ಸಮರಸ-ಕರ್ಕಟಕ ಮಾಸಾಚರಣೆ ಪ್ರಯುಕ್ತ ಕುಮಾರ ವಾಲ್ಮೀಕಿ ಯಾ ನರಹರಿ ಕವಿಯ ತೊರವೆ ರಾಮಾಯಣ-ಸಂಚಿಕೆ-03

ಅರಸುಗಳೊಳಧಿರಾಜ ಚಕ್ರೇ

ಶ್ವರನ ಬಸುಱಲಿ ಬಂದು ಲಕ್ಷ್ಮೀ

ವರನ ತೂಕದ ಸಾರ್ವಭೌಮನ ಕೈವಿಡಿದು ಕಡೆಗೆ

ನಿರಯನಿಳಯನ ನಿಳಯದಲಿ ಕೈ

ಸೆರೆಗೆ ಸಂದೌ ತಾಯೆಯೆಂದಿಳೆ

ಗುರುಳಿಸಿದನಶ್ರುಗಳನಾ ಕೈಯೊಡನೆ ಕಲಿಹನುಮ ||೨೮||

ಇರಲು ಮಾರುತಿ ಶಿಂಶುಪಾವರ

ತರುವಿನಗ್ರದಲವನಿಜೆಯ ಸಂ

ದರುಶನದ ಸಮಯಕ್ಕೆ ಸುಳಿದುದು ಮೂಡಲಿನಬಿಂಬ

ಮುಱಿದು ನಿದ್ರೆಯ ಕಾಪಿನಸುರರ

ತರುಣಿಯರು ಬಳಸಿದರು ಬಿದ್ದುದು

ತರಣಿಬಿಂಬ ಮಹಾಂಬುನಿಧಿಯಲಿ ನಡೆದು ಪಶ್ಚಿಮದ ||೨೯||

ಆಡಲೇನದ ಜೀಯ ಲೋಕದ

ಜೋಡೆಯೆ ಜಾನಕಿ ಜಗತ್ರಯ

ಗಾಢಪತಿಭಕ್ತಿಯರಿಗೀ ಸತಿಮಾತೃಭವನವಲ

ಆಡಿದಡೆ ಜನವೇನನೆಂಬುದೊ

ಖೋಡಿಗಳು ಕಿಱಿದುಂಟು ಮಿಕ್ಕಿನ

ಹಾಡಿಹೊಗಳಿಸಿಕೊಂಬ ಜಗದ ಪತಿವ್ರತಾಜನಕೆ ||೪೨||

ಕಂಡು ಬಲ್ಲೆನು ಹಲಬರನು ಭೂ

ಮಂಡಲದೊಳೀ ಸತಿಯ ಹೋಲುವ

ಹೆಂಡಿರಿಲ್ಲಾ ಧ್ರು ವಸಿಷ್ಠ ಮಹಾತ್ರಿಮುನಿವರರ

ಹೆಂಡಿರುಗಳೊಂದೋಜೆ ಜಗದಗಲ

ಖಂಡಸುವ್ರತೆ ಸೀತೆ ಹುಸಿದಡೆ

ಖಂಡಪರಶುವಿನಾಣೆ ಸತ್ಯವಿದೆಂದಳಾ ಸರಮೆ ||೪೩||

ಕಣುಗಳಲಿ ಕಿಡಿಸೂಸೆ ಕೈಯಲಿ

ತೃಣವನುಱೆ ಮುಱಿದಿಕ್ಕಿ ನುಡಿದಳು

ಬಣಗುರಕ್ಕಸ ಕೇಳೆಲವೊ ನಿನಗಿನಿತುಗುಣವಿರಲು

ತ್ರಿಣಯನನಧನುವಂದದೇತಕೆ

ಮಣಿಯದಾದುದು ಸುಡುಸುಡೆಲವೋ

ಹೆಣದಿನಿಹಿಗಳಿಗುಚಿತವೀ ಮಾತೆಂದಳಾ ಸೀತೆ ||೫೨||

ತಂದಡತಿಬಲನಹುದಲೇ ರಘು

ನಂದನನ ಸಮ್ಮುಖದೊಳೆನ್ನನು

ಹಂದೆ ಹೋಗೆಲೆ ನಾಯೆ ನಿನಗೇಕಮರಮಾನವರ

ದಂದಶೂಕರ ಭುವನದೊಡೆತನ

ಬೆಂದ ಮೋಱೆಗೆ ಬಹುವಿಕಾರದ

ಮಂದೆವಾಳದ ಮಾತದೇಕೆಂದುಱುಬಿದಳು ಖಳನ ||೫೩||

ವಾಸುಗಿಯ ನೀರೊಳ್ಳೆ ತನ್ನ ನಿ

ವಾಸದಲಿ ಜಱೆವುದು ಗಡೆಲವೋ

ದಾಶರಥಿಯನುಚರರ ಲೆಂಕರ ಲೆಂಕರನುಚರರ

ದಾಸಿಯರ ಲೆಂಕರಿಗೆ ಸರಿಬರ

ಲೇಸಱವನೀ ನಾಯ ಕಳುಹೆಂ

ದಾ ಸರಮೆಗಾ ಸೀತೆ ಕೋಪಿಸಿ ನುಡಿದಳಿಂತೆಂದು ||೫೬||

ಲಲನೆ ಕೇಳೀ ರಕ್ಕಸನ ಕಡಿ

ದಲೆಯ ಮೆಟ್ಟಿದು ಮಿಂದ ಬಳಿಕೀ

ಖಳನ ಸತಿಯರು ಸಿದ್ಧವಿದನೀ

ಹೊಲೆಯಗುತ್ತರಕೊಟ್ಟು ಕಳುಹೀ

ಗಳಹರಕ್ಕಸನಾಯನೆಂದಳು ಸರಮೆಗಾ ಸೀತೆ ||೫೭||

ಅಕಟ ಪೂರ್ವದಲಾವ ಹಿರಿಯರ

ಟಕರಿಗಳೆದನದಾವ ದೈವದ

ಭಕುತಿಯನು ಕುಂದಿದೆನೊ ನಿಂದಿಸಿದೆನೊ ಗುರುದ್ವಿಜರ

ವಿಕಳತೆಯಲಿ ವಿವೇಕಿಸದೆ ಪಾ

ತಕವ ನೆನೆದೆನೊ ಪತಿಯಳಕಟಾ

ಪ್ರಕಟಿಸಿತೆ ದುಷ್ಕರ್ಮಫಲವೆನಗೆಂದಳಾ ಸೀತೆ ||೬೪||

ಸುಳಿಯಲೇಕೆ ಕುರಂಗ ರಾಮನ

ಕಳುಹಲೇಕೆ ದುರುಕ್ತಿಯಲಿ ನುಡಿ

ದಲಘುಬಲ ಲಕ್ಷ್ಮಣನನುಱುಬಲದೇಕೆ ಬೆಂಬಳಿಯ

ಲಲನೆಯಿವಳಲ್ಲೆಂದು ಚಿತ್ತದೊ

ಳಲಸಿದರೊ ಮೇಣ್ ಖಳರ ಮಾಯೆಗೆ

ಸಿಲುಕಿದರೊ ಸಾವ್ ಬಾರದೆನಗಕಟೆಂದಳಾ ಸೀತೆ ||೬೫||