ಅಮೀಬಿಕ್ ಎನ್ಸೆಫಾಲಿಟಿಸ್: ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜಿನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಯುವಕ ಸಾವು

ಮಲಪ್ಪುರಂ: ಅಮೀಬಿಕ್ ಎನ್ಸೆಫಾಲಿಟಿಸ್ ನಿಂದಾಗಿ ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜಿನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಯುವಕ ಮೃತಪಟ್ಟಿದ್ದಾನೆ. 

ಮೃತ ವ್ಯಕ್ತಿ ಮುಹಮ್ಮದ್ ಶಫೀಕ್, ಮಲಪ್ಪುರಂನ ಪಿಲಾತ್ತರ ಮೂಲದವರು. ಶಫೀಕ್ ಅವರನ್ನು ಕಳೆದ ವಾರ ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜಿಗೆ ದಾಖಲಿಸಲಾಗಿತ್ತು.

ಶಫೀಕ್ ಅವರನ್ನು ಆರಂಭದಲ್ಲಿ ತೀವ್ರ ಲಕ್ಷಣಗಳ ಹಿನ್ನೆಲೆಯಲ್ಲಿ ಕೊಟ್ಟಕ್ಕಲದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಸ್ಥಿತಿ ಗಂಭೀರವಾದ ನಂತರ ಅವರನ್ನು ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜಿಗೆ ಸ್ಥಳಾಂತರಿಸಲಾಯಿತು. ಚಿಕಿತ್ಸೆ ಪಡೆಯುತ್ತಿರುವಾಗ ಅವರು ನಿಧನರಾದರು.

ಮಲ್ಲಪ್ಪುರಂನ ಅತವನಾಡ್ ಪಂಚಾಯತ್‍ನ ಚೇಳೂರು ಭರಣಿ ಕೊಳದಲ್ಲಿ ಸ್ನಾನ ಮಾಡಿದ್ದ ಅವರಿಗೆ ಬಳಿಕ ಅಮೀಬಾ ದೇಹವನ್ನು ಪ್ರವೇಶಿಸಿರಬಹುದು ಎಂಬುದು ಆರೋಗ್ಯ ಇಲಾಖೆ ಮತ್ತು ಜಿಲ್ಲಾಡಳಿತದ ಆರಂಭಿಕ ತೀರ್ಮಾನವಾಗಿದೆ.

ವೆಟ್ಟಿಚಿರ ಜುಮಾ ಮಸೀದಿಯಲ್ಲಿ ಅಂತ್ಯಕ್ರಿಯೆ ನಡೆಯಿತು. ಕೆಲವು ವಾರಗಳ ವಿರಾಮದ ನಂತರ ಅಮೀಬಿಕ್ ಎನ್ಸೆಫಾಲಿಟಿಸ್ ನಿಂದಾಗಿ ಹೊಸ ಸಾವಿನ ವರದಿ ಆರೋಗ್ಯ ಇಲಾಖೆ ಮತ್ತು ಸಾರ್ವಜನಿಕರಲ್ಲಿ ಹೆಚ್ಚಿನ ಕಳವಳವನ್ನು ಮೂಡಿಸಿದೆ.