ದಾಳಿ ನಡೆಸಲು ಇರಾನ್ ಬಳಿ ಇನ್ನೂ ಇವೆ ಕ್ಷಿಪಣಿಗಳು: ಇಸ್ರೇಲ್ ಗುಪ್ತಚರ ವರದಿ

ಜೆರುಸಲೆಮ್: ಪಶ್ಚಿಮ ಏಷ್ಯಾದಲ್ಲಿ ಯುದ್ಧ ನಿಲ್ಲುವಂತೆ ಕಾಣುತ್ತಿಲ್ಲ. ಇಸ್ರೇಲ್ (Israel) ಮೇಲೆ ದಾಳಿ (war) ನಡೆಸಲು ಇರಾನ್ (Iran) ಬಳಿ ಇನ್ನೂ 1,000ಕ್ಕೂ ಹೆಚ್ಚು ದೂರಗಾಮಿ ಕ್ಷಿಪಣಿಗಳು ಬಾಕಿ ಇವೆ ಎಂದು ಇಸ್ರೇಲ್ ಸೇನಾ ಮೂಲಗಳು ಬಹಿರಂಗಪಡಿಸಿವೆ.

ಇದರ ಜೊತೆಗೆ ಲೆಬನಾನ್ ಮೂಲದ ಹಿಜ್ಬುಲ್ಲಾ ಉಗ್ರ ಸಂಘಟನೆಯು ಸುಮಾರು 10,000ಕ್ಕೂ ಹೆಚ್ಚು ಅಲ್ಪ ವ್ಯಾಪ್ತಿಯ ರಾಕೆಟ್‌ಗಳನ್ನು ಹೊಂದಿದ್ದು, ಇದು ಯುದ್ಧ ದೀರ್ಘಕಾಲ ಮುಂದುವರಿಯುವ ಸೂಚನೆ ನೀಡಿದೆ.

ಇಸ್ರೇಲ್ ವಾಯುಪಡೆಯ ಹಿರಿಯ ಅಧಿಕಾರಿಯೊಬ್ಬರು, ಇರಾನ್‌ನ ಶಸ್ತ್ರಾಸ್ತ್ರಗಳ ಬಗೆಗಿನ ಅಂದಾಜು ಪಟ್ಟಿಯನ್ನು ಮೊದಲ ಬಾರಿಗೆ ಬಹಿರಂಗಪಡಿಸಿದ್ದಾರೆ. ಯುದ್ಧ ಆರಂಭವಾಗುವ ಮೊದಲು ಇರಾನ್ ಸುಮಾರು 2,000 ಮಧ್ಯಂತರ ಶ್ರೇಣಿಯ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಹೊಂದಿತ್ತು ಎನ್ನಲಾಗಿದೆ. ಇದರಲ್ಲಿ ಈಗಾಗಲೇ 500ಕ್ಕೂ ಹೆಚ್ಚು ಕ್ಷಿಪಣಿಗಳನ್ನು ಇಸ್ರೇಲ್ ಮೇಲೆ ಪ್ರಯೋಗಿಸಲಾಗಿದ್ದು, ಇನ್ನು ಕೆಲವು ನೆಲದ ಮೇಲೆಯೇ ನಾಶವಾಗಿವೆ. ಆದರೆ ಇರಾನ್ ತನ್ನ ಕ್ಷಿಪಣಿಗಳನ್ನು ಪರ್ವತ ಪ್ರದೇಶಗಳ ಸುರಂಗಗಳಲ್ಲಿ ಬಚ್ಚಿಟ್ಟಿರುವುದರಿಂದ ಅವುಗಳನ್ನು ಸಂಪೂರ್ಣವಾಗಿ ನಾಶಪಡಿಸುವುದು ಸವಾಲಾಗಿದೆ ಎಂದು ಹೇಳಿದ್ದಾಗಿ ಇಸ್ರೇಲ್ ಮಾಧ್ಯಮಗಳು ವರದಿ ಮಾಡಿವೆ.

ಹಿಜ್ಬುಲ್ಲಾ ನಿರಂತರ ದಾಳಿ:

ಇತ್ತ ಲೆಬನಾನ್ ಗಡಿಯಲ್ಲಿ ಹಿಜ್ಬುಲ್ಲಾ ಸಂಘಟನೆಯು ಪ್ರತಿದಿನ 200 ರಿಂದ 250 ರಾಕೆಟ್‌ಗಳನ್ನು ಇಸ್ರೇಲ್ ಮೇಲೆ ಉಡಾಯಿಸುತ್ತಿದೆ. ಇದರಿಂದಾಗಿ ಉತ್ತರ ಇಸ್ರೇಲ್‌ನ ಸಾವಿರಾರು ಜನರು ದಿನವಿಡೀ ಬಾಂಬ್ ಶೆಲ್ಟರ್‌ಗಳಲ್ಲಿ ಕಳೆಯುವಂತಾಗಿದೆ. ಹಿಜ್ಬುಲ್ಲಾ ಬಳಿ ಇರುವ ಶಸ್ತ್ರಾಸ್ತ್ರಗಳನ್ನು ಮಟ್ಟಹಾಕಲು ಇಸ್ರೇಲ್ ರಕ್ಷಣಾ ಪಡೆ (IDF) ಸತತ ಪ್ರಯತ್ನ ನಡೆಸುತ್ತಿದೆ.

ಯುದ್ಧದ ನಡುವೆಯೇ ಇಸ್ರೇಲ್‌ನಲ್ಲಿ ಜನಜೀವನವನ್ನು ಸಹಜ ಸ್ಥಿತಿಗೆ ತರಲು ಅಲ್ಲಿನ ಸರ್ಕಾರ ಪ್ರಯತ್ನಿಸುತ್ತಿದೆ. ಈ ವಾರದಿಂದ ಶಾಲೆಗಳನ್ನು ಹಂತ ಹಂತವಾಗಿ ಆರಂಭಿಸಲು ಶಿಕ್ಷಣ ಇಲಾಖೆ ನಿರ್ಧರಿಸಿದೆ. ವಿಮಾನ ನಿಲ್ದಾಣಗಳಲ್ಲಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಿಸಲಾಗಿದ್ದು, ಸುರಕ್ಷತಾ ನಿಯಮಗಳ ಅಡಿಯಲ್ಲಿ ಚಿತ್ರಮಂದಿರಗಳಿಗೂ ಅನುಮತಿ ನೀಡಲಾಗಿದೆ.

ಅಮೆರಿಕದ ಎಚ್ಚರಿಕೆ:

ಇದೇ ವೇಳೆ ಇರಾನ್‌ನ ಸತತ ದಾಳಿಗಳ ವಿರುದ್ಧ ಅಮೆರಿಕ ಸಹ ಕಠಿಣ ನಿಲುವು ತಳೆದಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್‌ನ ಮೂಲಸೌಕರ್ಯಗಳಾದ ಸೇತುವೆಗಳು ಮತ್ತು ವಿದ್ಯುತ್ ಸ್ಥಾವರಗಳ ಮೇಲೆ ದಾಳಿ ನಡೆಸುವ ಈಗಾಗಲೇ ಎಚ್ಚರಿಕೆ ನೀಡಿದ್ದಾರೆ. ಇರಾನ್ ತನ್ನ ದಾಳಿಯನ್ನು ಮುಂದುವರಿಸಿದರೆ ಅದರ ಆಡಳಿತ ವ್ಯವಸ್ಥೆಯನ್ನೇ ಕುಸಿಯುವಂತೆ ಮಾಡುವುದಾಗಿ ಇಸ್ರೇಲ್ ಕೂಡ ಗುಡುಗಿದೆ.
ಒಟ್ಟಾರೆಯಾಗಿ, ಎರಡೂ ದೇಶಗಳು ಶಸ್ತ್ರಾಸ್ತ್ರಗಳ ಸಂಗ್ರಹದ ಬಗ್ಗೆ ಅಧಿಕೃತವಾಗಿ ಮೌನ ವಹಿಸಿದ್ದರೂ, ಸದ್ಯದ ಪರಿಸ್ಥಿತಿಯನ್ನು ನೋಡಿದರೆ ಈ ಸಂಘರ್ಷವು ಮುಂದಿನ ಹಲವು ತಿಂಗಳುಗಳ ಕಾಲ ಮುಂದುವರಿಯುವ ಸಾಧ್ಯತೆ ದಟ್ಟವಾಗಿದೆ.