ಕಾಸರಗೋಡು ಜಿಲ್ಲಾ ಆಸ್ಪತ್ರೆಯಲ್ಲಿ ಇಲಿಗಳ ಹಾವಳಿ; ಗಾಜಿನ ಬಾಟಲಿ ಸ್ಫೋಟ: ಅಮೋನಿಯಾ ಅನಿಲ ಸೋರಿಕೆ

                                                                 

                        ಕಾಸರಗೋಡು: ಕಾಞಂಗಾಡು ಜಿಲ್ಲಾ ಆಸ್ಪತ್ರೆಯ ಲ್ಯಾಬ್ ನಿಂದ ಅಮೋನಿಯಾ ಗ್ಯಾಸ್ ಸೋರಿಕೆಯಾಗಿದೆ. ಆಸ್ಪತ್ರೆಯಲ್ಲಿ ಗಾಜಿನ ಬಾಟಲಿಯಲ್ಲಿ ಸಂಗ್ರಹಿಸಿಟ್ಟಿದ್ದ ಅಮೋನಿಯಾ ಇಲಿಗಳ ಕಾಟದಿಂದ ಬಾಟಲಿ ಒಡೆದು ಸೋರಿಕೆಯಾಗಿದೆ. ಶನಿವಾರ ಸಂಜೆ 4 ಗಂಟೆ ಸುಮಾರಿಗೆ ಈ ಘಟನೆ ನಡೆದಿದೆ.

            ಘಟನೆಯ ನಂತರ ಆಸ್ಪತ್ರೆಯ ಸಿಬ್ಬಂದಿ ಕೂಡಲೇ ಅಮೋನಿಯಾ ಇಡಲಾಗಿದ್ದ ಕೊಠಡಿಯ ಬಾಗಿಲು ಮುಚ್ಚಿ ಹೊರಗೆ ಹರಡದಂತೆ ತಡೆದಿದ್ದಾರೆ. ಠಾಣಾಧಿಕಾರಿ ಪಿ.ವಿ.ಪವಿತ್ರನ್ ನೇತೃತ್ವದಲ್ಲಿ ಕಾಞಂಗಾಡ್‍ನಿಂದ ಅಗ್ನಿಶಾಮಕ ದಳ ಸ್ಥಳಕ್ಕೆ ತಲುಪಿತು.

                       ಅಗ್ನಿಶಾಮಕ ಮತ್ತು ರಕ್ಷಣಾ ಅಧಿಕಾರಿಗಳಾದ ಮುಖೇಶ್ ಮತ್ತು ನಿಖಿಲ್ ಸುರಕ್ಷತಾ ಕಿಟ್‍ಗಳನ್ನು ಧರಿಸಿ ಕೋಣೆಗೆ ಪ್ರವೇಶಿಸಿದರು. ನಂತರ ಅಮೋನಿಯದ ಕಟು ವಾಸನೆಯ ಪ್ರತಿ ಬಾಟಲಿಯನ್ನು ಪರೀಕ್ಷಿಸಿ ಹಾನಿಗೊಂಡ ಬಾಟಲಿಯನ್ನು ಕಂಡುಹಿಡಿಯಲಾಯಿತು. ನಂತರ ಅದನ್ನು ಬಕೆಟ್ ನೀರಿಗೆ ಇಳಿಸುವ ಮೂಲಕ ನಿಷ್ಕ್ರಿಯಗೊಳಿಸಲಾಯಿತು.

                      ಅಮೋನಿಯಾ ಅನಿಲವು ಪ್ರದೇಶಗಳಿಗೆ ವ್ಯಾಪಿಸುವುದು  ಮತ್ತು ಸೋರಿಕೆಯ ಸಮಯದಲ್ಲಿ ಉಸಿರಾಡುವುದು ಅಪಾಯಕಾರಿ. ಈ ಅನಿಲವನ್ನು ಉಸಿರಾಡುವುದರಿಂದ ಶ್ವಾಸಕೋಶದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ ಎಂದು ಠಾಣಾಧಿಕಾರಿ ತಿಳಿಸಿದ್ದಾರೆ. ಸಹಾಯಕ ಠಾಣಾಧಿಕಾರಿ ಕೆ.ಸತೀಶ್ ಕುಮಾರ್, ಅಗ್ನಿಶಾಮಕ ಮತ್ತು ರಕ್ಷಣಾಧಿಕಾರಿ ಅನಿಲ್, ಅಗ್ನಿಶಾಮಕ ಮತ್ತು ರಕ್ಷಣಾಧಿಕಾರಿಗಳಾದ ಕಿರಣ್ ಕುಮಾರ್, ವರುಣ್ ರಾಜ್, ನಿಖಿಲ್, ಗೃಹರಕ್ಷಕ ದಳದ ನಾರಾಯಣನ್ ಮತ್ತು ನಾಗರಿಕ ರಕ್ಷಣಾ ಸಿಬ್ಬಂದಿಗಳಾದ ಪ್ರದೀಪ್ ಕುಮಾರ್, ರಾಜೇಶ್, ಕಿರಣ್ ರಕ್ಷಣಾ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.