ಯುರೋಪಿಯನ್ ರೇಸ್‌ ನಲ್ಲಿ ಅಪಘಾತ; ನಟ ಅಜಿತ್ ಕುಮಾರ್ ಪಾರು

ಮುಂಬೈ: ನಟ ಅಜಿತ್ ಕುಮಾರ್ ಅವರು ಯುರೋಪ್‌ ನಲ್ಲಿ ನಡೆದ ಎಂಡ್ಯೂರೆನ್ಸ್ ರೇಸಿಂಗ್ ಸ್ಪರ್ಧೆಯ ವೇಳೆ ಕಾರು ಅಪಘಾತಕ್ಕೆ ಒಳಗಾಗಿದ್ದು, ಯಾವುದೇ ಗಾಯಗಳಿಲ್ಲದೆ ಪಾರಾಗಿದ್ದಾರೆ.

ಮೋಟಾರ್‌ ಸ್ಪೋರ್ಟ್‌ ನಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಅಜಿತ್ ಅವರು ಏಷ್ಯನ್ ಲೆ ಮ್ಯಾನ್ಸ್ ಸರಣಿ ಮತ್ತು ಮೈಕೆಲಿನ್ ಲೆ ಮ್ಯಾನ್ಸ್ ಕಪ್‌ ನಂತಹ ಎಂಡ್ಯೂರೆನ್ಸ್ ರೇಸಿಂಗ್ ಚಾಂಪಿಯನ್‌ ಶಿಪ್‌ ಗಳಲ್ಲಿ ಭಾಗವಹಿಸುತ್ತಿದ್ದಾರೆ.

ಇಂತಹ ಸ್ಪರ್ಧೆಯೊಂದರ ಸಂದರ್ಭದಲ್ಲಿ ಈ ಅಪಘಾತ ಸಂಭವಿಸಿದೆ ಎಂದು ವರದಿಯಾಗಿದೆ.

ಫಿಲ್ಮಿಬೀಟ್ ವರದಿ ಪ್ರಕಾರ, ರೇಸ್‌ ನ ವೇಳೆ ಅಜಿತ್ ಅವರ ಕಾರು ನಿಯಂತ್ರಣ ಕಳೆದುಕೊಂಡು ಮತ್ತೊಂದು ವಾಹನಕ್ಕೆ ಡಿಕ್ಕಿ ಹೊಡೆದಿದೆ. ತಂಡಗಳು ಎದುರಿಸಿದ ತಾಂತ್ರಿಕ ಸಮಸ್ಯೆಗಳು, ಚಕ್ರಕ್ಕೆ ಸಂಬಂಧಿಸಿದ ತೊಂದರೆಗಳು ಸೇರಿದಂತೆ ಹಲವು ಕಾರಣಗಳಿಂದ ರೇಸ್ ಮತ್ತಷ್ಟು ಜಟಿಲಗೊಂಡಿತ್ತು. ಅಜಿತ್ ಸುರಕ್ಷಿತರಾಗಿದ್ದು, ಯಾವುದೇ ಗಂಭೀರ ಗಾಯವಾಗಿಲ್ಲ.

ಈ ಹಿಂದೆಯೂ ಅಪಘಾತ

ರೇಸ್‌ ಟ್ರಾಕ್‌ ನಲ್ಲಿ ಅಜಿತ್ ಅವರಿಗೆ ಈ ಹಿಂದೆಯೂ ಹಲವು ಅಪಘಾತಗಳು ಸಂಭವಿಸಿವೆ. 2025ರಲ್ಲಿ ಇಟಲಿಯಲ್ಲಿ ನಡೆದ GT4 ಯುರೋಪಿಯನ್ ಸರಣಿಯ ಸಂದರ್ಭದಲ್ಲಿ ಅವರ ರೇಸಿಂಗ್ ಕಾರು ಅಪಘಾತಕ್ಕೀಡಾಗಿತ್ತು. ಅಲ್ಲಿ ಅವರು ಗಾಯಗಳಿಲ್ಲದೆ ಪಾರಾಗಿದ್ದರು.

ಅದೇ ವರ್ಷದ ಆರಂಭದಲ್ಲಿ ಸ್ಪೇನ್‌ ನ ವೇಲೆನ್ಸಿಯಾದಲ್ಲಿ ನಡೆದ ಪೋರ್ಷೆ ಸ್ಪ್ರಿಂಟ್ ಚಾಲೆಂಜ್ ವೇಳೆ ಅಜಿತ್ ಅವರ ಕಾರು ಎರಡು ಬಾರಿ ಉರುಳಿತ್ತು. ಈ ಅಪಘಾತದಲ್ಲೂ ಅವರು ಗಾಯಗಳಿಲ್ಲದೆ ಪಾರಾಗಿದ್ದರು. ಇದಕ್ಕೂ ಮೊದಲು 24H ದುಬೈ ಎಂಡ್ಯೂರೆನ್ಸ್ ರೇಸ್‌ ಗಾಗಿ ಅಭ್ಯಾಸ ನಡೆಸುತ್ತಿದ್ದ ಸಂದರ್ಭದಲ್ಲಿ ಅವರ ಪೋರ್ಷೆ ಕಾರು ಅಪಘಾತಕ್ಕೀಡಾಗಿತ್ತು.

ಅಂತರರಾಷ್ಟ್ರೀಯ ರೇಸಿಂಗ್‌ ನಲ್ಲಿ ಅಜಿತ್

ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮೋಟಾರ್‌ ಸ್ಪೋರ್ಟ್‌ ನಲ್ಲಿ ಸ್ಪರ್ಧಿಸಿರುವ ಕೆಲವೇ ಭಾರತೀಯ ನಟರಲ್ಲಿ ಅಜಿತ್ ಒಬ್ಬರು. ಅವರು 2003ರ ಫಾರ್ಮುಲಾ ಏಷ್ಯಾ BMW ಚಾಂಪಿಯನ್‌ ಶಿಪ್‌ನಲ್ಲಿ ಸ್ಪರ್ಧಿಸಿದ್ದರು. ಬಳಿಕ ಕ್ರೆವೆಂಟಿಕ್ 24H ಸರಣಿ ಮತ್ತು GT4 ಯುರೋಪಿಯನ್ ಸರಣಿ ಸೇರಿದಂತೆ ವಿವಿಧ ಅಂತರರಾಷ್ಟ್ರೀಯ ರೇಸಿಂಗ್ ಸ್ಪರ್ಧೆಗಳಲ್ಲಿ ಭಾಗವಹಿಸಿದ್ದಾರೆ.

ಕಳೆದ ವರ್ಷ 'ದಿ ಹಾಲಿವುಡ್ ರಿಪೋರ್ಟರ್ ಇಂಡಿಯಾ'ಗೆ ನೀಡಿದ್ದ ಸಂದರ್ಶನದಲ್ಲಿ ಅಪಘಾತದ ಬಳಿಕ ತಮ್ಮ ಪ್ರತಿಕ್ರಿಯೆ ಮತ್ತು ರೇಸಿಂಗ್ ಕುರಿತು ತಮ್ಮ ನಿಲುವನ್ನು ಅಜಿತ್ ವಿವರಿಸಿದ್ದರು.

"ನಾನು ಅಪಘಾತಕ್ಕೀಡಾದಾಗ, ನನಗೆ ಗಾಯವಾಗಿದೆಯೇ ಎಂಬುದನ್ನು ಅರ್ಥಮಾಡಿಕೊಳ್ಳಲು ಪ್ರಯತ್ನಿಸುತ್ತೇನೆ. ಅದು ನನ್ನ ತಕ್ಷಣದ ಪ್ರತಿಕ್ರಿಯೆ. ನನಗೆ ಎಷ್ಟು ನೋವಾಗಿದೆ, ಕಾರು ಎಷ್ಟು ಹಾನಿಗೊಂಡಿದೆ ಮತ್ತು ನಾನು ಮತ್ತೆ ರೇಸ್ ಆರಂಭಿಸಲು ಸಾಧ್ಯವೇ ಎಂಬುದನ್ನು ನೋಡುತ್ತೇನೆ. ನೀವು ಸುರಕ್ಷಿತವಾಗಿದ್ದೀರಿ ಮತ್ತು ಕಾರು ಸರಿಯಾಗಿದೆ ಎಂದು ಖಚಿತಪಡಿಸಿಕೊಂಡ ಬಳಿಕ ಅಡ್ರಿನಾಲಿನ್ ಕೆಲಸ ಮಾಡಲು ಆರಂಭಿಸುತ್ತದೆ. ಆಗ ಒಂದೇ ಆಲೋಚನೆ ಇರುತ್ತದೆ-DNF ಆಗಬಾರದು. ನಾನು ಇಂದು ರೇಸ್ ಪೂರ್ಣಗೊಳಿಸಬೇಕು ಎಂದುಕೊಳ್ಳುತ್ತೇನೆ.

"ಅಪಘಾತವಾದಾಗ ನನ್ನ ಕುಟುಂಬದ ಬಗ್ಗೆಯೂ ಚಿಂತೆಯಾಗುತ್ತದೆ. ಅವರನ್ನು ಇಷ್ಟೊಂದು ಆತಂಕಕ್ಕೆ ಒಳಪಡಿಸುವುದು ಸರಿಯಲ್ಲ. ನನಗೆ ಕೆಲವು ಭೀಕರ ಅಪಘಾತಗಳು ಸಂಭವಿಸಿವೆ. ಇತರ ಚಾಲಕರಿಗೂ ಅಪಘಾತಗಳು ಸಂಭವಿಸುತ್ತವೆ. ಆದರೆ ನಾನು ನಟನಾಗಿರುವುದರಿಂದ ನನ್ನ ಅಪಘಾತಗಳು ಹೆಚ್ಚು ಸುದ್ದಿಯಾಗುತ್ತವೆ," ಎಂದು ಅಜಿತ್ ಹೇಳಿದ್ದರು.

ಅಜಿತ್ ಅವರು 'ಡೇರ್‌ಡೆವಿಲ್' ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಚಿತ್ರವನ್ನು ಅಧಿಕ್ ರವಿಚಂದ್ರನ್ ನಿರ್ದೇಶಿಸುತ್ತಿದ್ದಾರೆ.