ಪ್ರಯಾಣ ಸಂಕಷ್ಟಕ್ಕೆ ಪರಿಹಾರ: ಕಾಸರಗೋಡು-ಮಂಗಳೂರು ಮಾರ್ಗದಲ್ಲಿ ಹೆಚ್ಚಿನ ಬಸ್ ಆರಂಭಿಸಿದ ಕೇರಳ SRTC

ಕುಂಬಳೆ: ಕೇರಳ ಎಸ್‍ಆರ್‍ಟಿಸಿ ಕೂಡ ಕಾಸರಗೋಡು-ಮಂಗಳೂರು ಮಾರ್ಗದಲ್ಲಿ ಹೆಚ್ಚಿನ ಬಸ್‍ಗಳನ್ನು ಪ್ರಾರಂಭಿಸಿದೆ. ಕರ್ನಾಟಕ ಈ ಮಾರ್ಗದಲ್ಲಿ ಹೆಚ್ಚಿನ ಬಸ್‍ಗಳನ್ನು ಪ್ರಾರಂಭಿಸಿದ ನಂತರ, ಕೇರಳ ಎಸ್‍ಆರ್‍ಟಿಸಿ ಕೂಡ ಹೆಚ್ಚುವರಿ ಸೇವೆಗಳನ್ನು ಪ್ರಾರಂಭಿಸಲು ಮುಂದಾಯಿತು. ಇದು ಈ ಮಾರ್ಗದಲ್ಲಿರುವ ಪ್ರಯಾಣದ ತೊಂದರೆಗಳಿಗೆ ಸ್ವಲ್ಪ ಪರಿಹಾರವನ್ನು ತರಲಿದೆ ಎಂದು ಆಶಿಸಲಾಗಿದೆ. 

ಕರ್ನಾಟಕ ಎಸ್‍ಆರ್‍ಟಿಸಿ ಕಳೆದ ತಿಂಗಳು ಅಸ್ತಿತ್ವದಲ್ಲಿರುವ ಬಸ್‍ಗಳ ಜೊತೆಗೆ ಎರಡು ಅಲ್ಟ್ರಾ ಡಿಲಕ್ಸ್ ವೋಲ್ವೋ ಬಸ್‍ಗಳನ್ನು (ರಾಜಹಂಸ) ಪರಿಚಯಿಸಿತ್ತು. ಈ ಸೇವೆಗಳಿಗೆ ಕಾಸರಗೋಡು-ಮಂಗಳೂರುಗೆ ಟಿಕೆಟ್ ದರ 100 ರೂ. ಇದಕ್ಕೆ ಪ್ರಯಾಣಿಕರಿಂದ ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಕಾಸರಗೋಡಿನ ನಂತರ, ಈ ಬಸ್‍ಗಳು ಕುಂಬಳೆ, ಬಂದ್ಯೋಡು, ಕೈಕಂಬ, ಉಪ್ಪಳ, ಹೊಸಂಗಡಿ, ಮಂಜೇಶ್ವರ, ತಲಪ್ಪಾಡಿ, ತೊಕ್ಕೋಟು ನಿಲ್ದಾಣಗಳಲ್ಲಿ ಮಾತ್ರ ನಿಲುಗಡೆಹೊಮದಿದೆ. ಇತರ ಬಸ್ ಸೇವೆಗಳಿಗೆ ಹೋಲಿಸಿದರೆ ಇವು 15 ನಿಮಿಷಗಳನ್ನು ಉಳಿಸಲು ಸಾಧ್ಯವಾಗುತ್ತದೆ ಎಂದು ಪ್ರಯಾಣಿಕರು ಹೇಳುತ್ತಾರೆ.

ಕೇರಳ ಎಸ್‍ಆರ್‍ಟಿಸಿ ಕಳೆದ ಒಂದು ತಿಂಗಳಲ್ಲಿ ಕಾಸರಗೋಡು-ಮಂಗಳೂರು ಮಾರ್ಗದಲ್ಲಿ 3 ಹೊಸ ಬಸ್‍ಗಳನ್ನು ಪ್ರಾರಂಭಿಸಿದೆ. ಇವುಗಳಲ್ಲಿ ಒಂದು ಲಿಂಕ್ ಬಸ್ ಮತ್ತು ಎರಡು ಫಾಸ್ಟ್ ಪ್ಯಾಸೆಂಜರ್ ಸೇರಿವೆ. ಈ ಬಸ್ ಸೇವೆಗಳು ಕರ್ನಾಟಕದ ಬಸ್‍ಗಳಂತೆಯೇ ನಿಲ್ದಾಣಗಳನ್ನು ಹೊಂದಿವೆ.

ಅತಿ ವೇಗದಲ್ಲಿ ಚಲಿಸುವ ಈ ಬಸ್‍ಗಳಲ್ಲಿ ಒಂದು ಕಾಞಂಗಾಡ್ ವರೆಗೆ ಕಾರ್ಯನಿರ್ವಹಿಸುತ್ತದೆ. ಕಾಸರಗೋಡು-ಕಾಞಂಗಾಡ್ ಮಾರ್ಗದಲ್ಲಿ ಪಾಲಕುನ್ನುವಿನಲ್ಲಿ ಇದು ಕೇವಲ ಒಂದು ನಿಲ್ದಾಣವನ್ನು ಹೊಂದಿದೆ. ಈ ಸೇವೆಗಳ ಟಿಕೆಟ್ ಬೆಲೆಗಳನ್ನು ಸಾಮಾನ್ಯ ದರಕ್ಕಿಂತ ಹೆಚ್ಚಿಸಲಾಗಿದೆ.

ಗ್ರಾಮೀಣ ಸೇವೆಗಳಿಗೂ ಆದ್ಯತೆ:

ಕಾಸರಗೋಡಿನಿಂದ ಕೆಲವು ವರ್ಷಗಳ ಹಿಂದೆ ಹಲವು ಒಳ ಗ್ರಾಮಗಳಿಗೆ ಸಾರಿಗೆ ಇಲಾಖೆಯ ಬಸ್ ಸಂಚರಿಸುತ್ತಿತ್ತು. ಮುಖ್ಯವಾಗಿ ಕಾಸರಗೋಡು-ಮಧೂರು-ನೀರ್ಚಾಲು-ಮುಂಡಿತ್ತಡ್ಕ, ಕಾಸರಗೋಡು-ಬಂದ್ಯೋಡು-ಧರ್ಮತ್ತಡ್ಕ-ಬಾಯಾರ್ ಮೊದಲಾದ ಸೇವೆಗಳು ಕಳೆದ ಕೆಲವು ವರ್ಷಗಳಿಂದ ನಿಲುಗಡೆಗೊಂಡಿದೆ. ಇದರಿಂದ ಒಳನಾಡುಗಳ ಜನರು ತೀವ್ರ ಸಂಕಷ್ಟ ಅನುಭವಿಸುತ್ತಿದ್ದಾರೆ ಎಂಬ ಮಾಹಿತಿಗಳಿವೆ.

ಅಲ್ಲದೆ ಕಾಸರಗೋಡು-ಬದಿಯಡ್ಕ-ಪೆರ್ಲ-ವಿಟ್ಲ-ಪುತ್ತೂರಿನ ರೂಟಿನಲ್ಲಿ ವ್ಯಾಪಕ ಪ್ರಯಾಣಿಕರ ದಟ್ಟಣೆ ಕಂಡುಬರುತ್ತಿದ್ದು, ಕೇರಳ ಸಾರಿಗೆ ಬಸ್ ಗಳ ಕೊರತೆ ಪ್ರಯಾಣಿಕರನ್ನು ತಟ್ಟಿದೆ. ರಸ್ತೆಗಳ ಕಳಪೆ ವ್ಯವಸ್ಥೆ ಇಲ್ಲಿ ಬಸ್ ಸಂಚಾರ ನಡೆಸಲು ಹಿಂದೇಟಿಗೆ ಕಾರಣ ಎನ್ನಲಾಗಿದೆ. 

ಅಭಿಮತ:

ಈಗ ಹೊಸದಾಗಿ ಆರಂಬಿಸಿರುವ ಮೂರು ಬಸ್ ಸೇವೆಗಳಿಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇನ್ನಷ್ಟು ಬಸ್ ಗಳಿಗೆ ಬೇಡಿಕೆ ಇದ್ದು, ಶಬರಿಮಲೆ ಸೀಸನ್ ಕಳೆದ ಬಳಿಕ ಚಿಂತಿಸಲಾಗುವುದು. ಶಬರಿಮಲೆ ಸೀಸನ್ ಕಾರಣ ಬೇಕಷ್ಟು ಬಸ್ ಗಳು ನಮ್ಮ ಜಿಲ್ಲೆಗೆ ಈಗ ಲಭ್ಯವಿಲ್ಲ. 

ಅಲ್ಲದೆ ಈ ಹಿಂದೆ ಸಂಚಾರ ನಡೆಸುತ್ತಿದ್ದ ಕಾಸರಗೋಡು-ನೀರ್ಚಾಲು-ಮುಂಡಿತ್ತಡ್ಕ, ಕಾಸರಗೋಡು-ಬಂದ್ಯೋಡು-ಧರ್ಮತ್ತಡ್ಕ-ಬಾಯಾರ್ ಗ್ರಾಮೀಣ ಸಾರಿಗೆಗಳು ಈಗ ನಿಲುಗಡೆಗೊಂಡಿದ್ದು, ಸಾರ್ವಜನಿಕರಿಂದ ಅಧಿಕೃತ ಬೇಡಿಕೆ ಇದ್ದರೆ ಪುನರಾರಂಭಿಸಲಾಗುವುದು.

-ಪುರುಷೋತ್ತಮನ್

ಕೆ.ಎಸ್.ಆರ್.ಟಿ.ಸಿ. ಕಾಸರಗೋಡು ವಿಭಾಗ ಅಧಿಕಾರಿ.(ಸ್ಠಷನ್ ಮಾಸ್ಟರ್)