ಮಹಾರಾಷ್ಟ್ರ: ಏಪ್ರಿಲ್ 16ಕ್ಕೆ ಅಮರಾವತಿ ವಿಮಾನ ನಿಲ್ದಾಣ ಲೋಕಾರ್ಪಣೆ

ಮುಂಬ್ಯೆ: ಮಹಾರಾಷ್ಟ್ರದ ವಿದರ್ಭ ಪ್ರಾಂತ್ಯದ ಪ್ರಮುಖ ನಗರವಾದ ಅಮರಾವತಿಯಲ್ಲಿ ನಿರ್ಮಾಣಗೊಂಡಿರುವ 'ಅಮರಾವತಿ ವಿಮಾನ ನಿಲ್ದಾಣ' ಇದೇ ಏಪ್ರಿಲ್ 16 ರಂದು ಲೋಕಾರ್ಪಣೆ ಆಗಲಿದೆ.

ಈ ಮೂಲಕ ವಿದರ್ಭ ಪ್ರಾಂತ್ಯದ ಜನರ ಬಹಳ ದಿನದ ಬೇಡಿಕೆ ಈಡೇರಿದಂತಾಗಿದೆ ಎಂದು ಇಂಡಿಯಾ ಟಿ.ವಿ ನ್ಯೂಸ್ ವರದಿ ಮಾಡಿದೆ.

ಏಪ್ರಿಲ್ 16 ರಂದು ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೆಂದ್ರ ಫಡಣವೀಸ್ ಅವರು ಅಮರಾವತಿ ವಿಮಾನ ನಿಲ್ದಾಣವನ್ನು ಉದ್ಘಾಟಿಸಲಿದ್ದಾರೆ ಎಂದು ತಿಳಿದು ಬಂದಿದೆ.

2014ರಲ್ಲೇ ಇಲ್ಲಿ ವಿಮಾನ ನಿಲ್ದಾಣ ನಿರ್ಮಾಣ ಮಾಡಬೇಕು ಎಂಬ ಕಾಮಗಾರಿ ಶುರು ಆಗಿತ್ತು. ಆದರೆ ಕಾರಣಾಂತರಗಳಿಂದ ಕಾಮಗಾರಿ ಕುಂಟುತ್ತಾ ಸಾಗಿತ್ತು.

ಮಾರ್ಚ್ 30 ರಂದು ಅಮರಾವತಿ ವಿಮಾನ ನಿಲ್ದಾಣದಲ್ಲಿ ಪ್ರಾಯೋಗಿಕ ವಿಮಾನ ಸಂಚಾರ ನಡೆದಿತ್ತು. ಏಪ್ರಿಲ್ 16 ರಿಂದ ಪ್ರಾರಂಭಿಕವಾಗಿ ಮುಂಬೈ- ಅಮರಾವತಿ ನಡುವೆ ವಿಮಾನಗಳು ಸಂಚರಿಸಲಿವೆ.