ಬೆಲ್ಟ್​, ಕ್ಯಾಪ್​ ತೆಗೆಸಿ ಆರೋಪಿಗಳ ಜತೆ ಪೊಲೀಸರನ್ನು ಕುಳ್ಳರಿಸಿದ ಕೋರ್ಟ್​! ಏಕಿಂತ ಶಿಕ್ಷೆ ಅಂತೀರಾ?

 

                    ಅಹಮದಾಬಾದ್​: ಪೊಲೀಸರಿಗೆ ಅವರ ಸಮವಸ್ತ್ರದ ಭಾಗವಾಗಿರುವ ಬೆಲ್ಟ್​ ಮತ್ತು ಕ್ಯಾಪ್​ ಇದ್ದರೇನೇ ಗೌರವ. ಪೊಲೀಸ್​ ಎಂದು ಗುರುತಿಸಿಕೊಳ್ಳುವುದು ಇವುಗಳ ಮೂಲಕವಾಗಿಯೇ. ಆದರೆ ಕೋರ್ಟ್​ ಮಾತನ್ನು ಕೇಳದ ಪೊಲೀಸರಿಗೆ ಬೆಲ್ಟ್​, ಕ್ಯಾಪ್​ ತೆಗೆಸಿ ಆರೋಪಿಗಳ ಜತೆಯೇ ಕೋರ್ಟ್​ನಲ್ಲಿ ಕುಳಿತುಕೊಳ್ಳುವಂತೆ ಮಾಡಿದೆ ಗುಜರಾತ್​ನ ಮಿರ್ಜಾಪುರದ ಅಹಮದಾಬಾದ್ ಗ್ರಾಮಾಂತರ ಕೋರ್ಟ್​!

                ಸಾಮಾನ್ಯವಾಗಿ ಎಲ್ಲಾ ಕೋರ್ಟ್​ಗಳಲ್ಲಿ ಆರೋಪಿಗಳನ್ನು ಹಾಜರುಪಡಿಸಿದಾಗ ಅವರನ್ನು ಕೊನೆಯ ಸಾಲಿನಲ್ಲಿ ಕುಳ್ಳರಿಸಲಾಗುತ್ತದೆ. ಅದರಂತೆ ಕೋರ್ಟ್​ ಆ ಆರೋಪಿಗಳ ಜತೆಗೆ ಪೊಲೀಸರನ್ನು ಕೆಲವು ಗಂಟೆಗಳ ಕಾಲ ಕೋರ್ಟ್​ನಲ್ಲಿ ಕುಳ್ಳರಿಸಿದೆ.

                     ಆಗಿದ್ದೇನೆಂದರೆ, ಕೆಲವೊಂದು ಕ್ರಿಮಿನಲ್​ ಪ್ರಕರಣಗಳಲ್ಲಿ ಪೊಲೀಸರಿಗೆ ಕೋರ್ಟ್​ ಸಮನ್ಸ್​ ಜಾರಿ ಮಾಡುತ್ತದೆ. ಅದರಂತೆಯೇ ಈ ಕೋರ್ಟ್​ನಿಂದಲೂ ಕೆಲವು ಪೊಲೀಸರಿಗೆ ಸಮನ್ಸ್​ ಜಾರಿ ಮಾಡಲಾಗಿತ್ತು. ಅವರು ಕೋರ್ಟ್​ ಹೇಳಿದ ದಿನ ಹಾಜರು ಆಗಿ ಕೇಸ್​ ನಡೆಯುತ್ತಿರುವಾಗ ತಮ್ಮ ಉತ್ತರವನ್ನು ಹೇಳಬೇಕಿತ್ತು. ಆದರೆ ಕೆಲವು ಪ್ರಕರಣಗಳಲ್ಲಿ ಪೊಲೀಸರು ಗೈರಾಗುತ್ತಿದ್ದರು. ಪದೇ ಪದೇ ಕೋರ್ಟ್​ನಿಂದ ಸಮನ್ಸ್​ ಜಾರಿಯಾದರೂ ಅದನ್ನು ಪೊಲೀಸರು ನಿರ್ಲಕ್ಷಿಸಿದ್ದರು. ಈ ಕಾರಣದಿಂದ ವಿಚಾರಣೆ ಪ್ರತಿ ಬಾರಿಯೂ ಅನಿವಾರ್ಯವಾಗಿ ಮುಂದಕ್ಕೆ ಹಾಕಬೇಕಿತ್ತು. ಇದರಿಂದಾಗಿ ಪ್ರಕರಣಗಳನ್ನು ಇತ್ಯರ್ಥ ಪಡಿಸುವಲ್ಲಿ ವಿಳಂಬವಾಗುತ್ತಿತ್ತು.

                   ಇದನ್ನು ಕೋರ್ಟ್​ ಬಹಳ ಗಂಭೀರವಾಗಿ ತೆಗೆದುಕೊಂಡಿದೆ. ಕೋರ್ಟ್​ ಆದೇಶವನ್ನು ಪಾಲನೆ ಮಾಡುವುದನ್ನು ಬಿಟ್ಟು ಕೆಲವು ಪೊಲೀಸರು ದುರ್ವರ್ತನೆ ತೋರುತ್ತಿದ್ದಾರೆ ಎನ್ನುವ ಕಾರಣಕ್ಕೆ ಇಂಥದ್ದೊಂದು ಶಿಕ್ಷೆಯನ್ನು ನೀಡಿದೆ. ರೂಪಾಲಿ ಚೌಕಿಯ ಪೊಲೀಸ್ ಸಬ್ ಇನ್ಸ್‌ಪೆಕ್ಟರ್ ಜೆ ಡಿ ಪಟೇಲ್ ಅವರಿಗೆ ನ್ಯಾಯಾಲಯಕ್ಕೆ ಹಾಜರಾಗುವಂತೆ ಕೋರ್ಟ್​ ಸಮನ್ಸ್ ಜಾರಿ ಮಾಡಿತ್ತು. ಆದರೆ ಅವರು ಹಾಜರು ಆಗಿರಲಿಲ್ಲ. ಪದೇ ಪದೇ ಹೀಗೆ ಮಾಡಿದಾಗ ಕೋರ್ಟ್​ ಅವರ ವಿರುದ್ಧ ವಾರೆಂಟ್​ ಹೊರಡಿಸಿತ್ತು. ಎರಡು ದಿನಗಳ ನಂತರ ಅವರು ಕೋರ್ಟ್​ಗೆ ಹಾಜರಾದರು.

                     ಇದು ನ್ಯಾಯಾಧೀಶರಿಗೆ ಕೋಪ ತರಿಸಿತು. ಹಿಂದೆ ಕೂಡ ಕೆಲ ಪ್ರಕರಣಗಳಲ್ಲಿ ಇದೇ ರೀತಿ ಆಗಿರುವುದು ಅವರ ಗಮನಕ್ಕೆ ಬಂತು. ಆದ್ದರಿಂದ ಪೊಲೀಸ್​ ಇನ್ಸ್​ಪೆಕ್ಟರ್​ ಪಟೇಲ್​ ಸೇರಿದಂತೆ ನಾಲ್ವರು ಪೊಲೀಸರ ಕ್ಯಾಪ್​ ಮತ್ತು ಬೆಲ್ಟ್​ ತೆಗೆಸಿ ಆರೋಪಿಗಳ ಜತೆ ಕೊನೆಯ ಸಾಲಿನಲ್ಲಿ ಕುಳಿತುಕೊಳ್ಳುವಂತೆ ಶಿಕ್ಷೆ ನೀಡಿದರು.

                ಈ ಶಿಕ್ಷೆ ಇತರ ಪೊಲೀಸರಿಗೂ ಮಾದರಿಯಾಗಬೇಕಿದೆ ಎಂದು ಕೋರ್ಟ್​ ಹೇಳಿದೆ. ಈ ಘಟನೆ ಇದೀಗ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ಪರ- ವಿರೋಧಗಳ ಪ್ರತಿಕ್ರಿಯೆ ಬರುತ್ತಿವೆ