ಮಧ್ಯಪ್ರಾಚ್ಯ ಯುದ್ಧಭೂಮಿಯಲ್ಲಿ ʼಡಿಜಿಟಲ್ ಯುದ್ಧʼ | 'ಹಂಝಲಾ' ಸೈಬರ್ ದಾಳಿಗಳಿಂದ ಆತಂಕ; ಅಮೆರಿಕ-ಇರಾನ್ ಸಂಘರ್ಷಕ್ಕೆ ಹೊಸ ಆಯಾಮ

ಟೆಹರಾನ್: ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷವು ಕೇವಲ ಗಡಿಭಾಗದ ಕ್ಷಿಪಣಿ ದಾಳಿಗಳಿಗೆ ಸೀಮಿತವಾಗಿಲ್ಲ; ಡಿಜಿಟಲ್ ಲೋಕದಲ್ಲಿಯೂ ಈ ಯುದ್ಧ ತೀವ್ರಗೊಂಡಿದೆ. ಇರಾನ್ ಬಳಿ ಅಮೆರಿಕದ ಮುಖ್ಯ ಭೂಭಾಗವನ್ನು ತಲುಪುವ ಖಂಡಾಂತರ ಕ್ಷಿಪಣಿಗಳು ಇಲ್ಲದಿದ್ದರೂ, ಸೈಬರ್ ದಾಳಿಗಳ ಮೂಲಕ ಅಮೆರಿಕದ ಆಂತರಿಕ ವ್ಯವಸ್ಥೆಗಳಿಗೆ ನುಗ್ಗುವ ಸಾಮರ್ಥ್ಯವನ್ನು ಅದು ಪ್ರದರ್ಶಿಸಿದೆ.

ಇತ್ತೀಚೆಗೆ ಅಮೆರಿಕದ ಪ್ರಮುಖ ವೈದ್ಯಕೀಯ ತಂತ್ರಜ್ಞಾನ ಕಂಪನಿ 'ಸ್ಟ್ರೈಕರ್' ಮೇಲೆ ನಡೆದ ಭಾರೀ ಸೈಬರ್ ದಾಳಿ ಜಾಗತಿಕ ಮಟ್ಟದಲ್ಲಿ ಆತಂಕಕ್ಕೆ ಕಾರಣವಾಗಿದೆ. ಕಚೇರಿಗೆ ಬಂದ ಉದ್ಯೋಗಿಗಳು ತಮ್ಮ ಸಿಸ್ಟಂಗಳಲ್ಲಿನ ಡೇಟಾ ಸಂಪೂರ್ಣವಾಗಿ ಅಳಿಸಲ್ಪಟ್ಟಿರುವುದನ್ನು ಕಂಡು ಬೆಚ್ಚಿಬಿದ್ದರು. ಸಿಸ್ಟಂಗಳಲ್ಲಿ ಉಳಿದಿದ್ದ ಏಕೈಕ ಗುರುತು 'ಹಂಝಲಾ' ಎಂಬ ಲೋಗೋ ಆಗಿತ್ತು.

ಈ ದಾಳಿ ಕೇವಲ ಕಂಪನಿಯ ಮಟ್ಟಕ್ಕೆ ಸೀಮಿತವಾಗದೆ, ಅಮೆರಿಕದ ಗುಪ್ತಚರ ಹಾಗೂ ಕಾನೂನು ಜಾರಿ ವ್ಯವಸ್ಥೆಯ ಪ್ರಮುಖ ಅಧಿಕಾರಿ ಕಾಶ್ ಪಟೇಲ್ ಅವರ ವೈಯಕ್ತಿಕ ಇಮೇಲ್ ಖಾತೆಯನ್ನೂ ಹ್ಯಾಕ್ ಮಾಡಲಾಗಿದೆ ಎಂಬ ಮಾಹಿತಿ ಹೊರಬಂದಿದೆ. ಇದರಿಂದ ಒಂದು ಹ್ಯಾಕರ್ ಗುಂಪು ಅಮೆರಿಕದ ಆಡಳಿತ ವ್ಯವಸ್ಥೆಯನ್ನೇ ಸವಾಲು ಹಾಕುವ ಮಟ್ಟಕ್ಕೆ ಬೆಳೆಯಬಹುದೇ ಎಂಬ ಪ್ರಶ್ನೆ ಉದ್ಭವಿಸಿದೆ.

1969ರಲ್ಲಿ ಫೆಲೆಸ್ತೀನ್ ವ್ಯಂಗ್ಯಚಿತ್ರಕಾರ ನಾಜಿ ಅಲ್-ಅಲಿ ಸೃಷ್ಟಿಸಿದ 10 ವರ್ಷದ ಬಾಲಕನ ಪಾತ್ರವೇ ಹಂಝಲಾ. ಸದಾ ಬೆನ್ನು ತಿರುಗಿಸಿ ನಿಂತಿರುವ ಈ ಪಾತ್ರವನ್ನು ಈಗ ಇರಾನ್ ಬೆಂಬಲಿತ ಹ್ಯಾಕರ್ ಗುಂಪು ತನ್ನ ಗುರುತಾಗಿ ಬಳಸಿಕೊಳ್ಳುತ್ತಿದೆ.

ಈ ಗುಂಪು ಮೊದಲ ಬಾರಿಗೆ ಗಮನ ಸೆಳೆದದ್ದು ಇಸ್ರೇಲ್-ಹಮಾಸ್ ಸಂಘರ್ಷದ ವೇಳೆ. ಅಕ್ಟೋಬರ್ 7ರ ದಾಳಿಯ ನಂತರ, ಇವರು ಇಸ್ರೇಲ್‌ ನ ಸರ್ಕಾರಿ ಕಚೇರಿಗಳು, ತಂತ್ರಜ್ಞಾನ ಸಂಸ್ಥೆಗಳು ಹಾಗೂ 'ಐರನ್ ಡೋಮ್' ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗೆ ಸಂಬಂಧಿಸಿದ ಕಂಪನಿಗಳ ಮೇಲೆ ದಾಳಿ ನಡೆಸಿದ್ದರು. ತುರ್ತು ಸಂದೇಶಗಳ ಸೋಗಿನಲ್ಲಿ ನಾಗರಿಕರ ಫೋನ್‌ ಗಳಿಗೆ ಲಿಂಕ್ ಕಳುಹಿಸಿ ಅವರ ಫೋಟೋಗಳು ಮತ್ತು ಸ್ಥಳ ಮಾಹಿತಿಯನ್ನು ಕಸಿಯುವ ತಂತ್ರವನ್ನು ಬಳಸಿಕೊಂಡಿದ್ದರು.

ಇದಲ್ಲದೆ, ಇಸ್ರೇಲ್‌ ನ ಪರಮಾಣು ಸಂಶೋಧನಾ ಕೇಂದ್ರದ ರಹಸ್ಯ ಮಾಹಿತಿ ಮತ್ತು ವಿಜ್ಞಾನಿಗಳ ವಿವರಗಳನ್ನು ಸೋರಿಕೆ ಮಾಡಿ ಸರ್ಕಾರವನ್ನು ಮುಜುಗರಕ್ಕೀಡಾಗಿಸಿದ್ದರು. ಇದೀಗ ಇದೇ ಗುಂಪು ಅಮೆರಿಕವನ್ನು ಗುರಿಯಾಗಿಸಿಕೊಂಡಿದೆ. ಸ್ಟ್ರೈಕರ್ ಕಂಪನಿಯ 80ಕ್ಕೂ ಹೆಚ್ಚು ಸಿಸ್ಟಂಗಳಿಂದ ಡೇಟಾ ಅಳಿಸುವುದು ಹಾಗೂ ಉದ್ಯೋಗಿಗಳ ವೈಯಕ್ತಿಕ ಫೋನ್‌ ಗಳನ್ನು ರಿಸೆಟ್ ಮಾಡಿರುವುದು ಇವರ ಸಾಮರ್ಥ್ಯವನ್ನು ತೋರಿಸುತ್ತದೆ.

ಇರಾನ್‌ ನ ಸೈಬರ್ ಪಡೆಗಳು ಅತ್ಯಂತ ಸಂಘಟಿತವಾಗಿ ಕಾರ್ಯನಿರ್ವಹಿಸುತ್ತವೆ. ಗುಪ್ತಚರ ಸಚಿವಾಲಯದ ಮಾರ್ಗದರ್ಶನದಲ್ಲಿ ಹಂಝಲಾ ಮೊದಲಾದ ಗುಂಪುಗಳು ಕಾರ್ಯಾಚರಣೆ ನಡೆಸುತ್ತಿವೆ ಎನ್ನಲಾಗಿದೆ. ದಾಳಿಯ ವಿಧಾನವೂ ಸೂಕ್ಷ್ಮವಾಗಿದೆ. 'ಮ್ಯಾಂಟಿಕೋರ್' ಎಂಬ ಹ್ಯಾಕರ್ ತಂಡ ಮೊದಲು ಗುರಿಯಾದ ಸಂಸ್ಥೆಯ ನೆಟ್‌ ವರ್ಕ್‌ ಗೆ ನುಗ್ಗಿ ದೀರ್ಘಕಾಲ ಗೂಢಚರ್ಯೆ ನಡೆಸುತ್ತದೆ. ಪಾಸ್‌ ವರ್ಡ್‌ ಗಳು, ಇಮೇಲ್‌ ಗಳು ಹಾಗೂ ಪ್ರಮುಖ ದಾಖಲೆಗಳನ್ನು ಸಂಗ್ರಹಿಸಿದ ಬಳಿಕ, ಆ ಮಾಹಿತಿಯನ್ನು ಹಂಝಲಾ ತಂಡಕ್ಕೆ ಹಸ್ತಾಂತರಿಸಲಾಗುತ್ತದೆ.

ನಂತರ ಹಂಝಲಾ ತಂಡ ಡೇಟಾವನ್ನು ಅಳಿಸುವುದು ಅಥವಾ ಸಿಸ್ಟಂ ಹಾನಿಗೊಳಿಸುವ ಕಾರ್ಯವನ್ನು ನಿರ್ವಹಿಸುತ್ತದೆ. ಇವರು ಸಾಮಾನ್ಯ ಹ್ಯಾಕರ್‌ ಗಳಂತೆ ಕೇವಲ ಮಾಲ್‌ವೇರ್ ಮೇಲೆ ಅವಲಂಬಿಸದೆ, ನೇರವಾಗಿ 'ಗ್ಲೋಬಲ್ ಅಡ್ಮಿನ್' ಖಾತೆಯನ್ನು ವಶಪಡಿಸಿಕೊಳ್ಳುವ ತಂತ್ರವನ್ನು ಅನುಸರಿಸುತ್ತಾರೆ. ಇದರಿಂದ ಸಿಸ್ಟಂನ ಎಲ್ಲಾ ಕ್ರಿಯೆಗಳು ಅಧಿಕೃತ ಖಾತೆಯಿಂದಲೇ ನಡೆದಂತಾಗುವುದರಿಂದ ಭದ್ರತಾ ವ್ಯವಸ್ಥೆಗೆ ದಾಳಿ ಗುರುತಿಸಲು ಕಷ್ಟವಾಗುತ್ತದೆ.

ಈ ಸೈಬರ್ ದಾಳಿಗಳು ಅಮೆರಿಕ ಅಥವಾ ಇಸ್ರೇಲ್‌ ಗೆ ಮಾತ್ರ ಸೀಮಿತವಾಗಿಲ್ಲ. ಯುರೋಪಿನ ಅಲ್ಬೇನಿಯಾ ದೇಶದೊಂದಿಗೆ ಇರಾನ್ ಸಂಬಂಧ ಹದಗೆಡುವುದಕ್ಕೂ ಇದೇ ಕಾರಣವಾಗಿದೆ. ಇರಾನ್ ವಿರೋಧಿ ಸಂಘಟನೆ ಅಲ್ಬೇನಿಯಾದಲ್ಲಿ ನೆಲೆಸಿರುವುದಕ್ಕೆ ಪ್ರತಿಯಾಗಿ, ಅಲ್ಲಿನ ಸರ್ಕಾರಿ ಸಂಸ್ಥೆಗಳ ಮೇಲೆ ದಾಳಿ ನಡೆದಿತ್ತು. ಇದರ ಪರಿಣಾಮವಾಗಿ ಅಲ್ಬೇನಿಯಾ ಇರಾನ್ ಜೊತೆಗಿನ ತನ್ನ ರಾಜತಾಂತ್ರಿಕ ಸಂಬಂಧಗಳನ್ನು ಸಂಪೂರ್ಣವಾಗಿ ಕಡಿದುಕೊಂಡಿದೆ.

ಹಿಂದೆ ಇಂತಹ ದಾಳಿಗಳನ್ನು ರಹಸ್ಯವಾಗಿಡಲು ಪ್ರಯತ್ನಿಸಿದ್ದ ಇರಾನ್, ಈಗ ಹಂಝಲಾ ಮೂಲಕ ಬಹಿರಂಗ ಸವಾಲು ಹಾಕುತ್ತಿದೆ. ಅಮೆರಿಕದ ಎಫ್‌ಬಿಐ ಈ ಹ್ಯಾಕರ್‌ ಗಳ ಬಗ್ಗೆ ಮಾಹಿತಿ ನೀಡಿದವರಿಗೆ 10 ಮಿಲಿಯನ್ ಡಾಲರ್ ಬಹುಮಾನ ಘೋಷಿಸಿದೆ. ಕಾಶ್ ಪಟೇಲ್ ಅವರ ಇಮೇಲ್ ಹ್ಯಾಕ್ ಪ್ರಕರಣವು ಅಮೆರಿಕದ ಭದ್ರತಾ ವ್ಯವಸ್ಥೆಯಲ್ಲಿನ ಗಂಭೀರ ಲೋಪವನ್ನು ಎತ್ತಿ ತೋರಿಸಿದೆ.

ಇರಾನ್‌ ನ ಹ್ಯಾಕರ್‌ ಗಳು ಚೀನಾ ಅಥವಾ ರಷ್ಯಾದ ಹ್ಯಾಕರ್‌ ಗಳಷ್ಟು ತಾಂತ್ರಿಕವಾಗಿ ಮುಂದುವರಿದವರಾಗಿರದಿರಬಹುದು. ಆದರೆ ಅವರ ಅನಿರೀಕ್ಷಿತ ಕಾರ್ಯಶೈಲಿ ಮತ್ತು ಒತ್ತಡದ ಸಂದರ್ಭಗಳಲ್ಲಿ ಕೈಗೊಳ್ಳುವ ಕ್ರಮಗಳು ಅವರನ್ನು ಹೆಚ್ಚು ಅಪಾಯಕಾರಿಗಳನ್ನಾಗಿ ಮಾಡಿವೆ.

ಇಂದಿನ ಯುದ್ಧಗಳು ಕೇವಲ ಗಡಿಗಳಲ್ಲಿ ನಡೆಯುವುದಿಲ್ಲ; ಅವು ಡಿಜಿಟಲ್ ಜಗತ್ತಿನಲ್ಲಿಯೂ ನಡೆಯುತ್ತಿವೆ. ಈ ಸೈಬರ್ ದಾಳಿಗಳು ಕೇವಲ ತಾಂತ್ರಿಕ ಹಾನಿಗಷ್ಟೇ ಸೀಮಿತವಾಗದೆ, ಮಾನಸಿಕ ಮತ್ತು ಆರ್ಥಿಕ ಒತ್ತಡವನ್ನು ಸೃಷ್ಟಿಸುವ ಉದ್ದೇಶವನ್ನು ಹೊಂದಿವೆ. ಖಾಸಗಿ ಕಂಪನಿಗಳ ಮಾಹಿತಿಯನ್ನು ಸೋರಿಕೆ ಮಾಡುವ ಮೂಲಕ ಅವುಗಳನ್ನು ಅಸ್ಥಿರಗೊಳಿಸುವುದು ಇದರ ಭಾಗವಾಗಿದೆ.

ಅಮೆರಿಕ ತನ್ನ ಸೇನಾ ಶಕ್ತಿಯನ್ನು ಇರಾನ್ ಗಡಿಯಲ್ಲಿ ಕೇಂದ್ರೀಕರಿಸುತ್ತಿದ್ದರೆ, ಇರಾನ್ ತನ್ನ ಸೈಬರ್ ಶಕ್ತಿಯನ್ನು ಅಮೆರಿಕದ ಒಳಾಂಗಣ ವ್ಯವಸ್ಥೆಗಳತ್ತ ಕೇಂದ್ರೀಕರಿಸಿದೆ. ಭವಿಷ್ಯದಲ್ಲಿ ಕ್ಷಿಪಣಿಗಳಿಗಿಂತಲೂ ಸೈಬರ್ ದಾಳಿಗಳೇ ಹೆಚ್ಚು ವಿನಾಶಕಾರಿ ಆಗಬಹುದು ಎಂಬ ಸೂಚನೆಯನ್ನು 'ಹಂಝಲಾ' ಗುಂಪು ನೀಡುತ್ತಿದೆ.

ಈ ಹಿನ್ನೆಲೆದಲ್ಲಿ ಅಂತರಾಷ್ಟ್ರೀಯ ಸಮುದಾಯದ ಮುಂದೆ ಹೊಸ ಸವಾಲು ಉದ್ಭವಿಸಿದೆ. ಕೇವಲ ಭೌಗೋಳಿಕ ಗಡಿಗಳ ರಕ್ಷಣೆಯಷ್ಟೇ ಅಲ್ಲದೆ, ಡಿಜಿಟಲ್ ಗಡಿಗಳ ಭದ್ರತೆಗೂ ಹೆಚ್ಚಿನ ಆದ್ಯತೆ ನೀಡಬೇಕಾದ ಅವಶ್ಯಕತೆ ಎದುರಾಗಿದೆ. ಅಮೆರಿಕ ಈ ಸೈಬರ್ ದಾಳಿಗಳನ್ನು ಹೇಗೆ ಎದುರಿಸುತ್ತದೆ ಮತ್ತು ಇರಾನ್ ಬೆಂಬಲಿತ ಹ್ಯಾಕರ್ ಜಾಲವನ್ನು ಹೇಗೆ ಮಟ್ಟಹಾಕುತ್ತದೆ ಎಂಬ ಕುತೂಹಲ ಮೂಡಿದೆ.