ಶಬರಿಮಲೆಯ ಆಯ್ತು, ರಾಜ್ಯದ ಇತರ ದೇವಾಲಯಗಳಲ್ಲೂ ಚಿನ್ನದ ಕಳ್ಳತನ; RTI ದಾಖಲೆಗಳಿಂದ ಬಹಿರಂಗ

ತಿರುವನಂತಪುರಂ: ಶಬರಿಮಲೆಯ ಚಿನ್ನದ ಕಳ್ಳತನದಂತೆಯೇ, ರಾಜ್ಯದ ಇತರ ಪ್ರಮುಖ ದೇವಾಲಯಗಳಲ್ಲಿಯೂ ಚಿನ್ನ ಕಳೆದುಹೋಗಿದೆ ಎಂದು ಆರ್‍ಟಿಐ ದಾಖಲೆ ತಿಳಿಸಿದೆ.

ತಿರುವನಂತಪುರಂ ಶ್ರೀ ವರಾಹಮ್ ದೇವಸ್ಥಾನ, ಕೊಚ್ಚಿ ದೇವಸ್ವಂ ಮಂಡಳಿಯ ಅಡಿಯಲ್ಲಿರುವ ಪುಲ್ಲು ದೇವಿ ದೇವಸ್ಥಾನ ಮತ್ತು ತ್ರಿಪುಣಿತುರದಲ್ಲಿರುವ ಪೂರ್ಣತ್ರಯೀಶ ದೇವಸ್ಥಾನದಿಂದ ಚಿನ್ನ ಕಾಣೆಯಾಗಿದೆ. 

ಕೊಚ್ಚಿ ದೇವಸ್ವಂ ಮಂಡಳಿಯ ತ್ರಿಶೂರ್ ಗುಂಪಿನ ಅಡಿಯಲ್ಲಿರುವ ಪುಲ್ಲು ದೇವಿ ದೇವಸ್ಥಾನದಿಂದ 40 ಗ್ರಾಂ 500 ಮಿಲಿಗ್ರಾಂ ತೂಕದ ಏಳು ಚಿನ್ನದ ಹಾರಗಳು ಕಳೆದುಹೋಗಿವೆ. ತ್ರಿಪುಣಿತುರ ಪೂರ್ಣತ್ರಯೀಶ ದೇವಸ್ಥಾನದಿಂದ 663 ಮಿಲಿಗ್ರಾಂ ತೂಕದ ಚಿನ್ನದ ಕಿರೀಟ ಮತ್ತು ಶ್ರೀ ವರಾಹಮ್ ದೇವಸ್ಥಾನದಿಂದ ಪಾರಂಪರಿಕ ವಸ್ತುಗಳಾದ 7.750 ಗ್ರಾಂ ತೂಕದ ಎರಡು ಮಾಲೆಗಳು ಸಹ ಕಳೆದುಹೋಗಿವೆ. ಹೆಚ್ಚಿನ ದೇವಸ್ವಂ ದೇವಾಲಯಗಳು ತಿರುವಾಭರಣಂ ಸಂಖ್ಯೆಯನ್ನು ದಾಖಲಿಸುವ ತಿರುವಾಭರಣಂ ನೋಂದಣಿಯನ್ನು ಹೊಂದಿಲ್ಲ ಎಂದು ಉತ್ತರವು ಹೇಳುತ್ತದೆ.

ಕೊಚ್ಚಿ ದೇವಸ್ವಂ ತ್ರಿಶೂರ್ ಗ್ರೂಪ್ ಸಾರ್ವಜನಿಕ ಮಾಹಿತಿ ಅಧಿಕಾರಿ ಕೊಚ್ಚಿ ನಿವಾಸಿ ಕೆ. ಗೋವಿಂದನ್ ನಂಬೂದರಿಗೆ ಒದಗಿಸಿದ ಆರ್‍ಟಿಐ ದಾಖಲೆಯಲ್ಲಿ ಚಿನ್ನ ನಷ್ಟದ ಬಗ್ಗೆ ಮಾಹಿತಿ ಇದೆ.

ಶಬರಿಮಲೆ ಅಭಿವೃದ್ಧಿಗಾಗಿ ಸ್ವದೇಶ್ ದರ್ಶನ ಯೋಜನೆಗಾಗಿ ಕೇಂದ್ರ ಸರ್ಕಾರ ಹಂಚಿಕೆ ಮಾಡಿದ 46.53 ಕೋಟಿ ರೂಪಾಯಿಗಳಲ್ಲಿ ಕೇವಲ 36.27 ಕೋಟಿ ರೂಪಾಯಿಗಳನ್ನು ಮಾತ್ರ ಖರ್ಚು ಮಾಡಲಾಗಿದೆ ಎಂದು ಗೋವಿಂದನ್ ನಂಬೂದಿರಿ ಆರ್‍ಟಿಐ ದಾಖಲೆಗಳನ್ನು ಉಲ್ಲೇಖಿಸಿ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.