ನ್ಯೂಯಾರ್ಕ್: ಅಮೆರಿಕಗೆ ವಿದ್ಯಾಭ್ಯಾಸಕ್ಕಾಗಿ ತೆರಳಿದ ಭಾರತೀಯ ವಿದ್ಯಾರ್ಥಿನಿ ಕಳೆದ 3 ವರ್ಷಗಳಿಂದ ನಾಪತ್ತೆಯಾಗಿರುವ ಘಟನೆ ನಡೆದಿದ್ದು, ಈಕೆಯನ್ನು ಹುಡುಕಿಕೊಡಿ ಎಂದು ಕುಟುಂಬಸ್ಥರು ಅಮೆರಿಕದ ತನಿಖಾ ಸಂಸ್ಥೆ ಮೊರೆ ಹೋಗಿದ್ದಾರೆ.
28 ವರ್ಷದ ಮಯೂಶಿ ಭಗತ್ ಕಾಣೆಯಾದ ಯುವತಿ. 2019 ಏಪ್ರಿಲ್ 29ರಂದು ಕೊನೇ ಬಾರಿ ಕಾಣಿಸಿಕೊಂಡ ಈಕೆ ಈವರೆಗೆ ಎಲ್ಲಿದ್ದಾರೆ ಎಂಬುದೇ ತಿಳಿದುಬಂದಿಲ್ಲ. ನಾಪತ್ತೆಯಾದ ದಿನದಂದು ನ್ಯೂಯಾರ್ಕ್ನ ಜೆರ್ಸಿ ಸಿಟಿಯಲ್ಲಿ ಅಪಾರ್ಟ್ಮೆಂಟ್ನಿಂದ ಹೊರಹೋದ ಈಕೆ ಈವರೆಗೆ ಪತ್ತೆಯಾಗಿಲ್ಲ.
ಕಲರ್ಫುಲ್ ಪೈಜಾಮ ಮತ್ತು ಕಪ್ಪು ಟಿ ಶರ್ಟ್ ಧರಿಸಿ ಹೊರಹೋದ ಈಕೆ ನಂತರ ಎಲ್ಲಿಗೆ ಹೋದಳು ಎಂಬುದೇ ಯಾರಿಗೂ ಗೊತ್ತಿಲ್ಲ. ಮೇ 1 2019ರಲ್ಲೇ ಈಕೆ ನಾಪತ್ತೆಯಾಗಿರುವ ಬಗ್ಗೆ ದೂರು ಕೂಡ ದಾಖಲಿಸಲಾಗಿದ್ದು, ಈವರೆಗೂ ಈಕೆಯನ್ನು ಪತ್ತೆ ಹಚ್ಚಲು ಸಾಧ್ಯವಾಗಿಲ್ಲ. ಇದೀಗ ಸ್ವತಃ ಅಮೆರಿಕ ತನಿಖಾ ಸಂಸ್ಥೆಯೇ ಈ ಬಗ್ಗೆ ಮಾಹಿತಿ ನೀಡಿದೆ.
2016ರಲ್ಲಿ ಅಮೆರಿಕಗೆ ಬಂದಿದ್ದ ಮಯೂಶಿ ಭಗತ್ ಇಲ್ಲಿನ ಹ್ಯಾಂಪ್ಶೈರ್ ಮತ್ತು ನ್ಯೂಯಾರ್ಕ್ ಇನ್ಸ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಲ್ಲಿ ದಾಖಲಾತಿ ಪಡೆದಿದ್ದರು. ಆ ಬಳಿಕ ಅಲ್ಲಿಯೇ ವಾಸವಿದ್ದರು. ಇದೀಗ ಮೂರು ವರ್ಷಗಳಿಂದ ನಾಪತ್ತೆಯಾಗಿರುವ ಮಗಳನ್ನು ನೆನೆದು ಕುಟುಂಬ ಕಣ್ಣೀರಲ್ಲಿ ಕೈತೊಳೆಯುತ್ತಿದೆ.