ಹಸೀನಾ ಹಸ್ತಾಂತರಿಸದಿದ್ದರೆ ರಹಮಾನ್‌ ಭಾರತ ಭೇಟಿ ಇಲ್ಲ? ಬಾಂಗ್ಲಾದೇಶದಿಂದ ಷರತ್ತು

ನವದೆಹಲಿ: ಬಾಂಗ್ಲಾದೇಶದ ಪ್ರಧಾನಿ ತಾರಿಕ್‌ ರಹಮಾನ್‌ ಅವರ ಪ್ರಸ್ತಾವಿತ ಭಾರತ ಭೇಟಿಗೆ ಈಗ ಶೇಖ್‌ ಹಸೀನಾ ಹಸ್ತಾಂತರ ವಿಚಾರ ಅಡ್ಡಿಯಾಗಿದೆ. ಭಾರತವು ಹಸೀನಾ ಅವರನ್ನು ಬಾಂಗ್ಲಾದೇಶಕ್ಕೆ ಹಸ್ತಾಂತರಿಸುವಂತೆ ಢಾಕಾ ಒತ್ತಾಯಿಸಿದ್ದು, ಈ ಕುರಿತು ಭಾರತದಿಂದ ತ್ವರಿತ ಕ್ರಮ ಕೈಗೊಂಡರೆ ಮಾತ್ರ ರಹಮಾನ್‌ ಭೇಟಿಗೆ 'ಸೂಕ್ತ ವಾತಾವರಣ' ನಿರ್ಮಾಣವಾಗಲಿದೆ ಎಂದು ಬಾಂಗ್ಲಾದೇಶ ಹೇಳಿದೆ.

ರಹಮಾನ್‌ ಅವರು ಈ ವರ್ಷದ ಆರಂಭದಲ್ಲಿ ಬಾಂಗ್ಲಾದೇಶದ ಪ್ರಧಾನಿಯಾಗಿ ಅಧಿಕಾರ ಸ್ವೀಕರಿಸಿದ ಬಳಿಕ ಭಾರತಕ್ಕೆ ಇದು ಅವರ ಮೊದಲ ಭೇಟಿ ಆಗಬೇಕಿತ್ತು. ದ್ವಿಪಕ್ಷೀಯ ಸಂಬಂಧಕ್ಕೆ ಹೊಸ ಚೈತನ್ಯ ನೀಡುವ ನಿರೀಕ್ಷೆಯೂ ಇತ್ತು. ಆದರೆ ಹಸೀನಾ ವಿಚಾರ ಈಗ ಭೇಟಿಯ ಮೇಲೆ ಕರಿ ನೆರಳು ಬೀರಿದೆ.

ಬಾಂಗ್ಲಾದೇಶ ವಿದೇಶಾಂಗ ಸಚಿವಾಲಯದ ವಕ್ತಾರ ಎ.ಕೆ.ಎಂ. ಶಾಹಿದುಲ್‌ ಕರೀಂ, ಹಸೀನಾ ಸೇರಿದಂತೆ ಬಾಂಗ್ಲಾದೇಶದಲ್ಲಿ ಪ್ರಕರಣ ಎದುರಿಸುತ್ತಿರುವ ಆರೋಪಿಗಳನ್ನು ಹಸ್ತಾಂತರಿಸುವಂತೆ ಭಾರತಕ್ಕೆ ಮನವಿ ಮಾಡಲಾಗಿದೆ. ಭಾರತದ ಪ್ರತಿಕ್ರಿಯೆಗಾಗಿ ಕಾಯುತ್ತಿದ್ದೇವೆ ಎಂದು ಹೇಳಿದ್ದಾರೆ.

ಭಾರತದಲ್ಲೇ ಇರುವ ಹಸೀನಾ

2024ರ ಆಗಸ್ಟ್‌ನಲ್ಲಿ ಬಾಂಗ್ಲಾದೇಶದಲ್ಲಿ ವಿದ್ಯಾರ್ಥಿಗಳು ಮತ್ತು ಯುವಜನರ ಪ್ರತಿಭಟನೆ ತೀವ್ರಗೊಂಡ ಬಳಿಕ ಶೇಖ್‌ ಹಸೀನಾ ಅಧಿಕಾರ ಕಳೆದುಕೊಂಡು ಭಾರತಕ್ಕೆ ಬಂದಿದ್ದರು. ಅವರ ಅವಾಮಿ ಲೀಗ್‌ ಸರ್ಕಾರದ ವಿರುದ್ಧ ನಡೆದ ಪ್ರತಿಭಟನೆಗಳ ಸಂದರ್ಭದಲ್ಲಿ ಭದ್ರತಾ ಪಡೆಗಳ ಕ್ರಮಕ್ಕೆ ಸಂಬಂಧಿಸಿದ ಪ್ರಕರಣದಲ್ಲಿ ಬಾಂಗ್ಲಾದೇಶದ ನ್ಯಾಯಾಲಯವು ಕಳೆದ ವರ್ಷ ಅವರಿಗೆ ಮರಣದಂಡನೆ ವಿಧಿಸಿತ್ತು.

ಹಸೀನಾ ಅವರನ್ನು ಹಸ್ತಾಂತರಿಸುವಂತೆ ಬಾಂಗ್ಲಾದೇಶ ಹಲವು ಬಾರಿ ಭಾರತವನ್ನು ಒತ್ತಾಯಿಸಿದೆ. ಆದರೆ ಭಾರತವು ಅವರಿಗೆ ಆಶ್ರಯ ನೀಡಿರುವುದನ್ನು ತನ್ನ ದೀರ್ಘಕಾಲದ ಮಾನವೀಯ ಪರಂಪರೆಯ ಭಾಗವೆಂದು ಸಮರ್ಥಿಸಿಕೊಂಡಿದೆ.

ಆಗಸ್ಟ್‌ 5ರಂದು ನವದೆಹಲಿಯಲ್ಲಿ ನಡೆದ ಆನ್‌ಲೈನ್‌ ಮಾಧ್ಯಮ ಸಂವಾದದಲ್ಲಿ ಹಸೀನಾ ಡಿಸೆಂಬರ್‌ನಲ್ಲಿ ಬಾಂಗ್ಲಾದೇಶಕ್ಕೆ ಮರಳುವುದಾಗಿ ಹೇಳಿದ್ದರು. ಅವರ ಹೇಳಿಕೆ ಕೂಡ ಭಾರತ-ಬಾಂಗ್ಲಾದೇಶ ಸಂಬಂಧದಲ್ಲಿ ಮತ್ತೊಂದು ಸುತ್ತಿನ ಚರ್ಚೆಗೆ ಕಾರಣವಾಗಿತ್ತು.

ಭಾರತದ ನೆರವು ಪ್ರಸ್ತಾಪಿಸದ ರಹಮಾನ್‌

ಈ ನಡುವೆ ಬಾಂಗ್ಲಾದೇಶ ತೀವ್ರ ಇಂಧನ ಬಿಕ್ಕಟ್ಟನ್ನು ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಭಾರತ ನೀಡಿರುವ ನೆರವಿನ ಬಗ್ಗೆ ರಹಮಾನ್‌ ತಮ್ಮ ಭಾಷಣದಲ್ಲಿ ಪ್ರಸ್ತಾಪಿಸದೆ, ಚೀನಾ ಮತ್ತು ಮಲೇಷ್ಯಾದಿಂದ ದೊರೆಯುತ್ತಿರುವ ಇಂಧನ ಸಹಕಾರವನ್ನು ಉಲ್ಲೇಖಿಸಿರುವುದು ಗಮನ ಸೆಳೆದಿದೆ. 2026ರಲ್ಲಿ ಬಾಂಗ್ಲಾದೇಶಕ್ಕೆ 1.80 ಲಕ್ಷ ಟನ್‌ ಡೀಸೆಲ್‌ ಪೂರೈಸಲು ಭಾರತ ಒಪ್ಪಿಕೊಂಡಿದೆ. ಇದರಲ್ಲಿ 7,000 ಟನ್‌ ಡೀಸೆಲ್‌ ಅನ್ನು ಆಗಸ್ಟ್‌ 14ರಂದು ಬಾಂಗ್ಲಾದೇಶಕ್ಕೆ ಪೂರೈಸಲಾಗಿದೆ. ಆದರೆ ಇಂಧನ ಬಿಕ್ಕಟ್ಟಿನ ಕುರಿತು ಮಾತನಾಡಿದ ರಹಮಾನ್‌, ಚೀನಾ ಮತ್ತು ಮಲೇಷ್ಯಾದ ಸಹಕಾರವನ್ನು ಮಾತ್ರ ಪ್ರಸ್ತಾಪಿಸಿದರು.

ಇಂಧನಕ್ಕಾಗಿ ಚೀನಾ, ಭಾರತವೂ ಪ್ರಮುಖ

ದೇಶೀಯ ಅನಿಲ ಉತ್ಪಾದನೆ ಕುಸಿತ ಮತ್ತು ಎಲ್‌ಎನ್‌ಜಿ ಪೂರೈಕೆಯಲ್ಲಿನ ವ್ಯತ್ಯಯದಿಂದ ಬಾಂಗ್ಲಾದೇಶದ ಇಂಧನ ಬಿಕ್ಕಟ್ಟು ಮತ್ತಷ್ಟು ಗಂಭೀರವಾಗಿದೆ. ವಿದ್ಯುತ್‌ ಉತ್ಪಾದನೆ ಮತ್ತು ಕೈಗಾರಿಕಾ ಚಟುವಟಿಕೆಗಳ ಮೇಲೂ ಇದರ ಪರಿಣಾಮ ಬೀರಿದೆ.

ಬಾಂಗ್ಲಾದೇಶ ಮಲೇಷ್ಯಾದಿಂದ 34 ಸಾವಿರ ಟನ್‌ ಡೀಸೆಲ್‌ ಪಡೆದಿದೆ. ಚೀನಾದಿಂದಲೂ ಡೀಸೆಲ್‌ ಆಮದು ಮಾಡಿಕೊಳ್ಳುತ್ತಿದೆ. ಆದರೆ ಬಾಂಗ್ಲಾದೇಶದ ಇಂಧನ ವ್ಯವಸ್ಥೆಯಲ್ಲಿ ಭಾರತದ ಪಾತ್ರವೂ ದೊಡ್ಡದಿದೆ. ಭಾರತದಿಂದ ಬಾಂಗ್ಲಾದೇಶ 2,656 ಮೆಗಾವಾಟ್‌ ವಿದ್ಯುತ್‌ ಆಮದು ಮಾಡಿಕೊಳ್ಳುತ್ತಿದೆ. 2025ರಲ್ಲಿ ದೇಶದ ಒಟ್ಟು ವಿದ್ಯುತ್‌ ಪೂರೈಕೆಯಲ್ಲಿ ಭಾರತದ ಪಾಲು ಶೇ 15.6ರಷ್ಟಿತ್ತು.

ಚೀನಾದ ಹೆಜ್ಜೆ, ಭಾರತದ ಆತಂಕ

ರಹಮಾನ್‌ ಅವರ ಚೀನಾ ಪ್ರವಾಸದ ವೇಳೆ ಮೊಂಗ್ಲಾ ಬಂದರು ಆಧುನೀಕರಣಕ್ಕೆ ಸಂಬಂಧಿಸಿದ ಯೋಜನೆಗಳನ್ನು ಮುಂದುವರಿಸಲು ಎರಡೂ ದೇಶಗಳು ಒಪ್ಪಿಕೊಂಡಿದ್ದವು. ಬಂದರು ಸಮೀಪ ಆರ್ಥಿಕ ವಲಯ ಅಭಿವೃದ್ಧಿಪಡಿಸುವ ಯೋಜನೆಯನ್ನೂ ಚೀನಾದ ಸರ್ಕಾರಿ ಸಂಸ್ಥೆಯೊಂದು ಪಡೆದುಕೊಂಡಿದೆ.

ಬಾಂಗ್ಲಾದೇಶದಲ್ಲಿ ಚೀನಾದ ಪ್ರಭಾವ ಹೆಚ್ಚುತ್ತಿರುವುದು ನವದೆಹಲಿಗೆ ಆತಂಕದ ವಿಷಯವಾಗಿದೆ. ಮತ್ತೊಂದೆಡೆ, ಇಂಧನ ಬಿಕ್ಕಟ್ಟಿನ ಸಂದರ್ಭದಲ್ಲಿ ಭಾರತವು ವಿದ್ಯುತ್‌ ಮತ್ತು ಡೀಸೆಲ್‌ ಪೂರೈಕೆಯನ್ನು ಮುಂದುವರಿಸಿದೆ.

ರಹಮಾನ್‌ ಅವರ ಭಾರತ ಭೇಟಿ ಕುರಿತು ಯಾವುದೇ ಪ್ರಗತಿ ಕಾಣದಿದ್ದರೆ, ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗುವ ಮುಂದಿನ ಅವಕಾಶ ಸೆಪ್ಟೆಂಬರ್‌ನಲ್ಲಿ ನ್ಯೂಯಾರ್ಕ್‌ನಲ್ಲಿ ನಡೆಯಲಿರುವ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ಸಂದರ್ಭದಲ್ಲೇ ದೊರೆಯಬಹುದು.