ಸೈಬರ್ ಭದ್ರತಾ ಪರಿಣತರ ಕೊರತೆ ಎದುರಿಸುತ್ತಿರುವ ಭಾರತ; ಡಾಟಾ ಸೆಕ್ಯುರಿಟಿ ಕೌನ್ಸಿಲ್ ವರದಿ ಹೇಳುವುದೇನು?

ನವದೆಹಲಿ: ಭಾರತೀಯ ಡಾಟಾ ಸೆಕ್ಯುರಿಟಿ ಕೌನ್ಸಿಲ್ (DSCI) ಮತ್ತು SANS ಇನ್ಸ್ಟಿಟ್ಯೂಟ್ ಸಲ್ಲಿಸಿರುವ ಹೊಸ ವರದಿಯ ಪ್ರಕಾರ ಭಾರತ ಕೌಶಲ್ಯಪೂರ್ಣ ಸೈಬರ್ ಭದ್ರತಾ ವೃತ್ತಿಪರರ ತೀವ್ರ ಕೊರತೆಯನ್ನು ಎದುರಿಸುತ್ತಿದೆ.

ವಿಶೇಷವಾಗಿ ಕಂಪನಿಗಳು ಕ್ಲೌಡ್ ವೇದಿಕೆಗಳು ಮತ್ತು ಕೃತಕ ಬುದ್ಧಿಮತ್ತೆಯ ಮೇಲಿನ ಅವಲಂಬನೆಯನ್ನು ಹೆಚ್ಚಿಸುತ್ತಿರುವ ಸಂದರ್ಭದಲ್ಲಿ ಸೈಬರ್ ಭದ್ರತೆಯು ಜಾಗತಿಕ ಡಿಜಿಟಲ್ ಪರಿಸರ ವ್ಯವಸ್ಥೆಯಲ್ಲಿ ನಿರ್ಣಾಯಕ ಕ್ಷೇತ್ರಗಳಲ್ಲಿ ಒಂದಾಗಿ ವೇಗವಾಗಿ ಬೆಳೆಯುತ್ತಿದೆ.

ಸೈಬರ್ ಭದ್ರತೆಗೆ ಹೆಚ್ಚಾಗುತ್ತಿರುವ ಪ್ರಾಮುಖ್ಯತೆಯು ಕೌಶಲ್ಯಪೂರ್ಣ ವೃತ್ತಿಪರರ ಅಗತ್ಯವನ್ನು ಸೂಚಿಸುತ್ತದೆ. ಈ ನಿಟ್ಟಿನಲ್ಲಿ ಭಾರತ ಬಹಳ ಹಿಂದೆ ಬೀಳುವ ಸಾಧ್ಯತೆಯಿದೆ ಎಂದು indianexpress.com ವರದಿ ಮಾಡಿದೆ.

ಭಾರತೀಯ ಡಾಟಾ ಸೆಕ್ಯುರಿಟಿ ಕೌನ್ಸಿಲ್ (DSCI) ಮತ್ತು SANS ಇನ್ಸ್ಟಿಟ್ಯೂಟ್ ಸಲ್ಲಿಸಿರುವ ಹೊಸ ವರದಿಯ ಪ್ರಕಾರ ಭಾರತ ಕೌಶಲ್ಯಪೂರ್ಣ ಸೈಬರ್ ಭದ್ರತಾ ವೃತ್ತಿಪರರ ತೀವ್ರ ಕೊರತೆಯನ್ನು ಎದುರಿಸುತ್ತಿದೆ. ಶೇ 73ರಷ್ಟು ಉದ್ಯಮಗಳು ಮತ್ತು ಶೇ 68ರಷ್ಟು ಸೇವೆ ಒದಗಿಸುವವರು ಅರ್ಹ ಪ್ರತಿಭೆಗಳ ಲಭ್ಯತೆಯ ಕೊರತೆಯನ್ನು ವರದಿ ಮಾಡಿದ್ದಾರೆ.

ಇತ್ತೀಚೆಗೆ ಬಿಡುಗಡೆ ಮಾಡಿರುವ ಭಾರತೀಯ ಸೈಬರ್ ಭದ್ರತಾ ಕೌಶಲ್ಯ ಲ್ಯಾಂಡ್ಸ್ಕೇಪ್ ವರದಿ 2025-26 ವೇಗವಾಗಿ ಬೆಳೆಯುತ್ತಿರುವ ಡಿಜಿಟಲ್ ಪರಿವರ್ತನೆ ಮತ್ತು ಕಾರ್ಯಪಡೆಯ ಸಿದ್ಧತೆಯ ನಡುವೆ ಅಂತರ ಹೆಚ್ಚಾಗುತ್ತಿರುವುದನ್ನು ಒತ್ತಿ ಹೇಳಿದೆ. ಸೈಬರ್ ಭದ್ರತಾ ಕ್ಷೇತ್ರದಲ್ಲಿ ಅಗತ್ಯವಿರುವ ಉದ್ಯೋಗಿಗಳನ್ನು ತುಂಬಲು ಶೇ 84ರಷ್ಟು ಕಂಪನಿಗಳು ಒಂದರಿಂದ ಆರು ತಿಂಗಳವರೆಗೆ ಕಾಯುತ್ತಿವೆ. ಹೀಗಾಗಿ ಎಲ್ಲಾ ಕ್ಷೇತ್ರಗಳಲ್ಲೂ ಸೈಬರ್ ಭದ್ರತಾ ಸಿಬ್ಬಂದಿ ನೇಮಕಾತಿ ಅತಿದೊಡ್ಡ ಸವಾಲಾಗಿರುವುದು ತಿಳಿದು ಬರುತ್ತದೆ.

ಮತ್ತೊಂದು ಪ್ರಮುಖ ಕಳವಳವೆಂದರೆ ಉದ್ಯಮದ ಅಗತ್ಯಗಳು ಮತ್ತು ಅಭ್ಯರ್ಥಿಯ ಸಾಮರ್ಥ್ಯದ ನಡುವೆ ಹೊಂದಾಣಿಕೆಯಿಲ್ಲ. ವರದಿಯ ಪ್ರಕಾರ ಶೇ 63ರಷ್ಟು ಉದ್ಯಮಗಳು ಮತ್ತು ಶೇ 59ರಷ್ಟು ಸೇವೆ ಒದಗಿಸುವವರು ಅರ್ಜಿ ಸಲ್ಲಿಸುವವರಿಗೆ ಪ್ರಾಯೋಗಿಕ ಕೌಶಲ್ಯಗಳ ಕೊರತೆ ಇದೆ. ಹೆಚ್ಚುವರಿಯಾಗಿ ಸುಮಾರು ಶೇ 58ರಷ್ಟು ಉದ್ಯಮಗಳು ಮತ್ತು ಶೇ 60ರಷ್ಟು ಸೇವೆ ಒದಗಿಸುವವರು ಮುಖ್ಯವಾಗಿ ಕ್ಲೌಡ್, ಅಪ್ಲಿಕೇಶನ್ಸ್ ಮತ್ತು ಐಡೆಂಟಿಟಿ ಸಿಸ್ಟಂಗಳಲ್ಲಿ ಕ್ರಾಸ್-ಡೊಮೈನ್ ಪರಿಣತಿ ಹೊಂದಿರುವ ವೃತ್ತಿಪರರ ಕೊರತೆ ಎದುರಿಸುತ್ತಿವೆ.

ಕ್ಲೌಡ್-ಸ್ಥಳೀಯ ವೇದಿಕೆಗಳು, API-ಚಾಲಿತ ವ್ಯವಸ್ಥೆಗಳು ಮತ್ತು AI-ಸಕ್ರಿಯಗೊಂಡ ಆಪರೇಶನ್ ಗಳ ಕಡೆಗೆ ಸಂಸ್ಥೆಗಳು ಗಮನ ನೀಡಿರುವುದೇ ಈ ಕೊರತೆಗೆ ಮುಖ್ಯ ಕಾರಣ ಎಂದು ವರದಿ ಹೇಳಿದೆ. ಯಾಂತ್ರೀಕರಣಗೊಂಡ ಮತ್ತು ಸುಧಾರಿತ ಟೂಲ್ಗಳು ಹೊಸ ಪ್ರತಿಭೆಗಳನ್ನು ಬಯಸುತ್ತಿಲ್ಲ, ಬದಲಾಗಿ ವಿಶೇಷತಜ್ಞರು ಮತ್ತು ನಿರ್ಧಾರ ಕೈಗೊಳ್ಳಬೇಕಾದ ನುರಿತರನ್ನು ನಿರೀಕ್ಷಿಸುತ್ತಿವೆ.

ಮುಂದುವರಿದು AI ವ್ಯವಸ್ಥೆಯಿಂದಾಗಿ ನುರಿತ ಸೈಬರ್ ಭದ್ರತಾ ತಂತ್ರಜ್ಞರ ಬೇಡಿಕೆ ಹೆಚ್ಚಾಗುತ್ತಿದೆ. ಶೇ 83ರಷ್ಟು ಸಂಸ್ಥೆಗಳು AI ಮತ್ತು ಜನರೇಟಿವ್ AI ಭದ್ರತಾ ಕೌಶಲ್ಯಗಳನ್ನು ನಿರ್ಣಾಯಕವೆಂದು ಗುರುತಿಸುತ್ತವೆ. ಆದರೆ ಶೇ 78ರಷ್ಟು ವರದಿಗಳು AI ಭದ್ರತಾ ಎಂಜಿನಿಯರ್ಗಳ ಬೇಡಿಕೆಯನ್ನು ವರದಿ ಮಾಡಿವೆ. ಅದೇ ಸಮಯದಲ್ಲಿ ಶೇ 62ರಷ್ಟು ಉದ್ಯಮಗಳು ಈಗಾಗಲೇ AI ಮತ್ತು ಜನರೇಟಿವ್ AI ಯೋಜನೆಗಳಲ್ಲಿ ಕೆಲಸ ಮಾಡುತ್ತಿವೆ. ತಮ್ಮ ವ್ಯಾಪ್ತಿಯನ್ನು ವಿಸ್ತರಿಸಿಕೊಂಡು ಅತ್ಯಾಧುನಿಕ ಭದ್ರತಾ ಪ್ರಾವೀಣ್ಯತೆ ಸಾಧಿಸಲು ಪ್ರಯತ್ನಿಸುತ್ತಿವೆ.

ನಿರ್ದಿಷ್ಟ ಉದ್ಯೋಗಗಳನ್ನು ತುಂಬುವುದು ಬಹಳ ಕಷ್ಟವಾಗಿದೆ. ಅರ್ಧದಷ್ಟು ಸೇವೆ ಒದಗಿಸುವವರು ಮತ್ತು ಶೇ 40ರಷ್ಟು ಉದ್ಯಮಗಳು ಭದ್ರತಾ ತಂತ್ರಜ್ಞರ ನೇಮಕಾತಿಯಲ್ಲಿ ಸವಾಲು ಎದುರಿಸುತ್ತಿರುವುದಾಗಿ ವರದಿ ಮಾಡಿವೆ. ಅತ್ಯಾಧುನಿಕ ಬೆದರಿಕೆ ಬುದ್ಧಿಮತ್ತೆಯಲ್ಲಿ ಕೌಶಲ್ಯ ಹೊಂದಿದ OT/ICS (ಆಪರೇಶನಲ್ ಟೆಕ್ನಾಲಜಿ ಮತ್ತು ಕೈಗಾರಿಕಾ ನಿಯಂತ್ರಣ ವ್ಯವಸ್ಥೆಗಳು) ಭದ್ರತಾ ವಿಶೇಷಜ್ಞರು ಮತ್ತು ವೃತ್ತಿಪರರಿಗೆ ಬೇಡಿಕೆ ಹೆಚ್ಚಾಗಿದೆ. ಈ ವಲಯದಲ್ಲಿ ಉದ್ಯಮಗಳ ಬೇಡಿಕೆಗೆ ತಕ್ಕ ಪೂರೈಕೆಯಾಗುತ್ತಿಲ್ಲ.

ಇದೇ ಸಂದರ್ಭದಲ್ಲಿ, ಪ್ರತಿಭೆಗಳನ್ನು ಉಳಿಸಿಕೊಳ್ಳುವ ಒತ್ತಡ ಸವಾಲನ್ನು ಹೆಚ್ಚಿಸುತ್ತಿವೆ. ಸುಮಾರು ಶೇ 70ರಷ್ಟು ಸೇವೆ ಒದಗಿಸುವವರು ಮತ್ತು ಶೇ 42ರಷ್ಟು ಉದ್ಯಮಗಳು ಹೆಚ್ಚು ವೇತನ ಮುಂದಿಡುವ ಸ್ಪರ್ಧಿಗಳಿಗೆ ತಮ್ಮ ಪ್ರತಿಭೆಗಳನ್ನು ಕಳೆದುಕೊಳ್ಳುತ್ತಿರುವ ಆತಂಕ ವ್ಯಕ್ತಪಡಿಸಿದ್ದಾರೆ ಎಂದು ವರದಿ ಹೇಳಿದೆ.

ವರದಿಯಲ್ಲಿ ಕಂಡುಕೊಂಡಿರುವ ಪ್ರಕಾರ ತರಬೇತಿ ಮತ್ತು ಉದ್ಯಮ ಅಗತ್ಯಗಳ ನಡುವೆ ಹೆಚ್ಚು ಉತ್ತಮ ಹೊಂದಾಣಿಕೆ ಇರಬೇಕಿದೆ. ಡಿಜಿಟಲ್ ಆಪರೇಶನ್ಗಳ ಸುರಕ್ಷೆಗಾಗಿ, ಡಾಟಾ ಸಮಗ್ರತೆಯ ಖಾತರಿಗೆ ಮತ್ತು ತಂತ್ರಜ್ಞಾನ ಚಾಲಿತ ಜಗತ್ತಿನಲ್ಲಿ ವಿಶ್ವಾಸ ಉಳಿಸಿಕೊಳ್ಳಲು ಕೌಶಲ್ಯಪೂರ್ಣ ಸೈಬರ್ ಭದ್ರತಾ ವೃತ್ತಿಪರರು ಅತಿ ಅಗತ್ಯ.