ಎರಡನೇ ಬಾರಿ ಪೇಟಿಎಂ ಷೇರುಗಳು ತೀವ್ರ ಕುಸಿತ, ಹೂಡಿಕೆದಾರರಿಗೆ 55 ಸಾವಿರ ಕೋಟಿ ರೂಪಾಯಿ ನಷ್ಟ!

        ಮುಂಬೈ: ಸೋಮವಾರದಂದು (ನ.22) ರಂದು ಪೇಟಿಎಂ ಷೇರುಗಳು ಎರಡನೇ ಬಾರಿಗೆ ತೀವ್ರ ಕುಸಿತ ಕಂಡಿದ್ದು, ಎರಡು ಸೆಷನ್ ಗಳಲ್ಲಿ ಹೂಡಿಕೆದಾರರಿಗೆ ಒಟ್ಟು 55,000 ಕೋಟಿ ರೂಪಾಯಿ ನಷ್ಟ ಉಂಟಾಗಿದೆ. 

        ಷೇರು ಮಾರುಕಟ್ಟೆಯಲ್ಲಿ ಒನ್ 97 ಕಮ್ಯುನಿಕೇಷನ್ಸ್ ಎಂದು ಪಟ್ಟಿಯಾಗಿರುವ ಪೇಟಿಎಂ ನ ಷೇರುಗಳು ಮಧ್ಯಾಹ್ನ 12.01 ರ ವೇಳೆಗೆ ಶೇ.17 ರಷ್ಟು ಕುಸಿದಿದ್ದು, ಬಿಎಸ್ಇ ಯಲ್ಲಿ ಈ ಹಿಂದಿನ ಮುಕ್ತಾಯದ ಅವಧಿಯಲ್ಲಿ ರೂಪಾಯಿ 1,564.15 ಕ್ಕೆ ಷೇರುಗಳ ಮೌಲ್ಯ 1,289 ಕ್ಕೆ ಕುಸಿದಿತ್ತು. 

         ಸಂಸ್ಥೆಯ ಮಾರುಕಟ್ಟೆ ಕ್ಯಾಪ್ ಈಗ 85,000 ಕೋಟಿ ರೂಪಾಯಿಗಿಂತ ಕೆಳಗೆ ಕುಸಿದಿದೆ. ಷೇರುಗಳು ವಿನಿಮಯ ಕೇಂದ್ರಕ್ಕೆ ಬರುವುದಕ್ಕಿಂತಲೂ ಮುಂಚೆ ಎಂ-ಕ್ಯಾಪ್ 1.39 ಲಕ್ಷ ಕೋಟಿಯಷ್ಟಿತ್ತು. 

         ಈ ಕುಸಿತದ ಮೂಲಕ ಪೇಟಿಎಂ ನ ಷೇರುಗಳು, ಐಪಿಒ ವಿತರಣೆ ಬೆಲೆಯಾದ 2,150 ರೂಪಾಯಿಗಳಿಗೆ ಹೋಲಿಕೆ ಮಾಡಿದಲ್ಲಿ ಶೇ.40 ಕ್ಕಿಂತಲೂ ಹೆಚ್ಚು ಕುಸಿತ ಕಂಡಿದೆ. ವಾರಾಂತ್ಯದಲ್ಲಿ ಪೇಟಿಎಂ ನ ಒಟ್ಟು ವ್ಯಾಪಾರದ ಮೌಲ್ಯ (ಅಥವಾ ಈ ವೇದಿಕೆಯ ಮೂಲಕ ನಡೆದ ವಹಿವಾಟು) ಶೇ.131 ರಷ್ಟು-11.2 ಬಿಲಿಯನ್ ಡಾಲರ್ ಗೆ ಏರಿಕೆಯಾಗಿರುವುದರ ಹೊರತಾಗಿಯೂ ಷೇರು ಮಾರುಕಟ್ಟೆಯಲ್ಲಿ ಈ ಕುಸಿತ ದಾಖಲಾಗಿದೆ. 

        ಪೇಟಿಎಂ ನ ಮಾಸಿಕ ವಹಿವಾಟು ಬಳಕೆದಾರರು (ಎಂಟಿಯು) ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದಲ್ಲಿ ಶೇ.25 ರಷ್ಟು ಬೆಳವಣಿಗೆಯಾಗಿದೆ ಎಂದು ಪೇಟಿಎಂ ತಿಳಿಸಿದೆ.