ಆತ್ಮವಿಶ್ವಾಸದ ಮೊದಲ ಹೆಜ್ಜೆ: ಐ-ಲೀಡ್ ಉತ್ಪನ್ನಗಳು ಮಾರುಕಟ್ಟೆಗೆ

ಕಾಸರಗೋಡು: ನೋವಿನ ಹೊರತಾಗಿಯೂ ಸ್ವಂತ ಆದಾಯ ಮತ್ತು ಸ್ವಾವಲಂಬನೆಯನ್ನು ನೀಡುವ ಆತ್ಮವಿಶ್ವಾಸ. ಕಾಸರಗೋಡು ಜಿಲ್ಲೆಯ ಎಂಡೋಸಲ್ಫಾನ್ ಸಂತ್ರಸ್ತರು ಜೀವನದ ಕಷ್ಟಗಳ ನಡುವೆಯೂ ತಮ್ಮ ಭವಿಷ್ಯವನ್ನು ಭದ್ರಪಡಿಸಿಕೊಳ್ಳುವಲ್ಲಿ ನಿರತರಾಗಿದ್ದಾರೆ.

ಅವರು ತಮ್ಮ ಸ್ವಂತ ಶ್ರಮದಿಂದ ತಯಾರಿಸಿದ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಅಂತಿಮ ಹಂತದಲ್ಲಿದ್ದಾರೆ. ಈ ಉತ್ಪನ್ನಗಳನ್ನು ಫೆಬ್ರವರಿ 22 ರಂದು ಕಾಸರಗೋಡು ನಾಗರಿಕ ನಿಲ್ದಾಣದಲ್ಲಿ ಆಯೋಜಿಸಲಾಗುವ ಐ-ಲೀಡ್ ಉತ್ಪನ್ನ ಪ್ರದರ್ಶನ ಮತ್ತು ಮಾರುಕಟ್ಟೆ ಮೇಳದಲ್ಲಿ ಮಾರಾಟಕ್ಕೆ ಇರಿಸಲಾಗುವುದು. ಮಾರುಕಟ್ಟೆಯಲ್ಲಿ ನಾವೀನ್ಯತೆ ಮತ್ತು ಗುಣಮಟ್ಟವನ್ನು ನಿರೀಕ್ಷಿಸುವವರಿಗೆ ಇದು ಹೊಸ ಅನುಭವವಾಗಲಿದೆ. ಎಂಡೋಸಲ್ಫಾನ್ ಸಂತ್ರಸ್ತರು ಮತ್ತು ವಿಶೇಷ ಚೇತನರಿಗೆ ಸ್ವ-ಉದ್ಯೋಗ ಕಂಡುಕೊಳ್ಳುವ ಉದ್ದೇಶದಿಂದ ಸಾಮಾಜಿಕ ನ್ಯಾಯ ಇಲಾಖೆ ಮತ್ತು ಜಿಲ್ಲಾಡಳಿತ ಜಂಟಿಯಾಗಿ ಜಾರಿಗೆ ತಂದ ಯೋಜನೆ ಐ-ಲೀಡ್. 

ಫೆ.22 ರಂದು ಬೆಳಿಗ್ಗೆ 10 ಕ್ಕೆ ಜಿಲ್ಲೆಯ ಶಾಸಕರು ನಡೆಸುವ ಉದ್ಘಾಟನಾ ಸಮಾರಂಭದಲ್ಲಿ ಜಿಲ್ಲಾ ಪಂಚಾಯಿತಿ ಅಧ್ಯಕ್ಷರು, ಜಿಲ್ಲಾಧಿಕಾರಿಗಳು ಮತ್ತು ಸಾಮಾಜಿಕ ನ್ಯಾಯ ಇಲಾಖೆಯ ಉನ್ನತ ಅಧಿಕಾರಿಗಳು ಭಾಗವಹಿಸಲಿದ್ದಾರೆ.

ಕಲೆ ಮತ್ತು ಜೀವನೋಪಾಯ ಒಟ್ಟಿಗೆ ಸೇರುವ ಈ ಪ್ರದರ್ಶನವು ಕೇವಲ ಮಾರುಕಟ್ಟೆ ಮೇಳಕ್ಕಿಂತ ಹೆಚ್ಚಿನದಾಗಿ ಪ್ರತಿಭೆ ಮತ್ತು ದೃಢಸಂಕಲ್ಪಕ್ಕೆ ಸಾಕ್ಷಿಯಾಗುತ್ತದೆ.

ಕಾರಡ್ಕ, ಮುಳಿಯಾರ್, ಪುಲ್ಲೂರ್-ಪೆರಿಯ, ಪನತ್ತಡಿ, ಕಳ್ಳಾರ್ ಮತ್ತು ಬದಿಯಡ್ಕ ಎಂಸಿಆರ್‍ಸಿಗಳಲ್ಲಿ ತಯಾರಾದ ಉತ್ಪನ್ನಗಳು ಪ್ರದರ್ಶನದ ಪ್ರಮುಖ ಆಕರ್ಷಣೆಯಾಗಿರುತ್ತವೆ. ಕೈಯಿಂದ ತಯಾರಿಸಿದ ರಗ್ಗುಗಳು, ಪರಿಸರ ಸ್ನೇಹಿ ಫೀನಾಲ್ ಉತ್ಪನ್ನಗಳು ಮತ್ತು ನೋಟ್‍ಬುಕ್‍ಗಳಿಂದ ಹಿಡಿದು ಉತ್ಪನ್ನಗಳ ಪಟ್ಟಿ ಮುಂದುವರಿಯುತ್ತದೆ.

ಪುಲ್ಲೂರ್-ಪೆರಿಯಾ ಎಂಸಿಆರ್‍ಸಿ ಯಲ್ಲಿ ತಯಾರಿಸಿದ ಕೈಮಗ್ಗದ ನೆಲಹಾಸುಗಳು ಸ್ಥಳೀಯ ಕರಕುಶಲತೆಗೆ ಅತ್ಯುತ್ತಮ ಉದಾಹರಣೆಗಳಾಗಿವೆ.

ಮುಳಿಯಾರ್ ಎಂಸಿಆರ್‍ಸಿಯಲ್ಲಿ ತಯಾರಾದ ನೋಟ್‍ಬುಕ್‍ಗಳು ವಿದ್ಯಾರ್ಥಿಗಳು ಮತ್ತು ಸಣ್ಣ ವ್ಯವಹಾರಗಳಿಗೆ ಪ್ರಯೋಜನಕಾರಿಯಾಗಿದೆ. ಉತ್ತಮ ಗುಣಮಟ್ಟದ ಪುಟಗಳನ್ನು ಹೊಂದಿರುವ ಈ ದೀರ್ಘಕಾಲೀನ ಉತ್ಪನ್ನಗಳು ಗ್ರಾಹಕರಿಂದ ಉತ್ತಮ ಪ್ರತಿಕ್ರಿಯೆಯನ್ನು ಪಡೆಯುತ್ತವೆ ಎಂದು ಆಶಿಸಲಾಗಿದೆ.

ಪನತ್ತಡಿ, ಕಳ್ಳಾರ್ ಮತ್ತು ಬದಿಯಡ್ಕ ಎಂಸಿಆರ್‍ಸಿ ಗಳಲ್ಲಿ ತಯಾರಾದ 3-ಪೋಲ್ಡ್ ಛತ್ರಿಗಳು ಮಾರುಕಟ್ಟೆಗೆ ಸಿದ್ಧವಾಗಿವೆ. ಮಳೆ ಮತ್ತು ಶಾಖಕ್ಕೆ ಅತ್ಯುತ್ತಮ ಪ್ರತಿರೋಧವನ್ನು ಹೊಂದಿರುವ ಈ ಛತ್ರಿಗಳನ್ನು ಗ್ರಾಹಕರು ನೇರವಾಗಿ ಅಥವಾ ಆನ್ ಲೈನ್ ಮೂಲಕ ಖರೀದಿಸಬಹುದು.

ಕಾರಡ್ಕ ಎಂಸಿಆರ್‍ಸಿಯಲ್ಲಿ ತಯಾರಾಗುವ ಫಿನಾಲ್, ಟಾಯ್ಲೆಟ್ ಕ್ಲೀನರ್, ಪ್ಲೋರ್ ಕ್ಲೀನರ್ ಮತ್ತು ಡಿಶ್‍ವಾಶರ್‍ನಂತಹ ಉತ್ಪನ್ನಗಳು ವಿಶೇಷಚೇತನರಿಗೆ ಶಾಶ್ವತ ಆದಾಯವನ್ನು ಗಳಿಸುವುದರ ಜೊತೆಗೆ ಪರಿಸರ ಸ್ನೇಹಿ ಉತ್ಪನ್ನಗಳಿಗೆ ಗ್ರಾಹಕರ ಬೇಡಿಕೆಯನ್ನು ಪೂರೈಸಲಿದೆ. ಈ ಉಪಕ್ರಮದಿಂದ ಈಗಾಗಲೇ 10 ಕುಟುಂಬಗಳು ನೇರ ಪ್ರಯೋಜನ ಪಡೆಯಲಿವೆ.

ಉದ್ಯಮಗಳು ಮಾರುಕಟ್ಟೆಯಲ್ಲಿ ಶಾಶ್ವತ ಸ್ಥಾನವನ್ನು ಸ್ಥಾಪಿಸಲು, ಗ್ರಾಹಕರ ವಿಶ್ವಾಸವನ್ನು ಗಳಿಸಲು ಮತ್ತು ಭವಿಷ್ಯದಲ್ಲಿ ಮುಂದುವರಿಯಲು ಐ-ಲೀಡ್ ಪ್ರದರ್ಶನವು ನಿರ್ಣಾಯಕವಾಗಿರುತ್ತದೆ. ವಿಶೇಷ ಚೇತನರು ಮತ್ತು ಎಂಡೋಸಲ್ಫಾನ್ ಪೀಡಿತರು ತಮ್ಮದೇ ಆದ ಉತ್ಪನ್ನಗಳನ್ನು ಮಾರುಕಟ್ಟೆಗೆ ತರುವ ಈ ಉಪಕ್ರಮವು, ಉದ್ಯೋಗ ಸೃಷ್ಟಿಯ ಮೂಲಕ ಉನ್ನತಿಗೆ ಖಂಡಿತವಾಗಿಯೂ ಹೊಸ ಮಾದರಿಯಾಗಲಿದೆ.

ಫೆಬ್ರವರಿ 22 ರಂದು ಕಾಸರಗೋಡಿನಲ್ಲಿ ನಡೆಯಲಿರುವ ಪ್ರದರ್ಶನವು ಈ ಉತ್ಪನ್ನಗಳಿಗೆ ಮಾರುಕಟ್ಟೆಯಲ್ಲಿ ಗಟ್ಟಿಯಾದ ನೆಲೆಯನ್ನು ಒದಗಿಸಲಿದೆ ಎಂದು ಆಯೋಜಕರು ಆಶಿಸಿದ್ದಾರೆ.