ಮತ್ತೆ 'ಜೀವಂತಗೊಳಿಸಲು' 50 ಲಕ್ಷ ವ್ಯಯಿಸಿ 4 ವರ್ಷ ವ್ಯಕ್ತಿಯ ಮೃತದೇಹ ಫ್ರೀಝರ್ ನಲ್ಲಿಟ್ಟ ಕುಟುಂಬ!

ಮುಂಬೈ: ಭವಿಷ್ಯದಲ್ಲಿ ವಿಜ್ಞಾನ ಮುಂದುವರಿದು ಮತ್ತೆ ಜೀವಂತಗೊಳಿಸುವ ತಂತ್ರಜ್ಞಾನ ಅಭಿವೃದ್ಧಿಯಾಗಬಹುದು ಎಂಬ ನಿರೀಕ್ಷೆಯಲ್ಲಿ ಮುಂಬೈನ ಕುಟುಂಬವೊಂದು 2022ರಿಂದ 80 ವರ್ಷದ ವ್ಯಕ್ತಿಯ ಮೃತದೇಹವನ್ನು ನಾಲ್ಕು ವರ್ಷಗಳ ಕಾಲ ಫ್ರೀಝರ್‌ ನಲ್ಲಿ ಸಂರಕ್ಷಿಸಿದೆ. ಇದಕ್ಕಾಗಿ ಕುಟುಂಬವು 50 ಲಕ್ಷ ರೂ.ಗೂ ಹೆಚ್ಚು ಖರ್ಚು ಮಾಡಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. 

ಕ್ಯಾನ್ಸರ್, ಮೂತ್ರಪಿಂಡ ವೈಫಲ್ಯ ಹಾಗೂ ವಯೋಸಹಜ ಕಾಯಿಲೆಗಳಿಂದ ಬಳಲುತ್ತಿದ್ದ ವ್ಯಕ್ತಿ 2022ರಲ್ಲಿ ಮೃತಪಟ್ಟಿದ್ದರು. ಆರಂಭದಲ್ಲಿ ಮಲಾಡ್‌ ನಲ್ಲಿರುವ ತಮ್ಮ ಮನೆಯಲ್ಲೇ ಮೃತದೇಹವನ್ನು ಫ್ರೀಝರ್‌ನಲ್ಲಿ ಇರಿಸಲಾಗಿತ್ತು. ಕಟ್ಟಡದ ಪುನರಾಭಿವೃದ್ಧಿ ಕಾಮಗಾರಿ ಆರಂಭವಾದ ಬಳಿಕ ಮೃತದೇಹವನ್ನು ಮಲಾಡ್‌ ನ ಪಾಲಿಕ್ಲಿನಿಕ್‌ ನ ಆವರಣದಲ್ಲಿದ್ದ ಫ್ರೀಝರ್‌ಗೆ ಸ್ಥಳಾಂತರಿಸಲಾಗಿತ್ತು.

ಕುರಾರ್ ಪೊಲೀಸರಿಗೆ ದೊರೆತ ಖಚಿತ ಮಾಹಿತಿಯ ಆಧಾರದಲ್ಲಿ ಕ್ಲಿನಿಕ್‌ ಗೆ ಭೇಟಿ ನೀಡಿದಾಗ ಈ ವಿಷಯ ಬೆಳಕಿಗೆ ಬಂದಿದೆ. ಸುಮಾರು ಒಂದು ತಿಂಗಳಿನಿಂದ ಕ್ಲಿನಿಕ್ ನವೀಕರಣ ಕಾಮಗಾರಿಗಾಗಿ ಮುಚ್ಚಿದ್ದರೂ ಮೃತದೇಹ ಅಲ್ಲಿಯೇ ಇತ್ತು. ಮೃತದೇಹವನ್ನು ಕ್ಲಿನಿಕ್‌ ನಲ್ಲಿ ಇರಿಸಿರುವುದು ಆಡಳಿತ ಮಂಡಳಿ ಅಥವಾ ಆಸ್ತಿ ಮಾಲೀಕರಿಗೆ ತಿಳಿದಿರಲಿಲ್ಲ ಎಂದು ಪೊಲೀಸರು ಹೇಳಿದ್ದಾರೆ.

ಆದರೆ, ಸಂಬಂಧಿಕರು ಹಾಗೂ ನೆರೆಹೊರೆಯವರಿಗೆ ಈ ವ್ಯವಸ್ಥೆಯ ಬಗ್ಗೆ ತಿಳಿದಿತ್ತು. ಕುಟುಂಬ ಸದಸ್ಯರು, ಕ್ಲಿನಿಕ್ ಆಡಳಿತ ಮಂಡಳಿ ಹಾಗೂ ಆಸ್ತಿ ಮಾಲೀಕರನ್ನು ವಿಚಾರಿಸಿದ ಬಳಿಕ ಯಾವುದೇ ಅಕ್ರಮ ಅಥವಾ ಸಂಶಯಾಸ್ಪದ ಚಟುವಟಿಕೆ ನಡೆದಿರುವುದು ಕಂಡುಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ಅಂತ್ಯಸಂಸ್ಕಾರಕ್ಕೆ ಸಿದ್ಧವಿರಲಿಲ್ಲ

ವ್ಯಕ್ತಿಯ ಸಾವಿನಿಂದ ತೀವ್ರವಾಗಿ ನೊಂದಿದ್ದ ಅವರ ಪತ್ನಿ ಹಾಗೂ ಇಬ್ಬರು ವಯಸ್ಕ ಮಕ್ಕಳು ಅಂತ್ಯಸಂಸ್ಕಾರ ನೆರವೇರಿಸಲು ಮಾನಸಿಕವಾಗಿ ಸಿದ್ಧರಾಗಿರಲಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ವಕೀಲೆಯಾಗಿರುವ ಮಗಳು ಸೇರಿದಂತೆ ಕುಟುಂಬದ ಸದಸ್ಯರು 'ಕ್ರಯೋನಿಕ್ಸ್' ಕುರಿತು ಅಂತರ್ಜಾಲದಲ್ಲಿ ಮಾಹಿತಿ ಸಂಗ್ರಹಿಸಿದ್ದರು. ಕಾನೂನುಬದ್ಧವಾಗಿ ಮೃತಪಟ್ಟವರ ದೇಹವನ್ನು ದೀರ್ಘಕಾಲ ಸಂರಕ್ಷಿಸುವ ಸೌಲಭ್ಯ ಒದಗಿಸುವ ಅಮೆರಿಕದ ಸಂಸ್ಥೆಗಳನ್ನೂ ಸಂಪರ್ಕಿಸಿದ್ದರು.

ಮೃತದೇಹವನ್ನು ಅಮೆರಿಕದ ಕ್ರಯೋನಿಕ್ಸ್ ಕೇಂದ್ರಕ್ಕೆ ಕಳುಹಿಸುವ ಸಾಧ್ಯತೆ ಮತ್ತು ಅದಕ್ಕೆ ಸಂಬಂಧಿಸಿದ ಕಾನೂನು ಪ್ರಕ್ರಿಯೆಗಳ ಕುರಿತು ಭಾರತದಲ್ಲಿನ ವಕೀಲರೊಂದಿಗೆ ಕುಟುಂಬ ಸಮಾಲೋಚನೆ ನಡೆಸುತ್ತಿತ್ತು. ಕಳೆದ 4 ವರ್ಷಗಳಲ್ಲಿ ಮೃತದೇಹವನ್ನು ಸಂರಕ್ಷಿಸಿಡಲು 50 ಲಕ್ಷ ರೂ.ಗೂ ಹೆಚ್ಚು ಖರ್ಚು ಮಾಡಿದೆ ಎಂದು ಪೊಲೀಸರು ಹೇಳಿದ್ದಾರೆ.

'ಭವಿಷ್ಯದಲ್ಲಿ ಮರುಜೀವ ಸಾಧ್ಯ'

ಭವಿಷ್ಯದಲ್ಲಿ ವಿಜ್ಞಾನದ ಪ್ರಗತಿಯಿಂದ ಸಾವಿನಿಂದ ಉಂಟಾಗಿರುವ ಹಾನಿಯನ್ನು ಹಿಮ್ಮುಖಗೊಳಿಸಿ ವ್ಯಕ್ತಿಯನ್ನು ಮತ್ತೆ ಜೀವಂತಗೊಳಿಸುವ ತಂತ್ರಜ್ಞಾನ ಅಭಿವೃದ್ಧಿಯಾಗಬಹುದು ಎಂಬ ನಿರೀಕ್ಷೆಯಲ್ಲಿ ಮೃತದೇಹ ಸಂರಕ್ಷಣೆಯ ಸಾಧ್ಯತೆ ಕುರಿತು ಕುಟುಂಬ ಸಂಶೋಧನೆ ನಡೆಸಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಅಮೆರಿಕದ ಕೆಲವು ಖಾಸಗಿ ಕ್ರಯೋನಿಕ್ಸ್ ಸಂಸ್ಥೆಗಳು ಕಾನೂನುಬದ್ಧವಾಗಿ ಮೃತಪಟ್ಟವರ ದೇಹವನ್ನು ಅತ್ಯಂತ ಕಡಿಮೆ ತಾಪಮಾನದಲ್ಲಿ ಸಂರಕ್ಷಿಸುವ ಸೇವೆ ಒದಗಿಸುತ್ತವೆ. ಸಾಮಾನ್ಯವಾಗಿ ದ್ರವ ಸಾರಜನಕ ಬಳಸಿ ಸುಮಾರು -196 ಡಿಗ್ರಿ ಸೆಲ್ಸಿಯಸ್‌ ನಲ್ಲಿ ದೇಹವನ್ನು ಸಂರಕ್ಷಿಸಲಾಗುತ್ತದೆ. ಸಾವಿನ ಬಳಿಕ ದೇಹವನ್ನು ದೀರ್ಘಕಾಲದ ಸಂರಕ್ಷಣೆಗೆ ಸಿದ್ಧಪಡಿಸಿ ವಿಶೇಷ ಕೇಂದ್ರಕ್ಕೆ ಸಾಗಿಸುವುದು ಈ ಪ್ರಕ್ರಿಯೆಯ ಭಾಗವಾಗಿದೆ.

ಆದರೆ, ಕ್ರಯೋನಿಕ್ಸ್ ಇನ್ನೂ ಪ್ರಾಯೋಗಿಕ ಹಂತದಲ್ಲಿದೆ. ಈ ರೀತಿ ಸಂರಕ್ಷಿಸಲಾದ ವ್ಯಕ್ತಿಯನ್ನು ಮತ್ತೆ ಜೀವಂತಗೊಳಿಸಲು ಪ್ರಸ್ತುತ ಯಾವುದೇ ಸ್ಥಾಪಿತ ವೈಜ್ಞಾನಿಕ ವಿಧಾನ ಲಭ್ಯವಿಲ್ಲ.

ಅಮೆರಿಕದ ಕೆಲವು ಸಂಸ್ಥೆಗಳ ಸಂರಕ್ಷಣಾ ಪ್ಯಾಕೇಜ್‌ ಗಳ ವೆಚ್ಚ ಹತ್ತಾರು ಸಾವಿರ ಡಾಲರ್‌ ಗಳಷ್ಟಿದೆ. ಕೆಲವು ಕೇಂದ್ರಗಳು 28,000 ಡಾಲರ್‌ ಗಿಂತ ಹೆಚ್ಚಿನ ಏಕಕಾಲದ ವೆಚ್ಚವನ್ನು, ಇನ್ನು ಕೆಲವು 45,000 ಡಾಲರ್‌ ವರೆಗೆ ಶುಲ್ಕ ವಿಧಿಸುತ್ತವೆ.

ಕ್ರಯೋಪ್ರಿಸರ್ವೇಶನ್‌ ಗಿಂತ ಭಿನ್ನ

ಕ್ರಯೋಪ್ರಿಸರ್ವೇಶನ್ ಎಂದರೆ ಅತ್ಯಂತ ಕಡಿಮೆ ತಾಪಮಾನದಲ್ಲಿ ಜೀವಕೋಶಗಳು, ಅಂಗಾಂಶಗಳು ಅಥವಾ ಭ್ರೂಣಗಳನ್ನು ಸಂರಕ್ಷಿಸುವ ವೈಜ್ಞಾನಿಕ ವಿಧಾನ. ಇದು ಕೆಲವು ವೈದ್ಯಕೀಯ ಮತ್ತು ಸಂಶೋಧನಾ ಕ್ಷೇತ್ರಗಳಲ್ಲಿ ಸ್ಥಾಪಿತ ತಂತ್ರವಾಗಿದೆ.

ಇದಕ್ಕೆ ಭಿನ್ನವಾಗಿ, 'ಕ್ರಯೋನಿಕ್ಸ್' ಎಂದರೆ ಕಾನೂನುಬದ್ಧವಾಗಿ ಮೃತಪಟ್ಟ ವ್ಯಕ್ತಿಗಳನ್ನು ಭವಿಷ್ಯದ ತಂತ್ರಜ್ಞಾನದಿಂದ ಮತ್ತೆ ಜೀವಂತಗೊಳಿಸಬಹುದು ಎಂಬ ನಿರೀಕ್ಷೆಯಲ್ಲಿ ಸಂರಕ್ಷಿಸುವ ವಿಧಾನ. ಇದು ಇನ್ನೂ ಪ್ರಾಯೋಗಿಕ ಹಂತದಲ್ಲಿರುವ ಪದ್ಧತಿಯಾಗಿದೆ.

ಕುಟುಂಬವು ವ್ಯಕ್ತಿಯ ಸಾವಿಗೆ ಸಂಬಂಧಿಸಿದ ದಾಖಲೆಗಳನ್ನು ಪೊಲೀಸರಿಗೆ ಸಲ್ಲಿಸಿದೆ. ವ್ಯಕ್ತಿ ಸಹಜ ಕಾರಣಗಳಿಂದ ಮೃತಪಟ್ಟಿರುವುದು ವಿಚಾರಣೆಯಿಂದ ತಿಳಿದುಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈವರೆಗೆ ಪೊಲೀಸರು ಯಾವುದೇ ಪ್ರಕರಣ ದಾಖಲಿಸಿಲ್ಲ. ಮಾನವ ಮೃತದೇಹವನ್ನು ಇಷ್ಟು ದೀರ್ಘಕಾಲ ಸಂರಕ್ಷಿಸಿಡುವುದಕ್ಕೆ ಸಂಬಂಧಿಸಿದ ಕಾನೂನು ಅಂಶಗಳ ಕುರಿತು ತಜ್ಞರೊಂದಿಗೆ ಸಮಾಲೋಚನೆ ನಡೆಸುತ್ತಿದ್ದಾರೆ.

ಮೃತದೇಹವನ್ನು ವಿದೇಶದಲ್ಲಿರುವ ಕ್ರಯೋನಿಕ್ಸ್ ಕೇಂದ್ರಕ್ಕೆ ಕಳುಹಿಸುವ ಯೋಜನೆಯನ್ನು ಮುಂದುವರಿಸಬೇಕೇ ಅಥವಾ ಅಂತ್ಯಕ್ರಿಯೆ ನೆರವೇರಿಸಬೇಕೇ ಎಂಬ ಬಗ್ಗೆ ಕುಟುಂಬವು ನಿರ್ಧಾರ ಕೈಗೊಳ್ಳುವವರೆಗೆ ಕ್ಲಿನಿಕ್‌ ನಲ್ಲಿ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.