ಪ್ರಧಾನಿಯನ್ನು "ಬಾಲಾಕೋಟ್-ನೋಟು ರದ್ದತಿಯ ಮಾಂತ್ರಿಕ" ಎಂದ ರಾಹುಲ್ ಗಾಂಧಿ; ಲೋಕಸಭೆಯಲ್ಲಿ ಬಿಜೆಪಿಯಿಂದ ಗದ್ದಲ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರನ್ನು "ಬಾಲಾಕೋಟ್, ನೋಟು ರದ್ದತಿ ಮತ್ತು ಆಪರೇಷನ್ ಸಿಂಧೂರ್‌ ನ ಮಾಂತ್ರಿಕ" ಎಂದು ವ್ಯಂಗ್ಯವಾಡಿದ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ಹೇಳಿಕೆಗೆ ಲೋಕಸಭೆಯಲ್ಲಿ ಶುಕ್ರವಾರ ತೀವ್ರ ಗದ್ದಲ ಉಂಟಾಯಿತು.

ಬಿಜೆಪಿ ಸದಸ್ಯರು ತಕ್ಷಣ ಆಕ್ಷೇಪ ವ್ಯಕ್ತಪಡಿಸಿ ಸದನದ ಕಲಾಪಕ್ಕೆ ಅಡ್ಡಿಯಾಯಿತು.

ಮಹಿಳಾ ಮೀಸಲಾತಿ ಕಾನೂನು ಮತ್ತು ಕ್ಷೇತ್ರ ಮರುವಿಂಗಡಣೆ ಆಯೋಗದ ರಚನೆಗೆ ಸಂಬಂಧಿಸಿದ ತಿದ್ದುಪಡಿಗಳ ಕುರಿತ ಚರ್ಚೆಯಲ್ಲಿ ಭಾಗವಹಿಸಿದ ರಾಹುಲ್ ಗಾಂಧಿ, ಸರ್ಕಾರದ ಪ್ರಮುಖ ನಿರ್ಧಾರಗಳನ್ನು ಟೀಕಿಸಿದರು. 2019ರ ಬಾಲಾಕೋಟ್ ವಾಯುದಾಳಿ, 2016ರ ನೋಟು ರದ್ದತಿ ಹಾಗೂ "ಆಪರೇಷನ್ ಸಿಂಧೂರ್" ಅಡಿಯಲ್ಲಿ ನಡೆದ ಗಡಿಯಾಚೆಗಿನ ದಾಳಿಗಳನ್ನು ಉಲ್ಲೇಖಿಸಿದರು.

"ಈ ಮಸೂದೆ ಅಂಗೀಕಾರವಾಗುವುದಿಲ್ಲ ಎಂಬುದು ಸರ್ಕಾರಕ್ಕೆ ತಿಳಿದೇ ಇತ್ತು. ಪ್ರತಿಯೊಂದು ವಿರೋಧ ಪಕ್ಷವೂ ಇದನ್ನು ವಿರೋಧಿಸುತ್ತದೆ ಎಂಬುದು ಅವರಿಗೆ ಗೊತ್ತಿತ್ತು. ಸರ್ಕಾರ ಯೋಜಿತವಾಗಿ ಅಲ್ಲ, ಗಾಬರಿಯಿಂದ ಈ ಕ್ರಮ ತೆಗೆದುಕೊಂಡಿದೆ ಎಂದು ರಾಹುಲ್ ಗಾಂಧಿ ಹೇಳಿದರು.

"ಈ ಕ್ರಮದ ಮೂಲಕ ಕ್ಷೇತ್ರಗಳ ವಿನ್ಯಾಸ ಬದಲಿಸಿ ರಾಜಕೀಯ ಲಾಭ ಪಡೆಯಲು ಯತ್ನಿಸಲಾಗಿದೆ ಮತ್ತು ಪ್ರಧಾನಿಯನ್ನು ಮಹಿಳಾ ಪರ ನಾಯಕನಾಗಿ ತೋರಿಸುವ ಉದ್ದೇಶಗಳಿವೆ," ಎಂದು ಅವರು ಹೇಳಿದರು.

ಪ್ರಧಾನಿಯನ್ನು ನೇರವಾಗಿ ಹೆಸರಿಸದೆ, "ಬಾಲಾಕೋಟ್, ನೋಟು ರದ್ದತಿ ಮತ್ತು ಸಿಂಧೂರ್‌ ನ ಮಾಂತ್ರಿಕ ಈಗ ಬಹಿರಂಗಗೊಂಡಿದ್ದಾನೆ," ಎಂದು ರಾಹುಲ್ ಗಾಂಧಿ ವ್ಯಂಗ್ಯವಾಡಿದರು.

ಇದಕ್ಕೆ ತಕ್ಷಣ ಪ್ರತಿಕ್ರಿಯಿಸಿದ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು, "ಪ್ರಧಾನಿ ವಿರುದ್ಧ ಅನುಚಿತ ಪದ ಬಳಕೆ ಮಾಡಲಾಗಿದೆ. ಸಶಸ್ತ್ರ ಪಡೆಗಳ ಕಾರ್ಯಾಚರಣೆಗಳನ್ನು ಉಲ್ಲೇಖಿಸುವ ಮೂಲಕ ಅವುಗಳನ್ನು ಅವಮಾನಿಸಲಾಗಿದೆ," ಎಂದು ಆರೋಪಿಸಿದರು.

ರಕ್ಷಣಾ ಸಚಿವ ರಾಜನಾಥ್ ಸಿಂಗ್, "ಪ್ರಧಾನಿ ಬಗ್ಗೆ 'ಮಾಂತ್ರಿಕ' ಅಥವಾ 'ಜಾದೂಗಾರ' ಎಂಬ ಪದ ಬಳಕೆ ಆಕ್ಷೇಪಾರ್ಹ. ಇದು ದೇಶದ ಜನತೆಗೆ ಅವಮಾನ," ಎಂದು ಆ ಪದಗಳನ್ನು ದಾಖಲೆಗಳಿಂದ ತೆಗೆದುಹಾಕುವಂತೆ ಒತ್ತಾಯಿಸಿದರು.

ಮಧ್ಯಪ್ರವೇಶಿಸಿದ ಸ್ಪೀಕರ್ ಓಂ ಬಿರ್ಲಾ, "ಸದನದಲ್ಲಿ ಇಂತಹ ಪದ ಬಳಕೆ ಅನುಮತಿಸಲಾಗುವುದಿಲ್ಲ. ವಿಷಯದ ಮೇಲೆ ಗಮನಹರಿಸಿ," ಎಂದು ಸೂಚಿಸಿದರು. ಬಳಿಕ ರಾಹುಲ್ ಗಾಂಧಿ ಆ ಪದ ಬಳಸದೇ ಇರಲು ಒಪ್ಪಿಕೊಂಡರು.

ಬಿಜೆಪಿ ಸದಸ್ಯರ ಪ್ರತಿಭಟನೆಗಳ ನಡುವೆಯೇ ಗಾಂಧಿ ಪ್ರತಿಕ್ರಿಯಿಸಿ, "ನಾವು ಸರ್ಕಾರವನ್ನು ಮಾತ್ರ ಟೀಕಿಸುತ್ತಿದ್ದೇವೆ; ದೇಶ ಅಥವಾ ಸಶಸ್ತ್ರ ಪಡೆಗಳನ್ನು ಅಲ್ಲ. ನೀವು ಟೀಕೆಯಿಂದ ತಪ್ಪಿಸಿಕೊಳ್ಳಲು ಸಶಸ್ತ್ರ ಪಡೆಗಳ ಹೆಸರನ್ನು ಬಳಸುತ್ತಿದ್ದೀರಿ," ಎಂದು ಹೇಳಿದರು.

ಚರ್ಚೆಯ ವೇಳೆ ರಾಹುಲ್ ಗಾಂಧಿ, "ನಾವೆಲ್ಲರೂ ಮಹಿಳೆಯರಿಂದ ಕಲಿತಿದ್ದೇವೆ. ಆದರೆ ಪ್ರಧಾನಿ ಮತ್ತು ನನಗೆ ಹೆಂಡತಿ ಇಲ್ಲ," ಎಂದು ಹಾಸ್ಯವಾಗಿ ಹೇಳುತ್ತಿದ್ದಂತೆ ಸದನದಲ್ಲಿ ನಗೆ ಮೂಡಿತು.

ಮಹಿಳಾ ಮೀಸಲಾತಿ ಕಾನೂನಿನ ನಿಬಂಧನೆಗಳಲ್ಲಿ ಬದಲಾವಣೆ ತರಲು ಉದ್ದೇಶಿಸಿರುವ ಸಂವಿಧಾನ (131ನೇ ತಿದ್ದುಪಡಿ) ಮಸೂದೆ ಲೋಕಸಭೆಯಲ್ಲಿ ಪರಿಚಯಿಸಲಾಗಿದೆ. ಜೊತೆಗೆ, ಕ್ಷೇತ್ರ ಮರುವಿಂಗಡಣೆ ಮಸೂದೆ ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಸಂಬಂಧಿಸಿದ ತಿದ್ದುಪಡಿ ಮಸೂದೆಗಳನ್ನು ಕೂಡ ಮಂಡಿಸಲಾಗಿದೆ. ದಿಲ್ಲಿ, ಪುದುಚೇರಿ ಮತ್ತು ಜಮ್ಮು-ಕಾಶ್ಮೀರ ಸೇರಿದಂತೆ ಪ್ರದೇಶಗಳಲ್ಲಿ ಮಹಿಳಾ ಕೋಟಾ ಜಾರಿಗೆ ಸಂಬಂಧಿಸಿದ ಬದಲಾವಣೆಗಳು ಈ ಮಸೂದೆಗಳಲ್ಲಿ ಒಳಗೊಂಡಿವೆ.