ಅನಿವಾಸಿ ಭಾರತೀಯರು ಆನ್ ಲೈನ್ ನಲ್ಲಿ ಮತ ಚಲಾಯಿಸಲು ಸಾಧ್ಯವಿಲ್ಲ: ಚುನಾವಣಾ ಆಯೋಗ

 
    ನವದೆಹಲಿ: ಈ ವರ್ಷ ಏಪ್ರಿಲ್-ಮೇಯಲ್ಲಿ ನಡೆಯಲಿರುವ ಲೋಕಸಭೆ ಚುನಾವಣೆಯಲ್ಲಿ ಅನಿವಾಸಿ ಭಾರತೀಯರು ಆನ್ ಲೈನ್ ಮೂಲಕ ಮತ ಚಲಾಯಿಸುವ ಸೌಲಭ್ಯ ಹೊಂದಿರುವುದಿಲ್ಲ ಎಂದು ಭಾರತೀಯ ಚುನಾವಣಾ ಆಯೋಗ ಸ್ಪಷ್ಟಪಡಿಸಿದೆ.
ಮುಂಬರುವ ಲೋಕಸಭೆ ಚುನಾವಣೆಯಲ್ಲಿ ಎನ್ ಆರ್ ಐಗಳು ಆನ್ ಲೈನ್ ಮೂಲಕ ಮತ ಚಲಾಯಿಸುವ ಹಕ್ಕನ್ನು ಹೊಂದಿರುತ್ತಾರೆ ಎಂದು ಇತ್ತೀಚೆಗೆ ಬಂದ ಮಾಧ್ಯಮ ವರದಿಗಳಿಗೆ ಪ್ರತಿಕ್ರಿಯಿಸಿರುವ ಚುನಾವಣಾ ಆಯೋಗ, ಇಂತಹ ಯಾವುದೇ ಅನುಕೂಲ ಇರುವುದಿಲ್ಲ ಎಂದು ಆಯೋಗದ ವಕ್ತಾರರು ತಿಳಿಸಿದ್ದಾರೆ.
    ಎನ್ ಆರ್ ಐಗಳಿಗೆ ಆನ್ ಲೈನ್ ಮೂಲಕ ಮತ ಚಲಾಯಿಸಬೇಕೆಂದರೆ ಜನರ ಪ್ರಾತಿನಿಧಿತ್ವ ಕಾಯ್ದೆಗೆ ತಿದ್ದುಪಡಿ ತರಬೇಕು. ಇದುವರೆಗೆ ಯಾವುದೇ ಅಂತಹ ತಿದ್ದುಪಡಿ ತಂದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
    ಸದ್ಯದ ಮಟ್ಟಿಗೆ ಸಾಗರೋತ್ತರ ಭಾರತೀಯ ಮತದಾರರು ಚುನಾವಣಾ ಆಯೋಗದ ವೆಬ್ ಸೈಟ್ ನಲ್ಲಿ ದಾಖಲು ಮಾಡಿಕೊಂಡು ಭಾರತಕ್ಕೆ ಬಂದು ತಮ್ಮ ಕ್ಷೇತ್ರಕ್ಕೆ ಹೋಗಿ ತಮ್ಮ ಮೂಲ ಪಾಸ್ ಪೋರ್ಟ್ ತೋರಿಸಿ ಮತ ಚಲಾಯಿಸಬೇಕಾಗುತ್ತದೆ.
    ಚುನಾವಣಾ ಆಯೋಗದ ತಜ್ಞರ ಸಮಿತಿ ಕೂಡ ಇ-ವೋಟಿಂಗ್ ನ್ನು ಬೇಡವೆಂದಿದೆ, ಅದರ ಬದಲಿಗೆ ಪ್ರಾಕ್ಸಿ ವೋಟಿಂಗ್ ಗೆ ಅನುಮತಿ ನೀಡಿದೆ. ಅನಿವಾಸಿ ಭಾರತೀಯರಿಗೆ ಪ್ರಾಕ್ಸಿ ವೋಟಿಂಗ್ ಹಕ್ಕು ನೀಡುವ ಮಸೂದೆಯನ್ನು ಇತ್ತೀಚೆಗೆ ಲೋಕಸಭೆಯಲ್ಲಿ ಅಂಗೀಕಾರಗೊಂಡು ರಾಜ್ಯಸಭೆಗೆ ಹೋಗಿತ್ತು. ಅಲ್ಲಿ ಇನ್ನೂ ಅನುಮೋದನೆಯಾಗಿಲ್ಲ.
   ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಅಂಕಿಅಂಶ ಪ್ರಕಾರ ವಿವಿಧ ದೇಶಗಳಲ್ಲಿ ಸುಮಾರು 3.10 ಕೋಟಿ ಎನ್ ಆರ್ ಐಗಳು ವಾಸಿಸುತ್ತಿದ್ದಾರೆ.