ಫ್ಲಾಟ್ ವಿತರಣೆ ವಿಳಂಬ: ಗ್ರಾಹಕರಿಗೆ ಬಾಡಿಗೆ ಮತ್ತು ಪರಿಹಾರ ಪಾವತಿಸಲು ಆದೇಶ

ಕೊಚ್ಚಿ: ಫ್ಲಾಟ್ ನಿರ್ಮಾಣ ಮತ್ತು ವಿತರಣೆಯಲ್ಲಿ ನಾಲ್ಕು ವರ್ಷಗಳ ವಿಳಂಬ ಮತ್ತು ಹೆಚ್ಚುವರಿ ಮೊತ್ತವನ್ನು ವಿಧಿಸಿದ ದೂರಿನ ಮೇರೆಗೆ ಎರ್ನಾಕುಳಂ ಜಿಲ್ಲಾ ಗ್ರಾಹಕ ವಿವಾದ ಪರಿಹಾರ ಆಯೋಗವು ರಿಯಲ್ ಎಸ್ಟೇಟ್ ಡೆವಲಪರ್‍ಗೆ ಪರಿಹಾರವನ್ನು ಪಾವತಿಸಲು ಆದೇಶಿಸಿದೆ.

ಕಕ್ಕನಾಡ್ ನಿವಾಸಿಗಳಾದ ಸೀನಾ ಸುಸಾನ್ ಕುರುವಿಳ ಮತ್ತು ಅವರ ಪುತ್ರ ಮಿಥುನ್ ಕುರುವಿಳ ಸಲ್ಲಿಸಿದ ದೂರಿನ ಮೇರೆಗೆ ಡಿ.ಬಿ. ಬಿನು ನೇತೃತ್ವದ ವಿ. ರಾಮಚಂದ್ರನ್ ಮತ್ತು ಟಿ.ಎನ್. ಶ್ರೀವಿದ್ಯಾ ಅವರನ್ನೊಳಗೊಂಡ ಪೀಠವು ಈ ಆದೇಶವನ್ನು ಹೊರಡಿಸಿದೆ. 

ದೂರುದಾರರು ಮೇ 2010 ರಲ್ಲಿ ರೂ. 3429880 ಗೆ ಕಕ್ಕನಾಡ್ ಅಪಾಟ್ರ್ಮೆಂಟ್ ಅನ್ನು ಬುಕ್ ಮಾಡಿದ್ದರು. ಜನವರಿ 19, 2013 ರೊಳಗೆ ಫ್ಲಾಟ್ ಅನ್ನು ತಲುಪಿಸಲಾಗುವುದು ಎಂದು ಒಪ್ಪಂದದಲ್ಲಿ ಹೇಳಲಾಗಿದೆ. ಆದಾಗ್ಯೂ, ಮೊತ್ತದ 95% ಪಾವತಿಸಿದರೂ, ಐದು ವರ್ಷಗಳ ವಿಳಂಬದ ನಂತರ ಸೆಪ್ಟೆಂಬರ್ 2017 ರಲ್ಲಿ ಫ್ಲಾಟ್ ಅನ್ನು ಹಸ್ತಾಂತರಿಸಲಾಯಿತು. ಈ ಮಧ್ಯೆ, ಒತ್ತಡದಿಂದಾಗಿ ದೂರುದಾರರು ರೂ. 10,22,063 ಹೆಚ್ಚುವರಿ ಮೊತ್ತವನ್ನು ಪಾವತಿಸಬೇಕಾಯಿತು. ಪ್ರದೇಶವನ್ನು ಹೆಚ್ಚಿಸುವ ನೆಪದಲ್ಲಿ ಹೆಚ್ಚುವರಿಯಾಗಿ 2,74,480 ರೂ.ಗಳನ್ನು ವಿಧಿಸಲಾಯಿತು. ಆದಾಗ್ಯೂ, ಹಸ್ತಾಂತರಿಸಲಾದ ಅಪಾಟ್ರ್ಮೆಂಟ್ ಕಳಪೆ ಗುಣಮಟ್ಟದ್ದಾಗಿತ್ತು. ಸಾಕಷ್ಟು ನೀರು ಸರಬರಾಜು ವ್ಯವಸ್ಥೆ ಅಥವಾ ಸರಿಯಾದ ವಿದ್ಯುತ್ ಕೆಲಸ ಇರಲಿಲ್ಲ. ಸುಪ್ರೀಂ ಕೋರ್ಟ್ ತೀರ್ಪುಗಳನ್ನು ಉಲ್ಲೇಖಿಸಿ, ಒಪ್ಪಂದದ ಪ್ರಕಾರ ಬಿಲ್ಡರ್ ಫ್ಲಾಟ್ ಅನ್ನು ಹಸ್ತಾಂತರಿಸಲು ವಿಫಲವಾದರೆ ಅದು ಸೇವೆಯಲ್ಲಿ ಗಂಭೀರ ಲೋಪವಾಗಿದೆ ಎಂದು ಆಯೋಗ ಗಮನಿಸಿದೆ.

ವಿಳಂಬದಿಂದಾಗಿ ದೂರುದಾರರಿಗೆ 5,76,000 ರೂ. ಬಾಡಿಗೆ ಮೊತ್ತವನ್ನು ಮರುಪಾವತಿಸಬೇಕು. ಇದಲ್ಲದೆ, ದೂರುದಾರರು ಅನುಭವಿಸಿದ ಮಾನಸಿಕ ಯಾತನೆ, ತೊಂದರೆಗಳು ಮತ್ತು ನ್ಯಾಯಾಲಯದ ವೆಚ್ಚಗಳಿಗೆ ಪರಿಹಾರವಾಗಿ 45 ದಿನಗಳಲ್ಲಿ 1,10,000 ರೂ.ಗಳನ್ನು ಪಾವತಿಸಬೇಕೆಂದು ಆಯೋಗ ಆದೇಶಿಸಿದೆ. ದೂರುದಾರರ ಪರವಾಗಿ ವಕೀಲ ಬಿನು ಮ್ಯಾಥ್ಯೂ ವಾದಿಸಿದರು.