ಕೊಹಿನೂರ್ ವಜ್ರವನ್ನು ಭಾರತಕ್ಕೆ ಹಸ್ತಾಂತರಿಸುವಂತೆ ಬ್ರಿಟನ್‌ನ ರಾಜ ಚಾರ್ಲ್ಸ್‌ಗೆ ಮನವಿ ಮಾಡುತ್ತೇನೆ: ನ್ಯೂಯಾರ್ಕ್ ಮೇಯರ್ ಝೊಹ್ರಾನ್ ಮಮ್ದಾನಿ

ನ್ಯೂಯಾರ್ಕ್: ನ್ಯೂಯಾರ್ಕ್ ನಗರದ ಮೇಯರ್ ಝೊಹ್ರಾನ್ ಮಮ್ದಾನಿ ಅವರು, ಬ್ರಿಟನ್‌ನ ರಾಜ ಚಾರ್ಲ್ಸ್ III ಅವರನ್ನು ಭೇಟಿಯಾದಲ್ಲಿ ಐತಿಹಾಸಿಕ ಕೊಹಿನೂರ್ ವಜ್ರವನ್ನು ಭಾರತಕ್ಕೆ ಹಸ್ತಾಂತರಿಸುವಂತೆ ಮನವಿ ಮಾಡುವುದಾಗಿ ಬುಧವಾರ ತಿಳಿಸಿದ್ದಾರೆ.

ಸೆಪ್ಟೆಂಬರ್ 11 ದಾಳಿಯ ಸಂತ್ರಸ್ತರ ಸ್ಮರಣಾರ್ಥ ಕಾರ್ಯಕ್ರಮಕ್ಕೂ ಮುನ್ನ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ವಿಷಯ ಅಧಿಕೃತ ಕಾರ್ಯಸೂಚಿಯ ಭಾಗವಾಗಿಲ್ಲದಿದ್ದರೂ, ಖಾಸಗಿ ಸಭೆಗೆ ಅವಕಾಶ ದೊರೆತರೆ ಪ್ರಸ್ತಾಪಿಸುವುದಾಗಿ ಹೇಳಿದರು.

"ರಾಜನೊಂದಿಗೆ ಪ್ರತ್ಯೇಕವಾಗಿ ಮಾತನಾಡುವ ಅವಕಾಶ ಸಿಕ್ಕರೆ, ಕೊಹಿನೂರ್ ವಜ್ರವನ್ನು ಹಿಂದಿರುಗಿಸುವಂತೆ ತಿಳಿಸುತ್ತೇನೆ," ಎಂದು ಹೇಳಿದರು.

ನಂತರ ನಡೆದ 9/11 ಸ್ಮಾರಕ ಕಾರ್ಯಕ್ರಮದಲ್ಲಿ ರಾಜ ಚಾರ್ಲ್ಸ್ ಮತ್ತು ಝೊಹ್ರಾನ್ ಮಮ್ದಾನಿ ಸಂಕ್ಷಿಪ್ತವಾಗಿ ಮಾತುಕತೆ ನಡೆಸಿದರು. ಆದರೆ, ಈ ವೇಳೆ ವಜ್ರದ ವಿಷಯ ಪ್ರಸ್ತಾಪವಾಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ. ಬಕಿಂಗ್‌ಹ್ಯಾಮ್ ಅರಮನೆಯು ಮಮ್ದಾನಿಯವರ ಹೇಳಿಕೆಗಳ ಕುರಿತು ಪ್ರತಿಕ್ರಿಯಿಸಲು ನಿರಾಕರಿಸಿದ್ದು, ಮೇಯರ್ ಕಚೇರಿಯೂ ಅವರ ನಡುವಿನ ಮಾತುಕತೆಯ ವಿವರಗಳನ್ನು ಬಹಿರಂಗಪಡಿಸಿಲ್ಲ.

ಕೊಹಿನೂರ್ 105.6 ಕ್ಯಾರೆಟ್ ತೂಕದ ವಜ್ರವಾಗಿದ್ದು, 1849ರಲ್ಲಿ ಲಾಹೋರ್ ಒಪ್ಪಂದದ ಬಳಿಕ ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪೆನಿಯ ವಶಕ್ಕೆ ಸೇರಿತ್ತು. ಈ ಒಪ್ಪಂದವು ಬಾಲ ರಾಜ ಮಹಾರಾಜ ದುಲೀಪ್ ಸಿಂಗ್ ಅವರನ್ನು ಶರಣಾಗುವಂತೆ ಮಾಡಿತ್ತು. ನಂತರ ಈ ವಜ್ರವು ಬ್ರಿಟಿಷ್ ಕಿರೀಟ ಆಭರಣಗಳ ಭಾಗವಾಗಿ ಪ್ರಸ್ತುತ ಲಂಡನ್ ಟವರ್‌ ನಲ್ಲಿ ಪ್ರದರ್ಶನದಲ್ಲಿದೆ.

ಭಾರತ ಸರಕಾರವು, ಈ ವಜ್ರವನ್ನು ಸಿಖ್ ಸಾಮ್ರಾಜ್ಯದ ರಾಜರಿಂದ ಬಲವಂತವಾಗಿ ಕಸಿದುಕೊಳ್ಳಲಾಗಿದೆ ಎಂದು ವಾದಿಸುತ್ತಿದ್ದು, ಅದನ್ನು ವಸಾಹತುಶಾಹಿ ಶೋಷಣೆಯ ಸಂಕೇತವೆಂದು ಪರಿಗಣಿಸಿ ಹಿಂತಿರುಗಿಸುವಂತೆ ದೀರ್ಘಕಾಲದಿಂದ ಒತ್ತಾಯಿಸುತ್ತಿದೆ. "ಇದು ನಮ್ಮ ರಾಷ್ಟ್ರದ ಇತಿಹಾಸದಲ್ಲಿ ಆಳವಾದ ಬೇರುಗಳನ್ನು ಹೊಂದಿರುವ ಅಮೂಲ್ಯ ಪರಂಪರೆ," ಎಂದು ಭಾರತವು ಹಿಂದೆಯೇ ಹೇಳಿದೆ.

ಆದರೆ, ಯುನೈಟೆಡ್ ಕಿಂಗ್‌ಡಂ ಸರಕಾರ 19ನೇ ಶತಮಾನದ ಒಪ್ಪಂದದ ಆಧಾರದ ಮೇಲೆ ತನ್ನ ಕಾನೂನುಬದ್ಧ ಹಕ್ಕನ್ನು ಮುಂದುವರಿಸಿಕೊಂಡಿದೆ. ಕೊಹಿನೂರ್ ವಜ್ರವು ಬ್ರಿಟಿಷರ ಕೈಗೆ ಸೇರುವ ಮೊದಲು ಮೊಘಲರು, ಪರ್ಷಿಯನ್ ಜನಪ್ರತಿನಿಧಿಗಳು ಹಾಗೂ ಆಫ್ಘನ್ ಆಡಳಿತಗಾರರ ಕೈಗಳಿಂದ ಹಾದುಹೋಗಿದ್ದು ಗಮನಾರ್ಹವಾಗಿದೆ.