ಹೊಸ ಅಂಚೆ ವಾಹನ ಸೇವೆಯಿಂದ ಕಾಸರಗೋಡು ಹೊರಗೆ; ಕಣ್ಣೂರುವರೆಗೆ ಮಾತ್ರ ಸೇವೆ: ಹೆಚ್ಚಿದ ಪ್ರತಿಭಟನೆ

ಕಾಸರಗೋಡು: ಕೇರಳಕ್ಕೆ ತೆರಳುವ ಎಲ್ಲಾ ರೈಲುಗಳನ್ನು ಕಣ್ಣೂರಿನಲ್ಲಿ ಸ್ಥಗಿತಗೊಳಿಸುತ್ತಿರುವ ರೈಲ್ವೆ ಸಚಿವಾಲಯದ ಕ್ರಮದ ಬೆನ್ನಿಗೇ, ಅಂಚೆ ಇಲಾಖೆಯು ಕಾಸರಗೋಡನ್ನು ಹೊರಗಿಟ್ಟಿದೆ. ಅಂಚೆ ಸೇವೆಯನ್ನು ವೇಗಗೊಳಿಸಲು ದೈನಂದಿನ ವಾಹನ ಸೇವೆಯನ್ನು ಪರಿಚಯಿಸಿದ ಅಂಚೆ ಇಲಾಖೆಯ ನಿರ್ಧಾರದಲ್ಲಿ ಕಾಸರಗೋಡು ಜಿಲ್ಲೆಯನ್ನು ಸಂಪೂರ್ಣವಾಗಿ ಹೊರಗಿಡಲಾಗಿದೆ.

ಕಣ್ಣೂರುವರೆಗೆ ಮಾತ್ರ ಸೇವೆ:

ತಿರುವನಂತಪುರದಿಂದ ಕಣ್ಣೂರುವರೆಗೆ ಆರು ಟನ್ ಸಾಮಥ್ರ್ಯದ ದೈನಂದಿನ ವಾಹನ ಸೇವೆಯನ್ನು ಅಂಚೆ ಇಲಾಖೆ ಪರಿಚಯಿಸಿದೆ. ಕೇರಳ ಅಂಚೆ ವೃತ್ತವು ಅಂಚೆ ಪಾರ್ಸೆಲ್ ಗಳನ್ನು ತ್ವರಿತವಾಗಿ ವಿತರಿಸಲು ಪ್ರಾರಂಭಿಸಿರುವ ತಿರುವನಂತಪುರಂ-ಕಣ್ಣೂರು ರಸ್ತೆ ಸಾರಿಗೆ ಜಾಲ ಸೇವೆಯಿಂದ ಕಾಸರಗೋಡನ್ನು ಹೊರಗಿಡಲಾಗಿದೆ. ಈ ಯೋಜನೆಯನ್ನು ಶುಕ್ರವಾರ ಕೇರಳ ವೃತ್ತದ ಮುಖ್ಯ ಪೋಸ್ಟ್ ಮಾಸ್ಟರ್ ಜನರಲ್ ಅಮಿತಾಭ್ ಸಿಂಗ್ ಅವರು ಉದ್ಘಾಟಿಸಿದ್ದರು.

ಸೇವಾ ವೇಳಾಪಟ್ಟಿ:

ಹೊಸ ಅಂಚೆ ವಾಹನವು ರಾತ್ರಿ 9 ಗಂಟೆಗೆ ತಿರುವನಂತಪುರಂನಿಂದ ಹೊರಟು ಮರುದಿನ ಬೆಳಿಗ್ಗೆ 11.30 ಕ್ಕೆ ಕಣ್ಣೂರು ತಲುಪಲು ವ್ಯವಸ್ಥೆ ಮಾಡಲಾಗಿದೆ. ಕಣ್ಣೂರಿನಿಂದ ಹಿಂತಿರುಗುವ ಸೇವೆಯನ್ನು ಕೂಡಾ ನಿರ್ವಹಿಸಲಾಗುವುದು. ಈ ವಾಹನ ಸೇವೆಯು ಕೊಲ್ಲಂ, ಎರ್ನಾಕುಳಂ, ತ್ರಿಶೂರ್ ಮತ್ತು ಕೋಝಿಕೋಡ್ ನಗರಗಳನ್ನು ತಿರುವನಂತಪುರಂ ಮತ್ತು ಕಣ್ಣೂರು ನಡುವೆ ಸಂಪರ್ಕಿಸುತ್ತದೆ.

ಪ್ರಬಲ ಪ್ರತಿಭಟನೆ:

ಇತರ ಜಿಲ್ಲೆಗಳಂತೆ, ಕಾಸರಗೋಡು ಬಹಳಷ್ಟು ಪಾರ್ಸೆಲ್ ಮತ್ತು ಮೇಲ್ ಸಂಬಂಧಿತ ವಸ್ತುಗಳನ್ನು ಕಳುಹಿಸುವ ಜಿಲ್ಲೆಯಾಗಿದೆ. ಹೈ-ಸ್ಪೀಡ್ ಅಂಚೆ ವಾಹನ ಸೇವೆಯಿಂದ ಕಾಸರಗೋಡನ್ನು ಹೊರಗಿಡುವುದರ ವಿರುದ್ಧ ಜಿಲ್ಲೆಯ ಆನ್‍ಲೈನ್ ವ್ಯಾಪಾರಿಗಳು ತೀವ್ರವಾಗಿ ಪ್ರತಿಭಟಿಸುತ್ತಿದ್ದಾರೆ. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಎಲ್ಲಾ ಯೋಜನೆಗಳಿಂದ ಕಾಸರಗೋಡನ್ನು ಹೊರಗಿಡುವುದರ ವಿರುದ್ಧ ಜನರಲ್ಲಿ ಪ್ರತಿಭಟನೆಗಳು ಹೆಚ್ಚುತ್ತಿವೆ.