ತ್ರಿಶೂರ್: ನಕಲಿ ಪದವಿ ಪ್ರಮಾಣ ಪತ್ರ ಬಳಸಿ 22 ವರ್ಷಗಳಿಂದ ತರಗತಿ ತೆಗೆದುಕೊಂಡವನ ವಿರುದ್ಧ ಪಾಲಕರು ಕಿಡಿಕಾರಿದ್ದಾರೆ. ತ್ರಿಶೂರ್ ಪಟೂರ್ ಅಲಿಮುಲ್ ಇಸ್ಲಾಂ ಹೈಯರ್ ಸೆಕೆಂಡರಿ ಶಾಲೆಯ ಮಾಜಿ ಪ್ರಾಂಶುಪಾಲ ಕೆ.ವಿ. ಫೈಸಲ್ ವಿರುದ್ಧ ಪೋಷಕರು ಹಾಗೂ ಸ್ಥಳೀಯರು ಗಂಭೀರ ಆರೋಪ ಮಾಡಿದ್ದಾರೆ. ಅವರು ಮೂಲಭೂತವಾದಿ ಸಂಘಟನೆಯ ಸದಸ್ಯರಾಗಿದ್ದರು ಮತ್ತು ರಾಷ್ಟ್ರಗೀತೆ ಹಾಡಲು ಅಡ್ಡಿಪಡಿಸಿದರು ಮತ್ತು ಇತರ ಧರ್ಮದ ಜನರ ಆಚರಣೆಗೆ ಅಡ್ಡಿಪಡಿಸಿದ ಆರೋಪವಿದೆ.
ಫೈಸಲ್ ಕಳೆದ 22 ವರ್ಷಗಳಿಂದ ಅಲಿಮುಲ್ ಇಸ್ಲಾಂ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಶಿಕ್ಷಕರಾಗಿ ಕಾರ್ಯನಿರ್ವಹಿಸುತ್ತಿದ್ದು, ಮೈಸೂರು ಮತ್ತು ಬೆಂಗಳೂರು ವಿಶ್ವವಿದ್ಯಾನಿಲಯಗಳಲ್ಲಿ ಪದವಿ, ಸ್ನಾತಕೋತ್ತರ ಪದವಿ ಮತ್ತು ಬಿಎಡ್ ಪದವಿ ಪಡೆದಿದ್ದಾರೆ ಎನ್ನಲಾಗಿದೆ. ಇದಲ್ಲದೇ ಹಿರಿತನವನ್ನು ಬದಿಗೊತ್ತಿ ಪ್ರಾಂಶುಪಾಲರನ್ನಾಗಿಯೂ ನೇಮಕ ಮಾಡಲಾಗಿದೆ. ಆದರೆ ಶಿಕ್ಷಕಿಯೊಂದಿಗೆ ಅನುಚಿತವಾಗಿ ವರ್ತಿಸಿದ ಹಿನ್ನೆಲೆಯಲ್ಲಿ ಅವರನ್ನು ಕೆಳಗಿಳಿಸಲಾಗಿತ್ತು. ಅವರ ವಿರುದ್ಧ ಒಂದಕ್ಕಿಂತ ಹೆಚ್ಚು ಶಿಕ್ಷಕಿಯರು ದೂರು ದಾಖಲಿಸಿದ್ದರು.
ರಾಷ್ಟ್ರಗೀತೆ ಹಾಡುವಾಗ ಮೈಕ್ ಸಂಪರ್ಕ ಕಡಿತಗೊಳಿಸುವುದು, ಅನ್ಯಧರ್ಮೀಯರ ಸಂಭ್ರಮಾಚರಣೆಗೆ ಅಡ್ಡಿಪಡಿಸುವುದು ಮೊದಲಾದ ಆರೋಪ ಅವರ ಮೇಲಿದೆ.
ಮೈಸೂರು ಮತ್ತು ಬೆಂಗಳೂರು ವಿಶ್ವವಿದ್ಯಾನಿಲಯಗಳಲ್ಲಿ ಪಡೆದಿರುವರೆಂಬ ಶಿಕ್ಷಣ ಅರ್ಹತೆ ಬಗ್ಗೆ ನಡೆಸಿದ ತನಿಖೆಯಲ್ಲಿ ಅವರ ಪ್ರಮಾಣಪತ್ರಗಳು ನಕಲಿ ಎಂದು ತಿಳಿದುಬಂದಿದೆ. ಹೈಯರ್ ಸೆಕೆಂಡರಿ ವಿಭಾಗದ ಮುಖ್ಯಸ್ಥರು ನೀಡಿದ ದೂರಿನ ಮೇರೆಗೆ ಪಾವರಟಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಅವರು ಆರು ತಿಂಗಳಿನಿಂದ ಅಮಾನತುಗೊಂಡಿದ್ದಾರೆ. ಆರೋಪಿ ಶಿಕ್ಷಕನನ್ನು ವಾಪಸ್ ಪಡೆಯಬಾರದು ಹಾಗೂ ಈವರೆಗೆ ನೀಡಿರುವ ವೇತನವನ್ನು ವಾಪಸ್ ಪಡೆಯಬೇಕು ಎಂದು ಆಗ್ರಹಿಸಿ ಸ್ಥಳೀಯರು ಹಾಗೂ ಪೋಷಕರು ಆಂದೋಲನಕ್ಕೆ ಸಿದ್ಧತೆ ನಡೆಸಿದ್ದಾರೆ.
ನಕಲಿ ಪದವಿ ನೀಡಿ ಎರಡು ದಶಕಗಳಿಂದ ಸರಕಾರಿ ವ್ಯವಸ್ಥೆಗೆ ವಂಚನೆ ಮಾಡಿ ಶಿಕ್ಷಕರಾಗಿದ್ದು ಭಯೋತ್ಪಾದಕ ಸಂಘಟನೆಯ ನೆರವಿನಿಂದ ಶಾಲೆಯನ್ನು ನಿಯಂತ್ರಿಸುತ್ತಿದ್ದ ಇವರ ವಿರುದ್ಧ ಶಿಕ್ಷಕರು ಸೇರಿದಂತೆ ಸಾರ್ವಜನಿಕರು ಮುಗಿಬಿದ್ದಿದ್ದಾರೆ.
DOCTYPE html>
