ಆಟಿಸಂ, ಸೆರೆಬ್ರಲ್ ಪಾಲ್ಸಿ ಇರುವವರಿಗೆ ನೀಡಿರುವ ಎಷ್ಟು ವಿಮಾ ಪಾಲಿಸಿಗಳೆಷ್ಟು?: ಕೇಂದ್ರದಿಂದ ಮಾಹಿತಿ ಕೇಳಿದ ಸುಪ್ರೀಂ ಕೋರ್ಟ್

ನವದೆಹಲಿ: ಆಟಿಸಂ, ಸೆರೆಬ್ರಲ್ ಪಾಲ್ಸಿ, ಬೌದ್ಧಿಕ ವಿಕಲತೆ ಮತ್ತು ಬಹು-ವಿಕಲತೆ ಹೊಂದಿರುವವರಿಗೆ ವಿಮಾ ಕಂಪೆನಿಗಳು ನೀಡಿರುವ ಜೀವ ವಿಮಾ ಪಾಲಿಸಿಗಳ ಕುರಿತು ಮಾಹಿತಿ ನೀಡುವಂತೆ ಸುಪ್ರೀಂ ಕೋರ್ಟ್ ಭಾರತದ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರಕ್ಕೆ (IRDAI) ಸೂಚಿಸಿದೆ ಎಂದು livelaw.in ವರದಿ ಮಾಡಿದೆ.

ವಿಕಲತೆ ಹೊಂದಿರುವವರ ಹಕ್ಕುಗಳನ್ನು ರಕ್ಷಿಸುವಲ್ಲಿ ವ್ಯವಸ್ಥಿತ ವೈಫಲ್ಯಗಳಿವೆ ಎಂದು ಆರೋಪಿಸಿ ಸಲ್ಲಿಸಿರುವ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ (PIL) ವಿಚಾರಣೆ ವೇಳೆ ನ್ಯಾಯಮೂರ್ತಿ ಬಿ.ವಿ. ನಾಗರತ್ನ ಮತ್ತು ನ್ಯಾಯಮೂರ್ತಿ ಆರ್. ಮಹಾದೇವನ್ ಅವರ ಪೀಠ ಈ ಸೂಚನೆ ನೀಡಿದೆ.

ಆಟಿಸಂ, ಸೆರೆಬ್ರಲ್ ಪಾಲ್ಸಿ, ಬೌದ್ಧಿಕ ವಿಕಲತೆ ಮತ್ತು ಬಹು-ವಿಕಲತೆ ಹೊಂದಿರುವವರಿಗೆ ಸಾರ್ವಜನಿಕ ಹಾಗೂ ಖಾಸಗಿ ವಿಮಾ ಕಂಪೆನಿಗಳು ಎಷ್ಟು ಜೀವ ವಿಮಾ ಪಾಲಿಸಿಗಳನ್ನು ನೀಡಿವೆ ಎಂಬ ಮಾಹಿತಿಯನ್ನು ಸಂಗ್ರಹಿಸಿ ನ್ಯಾಯಾಲಯಕ್ಕೆ ಸಲ್ಲಿಸುವಂತೆ IRDAIಗೆ ಸೂಚಿಸಲಾಗಿದೆ.

ಈ ಮಾಹಿತಿಯನ್ನು ನವೆಂಬರ್ 19ರಂದು ನಡೆಯುವ ಮುಂದಿನ ವಿಚಾರಣೆಯೊಳಗೆ ಸಲ್ಲಿಸಬೇಕು.

ವಿಕಲಚೇತನರು ಮತ್ತು ಮಾನಸಿಕ ಅಸ್ವಸ್ಥತೆ ಹೊಂದಿರುವವರಿಗೆ ವಿಮಾ ರಕ್ಷಣೆ ನೀಡುವಂತೆ ನಿಯಮಗಳಿದ್ದರೂ, ಆಟಿಸಂ ಹೊಂದಿರುವವರಿಗೆ ವಾಸ್ತವದಲ್ಲಿ ವಿಮಾ ರಕ್ಷಣೆ ಇಲ್ಲ ಅಥವಾ ಅದು ಅಸಮರ್ಪಕವಾಗಿದೆ ಎಂದು ಅರ್ಜಿದಾರರು ಉಲ್ಲೇಖಿಸಿದ್ದಾರೆ.

ವಿಚಾರಣೆ ವೇಳೆ IRDAI ಪರ ವಕೀಲರು ವಿಕಲಚೇತನರು ಮತ್ತು ಮಾನಸಿಕ ಅಸ್ವಸ್ಥತೆ ಹೊಂದಿರುವವರಿಗೆ ವಿಮಾ ರಕ್ಷಣೆ ಕುರಿತು ನಿಯಂತ್ರಕರು ಹೊರಡಿಸಿರುವ ಸುತ್ತೋಲೆಗಳನ್ನು ನ್ಯಾಯಾಲಯದ ಗಮನಕ್ಕೆ ತಂದರು. ಬಳಿಕ, ಸಂಬಂಧಪಟ್ಟವರಿಗೆ ನೀಡಿರುವ ಜೀವ ವಿಮಾ ಪಾಲಿಸಿಗಳ ಸಂಖ್ಯೆಯ ಮಾಹಿತಿಯನ್ನು ಸಲ್ಲಿಸುವಂತೆ ನ್ಯಾಯಾಲಯ ಸೂಚಿಸಿತು.

ಆಟಿಸಂ, ಡಿಸ್ಲೆಕ್ಸಿಯಾ ಮತ್ತು ADHD ಸೇರಿದಂತೆ ನರವೈವಿಧ್ಯತೆಯ ಸ್ಥಿತಿಗಳನ್ನು ಹೊಂದಿರುವವರ ಹಕ್ಕುಗಳನ್ನು ರಕ್ಷಿಸುವಲ್ಲಿ ನಿರಂತರ ನಿರ್ಲಕ್ಷ್ಯ, ಸಾಂಸ್ಥಿಕ ನಿರಾಸಕ್ತಿ ಮತ್ತು ವೈಫಲ್ಯ ಇದೆ ಎಂದು ಅರ್ಜಿದಾರರು ಆರೋಪಿಸಿದ್ದಾರೆ.

ರಾಷ್ಟ್ರೀಯ ಟ್ರಸ್ಟ್ ಕಾಯ್ದೆ, 1999; ಅಂಗವಿಕಲ ವ್ಯಕ್ತಿಗಳ ಹಕ್ಕುಗಳ ಕಾಯ್ದೆ, 2016; ಮಾನಸಿಕ ಆರೋಗ್ಯ ಕಾಯ್ದೆ, 2017 ಹಾಗೂ ರಾಷ್ಟ್ರೀಯ ಟ್ರಸ್ಟ್ (ತಿದ್ದುಪಡಿ) ಕಾಯ್ದೆ, 2018ರ ಅನುಷ್ಠಾನದಲ್ಲೂ ಸಮಸ್ಯೆಗಳಿವೆ ಎಂದು ಅವರು ಹೇಳಿದ್ದಾರೆ.

ಈ ಕಾನೂನುಗಳು ಜಾರಿಯಲ್ಲಿದ್ದರೂ, ಮಾನಸಿಕ ಆರೋಗ್ಯ ಸೇವೆಗಳಿಗೆ ಅಗತ್ಯ ಮೂಲಸೌಕರ್ಯ, ಹಣಕಾಸು ಮತ್ತು ಸೌಲಭ್ಯಗಳ ಕೊರತೆ ಇದೆ. ಈ ಬಗ್ಗೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವ ಕೆಲಸವೂ ಸಮರ್ಪಕವಾಗಿ ನಡೆಯುತ್ತಿಲ್ಲ ಎಂದು ಅರ್ಜಿಯಲ್ಲಿ ಹೇಳಲಾಗಿದೆ.

ಅಲ್ಲದೆ, ಪುನರ್ವಸತಿ ಕೇಂದ್ರಗಳ ಸಂಖ್ಯೆ ಕಡಿಮೆ ಇದೆ. ಸಮುದಾಯದ ಮಟ್ಟದಲ್ಲೂ ಅಗತ್ಯ ಪುನರ್ವಸತಿ ಸೇವೆಗಳು ಸಮರ್ಪಕವಾಗಿ ಲಭ್ಯವಿಲ್ಲ. ಈ ಎಲ್ಲ ಸಮಸ್ಯೆಗಳ ಜೊತೆಗೆ, ನರವೈವಿಧ್ಯತೆಯ ಸ್ಥಿತಿಗಳ ಬಗ್ಗೆ ಇರುವ ಸಾಮಾಜಿಕ ಕಳಂಕ ಮತ್ತು ಸರ್ಕಾರಿ ಸಂಸ್ಥೆಗಳ ನಿರಾಸಕ್ತಿ ಪುನರ್ವಸತಿ ಹಾಗೂ ಸಮಾಜದ ಮುಖ್ಯವಾಹಿನಿಗೆ ಸೇರುವ ಪ್ರಕ್ರಿಯೆಗೆ ಅಡ್ಡಿಯಾಗುತ್ತಿವೆ ಎಂದು ಅರ್ಜಿದಾರರು ಆರೋಪಿಸಿದ್ದಾರೆ.

ವಿಮಾನ ಪ್ರಯಾಣ, ರೈಲ್ವೆ ಮತ್ತು ಮಹಾನಗರಗಳಲ್ಲಿ ನರ-ಡೈವರ್ಜೆಂಟ್ ವ್ಯಕ್ತಿಗಳು ಎದುರಿಸುತ್ತಿರುವ ಸಮಸ್ಯೆಗಳನ್ನೂ ಅರ್ಜಿ ಉಲ್ಲೇಖಿಸಿದೆ.

ಸಂವೇದನಾ ಸ್ನೇಹಿ ಮೂಲಸೌಕರ್ಯ ಮತ್ತು ತರಬೇತಿ ಪಡೆದ ಸಿಬ್ಬಂದಿಯ ಕೊರತೆ, ರೋಗನಿರ್ಣಯ ಮತ್ತು ಆರಂಭಿಕ ಹಸ್ತಕ್ಷೇಪದಲ್ಲಿನ ಅಂತರ, ಅಂತರ್ಗತ ಶಿಕ್ಷಣ ನೀತಿಗಳ ಅನುಷ್ಠಾನದ ಕೊರತೆ ಹಾಗೂ ವಿಶಿಷ್ಟ ಅಂಗವೈಕಲ್ಯ ಗುರುತಿನ (UDID) ಪ್ರಮಾಣಪತ್ರ ಪಡೆಯುವಲ್ಲಿನ ಸಮಸ್ಯೆಗಳಿವೆ ಎಂದು ಅರ್ಜಿಯಲ್ಲಿ ಹೇಳಲಾಗಿದೆ.

ನರ-ಡೈವರ್ಜೆಂಟ್ ವ್ಯಕ್ತಿಗಳನ್ನು CSR-ನಿಧಿಯ ಉದ್ಯೋಗ ಯೋಜನೆಗಳಿಂದ ಹೊರಗಿಡಲಾಗುತ್ತದೆ ಎಂದು ಅರ್ಜಿಯಲ್ಲಿ ಆರೋಪಿಸಲಾಗಿದೆ. ಶಾಶ್ವತ ಉದ್ಯೋಗದ ಬದಲಿಗೆ ತಾತ್ಕಾಲಿಕ ಇಂಟರ್ನ್ ಶಿಪ್ ಗಳನ್ನು ನೀಡಲಾಗುತ್ತದೆ ಎಂದೂ ಉಲ್ಲೇಖಿಸಲಾಗಿದೆ.

ADHD ಅಥವಾ ಆಟಿಸಂ ಇರುವ ವಿದ್ಯಾರ್ಥಿಗಳಿಗೆ ಅಗತ್ಯ ಸೌಲಭ್ಯಗಳನ್ನು ನೀಡುವ ಬದಲು ಖಾಸಗಿ ಶಾಲೆಗಳು ಅವರನ್ನು ಹೊರಗಿಡುತ್ತವೆ ಅಥವಾ ಶಾಲೆ ಬಿಡುವಂತೆ ಒತ್ತಡ ಹೇರುತ್ತವೆ ಎಂಬ ಆರೋಪವನ್ನೂ ಅರ್ಜಿ ಮಾಡಿದೆ.

ನರ-ಡೈವರ್ಜೆಂಟ್ ವ್ಯಕ್ತಿಗಳಿಗೆ ಗುರುತಿಸುವಿಕೆ, ಮಾನಸಿಕ ಆರೋಗ್ಯ ರಕ್ಷಣೆ, ಚಿಕಿತ್ಸೆ, ಪುನರ್ವಸತಿ, ವಸತಿ ಬೆಂಬಲ ಮತ್ತು ವಿಮಾ ರಕ್ಷಣೆಯನ್ನು ಒಳಗೊಂಡ ಸಮಗ್ರ ರಾಷ್ಟ್ರೀಯ ನೀತಿ ರೂಪಿಸಲು ನಿರ್ದೇಶನ ನೀಡುವಂತೆ ಅರ್ಜಿದಾರರು ಕೋರಿದ್ದಾರೆ.

ಕಾನೂನು ಜಾರಿ, ವಾಯುಯಾನ, ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರಗಳ ಸಿಬ್ಬಂದಿಗೆ ಕಡ್ಡಾಯ ತರಬೇತಿ ನೀಡಬೇಕು. UDID ಪ್ರಮಾಣೀಕರಣ ಪ್ರಕ್ರಿಯೆ ಸರಳಗೊಳಿಸಬೇಕು ಮತ್ತು ಹೆಚ್ಚಿನ ಪ್ರಮಾಣೀಕರಣ ಕೇಂದ್ರಗಳನ್ನು ಸ್ಥಾಪಿಸಬೇಕು ಎಂದು ಕೋರಲಾಗಿದೆ.

ಸಮಗ್ರ ಶಿಕ್ಷಣ ಕ್ರಮಗಳು, ಸಮುದಾಯ ಆಧಾರಿತ ಮಾನಸಿಕ ಆರೋಗ್ಯ ಸೌಲಭ್ಯಗಳು, ವಿಮಾನ ನಿಲ್ದಾಣಗಳು ಮತ್ತು ಸಾರಿಗೆ ಕೇಂದ್ರಗಳಲ್ಲಿ ಸಂವೇದನಾ ಸ್ನೇಹಿ ಮೂಲಸೌಕರ್ಯ, ಜಿಲ್ಲಾ ಮಟ್ಟದ ಮೇಲ್ವಿಚಾರಣಾ ಸಮಿತಿಗಳು, ಪ್ರತ್ಯೇಕ ಮಾನಸಿಕ ಆರೋಗ್ಯ ಬಜೆಟ್ ಮತ್ತು 24/7 ಸಹಾಯವಾಣಿಗಳನ್ನು ಸ್ಥಾಪಿಸುವಂತೆಯೂ ಮನವಿ ಮಾಡಲಾಗಿದೆ.

ಈ ಪ್ರಕರಣದ ಮುಂದಿನ ವಿಚಾರಣೆ ನವೆಂಬರ್ 19, 2026ರಂದು ನಡೆಯಲಿದೆ.