ಗೂಗಲ್ ಕ್ರೋಮ್‌ನಿಂದ ಸದ್ದಿಲ್ಲದೆ 4GB AI ಮಾಡೆಲ್ ಇನ್‌ಸ್ಟಾಲ್; ಇದನ್ನು ಡಿಲೀಟ್ ಮಾಡುವುದು ಹೇಗೆ?

 ಗೂಗಲ್ ಕ್ರೋಮ್ ಬಳಕೆದಾರರು ತಮ್ಮ ಕಂಪ್ಯೂಟರ್ನಲ್ಲಿ ಅನಿರೀಕ್ಷಿತವಾಗಿ 4GB ಫೈಲ್ ಹೊಂದಿರಬಹುದು.

ಏಕೆಂದರೆ ಕಂಪನಿಯು ಆನ್-ಡಿವೈಸ್ AI ಫೀಚರ್ಗಳನ್ನು ಬಿಡುಗಡೆ ಮಾಡುತ್ತಿದೆ. 

ಜೆಮಿನಿ ನ್ಯಾನೋ ಎಂದು ಕರೆಯಲಾಗುವ ಈ ಫೈಲ್ ಕ್ಲೌಡ್ ಸರ್ವರ್ಗಳನ್ನು ಸಂಪೂರ್ಣವಾಗಿ ಅವಲಂಬಿಸುವ ಬದಲು ಬಳಕೆದಾರರ ಸಾಧನಗಳಲ್ಲಿ ನೇರವಾಗಿ ಕಾರ್ಯನಿರ್ವಹಿಸುವ ಕಾಂಪ್ಯಾಕ್ಟ್ AI ಮಾದರಿಯಾಗಿದೆ. ಪ್ರೈವಸಿ ಸಂಶೋಧಕರ ಪ್ರಕಾರ ಕ್ರೋಮ್ ಸ್ಪಷ್ಟವಾದ ನೋಟಿಫಿಕೇಶನ್ ಅಥವಾ ಒಪ್ಪಿಗೆ ಪ್ರಾಂಪ್ಟ್ ನೀಡದೆಯೇ ಅರ್ಹ ಕಂಪ್ಯೂಟರ್ಗಳಿಗೆ ಸದ್ದಿಲ್ಲದೆ ಮಾದರಿಯನ್ನು ಡೌನ್ಲೋಡ್ ಮಾಡುತ್ತಿದೆ.

ಜೆಮಿನಿ ನ್ಯಾನೋ ಪಠ್ಯ ಸಹಾಯ, ವಿಷಯ ಸಾರಾಂಶ, ಸ್ಕ್ಯಾಮ್ ಪತ್ತೆ ಮತ್ತು ಸಾಧನಗಳಲ್ಲಿ ಸ್ಥಳೀಯವಾಗಿ ಕೆಲಸ ಮಾಡಲು ವಿನ್ಯಾಸಗೊಳಿಸಲಾದ ಇತರ ಫೀಚರ್ಗಳನ್ನು ಒಳಗೊಂಡಂತೆ AI ಚಾಲಿತ ಸಾಮರ್ಥ್ಯವನ್ನು ಹೊಂದಿದೆ. ಗೂಗಲ್ ಹೇಳುವ ಪ್ರಕಾರ, "ಸಾಧನಗಳಲ್ಲಿ ಕಾರ್ಯಗಳನ್ನು ಪ್ರಕ್ರಿಯೆಗೊಳಿಸುವುದರಿಂದ ವೇಗವನ್ನು ಸುಧಾರಿಸಬಹುದು. ಇಂಟರ್ನೆಟ್ ಸಂಪರ್ಕದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಬಹುದು ಮತ್ತು ಕೆಲವು ಕಾರ್ಯಗಳಿಗೆ ಗೌಪ್ಯತೆ ಹೆಚ್ಚಿಸಬಹುದು".

ಆದರೆ ಈ ಇನ್ಸ್ಟಾಲೇಶನ್ ಕುರಿತಂತೆ ಪ್ರೈವಸಿ ಪರ ವಾದ ಮಾಡುವವರು ಟೀಕಿಸುತ್ತಿದ್ದಾರೆ. ಬಹಳಷ್ಟು ಬಳಕೆದಾರರಿಗೆ ಈ ಸಾಫ್ಟ್ವೇರ್ ತಮ್ಮ ಡಿವೈಸ್ಗೆ ಡೌನ್ಲೋಡ್ ಆಗಿರುವುದೇ ತಿಳಿದಿಲ್ಲ. AI ಮಾಡೆಲ್ ಅನ್ನು weights.bin ಎಂದು ಕರೆಯಲಾಗುವ ಫೈಲ್ನಲ್ಲಿ ಸಂಗ್ರಹಿಸಿಡಲಾಗಿದೆ. ಅದು ನಿಮ್ಮ ಸಿಸ್ಟಂನಲ್ಲಿ ಸುಮಾರು 4ಜಿಬಿ ಸ್ಟೋರೇಜ್ ಸ್ಪೇಸ್ ಬಳಸುತ್ತದೆ.

ನಿರ್ದಿಷ್ಟ ಹಾರ್ಡ್ವೇರ್ ಅವಶ್ಯಕತೆ ಪೂರೈಸುವ ಸಾಧನಗಳಲ್ಲಿ ಮಾತ್ರ ಈ ಮಾದರಿಯನ್ನು ಇನ್ಸ್ಟಾಲ್ ಮಾಡಲಾಗುತ್ತಿದೆ. ಸಿಸ್ಟಮ್ನಲ್ಲಿ ಸ್ಟೋರೇಜ್, ಮೆಮೊರಿ, ಪ್ರೊಸೆಸಿಂಗ್ ಪವರ್ ಅಥವಾ ನೆಟ್ವರ್ಕ್ ಸಂಪನ್ಮೂಲಗಳು ಇಲ್ಲದೆ ಇದ್ದರೆ ಸ್ವಯಂಚಾಲಿತವಾಗಿ ತೆಗೆದು ಹಾಕಬಹುದು ಎಂದು ಗೂಗಲ್ ಹೇಳುತ್ತದೆ. ಗೂಗಲ್ on-device AI ಕಾರ್ಯವನ್ನು ನಿಷ್ಕ್ರಿಯಗೊಳಿಸಲು ಅನುಮತಿಸುವ ಸೆಟ್ಟಿಂಗ್ಗಳನ್ನೂ ಸಹ ಪರಿಚಯಿಸಿದೆ.

ಜೆಮಿನಿ ನ್ಯಾನೋ ಇನ್ಸ್ಟಾಲ್ ಆಗಿರುವುದನ್ನು ಪರೀಕ್ಷಿಸುವುದು ಹೇಗೆ?

ಮ್ಯಾಕ್ ಬಳಕೆದಾರರು Finder ತೆರೆಯಿರಿ, Library > ಗೆ ಹೋಗಿ; Application Support > Google > Chrome > Default ಗೆ ಹೋಗಿ OptGuideOnDeviceModel ಫೋಲ್ಡರ್ ಹುಡುಕಿ. ಅಲ್ಲಿ ನಿಮಗೆ weights.bin ಕಂಡುಬಂದಲ್ಲಿ ಜೆಮಿನಿ ನ್ಯಾನೋ ಇನ್ಸ್ಟಾಲ್ ಆಗಿದೆ ಎಂದು ತಿಳಿದುಕೊಳ್ಳಬೇಕು.

ವಿಂಡೋಸ್ ಬಳಕೆದಾರರು ಹೇಗೆ ಕಂಡುಹಿಡಿಯುವುದು?

ವಿಂಡೋಸ್ ಬಳಕೆದಾರರು Windows + R ಪ್ರೆಸ್ ಮಾಡಿದ ನಂತರ %LOCALAPPDATA%\Google\Chrome\User Data\OptGuideOnDeviceModel ಗೆ ಹೋಗಿ. ಫೈಲ್ ಎಕ್ಸ್ಪ್ಲೋರರ್ ಮೂಲಕವೂ ಪರ್ಯಾಯವಾಗಿ weights.bin ಫೈಲ್ ಇದೆಯೇ ಎಂದು ಗಮನಿಸಬಹುದು.

AI ಮಾಡೆಲ್ ತೆಗೆಯುವುದು ಹೇಗೆ?

ಮ್ಯಾಕ್ನಲ್ಲಿ ಜೆಮಿನಿ ನ್ಯಾನೋ ತೆಗೆಯಲು ಕ್ರೋಮ್ ತೆರೆಯಬೇಕು ಮತ್ತು Settings > System ಗೆ ಹೋಗಿ On-device AI ಅನ್ನು ಸ್ವಿಚ್ ಆಫ್ ಮಾಡಿ.

ವಿಂಡೋಸ್ ಬಳಕೆದಾರರು ಹೆಚ್ಚುವರಿ ಹಂತಗಳನ್ನು ಅನುಸರಿಸಬೇಕು:

• ಕ್ರೋಮ್ ತೆರೆದು Settings > System ಗೆ ಹೋಗಿ.

• On-device AI ಗೆ ಹೋಗಿ.

• chrome://flags ಎಂದು ಅಡ್ರೆಸ್ ಬಾರ್ನಲ್ಲಿ ಟೈಪ್ ಮಾಡಿ.

• Optimisation Guide ಅನ್ನು ಹುಡುಕಿ.

• Optimisation Guide on Device ಅನ್ನು Disabled ಮಾಡಿ.

• ಕ್ರೋಮ್ ಅನ್ನು ಪೂರ್ಣವಾಗಿ ಮರು ಪ್ರಾರಂಭಿಸಿ.

• ನಂತರ Chrome user data folder ಗೆ ಹೋಗಿ ಮತ್ತು OptGuideOnDeviceModel ಡೈರೆಕ್ಟರಿಯನ್ನು ಡಿಲೀಟ್ ಮಾಡಿ.

ಈ ವಿವಾದವು AI ಉದ್ಯಮದಲ್ಲಿ ವ್ಯಾಪಕ ಬದಲಾವಣೆಯನ್ನು ಎತ್ತಿ ತೋರಿಸುತ್ತದೆ. ತಂತ್ರಜ್ಞಾನ ಕಂಪನಿಗಳು AI ಪ್ರೊಸೆಸಿಂಗ್ ಕ್ಲೌಡ್ ಸರ್ವರ್ಗಳಿಂದ ಬಳಕೆದಾರರ ಸ್ವಂತ ಸಾಧನಗಳಿಗೆ ಹೆಚ್ಚಾಗಿ ವರ್ಗಾಯಿಸುತ್ತಿದೆ. ಮೂಲ ಸೌಕರ್ಯ ವೆಚ್ಚ ಕಡಿಮೆ ಮಾಡುವ ಜೊತೆಗೆ ವೇಗದ ಮತ್ತು ಹೆಚ್ಚು ವೈಯಕ್ತಿಕ ಅನುಭವ ಸಕ್ರಿಯಗೊಳಿಸಲು ಹೀಗೆ ಮಾಡುತ್ತಿರುವುದಾಗಿ ಕಂಪನಿಗಳು ಹೇಳಿವೆ.

ವಿಶೇಷವಾಗಿ ದೊಡ್ಡ ಫೈಲ್ಗಳನ್ನು ಡೌನ್ಲೋಡ್ ಮಾಡುವುದು ಮತ್ತು ಸ್ಪಷ್ಟ ಬಳಕೆದಾರರ ಅನುಮೋದನೆ ಇಲ್ಲದೆ ಸ್ಥಳೀಯ ಸಂಗ್ರಹಣೆ ಬಳಸುವುದನ್ನು ಒಳಗೊಂಡಿರುವಾಗ ಅಂತಹ ನಿಯೋಜನೆ ಹೆಚ್ಚು ಪಾರದರ್ಶಕವಾಗಿರಬೇಕು ಎಂದು ವಿಮರ್ಶಕರು ವಾದಿಸುತ್ತಾರೆ. ಕೆಲವು ಪ್ರೈವಸಿ ತಜ್ಞರು ಈ ವಿಧಾನವು ಯುರೋಪಿಯನ್ ಡೇಟಾ ಸಂರಕ್ಷಣಾ ಕಾನೂನುಗಳ ಅಡಿಯಲ್ಲಿ ಪಾರದರ್ಶಕವಾಗಿರುವುದನ್ನು ಅನುಸರಿಸುತ್ತಿಲ್ಲ ಎಂದು ವಾದಿಸುತ್ತಿದ್ದಾರೆ.

ಜೆಮಿನಿ ನ್ಯಾನೋ ಕ್ರೋಮ್ನ AI ಸಾಮರ್ಥ್ಯಗಳನ್ನು ಸುಧಾರಿಸುವ ಉದ್ದೇಶ ಹೊಂದಿದೆ ಎಂದು ಗೂಗಲ್ ಹೇಳುತ್ತಿದ್ದರೂ, ಕಂಪನಿಗಳು AI ಫೀಚರ್ಗಳನ್ನು ಹೇಗೆ ಪರಿಚಯಿಸುತ್ತಿವೆ ಮತ್ತು ಬಳಕೆದಾರರು ತಮ್ಮ ಸಾಧನಗಳಲ್ಲಿ ಸ್ಥಾಪಿಸಲಾದ ಸಾಫ್ಟ್ವೇರ್ ಮೇಲೆ ಹೊಂದಿರಬೇಕಾದ ನಿಯಂತ್ರಣ ಮಟ್ಟ ಕುರಿತು ಚರ್ಚೆ ಹುಟ್ಟು ಹಾಕಿದೆ. 

ಜೆಮಿನಿ ನ್ಯಾನೋ ಎಂದು ಕರೆಯಲಾಗುವ 4ಜಿಬಿ ಫೈಲ್, ಕ್ಲೌಡ್ ಸರ್ವರ್ಗಳನ್ನು ಸಂಪೂರ್ಣವಾಗಿ ಅವಲಂಬಿಸುವ ಬದಲು ಬಳಕೆದಾರರ ಸಾಧನಗಳಲ್ಲಿ ನೇರವಾಗಿ ಕಾರ್ಯನಿರ್ವಹಿಸುವ ಕಾಂಪ್ಯಾಕ್ಟ್ AI ಮಾದರಿಯಾಗಿದೆ.