ಇರಾನ್‍ನಿಂದ `ಗಂಭೀರ' ಬೆದರಿಕೆ| ನೆತನ್ಯಾಹು ಪುತ್ರ ಅಮೆರಿಕದಿಂದ ತುರ್ತಾಗಿ ಇಸ್ರೇಲ್‍ಗೆ ವಾಪಸ್

ಟೆಲ್ ಅವೀವ್: ಇರಾನ್‍ನಿಂದ `ಗಂಭೀರ' ಬೆದರಿಕೆ ಕುರಿತು ಅಧಿಕಾರಿಗಳ ಸುಳಿವಿನ ನಂತರ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಪುತ್ರ ಯೈರ್ ನೆತನ್ಯಾಹು ಅವರನ್ನು ಅಮೆರಿಕದಿಂದ ತುರ್ತಾಗಿ ಇಸ್ರೇಲ್‍ಗೆ ಕರೆತರಲಾಗಿದೆ ಎಂದು ಇಸ್ರೇಲ್‍ನ ಭದ್ರತಾ ಸಂಸ್ಥೆ ಖಚಿತಪಡಿಸಿದೆ.

ಯೈರ್ ನೆತನ್ಯಾಹು ಅವರಿಗೆ ಹಾನಿ ಮಾಡುವ ಗಂಭೀರ ಬೆದರಿಕೆ ನಿಜಕ್ಕೂ ಇತ್ತು. ಪರಿಸ್ಥಿತಿ ಮೌಲ್ಯಮಾಪನದ ನಂತರ, ಅವರ ಭದ್ರತಾ ತಂಡದೊಂದಿಗೆ ಅವರನ್ನು ತುರ್ತಾಗಿ ಇಸ್ರೇಲ್‍ಗೆ ಕರೆತರಲು ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಭದ್ರತಾ ಸಂಸ್ಥೆಯ ಮೂಲಗಳನ್ನು ಉಲ್ಲೇಖಿಸಿ `ಜೆರುಸಲೇಮ್ ಪೋಸ್ಟ್' ವರದಿ ಮಾಡಿದೆ.

ಮಿಯಾಮಿ ಪ್ರದೇಶದಲ್ಲಿ ಇರಾನ್ ಏಜೆಂಟರು ಉಪಸ್ಥಿತರಿದ್ದಾರೆ ಮತ್ತು ಯೈರ್ ಅವರ ಚಲನವಲನಗಳನ್ನು ಗಮನಿಸುತ್ತಿದ್ದಾರೆ ಎಂದು ಗುಪ್ತಚರ ಸಂಸ್ಥೆ ಮಾಹಿತಿ ನೀಡಿತ್ತು ಎಂದು ಅಮೆರಿಕದ ಕಾನೂನು ಜಾರಿ ಮೂಲಗಳು ತಿಳಿಸಿವೆ. ತುರ್ತು ಸ್ಥಳಾಂತರಕ್ಕೆ ಸಹಾಯ ಮಾಡಲು ಭದ್ರತಾ ಸಿಬ್ಬಂದಿಯನ್ನು ಮಿಯಾಮಿಗೆ ಕಳುಹಿಸಲಾಯಿತು. ಇಸ್ರೇಲ್ ಅಧ್ಯಕ್ಷ ಐಸಾಕ್ ಹರ್ಜೋಗ್ ಅವರು ಅಮೆರಿಕಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಈ ಏಜೆಂಟ್‍ಗಳು ಅವರೊಂದಿಗೆ ಇದ್ದರು ಎಂದು `ದಿ ಟೈಮ್ಸ್ ಆಫ್ ಇಸ್ರೇಲ್' ವರದಿ ಮಾಡಿದೆ.