ವರ್ಕೌಟ್ ಸಮಯದಲ್ಲಿ ಎಷ್ಟು ನೀರು ಕುಡಿಯಬೇಕು? ಜಿಮ್ ಹೋಗುವವರಿಗೆ ಬೆಸ್ಟ್ ಟಿಪ್ಸ್ ಇಲ್ಲಿದೆ

ವರ್ಕೌಟ್ (Workout) ಮಾಡುವುದರಿಂದ ದೇಹ ಸದೃಢವಾಗಿರುತ್ತದೆ. ಜೊತೆಗೆ ಆರೋಗ್ಯ (Health) ಚೆನ್ನಾಗಿರುತ್ತದೆ. ಆದರೆ ಅನೇಕರು ವರ್ಕೌಟ್ ಮಾಡುವಾಗ ನೀರು (Water) ಕುಡಿಯುವುದನ್ನು ಮರೆಯುತ್ತಾರೆ. ಕೇವಲ ಬೆಳಿಗ್ಗೆ ಎದ್ದು ವರ್ಕೌಟ್ ಮಾಡಿದರೆ ಸಾಕು ಎಂದು ಯೋಚಿಸಬೇಡಿ.

ಸರಿಯಾದ ಪ್ರಮಾಣದಲ್ಲಿ ನೀರು ಕುಡಿಯದಿದ್ದರೆ ವರ್ಕೌಟ್ ಮಾಡುವುದರಿಂದ ಬರುವ ಲಾಭ ಕಡಿಮೆಯಾಗುತ್ತದೆ. ನಿಜವಾದ ಫಲಿತಾಂಶಕ್ಕಾಗಿ ನೀರು ಕುಡಿಯುವುದು ಬಹಳ ಮುಖ್ಯ.

ವರ್ಕೌಟ್ ಮಾಡುವಾಗ ದೇಹ ಬೆವರು ಬಿಡುತ್ತದೆ. ಬೆವರಿನೊಂದಿಗೆ ನೀರು ಮತ್ತು ಲವಣಗಳು ಹೊರಹೋಗುತ್ತವೆ. ಇದರಿಂದ ದೇಹದಲ್ಲಿ ನೀರು ಕಡಿಮೆಯಾಗುತ್ತದೆ (ಡಿಹೈಡ್ರೇಷನ್). ಇದು ಆಯಾಸ, ತಲೆನೋವು, ಸ್ನಾಯುಗಳ ಸೆಳೆತ, ತಲೆಸುತ್ತು ಮತ್ತು ವರ್ಕೌಟ್ ಸಾಮರ್ಥ್ಯ ಕಡಿಮೆಯಾಗುವುದಕ್ಕೆ ಕಾರಣವಾಗುತ್ತದೆ.

ದೇಹದ ತೂಕದ ಕೇವಲ 1-2% ನೀರು ಕಳೆದುಹೋದರೂ ವರ್ಕೌಟ್ ಪರಿಣಾಮ ಕಡಿಮೆಯಾಗುತ್ತದೆ. ಅದಕ್ಕಾಗಿ ಸರಿಯಾದ ಸಮಯದಲ್ಲಿ ಮತ್ತು ಸರಿಯಾದ ಪ್ರಮಾಣದಲ್ಲಿ ನೀರು ಕುಡಿಯುವುದು ಒಳ್ಳೆಯದು ಎಂದು ಭಾರತೀಯ ಸೇನೆಯಲ್ಲಿ ವೈದ್ಯರಾಗಿ ಸೇವೆ ಸಲ್ಲಿಸಿ ನಿವೃತ್ತರಾದ ಮೇಜರ್ ಡಾ. ಎಸ್. ಬಖ್ತಿಯಾರ್ ಚೌಧರಿ ಅವರು ತಮ್ಮ ಯೂಟ್ಯೂಬ್ ವಿಡಿಯೋದಲ್ಲಿ ವಿವರಿಸಿದ್ದಾರೆ.

ವರ್ಕೌಟ್ ಮೊದಲು:

ವರ್ಕೌಟ್ ಪ್ರಾರಂಭಿಸುವ 2-3 ಗಂಟೆಗಳ ಮೊದಲು ಸುಮಾರು 500-600 ಮಿಲಿ ನೀರು ಕುಡಿಯಿರಿ. ವರ್ಕೌಟ್ ಪ್ರಾರಂಭಿಸುವ 15-20 ನಿಮಿಷಗಳ ಮೊದಲು ಇನ್ನೊಂದು 200-300 ಮಿಲಿ ನೀರು ಸೇವಿಸಿ. ಇದರಿಂದ ದೇಹ ಸಿದ್ಧವಾಗಿ, ಶಕ್ತಿ ಹೆಚ್ಚಾಗುತ್ತದೆ.

ವರ್ಕೌಟ್ ಮಾಡುವಾಗ: ಪ್ರತಿ 15-20 ನಿಮಿಷಕ್ಕೊಮ್ಮೆ ಅರ್ಧ ಗ್ಲಾಸ್‌ನಿಂದ ಒಂದು ಗ್ಲಾಸ್ ನೀರನ್ನು ಸಣ್ಣ ಸಣ್ಣ ಗುಟುಕುಗಳಲ್ಲಿ ಕುಡಿಯಿರಿ. ಸಾಮಾನ್ಯವಾಗಿ ಗಂಟೆಗೆ ಅರ್ಧ ಲೀಟರ್‌ನಿಂದ ಒಂದು ಲೀಟರ್ ನೀರು ಸಾಕು. ಬಿಸಿ ಹವೆಯಲ್ಲಿ ಅಥವಾ ಕಠಿಣ ವರ್ಕೌಟ್ ಮಾಡುವಾಗ ಸ್ವಲ್ಪ ಹೆಚ್ಚು ಕುಡಿಯಬಹುದು. 20 ನಿಮಿಷಕ್ಕಿಂತ ಕಡಿಮೆ ವರ್ಕೌಟ್ ಮಾಡುವಾಗ ಸಾಮಾನ್ಯ ನೀರು ಸಾಕು. ಹೆಚ್ಚು ಸಮಯ ಅಥವಾ ಕಠಿಣ ವರ್ಕೌಟ್​​ಕೆ ಎಲೆಕ್ಟ್ರೋಲೈಟ್ ಪಾನೀಯಗಳು ಉತ್ತಮ.

ವರ್ಕೌಟ್ ನಂತರ: ವರ್ಕೌಟ್ ಮುಗಿದ ಕೂಡಲೇ 200-300 ಮಿಲಿ ನೀರು ಕುಡಿಯಿರಿ. ನಂತರ ದೇಹದಿಂದ ಕಳೆದುಹೋದ ನೀರನ್ನು ತುಂಬಿಸಲು ಇನ್ನಷ್ಟು ನೀರು ಕುಡಿಯಿರಿ. ವ್ಯಾಯಾಮಕ್ಕೆ ಮೊದಲು ಮತ್ತು ನಂತರ ತೂಕವನ್ನು ಅಳೆಯಿರಿ. ಒಂದು ಕಿಲೋಗ್ರಾಂ ತೂಕ ಕಡಿಮೆಯಾದರೆ 1.25 ರಿಂದ 1.5 ಲೀಟರ್ ನೀರು ಕುಡಿಯಿರಿ. ಇದರಿಂದ ದೇಹ ಬೇಗನೆ ಚೇತರಿಸಿಕೊಳ್ಳುತ್ತದೆ.

ವೈದ್ಯರ ಸಲಹೆಗಳೇನು?

ನೀರಿನ ಪ್ರಮಾಣ ಎಲ್ಲರಿಗೂ ಒಂದೇ ಇರುವುದಿಲ್ಲ. ದೇಹದ ತೂಕ, ಬೆವರು, ಹವಾಮಾನ, ವ್ಯಾಯಾಮದ ತೀವ್ರತೆ ಮತ್ತು ಸಮಯವನ್ನು ನೋಡಿ ಬದಲಾಗುತ್ತದೆ. ಬಾಯಾರಿಕೆ ಬಂದಾಗ ಮಾತ್ರ ಕುಡಿದರೆ ಸಾಕಾಗುವುದಿಲ್ಲ. ಏಕೆಂದರೆ ಬಾಯಾರಿಕೆ ಬಂದಾಗಾಗಲೇ ದೇಹಕ್ಕೆ ನೀರು ಕಡಿಮೆಯಾಗಿರುತ್ತದೆ. ಆದ್ದರಿಂದ ನಿಯಮಿತವಾಗಿ ಸಣ್ಣ ಸಣ್ಣ ಸಿಪ್‌ಗಳಲ್ಲಿ ಕುಡಿಯಿರಿ.

ತುಂಬಾ ಹೆಚ್ಚು ನೀರು ಕುಡಿಯುವುದೂ ಒಳ್ಳೆಯದಲ್ಲ. ಜಾಸ್ತಿ ಕುಡಿದರೆ ದೇಹದಲ್ಲಿ ಸೋಡಿಯಂ ಕಡಿಮೆಯಾಗಿ ಅಪಾಯವಾಗಬಹುದು. ಆದ್ದರಿಂದ ಸಮತೋಲನ ಇರಿಸಿ. ಸ್ವಲ್ಪ ತಣ್ಣಗಿರುವ (ತುಂಬಾ ತಣ್ಣಗಿರದ) ನೀರು ಕುಡಿಯುವುದು ಉತ್ತಮ. ಇದು ದೇಹವನ್ನು ತಣ್ಣಗಾಗಿಸಿ, ಬೇಗನೆ ಹೀರಿಕೊಳ್ಳಲು ಸಹಾಯ ಮಾಡುತ್ತದೆ ಎಂದು ಡಾ. ಎಸ್. ಬಖ್ತಿಯಾರ್ ಚೌಧರಿ ತಿಳಿಸಿದ್ದಾರೆ.