ಆಂಡ್ರಾಯ್ಡ್‌ ಮೊಬೈಲ್‌ನಿಂದ ಐಫೋನ್‌ಗೆ WhatsApp ಚಾಟ್ ವರ್ಗಾಯಿಸಲು ಈ ಟಿಪ್ಸ್‌ ಫಾಲೋ ಮಾಡಿ

 ಪ್ರಸ್ತುತ ದಿನಗಳಲ್ಲಿ WhatsApp ನಮ್ಮ ದೈನಂದಿನ ಜೀವನದ ಪ್ರಮುಖ ಭಾಗವಾಗಿದೆ. ವೈಯಕ್ತಿಕ ಚಾಟ್‌ಗಳಿಂದ ಹಿಡಿದು ಫೋಟೋ, ವಿಡಿಯೋ, ಡಾಕ್ಯುಮೆಂಟ್‌ಗಳು ಮತ್ತು ಕಚೇರಿ ಮಾಹಿತಿವರೆಗಿನ ಬಹುತೇಕ ಎಲ್ಲವೂ ವಾಟ್ಸಾಪ್‌ ನಲ್ಲೇ ಸ್ಟೋರ್‌ ಆಗಿರುತ್ತವೆ. ಹೀಗಾಗಿ ಹೊಸ ಮೊಬೈಲ್‌ ಖರೀದಿಸಿದಾಗ ಅಥವಾ ಆಂಡ್ರಾಯ್ಡ್‌ ನಿಂದ ಐಫೋನ್‌ ಗೆ ಬದಲಾಯಿಸಿದಾಗ ಹಳೆಯ ಚಾಟ್‌ಗಳನ್ನು ಸುರಕ್ಷಿತವಾಗಿ ವರ್ಗಾಯಿಸುವುದು ಬಹಳ ಮುಖ್ಯವಾಗುತ್ತದೆ. ಹಿಂದೆ ಈ ಪ್ರಕ್ರಿಯೆ ಕಷ್ಟಕರವಾಗಿದ್ದರೂ ಇದೀಗ ವಾಟ್ಸಾಪ್‌ ಅಧಿಕೃತವಾಗಿ ಸುಲಭ ಮತ್ತು ಸುರಕ್ಷಿತ ಚಾಟ್ ಟ್ರಾನ್ಸ್‌ಫರ್ ವ್ಯವಸ್ಥೆಯನ್ನು ನೀಡುತ್ತಿದೆ. ಕೆಲವೇ ಸುಲಭ ಹಂತಗಳನ್ನು ಅನುಸರಿಸಿದರೆ ನಿಮ್ಮ ಎಲ್ಲಾ ಮುಖ್ಯ ಚಾಟ್‌ಗಳು ಮತ್ತು ಮೀಡಿಯಾ ಫೈಲ್‌ಗಳನ್ನು ಹೊಸ ಫೋನ್‌ಗೆ ಸುಲಭವಾಗಿ ವರ್ಗಾಯಿಸಬಹುದು. ಹಾಗಾದರೆ ಈ ಬಗ್ಗೆ ಇನ್ನಷ್ಟು ಮಾಹಿತಿ ಮುಂದೆ ತಿಳಿಯೋಣ. 

WhatsApp ಚಾಟ್‌ ವರ್ಗಾಯಿಸಲು ಹೀಗೆ ಮಾಡಿ

ಆಂಡ್ರಾಯ್ಡ್ ಫೋನ್‌ನಿಂದ ಐಫೋನ್‌ಗೆ ವಾಟ್ಸಾಪ್‌ ಚಾಟ್ ವರ್ಗಾಯಿಸಲು ಮೊದಲು ಐಫೋನ್‌ ಹೊಸದಾಗಿರಬೇಕು ಅಥವಾ Factory Reset ಸ್ಥಿತಿಯಲ್ಲಿ ಇರಬೇಕು. ಬಳಿಕ ಐಫೋನ್‌ Move to iOS ಆಪ್‌ ಅನ್ನು ಆಂಡ್ರಾಯ್ಡ್‌ ಫೋನ್‌ನಲ್ಲಿ ಇನ್‌ಸ್ಟಾಲ್ ಮಾಡಬೇಕು. ಎರಡೂ ಫೋನ್‌ಗಳನ್ನು ಒಂದೇ Wi-Fi ನೆಟ್‌ವರ್ಕ್‌ಗೆ ಕನೆಕ್ಟ್ ಮಾಡಿದ ನಂತರ Move to iOS ಆಪ್‌ ಮೂಲಕ ಡೇಟಾ ಟ್ರಾನ್ಸ್‌ಫರ್ ಪ್ರಕ್ರಿಯೆ ಪ್ರಾರಂಭಿಸಬಹುದು.

ಈ ಪ್ರಕ್ರಿಯೆಯಲ್ಲಿ ವಾಟ್ಸಾಪ್‌ ಆಯ್ಕೆಯನ್ನು ಸೆಲೆಕ್ಟ್ ಮಾಡಿದರೆ ಚಾಟ್‌ಗಳು, ಮೀಡಿಯಾ ಫೈಲ್‌ಗಳು ಮತ್ತು ಕೆಲವು ಸೆಟ್ಟಿಂಗ್‌ಗಳು ಐಫೋನ್‌ಗೆ ವರ್ಗವಾಗುತ್ತವೆ. ನಂತರ ಐಫೋನ್‌‌ನಲ್ಲಿ ಅದೇ ಮೊಬೈಲ್ ಸಂಖ್ಯೆಯಿಂದ ವಾಟ್ಸಾಪ್‌ ಲಾಗಿನ್ ಮಾಡಿದಾಗ ಹಳೆಯ ಚಾಟ್‌ಗಳು ಸ್ವಯಂಚಾಲಿತವಾಗಿ ಕಾಣಿಸಿಕೊಳ್ಳುತ್ತವೆ.

ಇದೇ ರೀತಿ ಐಫೋನ್‌ ‌ನಿಂದ ಆಂಡ್ರಾಯ್ಡ್ ಫೋನಿಗೆ ಚಾಟ್ ವರ್ಗಾಯಿಸುವುದೂ ಈಗ ಸುಲಭವಾಗಿದೆ. ಕೆಲವು ಆಂಡ್ರಾಯ್ಡ್ ಫೋನ್‌ಗಳಲ್ಲಿ ವಿಶೇಷ ವಾಟ್ಸಾಪ್‌ Transfer ಆಯ್ಕೆ ಲಭ್ಯವಿದ್ದು, USB-C to Lightning ಕೇಬಲ್ ಮೂಲಕ ಎರಡೂ ಫೋನ್‌ಗಳನ್ನು ಕನೆಕ್ಟ್ ಮಾಡಿ ಚಾಟ್‌ಗಳನ್ನು ವರ್ಗಾಯಿಸಬಹುದು. ಹೊಸ ಆಂಡ್ರಾಯ್ಡ್ ಫೋನ್ ಸೆಟ್‌ಅಪ್ ಸಮಯದಲ್ಲಿ ವಾಟ್ಸಾಪ್‌ ಡೇಟಾ ಟ್ರಾನ್ಸ್‌ಫರ್ ಆಯ್ಕೆಯನ್ನು ಆಯ್ಕೆ ಮಾಡಬೇಕು.

ಚಾಟ್ ಟ್ರಾನ್ಸ್‌ಫರ್ ಮಾಡುವ ಮೊದಲು ಕೆಲವು ಮುಖ್ಯ ವಿಚಾರಗಳನ್ನು ಗಮನಿಸಬೇಕು. ಎರಡೂ ಫೋನ್‌ಗಳಲ್ಲಿ ವಾಟ್ಸಾಪ್‌ ಹೊಸ ಆವೃತ್ತಿ ಇರಬೇಕು. ಫೋನ್‌ನಲ್ಲಿ ಸಾಕಷ್ಟು ಸ್ಟೋರೇಜ್ ಖಾಲಿ ಇರಬೇಕು. ಜೊತೆಗೆ ಇಂಟರ್‌ನೆಟ್ ಸಂಪರ್ಕ ಸ್ಥಿರವಾಗಿರುವುದು ಮುಖ್ಯ. ಈಗ ವಾಟ್ಸಾಪ್‌ ನೀಡಿರುವ ಅಧಿಕೃತ ಟ್ರಾನ್ಸ್‌ಫರ್ ವ್ಯವಸ್ಥೆಯಿಂದ ಆಂಡ್ರಾಯ್ಡ್ ಮತ್ತು ಐಫೋನ್‌ ನಡುವೆ ಚಾಟ್ ವರ್ಗಾವಣೆ ಹಿಂದಿನಿಗಿಂತ ಹೆಚ್ಚು ಸುಲಭ ಮತ್ತು ಸುರಕ್ಷಿತವಾಗಿದೆ. ಹೀಗಾಗಿ ಹೊಸ ಫೋನ್ ಖರೀದಿಸಿದರೂ ಹಳೆಯ ಮೆಮೊರಿಗಳ ಚಾಟ್‌ಗಳನ್ನು ಕಳೆದುಕೊಳ್ಳುವ ಆತಂಕ ಬೇಡ.