ನದಿಗೆ ಸಂಸ್ಕರಿಸದ ತ್ಯಾಜ್ಯ: ಯಮುನಾ ದಡದಲ್ಲಿ ಹನುಮ ವೇಷ ಧರಿಸಿ ಕಾರ್ಯಕರ್ತ ಉಪವಾಸ ಸತ್ಯಾಗ್ರಹ

ನವದೆಹಲಿ: ಮಥುರಾ-ವೃಂದಾವನದ ಯಮುನಾ ನದಿಯಲ್ಲಿ ಮಾಲಿನ್ಯದ ಬಗ್ಗೆ ಗಮನ ಸೆಳೆಯಲು ಕಾರ್ಯಕರ್ತ ದೀಪಕ್ ಶರ್ಮಾ ಭಾನುವಾರ ನದಿ ದಂಡೆಯಲ್ಲಿ ಏಳು ದಿನಗಳ ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದಾರೆ. 

ಸರ್ಕಾರ, ಆಡಳಿತ ಮತ್ತು ನಾಗರಿಕ ಅಧಿಕಾರಿಗಳು ಯಮುನಾ ನದಿಗೆ ಸಂಸ್ಕರಿಸದ ಕೊಳಚೆ ನೀರನ್ನು ಬಿಡುವುದನ್ನು ತಡೆಯಲು ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದರು.

ಶರ್ಮಾ ಈ ಹಿಂದೆ ನಗರಸಭೆ ಕಚೇರಿಯಲ್ಲಿ ಜಿರಳೆ ವೇಷ ಧರಿಸಿ ಪ್ರತಿಭಟಿಸಿದರು. ಈ ಬಾರಿ ಅವರು ಹನುಮನ ವೇಷ ಧರಿಸಿದ್ದಾರೆ. ವೃಂದಾವನದ ಯಮುನಾ ನದಿಯ ದಡದಲ್ಲಿರುವ ವಿಹಾರ್ ಘಾಟ್‌ನಲ್ಲಿ ಭಾನುವಾರ, ಶರ್ಮಾ ತಮ್ಮ ವಾರದ ಉಪವಾಸ ಮತ್ತು ನದಿಯಲ್ಲಿ ಹೆಚ್ಚುತ್ತಿರುವ ಮಾಲಿನ್ಯ ಮತ್ತು ಚರಂಡಿಗಳ ಮೂಲಕ ಕೊಳಚೆ ನೀರನ್ನು ಬಿಡುವುದರ ವಿರುದ್ಧ "ಶಾಂತಿಯುತ, ಸಾಂಕೇತಿಕ ಪ್ರತಿಭಟನೆ"ಯನ್ನು ಪ್ರಾರಂಭಿಸಿದರು.

ಸುದ್ದಿಗಾರರೊಂದಿಗೆ ಮಾತನಾಡಿದ ಶರ್ಮಾ, ಪ್ರಧಾನಿ ನರೇಂದ್ರ ಮೋದಿಯವರಿಗೆ ಮನವಿ ಮಾಡಿ, "ನೀವು (ನರೇಂದ್ರ ಮೋದಿ) ನಿಮ್ಮ ಜನ್ಮಸ್ಥಳ (ವಡ್ನಗರ)ದಲ್ಲಿ 3,000 ವರ್ಷಗಳಿಂದ ಅಸ್ತಿತ್ವದಲ್ಲಿರುವ ದಕ್ಷ ನೀರು ನಿರ್ವಹಣಾ ವ್ಯವಸ್ಥೆಗಳನ್ನು ಗಮನಿಸಬೇಕು. "ಯಮುನಾವನ್ನು ಮಾಲಿನ್ಯ ಮುಕ್ತಗೊಳಿಸಲು ಇದೇ ರೀತಿಯ ವ್ಯವಸ್ಥೆಯನ್ನು ಜಾರಿಗೆ ತರಬೇಕು." ಎಂದು ಆಗ್ರಹಿಸಿದ್ದಾರೆ.

ದೇಶೀಯವಾಗಿ ಮತ್ತು ಅಂತರರಾಷ್ಟ್ರೀಯವಾಗಿ ಗಮನ ಸೆಳೆದಿದ್ದರೂ, ಮಥುರಾ-ವೃಂದಾವನದ ಚರಂಡಿಗಳು ಸಂಸ್ಕರಿಸದ ತ್ಯಾಜ್ಯವನ್ನು ನೇರವಾಗಿ ಯಮುನಾಗೆ ಬಿಡುತ್ತಲೇ ಇವೆ ಎಂದು ಅವರು ಹೇಳಿದ್ದಾರೆ.