EU ಸೇರ್ಪಡೆ ಕುರಿತ ಮಾತುಕತೆಯನ್ನು ತಿರಸ್ಕರಿಸಿದ ಐಸ್‌ ಲ್ಯಾಂಡ್: ಮುಂದೇನು?

ಯುರೋಪಿಯನ್ ಒಕ್ಕೂಟಕ್ಕೆ ಸೇರ್ಪಡೆಯಾಗುವ ಮಾತುಕತೆಯನ್ನು ಮತ್ತೆ ಆರಂಭಿಸುವ ಪ್ರಸ್ತಾಪವನ್ನು ಐಸ್‌ ಲ್ಯಾಂಡ್ ನ ಮತದಾರರು ತಿರಸ್ಕರಿಸಿದ್ದಾರೆ. 27 ದೇಶಗಳ ಈ ಒಕ್ಕೂಟದ ಜೊತೆ ನಿಕಟ ಬಾಂಧವ್ಯ ಬೆಳೆಸಿಕೊಳ್ಳಲು ಬಯಸಿದ್ದ ಸರ್ಕಾರಕ್ಕೆ ಇದರಿಂದ ಹಿನ್ನಡೆಯಾಗಿದೆ.

ರಾಷ್ಟ್ರೀಯ ಪ್ರಸಾರ ಸಂಸ್ಥೆ 'ಖUಗಿ' ಪ್ರಕಾರ, ಬಹುತೇಕ ಎಲ್ಲಾ ಮತಗಳ ಎಣಿಕೆ ಮುಗಿದಿದ್ದು, ಶೇಕಡಾ 52.5ರಷ್ಟು ಮತಗಳೊಂದಿಗೆ 'ಇಲ್ಲ' ಎಂಬ ನಿಲುವು ಮುನ್ನಡೆಯಲ್ಲಿದೆ.

ಶೇಕಡಾ 47.5ರಷ್ಟು ಜನರು ಮಾತ್ರ ಪ್ರಸ್ತಾಪವನ್ನು ಬೆಂಬಲಿಸಿದ್ದಾರೆ. ಅಧಿಕೃತ ಫಲಿತಾಂಶಗಳು ಇನ್ನಷ್ಟೇ ಪ್ರಕಟವಾಗಬೇಕಿದೆ.

ಇದು ನೇರವಾಗಿ ಯುರೋಪಿಯನ್ ಯೂನಿಯನ್ ಸದಸ್ಯತ್ವದ ಮೇಲಿನ ಮತದಾನವಲ್ಲ. ಬದಲಾಗಿ, ಹತ್ತು ವರ್ಷಗಳ ಹಿಂದೆ ಸ್ಥಗಿತಗೊಂಡಿದ್ದ ಮಾತುಕತೆಯನ್ನು ಮತ್ತೆ ಆರಂಭಿಸಬೇಕೇ ಬೇಡವೇ ಎಂಬುದರ ಮೇಲಿನ ನಿರ್ಧಾರವಾಗಿದೆ.

ಆರ್ಕ್ಟಿಕ್ ಪ್ರದೇಶದಲ್ಲಿನ ಭದ್ರತಾ ಉದ್ವಿಗ್ನತೆ ಸೇರಿದಂತೆ ಬೆಳೆಯುತ್ತಿರುವ ಆರ್ಥಿಕ ಮತ್ತು ಭೌಗೋಳಿಕ ರಾಜಕೀಯ ಒತ್ತಡಗಳನ್ನು ಎದುರಿಸಲು ಈ ಮಾತುಕತೆಗಳನ್ನು ಪುನರಾರಂಭಿಸುವುದು ನೆರವಾಗುತ್ತದೆ ಎಂದು ಸರ್ಕಾರ ವಾದಿಸಿತ್ತು.

ಇದಕ್ಕೆ ವ್ಯತಿರಿಕ್ತವಾಗಿ, ಒಕ್ಕೂಟಕ್ಕೆ ಸೇರ್ಪಡೆಯಾಗುವುದನ್ನು ವಿರೋಧಿಸಿದವರು ಐಸ್‌ ಲ್ಯಾಂಡ್ ನ ಮೀನುಗಾರಿಕಾ ಜಲಪ್ರದೇಶದ ರಕ್ಷಣೆ ಮತ್ತು ದೇಶವು ಒಕ್ಕೂಟದ ಭಾಗವಾದರೆ ಎದುರಾಗಬಹುದಾದ ಸಾರ್ವಭೌಮತ್ವಕ್ಕೆ ಸಂಬಂಧಿಸಿದ ಸಾಮಾನ್ಯ ವಿಚಾರಗಳ ಮೇಲೆ ಹೆಚ್ಚಿನ ಗಮನ ಹರಿಸಿದ್ದರು.

►ಮತದಾನದ ಉದ್ದೇಶವೇನಿತ್ತು?

ಐಸ್‌ ಲ್ಯಾಂಡ್ ಯುರೋಪಿಯನ್ ಯೂನಿಯನ್ ಜೊತೆಗಿನ ಸೇರ್ಪಡೆ ಮಾತುಕತೆಯನ್ನು ಪುನರಾರಂಭಿಸಬೇಕೇ ಎಂಬ ಸರಳ ಪ್ರಶ್ನೆಯನ್ನು ಜನಮತಸಂಗ್ರಹದಲ್ಲಿ ಮತದಾರರ ಮುಂದಿಡಲಾಗಿತ್ತು.

ಇದು ಐಸ್‌ ಲ್ಯಾಂಡ್ ಯುರೋಪಿಯನ್ ಒಕ್ಕೂಟಕ್ಕೆ ಸೇರಬೇಕೇ ಅಥವಾ ಬೇಡವೇ ಎಂಬುದರ ನೇರ ಮತದಾನವಾಗಿರಲಿಲ್ಲ. 'ಹೌದು' ಎಂಬ ಫಲಿತಾಂಶ ಬಂದಿದ್ದರೆ, ಬ್ರಸೆಲ್ಸ್ ಜೊತೆ ಮಾತುಕತೆ ಆರಂಭಿಸಲು ಸರ್ಕಾರಕ್ಕೆ ಅವಕಾಶ ಸಿಗುತ್ತಿತ್ತು. ಸದಸ್ಯತ್ವದ ಬಗ್ಗೆ ಅಂತಿಮ ಒಪ್ಪಂದವಾದರೆ, ಅದನ್ನು ಮತ್ತೊಂದು ಜನಮತಸಂಗ್ರಹದ ಮೂಲಕ ನಿರ್ಧರಿಸಲಾಗುತ್ತಿತ್ತು.

2009ರ ಆರ್ಥಿಕ ಬಿಕ್ಕಟ್ಟಿನ ನಂತರ ಐಸ್‌ ಲ್ಯಾಂಡ್ ಯುರೋಪಿಯನ್ ಒಕ್ಕೂಟದ ಸದಸ್ಯತ್ವಕ್ಕೆ ಅರ್ಜಿ ಸಲ್ಲಿಸಿತ್ತು. 2013ರಲ್ಲಿ ಯುರೋಪಿಯನ್ ಒಕ್ಕೂಟ ವಿರೋಧಿ ಸರ್ಕಾರ ಅಧಿಕಾರಕ್ಕೆ ಬಂದ ನಂತರ ಈ ಮಾತುಕತೆಗಳನ್ನು ಸ್ಥಗಿತಗೊಳಿಸಲಾಯಿತು. ತಾಂತ್ರಿಕವಾಗಿ ಈ ಜನಮತಸಂಗ್ರಹದ ಫಲಿತಾಂಶ ಕಡ್ಡಾಯವಲ್ಲ. ಆದರೆ, ಸೋಷಿಯಲ್ ಡೆಮಾಕ್ರಟಿಕ್ ಪಕ್ಷದ ಪ್ರಧಾನಿ ಕ್ರಿಸ್ಟ್ರುನ್ ಫ್ರೋಸ್ಟಾಡೋಟಿರ್ ನೇತೃತ್ವದ ಸಮ್ಮಿಶ್ರ ಸರ್ಕಾರ ಜನರ ತೀರ್ಪನ್ನು ಗೌರವಿಸುವುದಾಗಿ ಭರವಸೆ ನೀಡಿದೆ.

►ಮತದಾನದ ಫಲಿತಾಂಶವೇನು?

RUV ವಾಹಿನಿಯ ವರದಿಯಂತೆ, ಶೇಕಡಾ 52.5ರಷ್ಟು ಮತಗಳೊಂದಿಗೆ 'ಇಲ್ಲ' ಎಂಬ ಬಣ ಗೆಲುವು ಸಾಧಿಸಿದೆ. ಶೇಕಡಾ 47.5ರಷ್ಟು ಮಂದಿ ಮಾತ್ರ 'ಹೌದು' ಎಂದು ಮತ ಚಲಾಯಿಸಿದ್ದಾರೆ. ಒಂದು ಕ್ಷೇತ್ರದ ಕೆಲವು ಮತಗಳ ಎಣಿಕೆ ಬಾಕಿ ಇದ್ದರೂ, ಅದರಿಂದ ಅಂತಿಮ ಫಲಿತಾಂಶ ಬದಲಾಗುವ ಸಾಧ್ಯತೆಯಿಲ್ಲ.

ಈ ಫಲಿತಾಂಶವು ಪ್ರಧಾನಿ ಫ್ರೋಸ್ಟಾಡೋಟಿರ್ ಸರ್ಕಾರಕ್ಕೆ ದೊಡ್ಡ ಹಿನ್ನಡೆಯಾಗಿದೆ. ಸರ್ಕಾರವು ಈ ಜನಮತಸಂಗ್ರಹವನ್ನು EU ಚರ್ಚೆಯ 'ಈಗ ಇಲ್ಲದಿದ್ದರೆ ಎಂದಿಗೂ ಇಲ್ಲ' ಎಂಬ ನಿರ್ಣಾಯಕ ಹಂತ ಎಂದು ಬಿಂಬಿಸಿತ್ತು.

EU ಸೇರ್ಪಡೆ ಕುರಿತ ಚರ್ಚೆಗಳೇನು?

EU ಸದಸ್ಯತ್ವವನ್ನು ವಿರೋಧಿಸಿದವರು ಮುಂದಿಟ್ಟ ಪ್ರಮುಖ ವಾದವೆಂದರೆ, ದೇಶದ ಆರ್ಥಿಕತೆಯ ಬೆನ್ನೆಲುಬಾಗಿರುವ ಮೀನುಗಾರಿಕೆ ಉದ್ಯಮಕ್ಕೆ ಎದುರಾಗಬಹುದಾದ ಅಪಾಯ.

'ಇಲ್ಲ' ಎಂಬ ಪರವಾಗಿ ಪ್ರಚಾರ ನಡೆಸಿದ್ದ ವಿರೋಧ ಪಕ್ಷದ ನಾಯಕಿ ಗುಡ್ರುನ್ ಹಾಫ್ಸ್ಟೈನ್ಸ್ಡೋಟಿರ್, ಐಸ್‌ ಲ್ಯಾಂಡ್ ನ ಆರ್ಥಿಕ ಸಮಸ್ಯೆಗಳನ್ನು ಬ್ರಸೆಲ್ಸ್ ಪರಿಹರಿಸುತ್ತದೆ ಎಂಬ ವಾದವನ್ನು ತಳ್ಳಿಹಾಕಿದರು.

"ಈ ಸಮಸ್ಯೆಗಳನ್ನು ನಮ್ಮ ಪರವಾಗಿ ಬ್ರಸೆಲ್ಸ್ ಬಗೆಹರಿಸುವುದಿಲ್ಲ. ಇವುಗಳನ್ನು ಐಸ್‌ ಲ್ಯಾಂಡ್ ನ ರಾಜಕಾರಣಿಗಳೇ ಪರಿಹರಿಸಿಕೊಳ್ಳಬೇಕು" ಎಂದು ಅವರು ಹೇಳಿದರು.

ಇನ್ನೊಂದೆಡೆ, ಯುರೋಪಿಯನ್ ಒಕ್ಕೂಟದ ಸದಸ್ಯತ್ವ ಪಡೆದರೆ ದೇಶದಲ್ಲಿರುವ ಹೆಚ್ಚಿನ ಹಣದುಬ್ಬರ ಮತ್ತು ಬಡ್ಡಿದರಗಳನ್ನು ಹತೋಟಿಗೆ ತರಬಹುದು ಎಂಬುದು ಬೆಂಬಲಿಗರ ವಾದವಾಗಿತ್ತು. ಯುರೋಪಿಯನ್ ಸೆಂಟ್ರಲ್ ಬ್ಯಾಂಕ್ ನ ಬಡ್ಡಿದರ ಶೇಕಡಾ 2.25ರಷ್ಟಿದ್ದರೆ, ಐಸ್‌ ಲ್ಯಾಂಡ್ ನ ಕೇಂದ್ರ ಬ್ಯಾಂಕ್ನ ಬಡ್ಡಿದರ ಶೇಕಡಾ 8ರಷ್ಟಿದೆ.

ಯುರೊ ಕರೆನ್ಸಿಯನ್ನು ಅಳವಡಿಸಿಕೊಳ್ಳುವುದರಿಂದ ಆರ್ಥಿಕ ಸ್ಥಿರತೆ ಸಿಗುತ್ತದೆ ಎಂದೂ ಕೆಲವರು ಭಾವಿಸಿದ್ದರು. ಈ ಎಲ್ಲ ಚರ್ಚೆಗಳ ನಡುವೆಯೂ, ಐಸ್‌ ಲ್ಯಾಂಡ್ ಈಗಾಗಲೇ ಯುರೋಪಿಯನ್ ಒಕ್ಕೂಟದ ಜೊತೆ ನಿಕಟ ಆರ್ಥಿಕ ಸಂಬಂಧಗಳನ್ನು ಹೊಂದಿದೆ.

ಐಸ್‌ ಲ್ಯಾಂಡ್ 'ಯುರೋಪಿಯನ್ ಎಕನಾಮಿಕ್ ಏರಿಯಾ' (EEA) ಮತ್ತು 'ಷೆಂಗೆನ್ ಮುಕ್ತ-ಸಂಚಾರ ವಲಯ'ದ ಭಾಗವಾಗಿದೆ. ಹೀಗಾಗಿ ಸದಸ್ಯತ್ವ ಇಲ್ಲದಿದ್ದರೂ, ಯುರೋಪಿಯನ್ ಒಕ್ಕೂಟದ ಮಾರುಕಟ್ಟೆಯ ಪ್ರಯೋಜನಗಳನ್ನು ಇದು ಪಡೆಯುತ್ತಿದೆ.

►ಜನಮತಸಂಗ್ರಹಕ್ಕೆ ಕಾರಣವೇನು?

ಆರ್ಕ್ಟಿಕ್ ಪ್ರದೇಶದ ಸುತ್ತಲಿನ ಭೌಗೋಳಿಕ ರಾಜಕೀಯ ಪರಿಸ್ಥಿತಿ ಬದಲಾಗುತ್ತಿರುವುದರಿಂದ ಯುರೋಪಿಯನ್ ಒಕ್ಕೂಟಕ್ಕೆ ಸೇರ್ಪಡೆಯಾಗುವ ಚರ್ಚೆ ಮಹತ್ವ ಪಡೆದುಕೊಂಡಿತು. ಐಸ್‌ ಲ್ಯಾಂಡ್ NATO ಸಂಸ್ಥೆಯ ಸದಸ್ಯ ದೇಶವಾಗಿದ್ದರೂ, ತನ್ನದೇ ಆದ ಸ್ವಂತ ಸೈನ್ಯವನ್ನು ಹೊಂದಿಲ್ಲ. ಹೀಗಾಗಿ ರಕ್ಷಣೆಗಾಗಿ ಮೈತ್ರಿಕೂಟದ ದೇಶಗಳನ್ನೇ ಹೆಚ್ಚಾಗಿ ನೆಚ್ಚಿಕೊಂಡಿದೆ.

2024ರಲ್ಲಿ ಅಧಿಕಾರಕ್ಕೆ ಬಂದ ದೇಶದ ಎಡಪಂಥೀಯ ಸಮ್ಮಿಶ್ರ ಸರ್ಕಾರವು ಮುಂದಿನ ವರ್ಷಕ್ಕೆ ಯೋಜಿಸಿದ್ದ ಜನಮತಸಂಗ್ರಹವನ್ನು ಬೇಗನೇ ನಡೆಸಲು ತೀರ್ಮಾನಿಸಿತು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಗ್ರೀನ್ಲ್ಯಾಂಡ್ ವಿಚಾರವಾಗಿ ಮಾತನಾಡುತ್ತಾ ಐಸ್‌ ಲ್ಯಾಂಡ್ ಹೆಸರನ್ನು ನಾಲ್ಕು ಬಾರಿ ತಪ್ಪಾಗಿ ಉಲ್ಲೇಖಿಸಿದ್ದು ಈ ತೀರ್ಮಾನಕ್ಕೆ ಪ್ರಮುಖ ಪ್ರಚೋದನೆಯಾಯಿತು.

ಯುರೋಪಿಯನ್ ಒಕ್ಕೂಟದ ಜೊತೆ ನಿಕಟ ಬಾಂಧವ್ಯ ಬೆಳೆಸಿಕೊಳ್ಳುವುದರಿಂದ ದೇಶಕ್ಕೆ ಹೆಚ್ಚಿನ ಭದ್ರತೆ ಸಿಗುತ್ತದೆ ಮತ್ತು ಪ್ರಾದೇಶಿಕ ಉದ್ವಿಗ್ನತೆಯ ನಡುವೆ ತನ್ನ ಸ್ಥಾನ ಬಲಗೊಳ್ಳುತ್ತದೆ ಎಂದು ಸರ್ಕಾರ ವಾದಿಸಿತ್ತು.

"ಜನಮತಸಂಗ್ರಹಕ್ಕಾಗಿ ನಾವು ವರ್ಷಗಳಿಂದ ಕಾಯುತ್ತಿದ್ದೆವು" ಎಂದು ಹೇಳಿದ ಫ್ರೋಸ್ಟಾಡೋಟಿರ್, ಫಲಿತಾಂಶ ಏನೇ ಬಂದರೂ ತಮ್ಮ ಸರ್ಕಾರ ತನ್ನ ಕಾರ್ಯವನ್ನು ಮುಂದುವರಿಸಲಿದೆ ಎಂದು ಸ್ಪಷ್ಟಪಡಿಸಿದರು.

►ಮುಂದೆ ಏನು?

2028ರವರೆಗೆ ಅಧಿಕಾರದಲ್ಲಿರುವ ಪ್ರಸ್ತುತ ಸರ್ಕಾರದ ಅವಧಿಯಲ್ಲಿ ಐಸ್‌ ಲ್ಯಾಂಡ್ ಮತ್ತೆ ಯುರೋಪಿಯನ್ ಒಕ್ಕೂಟದ ಸೇರ್ಪಡೆ ಮಾತುಕತೆಗಳನ್ನು ಆರಂಭಿಸುವ ಸಾಧ್ಯತೆ ಇಲ್ಲ.

ಜನರ 'ಇಲ್ಲ' ಎಂಬ ತೀರ್ಪನ್ನು ಗೌರವಿಸುವುದಾಗಿ ಸರ್ಕಾರ ಈಗಾಗಲೇ ತಿಳಿಸಿದೆ. ಅಲ್ಲದೆ, ಯುರೋಪಿಯನ್ ಒಕ್ಕೂಟದ ಸದಸ್ಯತ್ವಕ್ಕಾಗಿ ಸಲ್ಲಿಸಿರುವ ಅರ್ಜಿಯನ್ನು ಅಧಿಕೃತವಾಗಿ ಹಿಂಪಡೆಯಬೇಕೇ ಎಂಬ ಪ್ರಶ್ನೆಯನ್ನು ಸಂಸತ್ತಿನ ಮುಂದಿಡುವ ನಿರೀಕ್ಷೆಯಿದೆ.

ಸದ್ಯದ ಮಟ್ಟಿಗೆ, ಐಸ್‌ ಲ್ಯಾಂಡ್ ಯುರೋಪಿಯನ್ ಎಕನಾಮಿಕ್ ಏರಿಯಾ ಮತ್ತು ಷೆಂಗೆನ್ ವಲಯದ ಮೂಲಕ ಒಕ್ಕೂಟದ ಜೊತೆಗಿನ ಪ್ರಸ್ತುತ ಸಂಬಂಧವನ್ನು ಮುಂದುವರಿಸಲಿದ್ದು, ಯುರೋಪಿಯನ್ ಒಕ್ಕೂಟದಿಂದ ಹೊರಗೆ ಇರಲಿದೆ.