ಜಾತಿ ತಾರತಮ್ಯ: 6 ಜನರಿಗೆ 2 ವರ್ಷ ಜೈಲು ಶಿಕ್ಷೆ

 ತಿರುಪುರ : ಪರಿಶಿಷ್ಟ ಜಾತಿಯ ಮಹಿಳೆಯೊಬ್ಬರು ಸರ್ಕಾರಿ ಶಾಲೆಯಲ್ಲಿ ಮಧ್ಯಾಹ್ನದ ಬಿಸಿಯೂಟದ ಅಡುಗೆ ಕೆಲಸ ಮಾಡುವುದನ್ನು ತಡೆದ ಪ್ರಕರಣದಲ್ಲಿ, ಆರು ಜನರಿಗೆ ಇಲ್ಲಿನ ನ್ಯಾಯಾಲಯವು ಎರಡು ವರ್ಷಗಳ ಜೈಲು ಶಿಕ್ಷೆ ಮತ್ತು ತಲಾ ₹5,000 ದಂಡ ವಿಧಿಸಿದೆ. 2018ರಲ್ಲಿ ಈ ಪ್ರಕರಣ ನಡೆದಿತ್ತು.

ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ ಜನರ ಮೇಲಿನ ದೌರ್ಜನ್ಯ ತಡೆ ಕಾಯ್ದೆಯ ಅಡಿಯಲ್ಲಿ 35 ಜನರ ವಿರುದ್ಧ ಪ್ರಕರಣ ದಾಖಲಾಗಿತ್ತು. ಪ್ರಕರಣಗಳ ವಿಚಾರಣೆ ನಡೆಸಿದ ನ್ಯಾಯಾಲಯವು ಸಾಕ್ಷ್ಯಾಧಾರಗಳ ಕೊರತೆಯಿಂದ 25 ಆರೋಪಿಗಳನ್ನು ಖುಲಾಸೆಗೊಳಿಸಿದ್ದು, 6 ಜನರನ್ನು ತಪ್ಪಿತಸ್ಥರು ಎಂದು ತೀರ್ಮಾನ ಪ್ರಕಟಿಸಿದೆ. ಉಳಿದ ನಾಲ್ವರು ವಿಚಾರಣೆಯ ಸಮಯದಲ್ಲಿ ಮೃತಪಟ್ಟಿದ್ದಾರೆ.

ಪಿ. ಪಳನಿಸಾಮಿ ಗೌಂಡರ್, ಎನ್. ಶಕ್ತಿವೇಲ್, ಆರ್. ಶಣ್ಮುಗಂ, ಸಿ ವೆಲ್ಲಿಂಗಿರಿ, ಎ. ದುರೈಸಾಮಿ ಮತ್ತು ವಿ. ಸೀತಾ ಲಕ್ಷ್ಮಿ ಶಿಕ್ಷೆಗೊಳಗಾದವರು.

ಜಿಲ್ಲೆಯ ತಿರುಮಲೈ ಗೌಡಂಪಾಳಯಂನಲ್ಲಿರುವ ಶಾಲೆಯಲ್ಲಿ ಪರಿಶಿಷ್ಟ ಜಾತಿಯ 44 ವರ್ಷದ ಪಿ. ಪಪ್ಪಲ್ ಅವರು ಅಡುಗೆ ಮಾಡುವುದಕ್ಕೆ ಪೋಷಕರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಅವರ ವಿರುದ್ಧ ಜಾತಿ ತಾರತಮ್ಯ ಎಸಗಿದ್ದಲ್ಲದೆ, ನಂತರ ಅವರನ್ನು ವರ್ಗಾವಣೆ ಕೂಡಾ ಮಾಡಲಾಗಿತ್ತು.

ಇದನ್ನು ವಿರೋಧಿಸಿ ತಮಿಳುನಾಡು ಅಸ್ಪೃಶ್ಯತೆ ನಿರ್ಮೂಲನ ರಂಗದ ಸದಸ್ಯರು ಪ್ರತಿಭಟನೆ ನಡೆಸಿದ್ದರು. ಈ ಪ್ರತಿಭಟನೆ ನಂತರ ಅದೇ ವರ್ಷ ಜುಲೈನಲ್ಲಿ ಚೆಯೂರು ಪೊಲೀಸರು ಪ್ರಕರಣ ದಾಖಲಿಸಿ 8 ಜನರನ್ನು ಬಂಧಿಸಿದ್ದರು.