ಪುಸ್ತಕ : ಸುಪ್ತ ಸಿಂಚನ
ಲೇಖಕರು: ಪರಿಣಿತ ರವಿ
ವಿಮರ್ಶಾ ಬರಹ: ಚೇತನಾ ಕುಂಬಳೆ
ಕವಿಯತ್ರಿ ಪರಿಣಿತ ರವಿ ಅವರು ಕವಿತೆ, ಕತೆ, ಹನಿಗವನಗಳ ಮೂಲಕ ಸಾಹಿತ್ಯ ಲೋಕದಲ್ಲಿ ಗುರುತಿಸಿಕೊಂಡವರು. ಬಹುಮುಖ ಪ್ರತಿಭಾವಂತರಾದ ಇವರು ಆಂಗ್ಲ ಭಾಷಾ ಶಿಕ್ಷಕಿಯಾಗಿದ್ದರೂ ಕನ್ನಡ ಭಾಷೆಯ ಬಗೆಗೆ ಅಪಾರ ಪ್ರೀತಿ ಅಭಿಮಾನ ಹೊಂದಿದವರು. ವಿದ್ಯಾರ್ಥಿ ದೆಸೆಯಿಂದಲೇ ಸಾಹಿತ್ಯದಲ್ಲಿ ವಿಶೇಷ ಆಸಕ್ತಿ ತೋರಿದವರು. ಬರವಣಿಗೆಗೆ ತೊಡಗಿಕೊಂಡವರು. ಮೂಲತಃ ಪಾಣೆಮಂಗಳೂರಿನ ನಂದಾವರದವರಾದ ಇವರು ಈಗ ಉದ್ಯೋಗ ನಿಮಿತ್ತ ಎರ್ನಾಕುಳಂನಲ್ಲಿ ವಾಸವಾಗಿದ್ದಾರೆ.
ಇಲ್ಲಿನ ಹಲವು ಕವಿತೆಗಳಿಗೆ ಅದರ ಆಶಯವನ್ನು ವ್ಯಕ್ತಪಡಿಸುವ ಚಿತ್ರಗಳನ್ನು ಅಳವಡಿಸಲಾಗಿದೆ. 'ಹೊಸ ಬೆಳಕು' ಕವಿತೆಯ ಮೂಲಕ ಇಲ್ಲಿನ ಕವಿತೆಗಳು ಪ್ರಾರಂಭವಾಗುತ್ತವೆ. ಬೇರೆ ಊರಿಗೆ ಹೋಗಿ ಅನ್ಯ ಭಾಷಿಗರ ನಡುವೆ ಹೊಸ ಬದುಕು ಕಟ್ಟಿಕೊಳ್ಳವ ನಡುವೆ ಹಾರಲು ಮರೆತ ಪಂಜರದ ಹಕ್ಕಿ ತಾನಾಗಿದ್ದೆ ಎಂದೂ, ಜೊತೆಗಿದ್ದವರು ಸಹಕಾರ ನೀಡಿದಾಗ ತನ್ನೊಳಗಿದ್ದ ಸುಪ್ತ ಭಾವಗಳು ಜೀವ ಪಡೆದ ಸನ್ನಿವೇಶವನ್ನು ಹೇಳಿಕೊಳ್ಳುತ್ತಾರೆ. 'ಜನನಿ' ಕವಿತೆಯಲ್ಲಿ ಮಕ್ಕಳ ಒಳಿತನ್ನು ಬಯಸುವ ತಾಯಿ, ತ್ಯಾಗಮಯಿ, ಸಹನಾಮಯಿ, ಕ್ಷಮಯಾ ಧರಿತ್ರಿ, ಮಮತೆಯ ಸಾಕಾರಮೂರ್ತಿ ಎಂದೂ ಹೊಗಳುತ್ತಾರೆ.
'ಅಡಿಪಾಯ' ಕವಿತೆಯಲ್ಲಿ ಸಕ್ಕರೆಯ ಮಾತಿಗೆ ಮರುಳಾಗದೆ, ಹೊಗಳುಭಟ್ಟರನ್ನು ದೂರವಿರಿಸಬೇಕೆಂದೂ, ಮಾನವೀಯತೆಯನ್ನು ಮರೆಯದೆ, ಸಹಜೀವಿಗಳಲ್ಲಿ ಪ್ರೀತಿ, ಮಮತೆ ತೋರಬೇಕೆಂದೂ, ಗುರು ಹಿರಿಯರನ್ನು ಗೌರವಿಸಬೇಕೆಂದು ಬದುಕಿನ ಆದರ್ಶಗಳನ್ನು ಹೇಳುತ್ತಾರೆ. 'ಅರ್ಥವಾಗದೇ' ಕವನದಲ್ಲಿ, ಜೀವನ ಎನ್ನುವುದು ನೀರ ಮೇಲಿನ ಗುಳ್ಳೆಯಂತೆ ಹಾಗೆಯೇ ಮನುಷ್ಯನ ಜೀವವೂ ನಶ್ವರವಾದದ್ದು ಎಂಬ ಕಟು ವಾಸ್ತವದ ಅರಿವು ಮೂಡಿಸುತ್ತಾರೆ. 'ಅತಂತ್ರ' ಹಾಗೂ 'ಆರ್ತನಾದ' ಕವನಗಳಲ್ಲಿ ಕರ್ನಾಟಕದಿಂದ ಬೇರ್ಪಟ್ಟ ಕಾಸರಗೋಡಿನ ಇಂದಿನ ದುಸ್ಥಿತಿಯನ್ನೂ ಕನ್ನಡದ ಮೇಲಿನ ಪ್ರೀತಿ, ಕನ್ನಡಿಗರ ಅಳಲನ್ನು ಮನಕಲಕುವಂತೆ ಚಿತ್ರಿಸಿದ್ದಾರೆ. 'ಹುಡುಕಾಟ' ಕವನದಲ್ಲಿ ಈ ಬಣ್ಣದ ಜಗದಲ್ಲಿ, ಮಾಸಿ ಹೋಗದ ಬಣ್ಣವನ್ನು, ಮಾಯದ ಜಗದಲ್ಲಿ ನೈಜತೆಯ ನಗುಮೊಗವನ್ನು , ನೋವಿಗೆ ಸ್ಪಂದಿಸುವವರನ್ನು ಜಗ ಬೆಳಗುವವರನ್ನು ಹುಡುಕುತ್ತಾರೆ. 'ಹುಲು ಮಾನವ ಕವಿತೆಯಲ್ಲಿ, ಭೋರ್ಗರೆವ ಸಮುದ್ರಕ್ಕೂ, ಬೆಳಕ ನೀಡುವ ಸೂರ್ಯನಿಗೂ ತಂಪು ನೀಡುವ ಚಂದ್ರನಿಗೂ ಭೂಮಿಗೂ ಹೀಗೆ ಎಲ್ಲಾ ಚರಾಚರಗಳಿಗೂ ಕಷ್ಟಗಳು ತಪ್ಪಿಲ್ಲ ಹಾಗಿರುವಾಗ ಪ್ರಕೃತಿಯ ಮುಂದೆ ಮನುಷ್ಯ ಯಾವ ಲೆಕ್ಕ ಅವನಿಗೂ ಕಷ್ಟಗಳು ಬಂದೇ ಬರುತ್ತವೆ.ಎಂಬುದನ್ನು ಸಾದೋಹರಣವಾಗಿ ವಿವರಿಸುವರು. 'ಆ ಅರಳದ ಹೂಗಳು' ಕವಿತೆಯಲ್ಲಿ ಕಾಮದ ದಾಹಕ್ಕೋ, ಹೆತ್ತವರ ಒತ್ತಡಕ್ಕೋ ಸಮಾಜದ ಅಪೇಕ್ಷೆಗೋ ಅರಳುವ ಮೊದಲೇ ಅಥವಾ ಬದುಕು ಕಟ್ಟಿಕೊಳ್ಳುವ ಮೊದಲೇ ಹೆಣ್ಣು ಮಕ್ಕಳ ಜೀವ ಬಾಡಿ ಹೋಗುವುದಕ್ಕೆ ಹಲವು ಕಾರಣಗಳನ್ನು ನೀಡುತ್ತಾರೆ.
"ಕೃಷ್ಣ ನಿನ್ನಲ್ಲಿ ನಾನೇನು ಕೇಳಲಾರೆ
ನಿನಗೇನು ಬೇಕೋ ಅದನ್ನೇ ಕೊಡು
ಧನ್ಯತೆಯಿಂದಲೇ ಅದನ್ನು ಸ್ವೀಕರಿಸುತ್ತೇನೆ"
ಎನ್ನುವಲ್ಲಿ ವಿರಕ್ತಿ ಭಾವವೊಂದು ಮೂಡಿದೆ. 'ಮಾನವೀಯತೆ ಇನ್ನೂ ಉಸಿರಾಡುತ್ತಿದೆ' ಹಾಗೂ 'ನೋಡಿದೆಯಾ' ಕವಿತೆಯಲ್ಲಿ ಕೇರಳದಲ್ಲಿ ನಡೆದ ಜಲಪ್ರಳಯದ ಚಿತ್ರಣದಲ್ಲಿ ಯಾರೂ, ಯಾವುದೂ ಶಾಶ್ವತವಲ್ಲ ಎಂಬುದನ್ನೂ, ಅಲ್ಲಿ ಕಂಡು ಬಂದ ಮನುಷ್ಯರಲ್ಲಿ ಹುದುಗಿರುವ ಮಾನವೀಯತೆಯ ಕುರಿತು ಹೇಳುತ್ತಾರೆ.
"ಇರಲಿ ಆಶಾಭಾವ
ಮೆಟ್ಟಿ ನಿಲ್ಲು ಎಲ್ಲವ" ಎನ್ನುವಲ್ಲಿ ಲೇಖಕಿಯೊಳಗಿನ ಆತ್ಮಸ್ಥೈರ್ಯವನ್ನು ಗಮನಿಸಬಹುದು. 'ರಹಸ್ಯ' ಕವಿತೆಯಲ್ಲಿ, ಸಾವು ಎಂಬುದು ಬದುಕಿನ ರಹಸ್ಯ. ಅದಕ್ಕೆ ಮೇಲು-ಕೀಳು, ಬಡವ - ಶ್ರೀಮಂತ ಎಂಬ ಭೇದಭಾವವಿಲ್ಲ, ಅದರ ಕಣ್ಣಿಗೆ ಎಲ್ಲರೂ ಸಮಾನರೆಂಬ ಕಹಿ ಸತ್ಯದ ದರ್ಶನ ಮಾಡಿಸುತ್ತದೆ. ಈ ಸಂಕಲನದ ಕೊನೆಯ ಕವಿತೆ 'ಸುಪ್ತ ಸಿಂಚನ' ಲೇಖಕಿಯ ವ್ಯಕ್ತಿತ್ವವನ್ನು ಪರಿಚಯಿಸುತ್ತದೆ.
ಒಟ್ಟಿನಲ್ಲಿ ಇಲ್ಲಿನ ಕವಿತೆಗಳಲ್ಲಿ, ಬದುಕಿನ ಅನುಭವಗಳಿಂದ ಅರಿತ ಸತ್ಯಾಸತ್ಯತೆಗಳಿವೆ. ಜೀವನದ ಆದರ್ಶಗಳಿವೆ, ಒಳಿತು-ಕೆಡುಕುಗಳ ಅವಲೋಕನವಿದೆ, ಭಾಷೆಯ,ನಾಡಿನ ಬಗೆಗೆ ಪ್ರೀತಿ ಅಭಿಮಾನವಿದೆ, ಯೋಧರಿಗೆ ಅರ್ಪಿಸಿದ ಅಕ್ಷರದ ನಮನವಿದೆ. ಇನಿಯನ ಬಗೆಗಿನ ಒಲವಿದೆ, ಮನುಷ್ಯ- ಪ್ರಕೃತಿಯ ನಡುವಿನ ಅನುಸಂಧಾನವಿದೆ. ಇಲ್ಲಿನ ಕೆಲವು ಕವಿತೆಗಳಲ್ಲಿ ಸ್ತ್ರೀ ಸಂವೇದನೆ ಇರುವುದನ್ನು ಗಮನಿಸಬಹುದು. ಸಂಬಂಧಗಳ ನಡುವೆ ಒಂದು ಆತ್ಮೀಯತೆಯಿದೆ. ಇಲ್ಲಿನ ಹಲವು ಕವಿತೆಗಳೂ ಸಮಾಜಕ್ಕೊಂದು ಸಂದೇಶವನ್ನು ನೀಡುತ್ತವೆ. ಹೀಗೆ ಅವರ ಅಂತರಾಳದ ಭಾವಗಳು ಕವಿತೆಗಳಾಗಿ ಹೊರಹೊಮ್ಮಿ ಒಂದಷ್ಟು ವಿಷಯಗಳು ಚಿಂತನೆಗೆ ಒರೆ ಹಚ್ಚಲು ಸಹಕಾರಿಯಾಗಿವೆ.
ವಿಮರ್ಶಾ ಬರಹ:ಚೇತನಾ ಕುಂಬ್ಳೆ
DOCTYPE html>
