ಇರಾನ್‌ ನಲ್ಲಿ ಯುದ್ಧ ನಡೆಯುತ್ತಿರುವಾಗ ಕಳೆದ 40 ದಿನಗಳಲ್ಲಿ 36 ದಿನಗಳೂ ಗಾಝಾದ ಮೇಲೆ ಬಾಂಬ್ ದಾಳಿ ನಡೆಸಿತ್ತು ಇಸ್ರೇಲ್!

ಗಾಝಾ: 40 ದಿನಗಳ ಯುದ್ಧದ ನಂತರ ಎರಡು ವಾರಗಳ ಕದನ ವಿರಾಮಕ್ಕೆ ಅಮೆರಿಕ ಮತ್ತು ಇರಾನ್ ಬುಧವಾರ ಒಪ್ಪಿಕೊಂಡಿದ್ದು, ಶನಿವಾರ ಪಾಕಿಸ್ತಾನದ ಇಸ್ಲಾಮಾಬಾದ್‌ ನಲ್ಲಿ ಮಾತುಕತೆಗಳು ಪ್ರಾರಂಭವಾಗಲಿವೆ. ಆದರೆ ಫೆಬ್ರವರಿ 28 ರಂದು ಇಸ್ರೇಲ್ ಮತ್ತು ಅಮೆರಿಕ ಇರಾನ್ ಮೇಲೆ ಬಾಂಬ್ ದಾಳಿ ಮಾಡಲು ಪ್ರಾರಂಭಿಸಿದ ನಂತರ, ಇಸ್ರೇಲ್ ಬಹುತೇಕ ಪ್ರತಿದಿನ ಲೆಬನಾನ್, ಗಾಝಾ ಮತ್ತು ಆಕ್ರಮಿತ ಪಶ್ಚಿಮ ದಂಡೆಯ ಮೇಲೆ ದಾಳಿ ನಡೆಸಿದೆ.

►ಕಳೆದ 40 ದಿನಗಳಲ್ಲಿ 36 ದಿನಗಳೂ ಗಾಝಾ ಮೇಲೆ ನಡೆದಿತ್ತು ದಾಳಿ!

ಆರು ತಿಂಗಳ ಹಿಂದೆ ಗಾಝಾ ಪಟ್ಟಿಯಲ್ಲಿ "ಕದನ ವಿರಾಮ" ಘೋಷಣೆಯಾದಾಗಿನಿಂದ, ಇಸ್ರೇಲ್ ಸಾವಿರಾರು ಬಾರಿ ಒಪ್ಪಂದವನ್ನು ಉಲ್ಲಂಘಿಸಿದೆ. ಅಲ್ಲಿ ಇಸ್ರೇಲ್ ಬಹುತೇಕ ಪ್ರತಿದಿನ ದಾಳಿ ನಡೆಸುತ್ತಿದೆ. ಕಳೆದ 40 ದಿನಗಳಲ್ಲಿ, ಇಸ್ರೇಲ್ ಗಾಝಾದ ಮೇಲೆ ಬಾಂಬ್ ದಾಳಿಯನ್ನು ಮುಂದುವರೆಸಿದೆ. ರಫಾ ಕ್ರಾಸಿಂಗ್ ಅನ್ನು ಮುಚ್ಚಿದ್ದು, ಜೀವ ಉಳಿಸುವ ಆಹಾರ ಮತ್ತು ವೈದ್ಯಕೀಯ ಸರಬರಾಜುಗಳನ್ನು ತಡೆಹಿಡಿದಿದೆ.

aljazeera ವಿಶ್ಲೇಷಣೆಯ ಪ್ರಕಾರ, ಕಳೆದ 40 ದಿನಗಳಲ್ಲಿ 36 ದಿನಗಳು ಇಸ್ರೇಲ್ ಗಾಝಾದ ಮೇಲೆ ದಾಳಿ ಮಾಡಿದೆ. ಅಂದರೆ ಇಲ್ಲಿ ಕೇವಲ ನಾಲ್ಕು ದಿನ ಮಾತ್ರ ಯಾವುದೇ ಹಿಂಸಾತ್ಮಕ ದಾಳಿಗಳು, ಸಾವುಗಳು ಅಥವಾ ಗಾಯಗಳು ವರದಿಯಾಗಿಲ್ಲ.

►ಈ ಸಮಯದಲ್ಲಿ ಇಸ್ರೇಲ್ ಎಷ್ಟು ಜನರನ್ನು ಕೊಂದಿದೆ?

ಫೆಬ್ರವರಿ 28 ಮತ್ತು ಏಪ್ರಿಲ್ 8 ರ ನಡುವೆ, ಇಸ್ರೇಲಿ ದಾಳಿಗಳಲ್ಲಿ ಗಾಝಾದಲ್ಲಿ ಕನಿಷ್ಠ 107 ಜನರು ಸಾವಿಗೀಡಾಗಿದ್ದು, 342 ಜನರು ಗಾಯಗೊಂಡಿದ್ದಾರೆ. ಆರು ತಿಂಗಳ ಹಿಂದೆ ಗಾಝಾದಲ್ಲಿ "ಕದನ ವಿರಾಮ" ಜಾರಿಗೆ ಬಂದ ನಂತರ, ಇಸ್ರೇಲಿ ದಾಳಿಗಳಿಗೆ ಕನಿಷ್ಠ 738 ಜನರು ಬಲಿಯಾಗಿದ್ದಾರೆ, 2,000 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ.

ಗಾಝಾದಲ್ಲಿ ನಡೆದ ನರಮೇಧದಲ್ಲಿ, ಇಸ್ರೇಲ್ ಇಲ್ಲಿನ ಜನಸಂಖ್ಯೆಯ ಕನಿಷ್ಠ 10 ಪ್ರತಿಶತವನ್ನು ಕೊಂದಿದೆ ಅಥವಾ ಗಾಯಗೊಳಿಸಿದೆ. ಒಟ್ಟು 72,000 ಕ್ಕೂ ಹೆಚ್ಚು ಜನರು ಇಸ್ರೇಲ್ ದಾಳಿಯಲ್ಲಿ ಸಾವಿಗೀಡಾಗಿದ್ದಾರೆ. ಅವರಲ್ಲಿ ಹೆಚ್ಚಿನವರು ಮಹಿಳೆಯರು ಮತ್ತು ಮಕ್ಕಳು. ಕನಿಷ್ಠ 172,000 ಜನರು ಗಾಯಗೊಂಡಿದ್ದಾರೆ; ಸಾವಿರಾರು ಜನರು ಅವಶೇಷಗಳ ಅಡಿಯಲ್ಲಿ ಹೂತುಹೋಗಿದ್ದಾರೆ ಮತ್ತು ಸತ್ತಿದ್ದಾರೆಂದು ಭಾವಿಸಲಾಗಿದೆ.

ಬುಧವಾರ, ಯುಎಸ್, ಇಸ್ರೇಲ್ ಮತ್ತು ಇರಾನ್ ನಡುವಿನ ದಾಳಿಯಲ್ಲಿ ಬಹುನಿರೀಕ್ಷಿತ ವಿರಾಮಕ್ಕಾಗಿ ಜಗತ್ತು ಕಾಯುತ್ತಿದ್ದಾಗ, ಇಸ್ರೇಲ್ ಗಾಝಾದಲ್ಲಿ ನಡೆಸಿದ ಡ್ರೋನ್ ದಾಳಿಯಲ್ಲಿ Aljazeera ದ ವರದಿಗಾರ ಮೊಹಮ್ಮದ್ ವಿಸ್ವಾಶ್ ಸಾವಿಗೀಡಾಗಿದ್ದಾರೆ.

ಅದೇ ದಿನ, ಇಸ್ರೇಲ್ ಲೆಬನಾನ್ ಮೇಲೆ ದೊಡ್ಡ ಮಟ್ಟದ ದಾಳಿ ನಡೆಸಿತು. ಈ ದಾಳಿಯಲ್ಲಿ ಕನಿಷ್ಠ 254 ಜನರು ಸಾವಿಗೀಡಾಗಿದ್ದು, 1,165 ಜನರು ಗಾಯಗೊಂಡರು.

►ವೈದ್ಯಕೀಯ ಚಿಕಿತ್ಸೆಗಾಗಿ ಶೇ.8 ಜನರ ಸ್ಥಳಾಂತರ

ಫೆಬ್ರವರಿ 28 ರಂದು, ಇಸ್ರೇಲ್ ಮತ್ತು ಯುಎಸ್ ಇರಾನ್ ಮೇಲೆ ದಾಳಿಗಳನ್ನು ಪ್ರಾರಂಭಿಸಿದ ದಿನ, ಇಸ್ರೇಲಿ ಅಧಿಕಾರಿಗಳು ಗಾಝಾಗೆ ಎಲ್ಲಾ ಕ್ರಾಸಿಂಗ್‌ಗಳನ್ನು ಮುಚ್ಚಿದರು. ಇಲ್ಲಿ ಗಾಯಗೊಂಡ ರೋಗಿಗಳನ್ನು ವಿದೇಶಗಳಿಗೆ ಕರೆದೊಯ್ಯುವುದನ್ನು ನಿಲ್ಲಿಸಿದ್ದು, ವೈದ್ಯಕೀಯ ಚಿಕಿತ್ಸೆಗಾಗಿ ಸ್ಥಳಾಂತರಿಸುವಿಕೆಯನ್ನು ಸ್ಥಗಿತಗೊಳಿಸಿದರು. ಅವುಗಳಲ್ಲಿ ರಫಾ ಕ್ರಾಸಿಂಗ್ ಕೂಡ ಸೇರಿದೆ. ಇದು ಈಜಿಪ್ಟ್ ಮೂಲಕ ಗಾಝಾದ ಹೊರಗಿನ ಪ್ರಪಂಚಕ್ಕೆ ಏಕೈಕ ಪ್ರವೇಶದ್ವಾರವಾಗಿದೆ.

ಇದು ಯುಎಸ್ ಮಧ್ಯಸ್ಥಿಕೆಯ 20-ಪಾಯಿಂಟ್ ಕದನ ವಿರಾಮ ಯೋಜನೆಯಡಿಯಲ್ಲಿ ಗಾಝಾದ ಜನರಿಗಾಗಿ ತೆರೆಯಬೇಕಿತ್ತು. ಒಪ್ಪಂದದ ಆಧಾರದ ಮೇಲೆ ದಿನಕ್ಕೆ 50 ರೋಗಿಗಳು ಜೊತೆಗೆ ಅವರ ಕುಟುಂಬದವರು-ಸಾಮಾನ್ಯವಾಗಿ ಪ್ರತಿ ರೋಗಿಗೆ ಒಬ್ಬರು ಅಥವಾ ಇಬ್ಬರು ಆಪ್ತರು-ಚಿಕಿತ್ಸೆಗಾಗಿ ಎನ್ಕ್ಲೇವ್‌ ನಿಂದ ಹೊರಗೆ ಹೋಗಲು ಅವಕಾಶ ನೀಡಬೇಕಿತ್ತು.

ಎರಡು ವರ್ಷಗಳಿಗೂ ಹೆಚ್ಚು ಕಾಲದ ಇಸ್ರೇಲಿ ದಾಳಿಯಿಂದ ಸಾವಿರಾರು ಜನರು ಗಾಯಗೊಂಡಿದ್ದಾರೆ. ಅವರಿಗೆ ತುರ್ತು ವೈದ್ಯಕೀಯ ಚಿಕಿತ್ಸೆಯ ಅಗತ್ಯವಿದೆ. OCHA ಪ್ರಕಾರ, 4,000 ಮಕ್ಕಳು ಸೇರಿದಂತೆ 18,500 ಕ್ಕೂ ಹೆಚ್ಚು ರೋಗಿಗಳಿಗೆ ವೈದ್ಯಕೀಯ ನೆರವು ಅಗತ್ಯವಿದೆ.

ಮಾರ್ಚ್ 19 ರಂದು, ಇಸ್ರೇಲಿ ಅಧಿಕಾರಿಗಳು ರಫಾ ಮೂಲಕ ಸೀಮಿತ ವೈದ್ಯಕೀಯ ಸ್ಥಳಾಂತರಿಸುವಿಕೆಯನ್ನು ಪುನರಾರಂಭಿಸುವುದಾಗಿ ಘೋಷಿಸಿದರು.

ಗಾಝಾ ಮಾಧ್ಯಮ ಕಚೇರಿಯ ಪ್ರಕಾರ, ಫೆಬ್ರವರಿ 28 ರಿಂದ 7,800 ಪ್ರಯಾಣಿಕರಲ್ಲಿ 625 ಜನರಿಗೆ ಚಿಕಿತ್ಸೆಗಾಗಿ ಗಾಝಾದಿಂದ ಹೊರಡಲು ಅನುಮತಿ ನೀಡಲಾಗಿದೆ. ಇದು ಒಪ್ಪಿದ ಸಂಖ್ಯೆಯ ಸುಮಾರು 8 ಪ್ರತಿಶತದಷ್ಟಿದೆ.

►ಗಾಝಾಗೆ ಪ್ರವೇಶಿಸಲು ಶೇ 20 ಟ್ರಕ್‌ ಗಳಿಗೆ ಅನುಮತಿ

ಇಸ್ರೇಲ್ ತುರ್ತು ಆಹಾರ ಮತ್ತು ವೈದ್ಯಕೀಯ ಸರಬರಾಜುಗಳನ್ನು ಮಿತಿಗೊಳಿಸುವುದನ್ನು ಮುಂದುವರೆಸಿದೆ. ಇದು ತೀವ್ರ ಕೊರತೆಯನ್ನುಂಟು ಮಾಡಿದ್ದು, ಜನರು ಆಹಾರ ಸಮಸ್ಯೆಯಿಂದ ಬಳಲುವಂತಾಗಿದೆ.

ಜಾಗತಿಕ ಹಸಿವಿನ ಮೇಲ್ವಿಚಾರಕ ಇಂಟಿಗ್ರೇಟೆಡ್ ಫೇಸ್ ಕ್ಲಾಸಿಫಿಕೇಶನ್ (IPC) ಪ್ರಕಾರ, ಗಾಝಾದ ಜನಸಂಖ್ಯೆಯ ಮುಕ್ಕಾಲು ಭಾಗದಷ್ಟು (77 ಪ್ರತಿಶತ) ಜನರು ಹೆಚ್ಚಿನ ಮಟ್ಟದ ತೀವ್ರ ಆಹಾರ ಅಭದ್ರತೆಯನ್ನು ಎದುರಿಸುತ್ತಿದ್ದಾರೆ.

►ಐಪಿಸಿ ವಿಶ್ಲೇಷಿಸಿದ 1.6 ಮಿಲಿಯನ್ ಜನರಲ್ಲಿ:

475,000 ಜನರು ಹಂತ 2 ರಲ್ಲಿದ್ದಾರೆ; ಇವರಿಗೆ ಆಹಾರ ಸಿಗುತ್ತಿದೆ ಆದರೆ ಬೇಕಾದ ಪೋಷಕಾಂಶಗಳು ಸಿಗುತ್ತಿಲ್ಲ

1,027,790 ಜನರು ಹಂತ 3 ರಲ್ಲಿದ್ದಾರೆ; ಇವರಿಗೆ ಸಾಕಷ್ಟು ಆಹಾರ ಸಿಗುತ್ತಿಲ್ಲ

570,980 ಜನರು ಹಂತ 4 ರಲ್ಲಿದ್ದಾರೆ; ಇವರಿಗೆ ತುರ್ತಾಗಿ ಆಹಾರ ಬೇಕಿದೆ

1,885 ಜನರು ಹಂತ 5 ರಲ್ಲಿದ್ದಾರೆ; ಅಂದರೆ ಇಲ್ಲಿ ಕ್ಷಾಮವಿದೆ

ಗಾಝಾ ಮಾಧ್ಯಮ ಕಚೇರಿಯ ಪ್ರಕಾರ, ಇರಾನ್ ವಿರುದ್ಧ ಯುಎಸ್-ಇಸ್ರೇಲ್ ಯುದ್ಧ ಪ್ರಾರಂಭವಾದಾಗಿನಿಂದ, ಇಸ್ರೇಲ್ ಕದನ ವಿರಾಮ ಒಪ್ಪಂದದಲ್ಲಿ ನಿಗದಿಪಡಿಸಿದ 23,400 ಟ್ರಕ್‌ ಗಳಲ್ಲಿ ಕೇವಲ 4,999 ಮಾತ್ರ ಪಟ್ಟಿಗೆ ಪ್ರವೇಶಿಸಲು ಅವಕಾಶ ನೀಡಿದೆ. ಅಂದರೆ ಭರವಸೆ ನೀಡಿದ ವಿತರಣೆಗಳಲ್ಲಿ ಕೇವಲ ಐದನೇ ಒಂದು ಭಾಗ.

ಶಾಂತಿ ಮಂಡಳಿಯ ರಾಯಭಾರಿ ನಿಕೊಲಾಯ್ ಮ್ಲಾಡೆನೋವ್ ಅವರು ದಿನವೊಂದರಲ್ಲಿ ಮಾನವೀಯ ನೆರವು ನೀಡುವ 602 ಟ್ರಕ್‌ ಗಳು ಗಾಝಾಕ್ಕೆ ಪ್ರವೇಶಿಸಿವೆ ಎಂದು ಹೇಳಿದ್ದರು. ಈ ಹೇಳಿಕೆಯನ್ನು ತಿರಸ್ಕರಿಸಿದ ಗಾಝಾದ ಸರ್ಕಾರಿ ಮಾಧ್ಯಮ ಕಚೇರಿ, ಕೇವಲ 207 ಟ್ರಕ್‌ ಗಳು ಮಾತ್ರ ಗಾಝಾವನ್ನು ಪ್ರವೇಶಿಸಿವೆ; ಕೇವಲ 79 ಟ್ರಕ್‌ ಗಳು ಮಾನವೀಯ ನೆರವು ನೀಡಿವೆ ಎಂದು ಹೇಳಿದೆ. ನೆರವು "ಅಗತ್ಯವಿರುವ ಮಾನವೀಯ ಪ್ರತಿಕ್ರಿಯೆಯ ಮಟ್ಟವನ್ನು ಪೂರೈಸುವುದಿಲ್ಲ" ಎಂದು ಕಚೇರಿ ಹೇಳಿದೆ.

ಕದನ ವಿರಾಮ ಒಪ್ಪಂದದ ಅಡಿಯಲ್ಲಿ ಇಸ್ರೇಲ್ ಮಾನವೀಯ ಪ್ರೋಟೋಕಾಲ್ ಅನ್ನು ಅನುಷ್ಠಾನಗೊಳಿಸುವುದು ಒಪ್ಪಿದ ಮಟ್ಟಗಳ 38 ಪ್ರತಿಶತವನ್ನು ಮೀರಿಲ್ಲ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಸತ್ಯಗಳನ್ನು ತಿರುಚುವುದರಿಂದ ದುರಂತದ ಪ್ರಮಾಣವನ್ನು ಮರೆಮಾಡಲು ಸಾಧ್ಯವಿಲ್ಲ. ಹೀಗೆ ಮಾಡುವುದರಿಂದ ಯಾವುದೇ ಪಕ್ಷವು ಅದರ ಕಾನೂನು ಮತ್ತು ಮಾನವೀಯ ಜವಾಬ್ದಾರಿಗಳಿಂದ ಮುಕ್ತವಾಗುವುದಿಲ್ಲ ಎಂದು ಕಚೇರಿ ಹೇಳಿದ್ದು, ಫೆಲೆಸ್ತೀನಿನ ನಾಗರಿಕರನ್ನು ರಕ್ಷಿಸಲು ಅಂತರರಾಷ್ಟ್ರೀಯ ಹಸ್ತಕ್ಷೇಪಕ್ಕೆ ಕರೆ ನೀಡಿದೆ.