ಕರಿಪ್ಪೂರ್ ವಿಮಾನ ನಿಲ್ದಾಣದಲ್ಲಿ 40 ಕೋಟಿ ರೂ. ಮೌಲ್ಯದ ಬೃಹತ್ ಹೈಬ್ರಿಡ್ ಗಾಂಜಾ ವಶ: ಮೂವರು ಮಹಿಳೆಯರ ಬಂಧನ

ಕೋಝಿಕ್ಕೋಡ್: ಕರಿಪ್ಪೂರ್ ವಿಮಾನ ನಿಲ್ದಾಣದಲ್ಲಿ ಮತ್ತೊಂದು ಭಾರಿ ಹೈಬ್ರಿಡ್ ಗಾಂಜಾ ವಶಪಡಿಸಲಾಗಿದೆ. 40 ಕೋಟಿ ಮೌಲ್ಯದ 34 ಕೆಜಿ ಹೈಬ್ರಿಡ್ ಗಾಂಜಾದೊಂದಿಗೆ ಕೋಝಿಕ್ಕೋಡ್ ವಿಮಾನ ನಿಲ್ದಾಣದಲ್ಲಿ ಮೂವರು ಮಹಿಳೆಯರನ್ನು ಕಸ್ಟಮ್ಸ್ ಬಂಧಿಸಿದೆ. ಮಲೇಷ್ಯಾದಿಂದ ಬಂದ ಏರ್ ಏಷ್ಯಾ ವಿಮಾನದಲ್ಲಿ ಹೈಬ್ರಿಡ್ ಗಾಂಜಾ ಕಳ್ಳಸಾಗಣೆ ಮಾಡಲು ಯತ್ನಿಸಲಾಗಿದೆ.

ಏರ್ ಕಸ್ಟಮ್ಸ್ ಮತ್ತು ಏರ್ ಇಂಟೆಲಿಜೆನ್ಸ್ ಯೂನಿಟ್ ಅಧಿಕಾರಿಗಳು ಚೆನ್ನೈ ಮೂಲದ ರಬಿಯತ್ ಸೈದು ಸೈನುದ್ದೀನ್, ಕೊಯಮತ್ತೂರು ಮೂಲದ ಕವಿತಾ ರಾಜೇಶ್‍ಕುಮಾರ್ ಮತ್ತು ತ್ರಿಶೂರ್ ಮೂಲದ ಸಿಮಿ ಬಾಲಕೃಷ್ಣನ್ ಅವರನ್ನು ಬಂಧಿಸಿದ್ದಾರೆ.

ಅವರಿಂದ ಥೈಲ್ಯಾಂಡ್‍ನಲ್ಲಿ ತಯಾರಿಸಿದ ರಾಸಾಯನಿಕಗಳಿಂದ ಕೂಡಿದ ಸುಮಾರು 15 ಕೆಜಿ ಚಾಕೊಲೇಟ್, ಕೇಕ್ ಮತ್ತು ಕ್ರೀಮ್ ಬಿಸ್ಕತ್ತುಗಳನ್ನು ಪತ್ತೆಹಚ್ಚಿದರು. ತನಿಖಾ ತಂಡವು ಮಾದಕ ದ್ರವ್ಯಗಳನ್ನು ಥೈಲ್ಯಾಂಡ್‍ನಿಂದ ತರಲಾಗಿದೆ ಎಂದು ತೀರ್ಮಾನಿಸಿದೆ.

ಇದೇ ವೇಳೆ, ಸೋಮವಾರ ರಾತ್ರಿ ಕರಿಪ್ಪೂರ್ ವಿಮಾನ ನಿಲ್ದಾಣದಲ್ಲಿ ಅಬುಧಾಬಿಯಿಂದ ಕಳ್ಳಸಾಗಣೆ ಮಾಡಲಾಗುತ್ತಿದ್ದ ಒಂಬತ್ತು ಕೋಟಿ ಮೌಲ್ಯದ 18 ಕೆಜಿ ಹೈಬ್ರಿಡ್ ಗಾಂಜಾವನ್ನು ಪೆÇಲೀಸರು ವಶಪಡಿಸಿಕೊಂಡಿದ್ದರು. ಅಬುಧಾಬಿಯಿಂದ ಎತಿಹಾದ್ ಏರ್‍ವೇಸ್ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ಪ್ರಯಾಣಿಕರೊಬ್ಬರು ಕರಿಪ್ಪೂರ್ ವಿಮಾನ ನಿಲ್ದಾಣದಲ್ಲಿ ಇಳಿದು, ಹೈಬ್ರಿಡ್ ಗಾಂಜಾ ತುಂಬಿದ ಟ್ರಾಲಿ ಬ್ಯಾಗ್‍ನೊಂದಿಗೆ ಬಂದರು.

ಅದನ್ನು 14 ಪ್ಯಾಕೇಜ್‍ಗಳಲ್ಲಿ ಜೋಡಿಸಲಾಗಿತ್ತು. ಇಬ್ಬರು ಕಣ್ಣೂರು ಜಿಲ್ಲೆಯ ನಿವಾಸಿಗಳಾದ ಇಡವೇಲಿಕ್ಕಲ್ ಮೂಲದ ರಿಜಿಲ್ ಮತ್ತು ಸ್ವೀಕರಿಸಲು ಬಂದಿದ್ದ ತಲಶ್ಶೇರಿ ಮೂಲದ ರೋಷನ್ ಆರ್.ಬಾಬು ಬಂಧಿತರಾಗಿದ್ದಾರೆ.