ಸಾಗರೋತ್ತರ ಪೌರತ್ವ ಹೊಂದಿರುವವರಿಗೆ ಕೇಂದ್ರದ ಹೊಸ ಸೌಲಭ್ಯ: ಇ-ಒಸಿಐಗೆ ಚಾಲನೆ

 ನವದೆಹಲಿ: ವಿದೇಶಗಳಲ್ಲಿ ನೆಲೆಸಿರುವ ಭಾರತ ಮೂಲದವರಿಗೆ ಕೇಂದ್ರ ಸರ್ಕಾರ ಇ-ಒಸಿಐ (e-ಔಅI) ಕಾರ್ಡ್‌ ವ್ಯವಸ್ಥೆ ಆರಂಭಿಸಿದೆ. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮಂಗಳವಾರ ಇದಕ್ಕೆ ಚಾಲನೆ ನೀಡಿದರು. 

ಈ ಹೊಸ ವ್ಯವಸ್ಥೆಯಿಂದ ಒಸಿಐ ಕಾರ್ಡ್ ಪಡೆಯುವ ಪ್ರಕ್ರಿಯೆ ಸಂಪೂರ್ಣ ಡಿಜಿಟಲ್ ಆಗಲಿದೆ.

ಅರ್ಜಿ ಸಲ್ಲಿಸುವುದರಿಂದ ಹಿಡಿದು ಕಾರ್ಡ್ ಪಡೆಯುವವರೆಗೆ ಬಹುತೇಕ ಎಲ್ಲ ಕೆಲಸಗಳನ್ನು ಆನ್‌ಲೈನ್‌ನಲ್ಲೇ ಮಾಡಬಹುದು.

ಒಸಿಐ ಎಂದರೇನು?

ಒಸಿಐ (Overseas Citizen of India) ಎಂಬುದು ವಿದೇಶದ ಪೌರತ್ವ ಹೊಂದಿರುವ ಭಾರತೀಯ ಮೂಲದವರಿಗೆ ನೀಡುವ ವಿಶೇಷ ಗುರುತಿನ ಚೀಟಿ.

ಇದು ಭಾರತೀಯ ಪೌರತ್ವವಲ್ಲ. ಅಂದರೆ, ಒಸಿಐ ಕಾರ್ಡ್ ಹೊಂದಿರುವವರಿಗೆ ಭಾರತದಲ್ಲಿ ವಾಸಿಸಲು, ಕೆಲಸ ಮಾಡಲು ಹಾಗೂ ಹಲವು ಸೌಲಭ್ಯಗಳನ್ನು ಪಡೆಯಲು ಅವಕಾಶವಿರುತ್ತದೆ. ಆದರೆ ಮತದಾನ ಮಾಡುವುದು, ಚುನಾವಣೆಯಲ್ಲಿ ಸ್ಪರ್ಧಿಸುವುದು ಸೇರಿದಂತೆ ಭಾರತೀಯ ನಾಗರಿಕರಿಗೆ ಇರುವ ರಾಜಕೀಯ ಹಕ್ಕುಗಳು ಇರುವುದಿಲ್ಲ.

ಹೊಸ ವ್ಯವಸ್ಥೆಯಲ್ಲಿ ಏನು ಬದಲಾವಣೆ?

ಈವರೆಗೆ ಒಸಿಐ ಕಾರ್ಡ್ ಪಡೆಯಲು ಅಥವಾ ಕೆಲವು ಬದಲಾವಣೆಗಳಿಗಾಗಿ ಕಚೇರಿಗೆ ಹೋಗಬೇಕಾಗಿತ್ತು. ಇನ್ನು ಮುಂದೆ ಹೆಚ್ಚಿನ ಸೇವೆಗಳು ಆನ್‌ಲೈನ್‌ನಲ್ಲೇ ಸಿಗಲಿವೆ.

ಈ ಹೊಸ ವ್ಯವಸ್ಥೆಯಲ್ಲಿ ಅರ್ಜಿ ಸಲ್ಲಿಸುವುದು, ಅಗತ್ಯ ದಾಖಲೆಗಳನ್ನು ಅಪ್‌ಲೋಡ್ ಮಾಡುವುದು, ಅರ್ಜಿಯ ಸ್ಥಿತಿಯನ್ನು ಆನ್‌ಲೈನ್‌ನಲ್ಲಿ ಪರಿಶೀಲಿಸುವುದು ಹಾಗೂ ಅನುಮೋದನೆಯಾದ ಬಳಿಕ ಡಿಜಿಟಲ್ ಇ-ಒಸಿಐ ಕಾರ್ಡ್‌ ಅನ್ನು ಡೌನ್‌ಲೋಡ್ ಮಾಡುವುದು ಸೇರಿದಂತೆ ಎಲ್ಲ ಪ್ರಕ್ರಿಯೆಗಳನ್ನು ಆನ್‌ಲೈನ್‌ನಲ್ಲೇ ಪೂರ್ಣಗೊಳಿಸಬಹುದು

ಈಗಾಗಲೇ ಒಸಿಐ ಕಾರ್ಡ್ ಹೊಂದಿರುವವರೂ ಹೊಸ ಅರ್ಜಿ ಸಲ್ಲಿಸದೆ ಡಿಜಿಟಲ್ ಇ-ಒಸಿಐ ಕಾರ್ಡ್ ಪಡೆಯಬಹುದಾಗಿದೆ.

20 ವರ್ಷ ದಾಟಿದವರಿಗೆ ಏನು ಬದಲಾವಣೆ?

ಇದುವರೆಗೆ ಒಸಿಐ ಕಾರ್ಡ್‌ದಾರರು 20 ವರ್ಷ ದಾಟಿದ ಬಳಿಕ ಹೊಸ ಪಾಸ್‌ಪೋರ್ಟ್ ಪಡೆದರೆ, ಒಸಿಐ ಬುಕ್‌ಲೆಟ್‌ನ್ನೂ ಮರುಪಡೆಯಬೇಕಾಗುತ್ತಿತ್ತು. ಇನ್ನು ಮುಂದೆ ಆ ನಿಯಮ ಇರುವುದಿಲ್ಲ. ಹೊಸ ಪಾಸ್‌ಪೋರ್ಟ್ ಪಡೆದ ಬಳಿಕ ಅದರ ವಿವರಗಳನ್ನು ಆನ್‌ಲೈನ್‌ನಲ್ಲಿ ನವೀಕರಿಸಿದರೆ ಸಾಕು. ಒಸಿಐ ಬುಕ್‌ಲೆಟ್‌ ಅನ್ನು ಮತ್ತೆ ಪಡೆಯುವ ಅಗತ್ಯವಿಲ್ಲ. ಇದರಿಂದ ಅರ್ಜಿ ಸಲ್ಲಿಸುವ ಪ್ರಕ್ರಿಯೆ ಸರಳವಾಗಲಿದ್ದು, ಸಮಯ ಮತ್ತು ವೆಚ್ಚ ಎರಡೂ ಉಳಿತಾಯವಾಗಲಿದೆ.

ಯುಎಇ | ಇತ್ತಿಹಾದ್ ರೈಲು ಸೇವೆ ಆರಂಭ: ಮೊದಲ ದಿನವೇ ಭಾರಿ ಪ್ರತಿಕ್ರಿಯೆ

ಇ-ಒಸಿಐ ಕಾರ್ಡ್‌ನ ಪ್ರಯೋಜನಗಳೇನು?

ಸಂಪೂರ್ಣ ಆನ್‌ಲೈನ್ ಸೇವೆ: ಅರ್ಜಿ ಸಲ್ಲಿಸುವುದರಿಂದ ಕಾರ್ಡ್ ಪಡೆಯುವವರೆಗೆ ಎಲ್ಲ ಪ್ರಕ್ರಿಯೆಯನ್ನೂ ಆನ್‌ಲೈನ್‌ನಲ್ಲೇ ಪೂರ್ಣಗೊಳಿಸಬಹುದು.

ಕಚೇರಿಗೆ ಭೇಟಿ ಅಗತ್ಯ ಕಡಿಮೆ: ಹೆಚ್ಚಿನ ಸೇವೆಗಳಿಗಾಗಿ ಕಚೇರಿಗೆ ಹೋಗುವ ಅವಶ್ಯಕತೆ ಇರುವುದಿಲ್ಲ.

ದಾಖಲೆ ಕಳೆದುಹೋಗುವ ಭಯ ಇಲ್ಲ: ಡಿಜಿಟಲ್ ಕಾರ್ಡ್ ಇರುವುದರಿಂದ ಬುಕ್‌ಲೆಟ್‌ ಕಳೆದುಹೋಗುವ ಅಥವಾ ಹಾಳಾಗುವ ಸಮಸ್ಯೆ ತಪ್ಪುತ್ತದೆ.

ಮೊಬೈಲ್‌ನಲ್ಲೇ ಕಾರ್ಡ್: ಇ-ಒಸಿಐ ಕಾರ್ಡ್‌ ಅನ್ನು ಮೊಬೈಲ್‌ನಲ್ಲೇ ಸಂಗ್ರಹಿಸಿಟ್ಟುಕೊಳ್ಳಬಹುದು.

ವಿಮಾನ ನಿಲ್ದಾಣಗಳಲ್ಲಿ ತ್ವರಿತ ಪರಿಶೀಲನೆ: ಡಿಜಿಟಲ್ ಮಾಹಿತಿ ಲಭ್ಯವಿರುವುದರಿಂದ ವಲಸೆ ಪರಿಶೀಲನೆ ಇನ್ನಷ್ಟು ವೇಗವಾಗಿ ನಡೆಯಲಿದೆ.

ಆನ್‌ಲೈನ್ ಪರಿಶೀಲನೆ: ಅಗತ್ಯವಿದ್ದಾಗ ಕಾರ್ಡ್‌ನ ಮಾಹಿತಿಯನ್ನು ತಕ್ಷಣವೇ ಪರಿಶೀಲಿಸಬಹುದು.

ಯಾರಿಗೆ ಒಸಿಐ ಕಾರ್ಡ್ ಸಿಗುತ್ತದೆ?

1950ರ ಜನವರಿ 26ರಂದು ಅಥವಾ ಅದರ ಬಳಿಕ ಭಾರತದ ನಾಗರಿಕರಾಗಿದ್ದವರು ಅಥವಾ ಭಾರತೀಯ ನಾಗರಿಕತ್ವಕ್ಕೆ ಅರ್ಹರಾಗಿದ್ದವರ ಭಾರತೀಯ ಮೂಲದ ವಿದೇಶಿ ನಾಗರಿಕರು ಒಸಿಐ ಕಾರ್ಡ್‌ಗೆ ಅರ್ಜಿ ಸಲ್ಲಿಸಬಹುದು.

ಸರ್ಕಾರ ಹೇಳಿದ್ದೇನು?

ಕೇಂದ್ರ ಗೃಹ ಸಚಿವಾಲಯದ ಪ್ರಕಾರ, ಹೊಸ ಇ-ಒಸಿಐ ವ್ಯವಸ್ಥೆಯಿಂದ 50 ಲಕ್ಷಕ್ಕೂ ಹೆಚ್ಚು ಒಸಿಐ ಕಾರ್ಡ್‌ದಾರರಿಗೆ ಅನುಕೂಲವಾಗಲಿದೆ. ಜೊತೆಗೆ ಕಾಗದದ ಕೆಲಸ ಕಡಿಮೆಯಾಗಲಿದ್ದು, ಸೇವೆಗಳು ಮತ್ತಷ್ಟು ವೇಗವಾಗಿ ದೊರೆಯಲಿವೆ.

ಈ ಮಾಹಿತಿಯು ಕೇಂದ್ರ ಸರ್ಕಾರದ ಅಧಿಕೃತ ಪ್ರಕಟಣೆಯನ್ನು ಆಧರಿಸಿದೆ. ಇ-ಒಸಿಐಗೆ ಸಂಬಂಧಿಸಿದ ನಿಯಮಗಳು ಮತ್ತು ಸೇವೆಗಳ ವಿವರಗಳು ಕಾಲಕಾಲಕ್ಕೆ ಬದಲಾಗಬಹುದು. ಇತ್ತೀಚಿನ ಮಾಹಿತಿಗಾಗಿ ಅಧಿಕೃತ ಸರ್ಕಾರಿ ಮೂಲಗಳನ್ನು ಪರಿಶೀಲಿಸಿ.

ಆಧಾರ: ಭಾರತ ಸರ್ಕಾರದ ಗೃಹ ಸಚಿವಾಲಯ, ಪಿಐಬಿ