ಡ್ರೋನ್‌ & AI ರೋಬೋಟ್‌ ಬಳಕೆ: ಗ್ರಾಹಕರ ಮನೆ ಬಾಗಿಲಿಗೆ ತಲುಪಲಿವೆ ಉತ್ಪನ್ನಗಳು!

ಗುರುಗ್ರಾಮ: ಡ್ರೋನ್‌ಗಳು ಮತ್ತು ಕೃತಕ ಬುದ್ಧಿಮತ್ತೆ (ಎಐ) ರೋಬೋಟ್‌ಗಳನ್ನು ಬಳಸಿಕೊಂಡು ಹರಿಯಾಣದ ಗುರುಗ್ರಾಮದಲ್ಲಿ ಗ್ರಾಹಕರಿಗೆ ಬೇಕಾದ ಉತ್ಪನ್ನಗಳನ್ನು ಅತಿವೇಗವಾಗಿ ಅವರ ಮನೆ ಬಾಗಿಲಿಗೆ ತಲುಪಿಸುತ್ತಿದ್ದೇವೆ ಎಂದು ದೆಹಲಿ ಮೂಲದ ಸ್ಕೈ ಏರ್‌ ಕಂಪನಿಯ ಸಂಸ್ಥಾಪಕ ಅಂಕಿತ್ ಕುಮಾರ್ ತಿಳಿಸಿದ್ದಾರೆ.

'ನಾವು 'ಡಿಜಿಟಲ್ ಸ್ಕೈ ಪ್ಲಾಟ್‌ಫಾರ್ಮ್' ವೇದಿಕೆಯನ್ನು ಸಮರ್ಪಕವಾಗಿ ಬಳಸಿಕೊಳ್ಳುವ ಮೂಲಕ ಎಐ ಮೂಲಸೌಕರ್ಯದೊಂದಿಗೆ ಸಂಪರ್ಕ ಸಾಧಿಸಿದ್ದೇವೆ. ಕಳೆದ ಎರಡೂವರೆ ವರ್ಷದಲ್ಲಿ ಡ್ರೋನ್‌ಗಳನ್ನು ಬಳಸಿಕೊಂಡು ಸುಮಾರು 3.6 ಮಿಲಿಯನ್ ಉತ್ಪನ್ನಗಳನ್ನು ಗ್ರಾಹಕರ ಮನೆ ಬಾಗಿಲಿಗೆ ತಲುಪಿಸಿದ್ದೇವೆ. ಸಾವಿರ ಟನ್‌ಗಳಿಗೂ ಹೆಚ್ಚು ಇಂಗಾಲವನ್ನು ದೊಡ್ಡ ಪ್ರಮಾಣದಲ್ಲಿ ಕಡಿತಗೊಳಿಸಬಹುದು' ಎಂದು ಅಂಕಿತ್ ಕುಮಾರ್ ಹೇಳಿದ್ದಾರೆ.

'ನಾವು 'ಎಐ ಇಂಪ್ಯಾಕ್ಟ್ ಶೃಂಗಸಭೆ'ಯಲ್ಲಿ ಘೋಷಿಸಿದಂತೆ NASDAQನಲ್ಲಿ ಪಟ್ಟಿ ಮಾಡಲಾದ ಅಮೇರಿಕ ಮೂಲದ ಕಂಪನಿಯಾದ Arrive AIನೊಂದಿಗೆ ಒಪ್ಪಂದ, ಸಹಯೋಗಕ್ಕೆ ಸಹಿ ಮಾಡಿದ್ದೇವೆ. ಸ್ಮಾರ್ಟ್ ಮೇಲ್‌ ಬಾಕ್ಸ್ ವ್ಯವಸ್ಥೆಯನ್ನು ವಸತಿ ಪಟ್ಟಣಗಳು ​​ಅಥವಾ ವಾಣಿಜ್ಯ ಸಂಕೀರ್ಣಗಳಲ್ಲಿ ಸ್ಥಾಪಿಸುತ್ತೇವೆ. ಈ ಮೂಲಕ ಗ್ರಾಹಕರಿಗೆ ಬೇಕಾದ ಉತ್ಪನ್ನಗಳನ್ನು ಡ್ರೋನ್‌ ಮೂಲಕ ಮನೆ ಬಾಗಿಲಿಗೆ ತಲುಪಿಸುತ್ತೇವೆ' ಎಂದಿದ್ದಾರೆ.

ನಾವು 'ಅಟಾನಮಿ' ಕಂಪನಿಯೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದೇವೆ. ಇದು ಸ್ವಾಯತ್ತ ರೋವರ್ ಅನ್ನು ಅಭಿವೃದ್ಧಿಪಡಿಸಿದ ಅಮೇರಿಕನ ಕಂಪನಿಯಾಗಿದೆ. ಇದು ಉತ್ಪನ್ನಗಳ ಸಾಗಾಣಿಕೆಗೆ ಸಂಬಂಧಿಸಿ ಆಗಮನದ ಸ್ಥಳದಿಂದ ಸ್ವಯಂಚಾಲಿತವಾಗಿ ಮಾಹಿತಿಯನ್ನು ಸಂಗ್ರಹಿಸುತ್ತದೆ ಮತ್ತು ಗ್ರಾಹಕರ ಮನೆ ಬಾಗಿಲಿಗೆ ತಲುಪಿಸುತ್ತದೆ ಎಂದು ಅವರು ವಿವರಿಸಿದ್ದಾರೆ.

ಗ್ರಾಹಕರು OTP ಅನ್ನು ನಮೂದಿಸಬಹುದು ಮತ್ತು ಸ್ವಯಂಚಾಲಿತವಾಗಿ ಉತ್ಪನ್ನಗಳನ್ನು ಸ್ವೀಕರಿಸಬಹುದು. ಮುಂದಿನ ದಿನಗಳಲ್ಲಿ ನಾವು ಈ ವ್ಯವಸ್ಥೆಯನ್ನು ಗುರುಗ್ರಾಮ ಪ್ರತಿಯೊಂದು ಸ್ಥಳಕ್ಕೂ, ಪ್ರತಿಯೊಂದು ಪ್ರದೇಶಕ್ಕೂ ಕೊಂಡೊಯ್ಯುತ್ತೇವೆ ಎಂದು ಅಂಕಿತ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

'ಪ್ರಧಾನಿ ಮೋದಿ ಹೇಳಿದಂತೆ, ಎಐ ಕ್ಷೇತ್ರದಲ್ಲಿ ಭಾರತವು ಗಮನಾರ್ಹ ಪ್ರಗತಿಯನ್ನು ಸಾಧಿಸಲು ಸಿದ್ಧವಾಗಿದೆ. ಗ್ರಾಹಕರ ಮನೆ ಬಾಗಿಲಿಗೆ ಉತ್ಪನ್ನಗಳನ್ನು ತಲುಪಿಸುವ ಪರಿಕಲ್ಪನೆಯನ್ನು ಆರಂಭಿಸುತ್ತಿರುವ ವಿಶ್ವದ ಮೊದಲ ದೇಶ ಭಾರತ. ಇದಕ್ಕೆ ಗುರುಗ್ರಾಮದಲ್ಲಿ ಅಡಿಪಾಯ ಹಾಕಿದ್ದೇವೆ. ನಂತರ ಭಾರತದ ವಿವಿಧ ನಗರಗಳು ಸೇರಿದಂತೆ ವಿದೇಶಕ್ಕೂ ಸೇವೆಯನ್ನು ವಿಸ್ತರಿಸುತ್ತೇವೆ' ಎಂದಿದ್ದಾರೆ.