ಕಾಸರಗೋಡು: ತೆಂಗಿನ ಮರದ ಬುಡದಲ್ಲಿ ನೀರಿಂಗಿಸುವ ಗುಂಡಿಗಳನ್ನು ತೋಡುವ ಮೂಲಕ ಕಾಸರಗೋಡು ಜಿಲ್ಲೆ ಜಗತ್ತಿಗೆ ಮಾದರಿಯಾಗುತ್ತಿದೆ. ಮಳೆ ನೀರು ಇಂಗಿಸುವ ನಿಟ್ಟಿನಲ್ಲಿ ಈ ಮೂಲಕ ಹೊಸ ಕ್ರಾಂತಿ ನಡೆಸಲು ಜಿಲ್ಲೆ ಸಿದ್ಧವಾಗಿದೆ.
ಜಿಲ್ಲೆಯಲ್ಲಿ ವರ್ಷದಲ್ಲಿ 3 ಸಾವಿರ ಮಿ.ಮೀ. ಮಳೆ ಲಭಿಸುತ್ತಿದೆ. ಆದರೆ ಕಡಿಮೆ ದಿನಗಳಲ್ಲಿ ಮಾತ್ರ ಬಿರುಸಿನ ಮಳೆ ಸುರಿಯುತ್ತಿರುವ ಹಿನ್ನೆಲೆಯಲ್ಲಿ ಮಳೆ ನೀರನ್ನು ಸಂಗ್ರಹಿಸಿಡುವುದು ಜಿಲ್ಲೆಗೆ ಅನಿವಾರ್ಯವಾಗಿದೆ. ಈ ನಿಟ್ಟಿನಲ್ಲಿ ತೆಂಗಿನ ಮರಗಳ ಬುಡದಲ್ಲಿ ನೀರಿಂಗಿಸುವ ಗುಂಡಿ ತೋಡುವ ಮೂಲಕ ಮಳೆ ನೀರು ಸಂಗ್ರಹ ನಡೆಸಲಾಗುವುದು.
ಜೂ.29ರಂದು ಯೋಜನೆಗೆ ಚಾಲನೆ :
ಜಿಲ್ಲೆಯಲ್ಲಿರುವ ಎಲ್ಲ ತೆಂಗಿನ ಮರಗಳ ಬುಡದಲ್ಲೂ ಈ ಗುಂಡಿಗಳನ್ನು ತೋಡಲಾಗುವುದು. ಈ ಯೋಜನೆಯ ಜಿಲ್ಲಾ ಮಟ್ಟದ ಉದ್ಘಾಟನೆ ಜೂ.29ರಂದು ಬೆಳಗ್ಗೆ ವಿದ್ಯಾನಗರದ ಜಿಲ್ಲಾಧಿಕಾರಿ ಅವರ ಕ್ಯಾಂಪ್ ಹೌಸ್ ಆವರಣದ ತೆಂಗಿನ ಮರದ ಬುಡದಲ್ಲಿ ನಡೆಯಲಿದೆ. ಜಿಲ್ಲಾಧಿಕಾರಿ ಡಾ.ಡಿ.ಸಜಿತ್ ಬಾಬು ಅವರು ಗುಂಡಿ ತೋಡುವ ಮೂಲಕ ಈ ಯೋಜನೆಗೆ ಚಾಲನೆ ನೀಡುವರು.
ಈ ಮಧ್ಯೆ ತೆಂಗಿನ ಬುಡದಲ್ಲಿ ನೀರಿಂಗಿಸಲು ಗುಂಡಿಗಳನ್ನು ತೆಗೆಯಲು ಯೋಜನೆ ಜಾರಿಗೊಳ್ಳುತ್ತಿರುವಂತೆ ಸಾಂಕ್ರಾಮಿಕ ರೋಗ ಭೀತಿ ಕಾಡುವ ಸಾಧ್ಯತೆಗಳ ಬಗ್ಗೆ ಗೊಂದಲಗಳೂ ಮೂಡಿಬಂದಿದೆ. ಆರೋಗ್ಯ ಇಲಾಖೆ ಜಿಲ್ಲೆಯಲ್ಲಿ ವ್ಯಾಪಿಸುತ್ತಿರುವ ಡೆಂಗ್ಯು, ಮಲೇರಿಯಾ ಸಹಿತದ ಸಾಂಕ್ರಾಮಿಕ ರೋಗಗಳನ್ನು ನಿಯಂತ್ರಿಸುವಲ್ಲಿ ಕಟಿಬದ್ದರಾಗಿ ರೋಗ ಕಾರಕವಾಗಿರುವ ವೈರಸ್ ಗಳು ಉತ್ಪತ್ತಿಯಾಗುವ ಮೂಲಗಳನ್ನು ಸಂಪೂರ್ಣ ನಿಯಂತ್ರಿಸಲು ಉಜ್ಜುಗರಾಗುವ ಮಧ್ಯೆ ಹೊಸ ನೀರಿಂಗಿಸುವ ಪರಿಕಲ್ಪನೆ ವ್ಯಾಪಕ ಗೊಂದಲಗಳಿಗೂ ಕಾರಣವಾಗಲಿದೆ.
DOCTYPE html>
