ಭೀಕರ ಪ್ರವಾಹ: ವಿದೇಶಿ ರಕ್ಷಣಾ ತಂಡಗಳ ನೆರವು ನಿರಾಕರಿಸಿದ Nepal ಸರ್ಕಾರ

ಕಠ್ಮಂಡು: ಭೀಕರ ಹಠಾತ್ ಪ್ರವಾಹದಿಂದ 469 ಮಂದಿ ಮೃತಪಟ್ಟಿದ್ದು, ಸುಮಾರು 1,000 ಮಂದಿ ನಾಪತ್ತೆಯಾಗಿರುವ ಹಿನ್ನೆಲೆಯಲ್ಲಿ ಶೋಧ ಮತ್ತು ರಕ್ಷಣಾ ಕಾರ್ಯಕ್ಕೆ ನೆರವು ನೀಡಲು ಮುಂದಾದ ಹಲವು ದೇಶಗಳು ಹಾಗೂ ಅಂತರರಾಷ್ಟ್ರೀಯ ಸಂಸ್ಥೆಗಳ ಪ್ರಸ್ತಾವವನ್ನು ನೇಪಾಳ ಸರ್ಕಾರ ನಿರಾಕರಿಸಿದೆ. 

ದೇಶದ ಭದ್ರತಾ ಪಡೆಗಳೇ ಕಾರ್ಯಾಚರಣೆಯನ್ನು ಮುನ್ನಡೆಸಲು ಸಮರ್ಥವಾಗಿವೆ ಎಂದು ಸರ್ಕಾರ ತಿಳಿಸಿದೆ.

ನೇಪಾಳ-ಚೀನಾ ಗಡಿಯ ಸಮೀಪದ ಭೋಟೆಕೋಶಿ ಮತ್ತು ತ್ರಿಶೂಲಿ ನದಿಗಳಲ್ಲಿ ಬುಧವಾರ ಹಠಾತ್ ಪ್ರವಾಹ ಸಂಭವಿಸಿತ್ತು. ಪ್ರವಾಹದ ಬಳಿಕ ಮಣ್ಣು ಮತ್ತು ಅವಶೇಷಗಳ ನಡುವೆ ನಾಪತ್ತೆಯಾದವರಿಗಾಗಿ ಶೋಧ ಕಾರ್ಯ ಮುಂದುವರಿದಿದೆ.

ತಮ್ಮ ರಕ್ಷಣಾ ಸಿಬ್ಬಂದಿಯನ್ನು ನೇಪಾಳಕ್ಕೆ ಕಳುಹಿಸಲು ಅವಕಾಶ ನೀಡುವಂತೆ ಹಲವು ದೇಶಗಳು ಮತ್ತು ಅಂತರರಾಷ್ಟ್ರೀಯ ಸಂಸ್ಥೆಗಳು ನೇಪಾಳದ ವಿದೇಶಾಂಗ ಸಚಿವಾಲಯಕ್ಕೆ ಅಧಿಕೃತ ಹಾಗೂ ಅನಧಿಕೃತ ಮನವಿ ಸಲ್ಲಿಸಿದ್ದವು. ಆದರೆ, ನೇಪಾಳದ ಭದ್ರತಾ ಸಂಸ್ಥೆಗಳೇ ಕಾರ್ಯಾಚರಣೆಯ ನೇತೃತ್ವ ವಹಿಸಬೇಕು ಎಂದು ಸರ್ಕಾರ ನಿರ್ಧರಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

'ಚೀನಾ ಸೇರಿದಂತೆ ಇತರ ದೇಶಗಳಿಂದಲೂ ಇದೇ ರೀತಿಯ ಮನವಿಗಳು ಬಂದಿದ್ದವು. ಆದರೆ, ನಾವು ಅವುಗಳನ್ನು ನಿರಾಕರಿಸಬೇಕಾಯಿತು' ಎಂದು ವಿದೇಶಾಂಗ ಸಚಿವಾಲಯದ ಅಧಿಕಾರಿಯೊಬ್ಬರು 'ಕಠ್ಮಂಡು ಪೋಸ್ಟ್‌'ಗೆ ತಿಳಿಸಿದ್ದಾರೆ. ಇತರ ದೇಶಗಳ ರಕ್ಷಣಾ ಕಾರ್ಯಾಚರಣೆಯ ನೆರವು ಅಗತ್ಯವಿಲ್ಲ ಎಂದು ನೇಪಾಳದ ಅಧಿಕಾರಿಗಳು ರಾಯಿಟರ್ಸ್‌ಗೆ ತಿಳಿಸಿದ್ದಾರೆ.

2015ರ ಭೂಕಂಪದ ಅನುಭವ

2015ರ ಭೂಕಂಪದ ಬಳಿಕ ಹಲವು ವಿದೇಶಿ ರಕ್ಷಣಾ ತಂಡಗಳು ನೇಪಾಳಕ್ಕೆ ಆಗಮಿಸಿದ್ದವು. ಆ ತಂಡಗಳ ಕಾರ್ಯಾಚರಣೆಯನ್ನು ಸಮನ್ವಯಗೊಳಿಸುವುದು ಮತ್ತು ನಿರ್ವಹಿಸುವುದು ಕಷ್ಟವಾಗಿತ್ತು. ಈ ಅನುಭವದ ಹಿನ್ನೆಲೆಯಲ್ಲಿ ಈಗ ದೇಶದ ಭದ್ರತಾ ಸಂಸ್ಥೆಗಳೇ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಯನ್ನು ನಡೆಸಲು ಸರ್ಕಾರ ನಿರ್ಧರಿಸಿದೆ.

ವಿದೇಶಿ ರಕ್ಷಣಾ ತಂಡಗಳ ಬದಲಿಗೆ ಒಂದೇ ವ್ಯವಸ್ಥೆಯ ಮೂಲಕ ಹಣಕಾಸಿನ ನೆರವು ಪಡೆಯಲು ನೇಪಾಳ ಬಯಸಿದೆ. ಪುನರ್ವಸತಿ ಮತ್ತು ಪುನರ್‌ನಿರ್ಮಾಣದ ಹಂತದಲ್ಲಿ ಅಂತರರಾಷ್ಟ್ರೀಯ ನೆರವು ಪಡೆಯಲಾಗುವುದು ಎಂದು ಅಧಿಕಾರಿಗಳು ಹೇಳಿದ್ದಾರೆ.

4,348 ಸಿಬ್ಬಂದಿ ನಿಯೋಜನೆ

ನೇಪಾಳ ಪೊಲೀಸರು ಶುಕ್ರವಾರ ನೀಡಿದ ಮಾಹಿತಿ ಪ್ರಕಾರ, ಪ್ರವಾಹದಲ್ಲಿ 469 ಮಂದಿ ಮೃತಪಟ್ಟಿದ್ದು, 1,545 ಮಂದಿಯನ್ನು ರಕ್ಷಿಸಲಾಗಿದೆ. ಶೋಧ ಮತ್ತು ರಕ್ಷಣಾ ಕಾರ್ಯಕ್ಕಾಗಿ 4,348 ಪೊಲೀಸ್ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.

ರಸುವಾದಲ್ಲಿ 644, ನುವಕೋಟ್‌ ನಲ್ಲಿ 898 ಮತ್ತು ಧಾಡಿಂಗ್‌ನಲ್ಲಿ ಮೂವರನ್ನು ರಕ್ಷಿಸಲಾಗಿದೆ. ಸುಮಾರು 1,000 ಮಂದಿ ನಾಪತ್ತೆಯಾಗಿದ್ದು, ಅವರಲ್ಲಿ 28 ಪೊಲೀಸ್ ಸಿಬ್ಬಂದಿಯೂ ಇದ್ದಾರೆ ಎಂದು ವಿಪತ್ತು ನಿರ್ವಹಣಾ ಅಧಿಕಾರಿಗಳು ತಿಳಿಸಿದ್ದಾರೆ.

ವಿದೇಶಿ ಪ್ರಜೆಗಳೂ ನಾಪತ್ತೆ

ನಾಪತ್ತೆಯಾದವರಲ್ಲಿ ಹಲವು ದೇಶಗಳ ಪ್ರಜೆಗಳೂ ಇದ್ದಾರೆ. 'ಕಠ್ಮಂಡು ಪೋಸ್ಟ್‌' ವರದಿ ಪ್ರಕಾರ, 178 ಭಾರತೀಯರು, 65 ಅಮೆರಿಕನ್ನರು, 51 ಮಲೇಷಿಯನ್ನರು, 53 ಉಕ್ರೇನಿಯನ್ನರು, 33 ಬ್ರಿಟಿಷರು, 35 ಆಸ್ಟ್ರೇಲಿಯನ್ನರು ಮತ್ತು 25 ಕೆನಡಾದ ಪ್ರಜೆಗಳು ಇನ್ನೂ ಪತ್ತೆಯಾಗಿಲ್ಲ. ಇತರ ಹಲವು ದೇಶಗಳ ಡಝನ್‌ ಗಟ್ಟಲೆ ಪ್ರಜೆಗಳೂ ನಾಪತ್ತೆಯಾಗಿದ್ದಾರೆ.

ಕನಿಷ್ಠ 100 ಚೀನೀ ಪ್ರಜೆಗಳು ಸಂಪರ್ಕಕ್ಕೆ ಸಿಗುತ್ತಿಲ್ಲ ಎಂದು ಚೀನಾ ಅಧಿಕಾರಿಗಳು ತಿಳಿಸಿದ್ದಾರೆ.

ಹಣಕಾಸು, ಮಾನವೀಯ ನೆರವು ಸ್ವೀಕಾರ

ವಿದೇಶಿ ರಕ್ಷಣಾ ತಂಡಗಳ ನೆರವನ್ನು ತಿರಸ್ಕರಿಸಿರುವ ನೇಪಾಳ, ಅಂತರರಾಷ್ಟ್ರೀಯ ಹಣಕಾಸು ಮತ್ತು ಮಾನವೀಯ ನೆರವನ್ನು ಸ್ವೀಕರಿಸುತ್ತಿದೆ. ಅಮೆರಿಕವು 5 ಲಕ್ಷ ಡಾಲರ್‌ ನೆರವು ನೀಡುವುದಾಗಿ ಘೋಷಿಸಿದೆ. ವಿಶ್ವ ಆರೋಗ್ಯ ಸಂಸ್ಥೆ (WHO) ತುರ್ತು ವೈದ್ಯಕೀಯ ಸಾಮಗ್ರಿಗಳನ್ನು ಕಳುಹಿಸಿದೆ.

ಪ್ರವಾಹದಿಂದ ಸಂತ್ರಸ್ತರಾಗಿರುವ ವಿದೇಶಿ ಪ್ರಜೆಗಳಿಗೆ ಮಾಹಿತಿ ಒದಗಿಸುವುದು, ಶೋಧ ಮತ್ತು ರಕ್ಷಣಾ ಕಾರ್ಯಗಳನ್ನು ಸಮನ್ವಯಗೊಳಿಸುವುದು ಹಾಗೂ ಕಾನ್ಸುಲರ್ ನೆರವು ನೀಡುವ ಉದ್ದೇಶದಿಂದ ನೇಪಾಳದ ವಿದೇಶಾಂಗ ಸಚಿವಾಲಯವು ತುರ್ತು ನಿಯಂತ್ರಣ ಕೊಠಡಿಯನ್ನು ಸ್ಥಾಪಿಸಿದೆ.

ಪ್ರವಾಹದ ಪ್ರಮಾಣ ದೊಡ್ಡದಾಗಿದ್ದು, ನಾಪತ್ತೆಯಾದವರ ಪತ್ತೆ ಹಾಗೂ ಸಂತ್ರಸ್ತರ ರಕ್ಷಣೆಗೆ ಭದ್ರತಾ ಪಡೆಗಳು ನಿರಂತರವಾಗಿ ಕಾರ್ಯಾಚರಣೆ ನಡೆಸುತ್ತಿವೆ.