ಲೋಕಪಾಲಗೆ ₹5 ಕೋಟಿ ಮೌಲ್ಯದ ಏಳು ಐಷಾರಾಮಿ ಬಿಎಂಡಬ್ಲ್ಯು ಕಾರುಗಳ ಖರೀದಿಗೆ ಟೆಂಡರ್‌!

ನವದೆಹಲಿ: ಭ್ರಷ್ಟಾಚಾರ ನಿಗ್ರಹ ಸಂಸ್ಥೆ 'ಲೋಕಪಾಲ' ಅಂದಾಜು ₹5 ಕೋಟಿ ಮೌಲ್ಯದ ಏಳು ಐಷಾರಾಮಿ ಬಿಎಂಡಬ್ಲ್ಯು ಕಾರುಗಳನ್ನು ಖರೀದಿಸಲು ಟೆಂಡರ್‌ ಆಹ್ವಾನಿಸಿದೆ.

'ಬಿಎಂಡಬ್ಲ್ಯು 3 ಸರಣಿಯ 330ಎಲ್‌ಐ ಮಾದರಿಯ ಕಾರುಗಳನ್ನು ಪೂರೈಸಲು ಪ್ರತಿಷ್ಠಿತ ಏಜೆನ್ಸಿಗಳಿಂದ ಮುಕ್ತ ಟೆಂಡರ್‌ಗಳನ್ನು ಆಹ್ವಾನಿಸಿದೆ' ಎಂದು ಲೋಕಪಾಲ ಸಂಸ್ಥೆ ಟೆಂಡರ್‌ನಲ್ಲಿ ಹೇಳಿದೆ.

ಬಿಎಂಡಬ್ಲ್ಯು ವೆಬ್‌ಸೈಟ್ ಪ್ರಕಾರ, 3 ಸರಣಿಯ ಉದ್ದನೆಯ ವೀಲ್‌ಬೇಸ್ ಕಾರು ಈ ವಿಭಾಗದಲ್ಲಿ ಅತ್ಯಂತ ಉದ್ದ ಮತ್ತು ಹೆಚ್ಚು ವಿಶಾಲವಾಗಿದೆ. ಐಷಾರಾಮಿ ಕ್ಯಾಬಿನ್‌ ಇದ್ದು, ಅತ್ಯುತ್ತಮ ಸೌಕರ್ಯಗಳನ್ನು ಕಲ್ಪಿಸಲಾಗಿದೆ.

ಈ ಕಾರಿನ ಬೆಲೆ ನವದೆಹಲಿಯಲ್ಲಿ ಸುಮಾರು ₹69.5 ಲಕ್ಷ ಇದೆ.

ಲೋಕಪಾಲ ಸಂಸ್ಥೆಯಲ್ಲಿ ಒಟ್ಟು ಎಂಟು ಮಂಜೂರಾದ ಹುದ್ದೆಗಳಿವೆ. ಪ್ರಸ್ತುತ ಒಬ್ಬರು ಅಧ್ಯಕ್ಷರು ಮತ್ತು ಆರು ಸದಸ್ಯರು ಇದ್ದಾರೆ.