ಎ.ಸಿ ಓಕೆ, ಆದ್ರೂ ಜೋಕೆ! ಕೇಂದ್ರದಿಂದ ಮಾರ್ಗದರ್ಶಿ ಸೂತ್ರ ಬಿಡುಗಡೆ

   
      ಹೊಸದಿಲ್ಲಿ: ಗೃಹ ಬಳಕೆ, ಕಚೇರಿ ಅಥವಾ ವಾಣಿಜ್ಯ ಉದ್ದೇಶಕ್ಕೆ ಹವಾನಿಯಂತ್ರಿತ ವ್ಯವಸ್ಥೆ ಬಳಸುವುದಿದ್ದರೆ ಬಳಸಿ, ಆದರೆ, 24-40 ಡಿಗ್ರಿ ಸೆಲ್ಸಿಯಸ್ ಒಳಗೆ ಉಷ್ಣಾಂಶ ಹಾಗೂ ಶೇ. 40-70 ರಷ್ಟು ಆದ್ರ್ರತೆ ಹೊಂದಿರುವಂತೆ ನೋಡಿಕೊಳ್ಳಿ ಎಂದು ಕೇಂದ್ರ ಸರಕಾರ ಶುಕ್ರವಾರ ಹೇಳಿದೆ. ಜತೆಗೆ ಕೆಲವು ಮಾರ್ಗಸೂಚಿಗಳನ್ನು ಸಿದ್ಧಪಡಿಸಿ ಕಡ್ಡಾಯ ಪಾಲನೆಗೆ ಸೂಚನೆ ನೀಡಿದೆ.
     ಎಸಿ ಮೂಲಕ ಕೊರೊನಾ ಹರಡುತ್ತದೆ ಎಂಬ ಗುಮಾನಿ ಮೇಲೆ ಅದರ ಬಳಕೆ ಬಹುತೇಕ ನಿಂತು ಹೋಗಿದೆ. ಆದರೆ, ಸುಡು ಸುಡು ಬೇಸಿಗೆಯಲ್ಲಿ ಎಸಿ ಇಲ್ಲದ ಜೀವನ ತ್ರಾಸದಾಯಕ. ಲಾಕ್‍ಡೌನ್ ಅಂತ್ಯವಾದರೆ ವಾಣಿಜ್ಯ ಮಳಿಗೆಗಳು ತೆರೆಯಲಿದ್ದು, ಅಲ್ಲಿಯೂ ಎಸಿ ಅನಿವಾರ್ಯ. ಹೀಗಾಗಿ ಕೆಲವೊಂದು ಸೂಚನೆಗಳೊಂದಿಗೆ ಎಸಿ ಬಳಸಲು ಕೇಂದ್ರ ಸರಕಾರ ಒಪ್ಪಿದೆ. ಇಂಡಿಯನ್ ಸೊಸೈಟಿ ಆಫ್ ಹೀಟಿಂಗ್ ರೆಫ್ರಿಜರೇಟಿಂಗ್ ಗ್ರೌಂಡ್ ಏರ್ ಕಂಡೀಷನರ್ಸ್ ಎಂಜಿನಿಯರ್ಸ್ (ಐಎಸ್‍ಎಚ್‍ಆರ್‍ಎಇ) ಸಿದ್ಧಪಡಿಸಿರುವ ಸೂಚನೆಗಳನ್ನು ಕೇಂದ್ರ ಲೋಕೋಪಯೋಗಿ ಇಲಾಖೆ ಮೂಲಕ ಬಿಡುಗಡೆ ಮಾಡಲಾಗಿದೆ.
               ಏನೆಲ್ಲ ಸೂಚನೆಗಳು?

* ಮನೆ ಅಥವಾ ಕಚೇರಿಯಲ್ಲಿಎಸಿ ಬಳಸುವಾಗ ಕೊಠಡಿಯ ಉಷ್ಣಾಂಶ 24 ಡಿಗ್ರಿ ಸೆಲ್ಸಿಯಸ್‍ಗಿಂತ ಕಡಿಮೆಯಾಗದಂತೆ ನೋಡಿಕೊಳ್ಳಬೇಕು. ಗರಿಷ್ಠ ತಾಪಮಾನ 40 ಡಿಗ್ರಿ ಸೆ. ಇರಬಹುದು.

* ಎಸಿ ಚಾಲನೆಯಲ್ಲಿಇರುವ ವೇಳೆ ಎಗ್ಸಾಸ್ಟ್ ಫ್ಯಾನ್‍ಗಳು ತಿರುಗುತ್ತಿರಬೇಕು. ಈ ಮೂಲಕ ಗಾಳಿಯ ಮರುಪೂರಣ ವ್ಯವಸ್ಥೆ ಚೆನ್ನಾಗಿರುವಂತೆ ನೋಡಿಕೊಳ್ಳಬೇಕು.

* ಕೊಠಡಿಯೊಳಗಿನ ಗಾಳಿಯಲ್ಲಿ ಆದ್ರ್ರತೆ (ಹ್ಯುಮಿಡಿಟಿ) ಹೆಚ್ಚಿಸಲು ಪಾತ್ರೆಯೊಂದರಲ್ಲಿ ನೀರು ಇಡಬೇಕು ಹಾಗೂ ಅದು ಶೇ. 40ಕ್ಕಿಂತ ಕಡಿಮೆಯಾಗದಂತೆ ನೋಡಿಕೊಳ್ಳಬೇಕು.

* ಎಸಿ ಚಾಲನೆಯಲ್ಲಿ ಇರಲಿ ಅಥವಾ ಇಲ್ಲದೇ ಇರಲಿ, ಹೊರಗಿನ ಗಾಳಿ ಸಮರ್ಪಕವಾಗಿ ಒಳಗೆ ಪ್ರವೇಶಿಸಲು ಕಿಟಕಿ ವ್ಯವಸ್ಥೆ ಮಾಡಿಕೊಳ್ಳಬೇಕು.

* ಎಲೆಕ್ಟ್ರಿಕ್ ಫ್ಯಾನ್ ಅಥವಾ ಕೂಲರ್‍ಗಳನ್ನು ಬಳಸುವಾಗಲೂ ಕಿಟಕಿ ಬಾಗಿಲುಗಳು ಅರ್ಧದಷ್ಟು ತೆರೆದಿರಬೇಕು.

* ಕೈಗಾರಿಕೆಗಳಲ್ಲಿ ಎಸಿ ಬಳಸುವ ವೇಳೆ ಶೇ. 70 ರಿಂದ 80ರಷ್ಟು ಪ್ರಮಾಣದ ಗಾಳಿ ಹೊರಗಿನಿಂದ ಬರುವಂತೆ ನೋಡಿಕೊಳ್ಳಬೇಕು.

* ಲಾಕ್‍ಡೌನ್ ಹಿನ್ನೆಲೆಯಲ್ಲಿ ವಾಣಿಜ್ಯ ಮಳಿಗೆಗಳು ಬಂದ್ ಆಗಿವೆ. ಹೀಗಾಗಿ ಅಲ್ಲಿನ ಎಸಿ ಯಂತ್ರಗಳು ಸಾಕಷ್ಟು ಸಮಯದಿಂದ ಚಾಲನೆಯಾಗದೇ ಉಳಿದಿವೆ. ಎಸಿ ಡಕ್ಟ್ ಒಳಗೆ ಫಂಗಸ್, ಕಸಕಡ್ಡಿಗಳು, ಇಲಿಗಳು ಹಾಗೂ ಪಕ್ಷಿಗಳ ಹಿಕ್ಕೆ ತುಂಬಿರಬಹುದು. ಇವುಗಳನ್ನು ಶುಚಿಗೊಳಿಸಿ ಎಸಿ ಚಾಲನೆ ಮಾಡಬೇಕು.