ಚಂಡಿಗಢ: 36 ಗಂಟೆಗಳಿಂದ ವಿದ್ಯುತ್, ನೀರು ಸರಬರಾಜಿಲ್ಲದೆ ಜನತೆ ಕಂಗಾಲು

              ಚಂಡಿಗಢ: ವಿದ್ಯುತ್ ಇಲಾಖೆಯ ನೌಕರರು ಮೂರು ದಿನಗಳಿಂದ ನಡೆಸುತ್ತಿರುವ ಮುಷ್ಕರದ ಹಿನ್ನೆಲೆಯಲ್ಲಿ ಭಾರೀ ವಿದ್ಯುತ್ ಕಡಿತದ ನಂತರ ಚಂಡಿಗಢದ ಬಹುತೇಕ ಭಾಗಗಳಲ್ಲಿ 36 ಗಂಟೆಗಳಿಗೂ ಅಧಿಕ ಸಮಯದಿಂದ ವಿದ್ಯುತ್ ಮತ್ತು ನೀರು ಪೂರೈಕೆ ಇಲ್ಲವಾಗಿದ್ದು, ಜನತೆ ಕಂಗಾಲಾಗಿದ್ದಾರೆ.

          ಸೋಮವಾರ ಸಂಜೆಯಿಂದಲೇ ಸಾವಿರಾರು ಮನೆಗಳಿಗೆ ವಿದ್ಯುತ್, ನೀರು ಪೂರೈಕೆ ಇಲ್ಲವಾಗಿದ್ದು, ನಗರದ ಹಲವೆಡೆ ದೀಪಗಳು ಕಾರ್ಯನಿರ್ವಹಿಸುತ್ತಿಲ್ಲ. ಸರಕಾರಿ ಆಸ್ಪತ್ರೆಗಳು ಶಸ್ತ್ರಚಿಕಿತ್ಸೆಗಳನ್ನು ಮರು ನಿಗದಿಪಡಿಸಿವೆ.

              ಚಂಡಿಗಢ ಆರೋಗ್ಯ ಸೇವೆಗಳ ನಿರ್ದೇಶಕ ಡಾ. ಸುಮನ್ ಸಿಂಗ್ ಸುದ್ದಿಸಂಸ್ಥೆ ಪಿಟಿಐ ಜೊತೆಗೆ ಮಾತನಾಡುತ್ತಾ, "ನಮ್ಮಲ್ಲಿ ಜನರೇಟರ್‌ಗಳಂತೆ ಬ್ಯಾಕಪ್ ಯೋಜನೆ ಇದೆ. ಆದರೆ ನೀವು ಆಸ್ಪತ್ರೆಯ 100 ಪ್ರತಿಶತದಷ್ಟು ಲೋಡ್ ಅನ್ನು ಜನರೇಟರ್‌ನಲ್ಲಿ ಹಾಕಲು ಸಾಧ್ಯವಿಲ್ಲ. ಆದ್ದರಿಂದ, ನಾವು ನಮ್ಮ ಯೋಜಿತ ಶಸ್ತ್ರಚಿಕಿತ್ಸೆಗಳನ್ನು ಮರು ನಿಗದಿಪಡಿಸಬೇಕು ಅಥವಾ ಮುಂದೂಡಬೇಕಾಯಿತು'' ಎಂದರು.

ವಿದ್ಯುತ್ ಕಡಿತವು ಆನ್‌ಲೈನ್ ತರಗತಿಗಳು ಮತ್ತು ಕೋಚಿಂಗ್ ಸಂಸ್ಥೆಗಳನ್ನು ಸಹ ಮುಚ್ಚಿದೆ.

ವಿದ್ಯುತ್ ಇಲಾಖೆಯ ಖಾಸಗೀಕರಣ ವಿರೋಧಿಸಿ ವಿದ್ಯುತ್ ನೌಕರರು ಪ್ರತಿಭಟನೆ ನಡೆಸುತ್ತಿದ್ದಾರೆ. ಕೇಂದ್ರಾಡಳಿತ ಪ್ರದೇಶದ ಸಲಹೆಗಾರ ಧರಂ ಪಾಲ್ ಅವರು ಮುಷ್ಕರವನ್ನು ಹಿಂತೆಗೆದುಕೊಳ್ಳುವಂತೆ ಮನವೊಲಿಸಲು ಪವರ್ಮೆನ್ಸ್ ಯೂನಿಯನ್ ಜೊತೆ ಸಭೆ ನಡೆಸಿದರು. ಆದರೆ ಇದುವರೆಗೆ ಯಾವುದೇ ತೀರ್ಮಾನವಾಗಿಲ್ಲ.