EPFO ವೇತನ ಮಿತಿ ₹25,000ಕ್ಕೆ ಏರಿಕೆ: ದೇಶದ 51 ಲಕ್ಷ ಕಾರ್ಮಿಕರಿಗೆ ಕೇಂದ್ರ ಸರ್ಕಾರ ಬಂಪರ್ ಕೊಡುಗೆ..!

 ನವದೆಹಲಿ: ದೇಶದ ಕೋಟ್ಯಂತರ ಉದ್ಯೋಗಿಗಳಿಗೆ ಕೇಂದ್ರ ಸರ್ಕಾರವು ಸಿಹಿ ಸುದ್ದಿ ನೀಡಿದೆ. ನೌಕರರ ಭವಿಷ್ಯ ನಿಧಿ ಸಂಸ್ಥೆಯ (EPFO) ಕಡ್ಡಾಯ ವೇತನ ಮಿತಿಯನ್ನು (Wage Ceiling) ಪ್ರಸ್ತುತ ಇರುವ ರೂ.15,000 ರಿಂದ ರೂ.25,000 ಕ್ಕೆ ಹೆಚ್ಚಿಸಲು ಕೇಂದ್ರ ಸಚಿವ ಸಂಪುಟವು ಅಧಿಕೃತ ಅನುಮೋದನೆ ನೀಡಿದೆ. 

ಸರ್ಕಾರದ ಈ ಐತಿಹಾಸಿಕ ನಿರ್ಧಾರದಿಂದಾಗಿ ದೇಶಾದ್ಯಂತ ಹೆಚ್ಚುವರಿಯಾಗಿ 51 ಲಕ್ಷಕ್ಕೂ ಅಧಿಕ ಕಾರ್ಮಿಕರು ಕಡ್ಡಾಯ ಭವಿಷ್ಯ ನಿಧಿ (PF) ಮತ್ತು ಪಿಂಚಣಿ ಯೋಜನೆಯ ವ್ಯಾಪ್ತಿಗೆ ಒಳಪಡಲಿದ್ದಾರೆ.

ದೀರ್ಘಾವಧಿಯ ಕಾಯುವಿಕೆಯ ನಂತರ, ಕಳೆದ 12 ವರ್ಷಗಳಲ್ಲೇ ಶಾಸನಬದ್ಧ ವೇತನ ಮಿತಿಗೆ ತರಲಾದ ಮೊದಲ ಪ್ರಮುಖ ತಿದ್ದುಪಡಿ ಇದಾಗಿದೆ. ಈ ಹೊಸ ನಿಯಮವು ಇಂದಿನಿಂದಲೇ ಅಂದರೆ ಸೆಪ್ಟೆಂಬರ್ 17, 2026 ರಿಂದ ಅಧಿಕೃತವಾಗಿ ಜಾರಿಗೆ ಬರಲಿದೆ.

ಇದುವರೆಗೆ ಹೊಸ ಉದ್ಯೋಗಕ್ಕೆ ಸೇರುವ ವ್ಯಕ್ತಿಯ ಮಾಸಿಕ ವೇತನ ರೂ.15,000ಕ್ಕಿಂತ ಹೆಚ್ಚಿದ್ದರೆ, ಅವರು ಸ್ವಯಂಚಾಲಿತವಾಗಿ ಇಪಿಎಫ್‌ಒ ವ್ಯಾಪ್ತಿಗೆ ಒಳಪಡುವ ಅಗತ್ಯವಿರಲಿಲ್ಲ.

ಹೊಸ ವೇತನ ಮಿತಿಯ ಅನ್ವಯ, ತಿಂಗಳಿಗೆ ರೂ.25,000ವರೆಗೆ ವೇತನ ಪಡೆಯುವ ನೌಕರರು ಅನ್ವಯವಾಗುವ ನಿಯಮಗಳಿಗೆ ಒಳಪಟ್ಟು ಕಡ್ಡಾಯ ಇಪಿಎಫ್‌ಒ ವ್ಯಾಪ್ತಿಗೆ ಬರಲಿದ್ದಾರೆ. ಇದರಿಂದ ನೌಕರರಿಗೆ ಭವಿಷ್ಯ ನಿಧಿ ಉಳಿತಾಯ, ಪಿಂಚಣಿ ಸೌಲಭ್ಯ ಹಾಗೂ ವಿಮಾ ರಕ್ಷಣೆಯಂತಹ ಸಾಮಾಜಿಕ ಭದ್ರತಾ ಪ್ರಯೋಜನಗಳು ದೊರೆಯಲಿವೆ.

ವೇತನ ಮಿತಿಯನ್ನು ಹೆಚ್ಚಿಸುವುದರಿಂದ ಉದ್ಯೋಗಿಯ ಭವಿಷ್ಯ ನಿಧಿ ಮತ್ತು ಪಿಂಚಣಿ ಖಾತೆಗೆ ಉದ್ಯೋಗದಾತರು ಹೆಚ್ಚಿನ ಮೊತ್ತವನ್ನು ಕೊಡುಗೆಯಾಗಿ ನೀಡಬೇಕಾಗುತ್ತದೆ. ಸಾಮಾನ್ಯವಾಗಿ ಉದ್ಯೋಗದಾತರು ವೇತನ ಮಿತಿಯ ಶೇ.12ರಷ್ಟು ಮೊತ್ತವನ್ನು ಉದ್ಯೋಗಿಯ ಭವಿಷ್ಯ ನಿಧಿ ಖಾತೆಗೆ ಕೊಡುಗೆಯಾಗಿ ನೀಡುತ್ತಾರೆ. ಹೀಗಾಗಿ ಹೊಸ ಮಿತಿಯೊಂದಿಗೆ ಉದ್ಯೋಗದಾತರ ಕೊಡುಗೆಯೂ ಹೆಚ್ಚಾಗಲಿದೆ. ಮತ್ತೊಂದೆಡೆ, ಉದ್ಯೋಗಿಯ ಕೈಗೆ ಸಿಗುವ ವೇತನದಲ್ಲಿ ಕಡಿತವಾಗಲಿದೆ.

ಇಪಿಎಫ್‌ಒ ವೇತನ ಮಿತಿಯನ್ನು ಕೊನೆಯ ಬಾರಿ 2014ರ ಸೆಪ್ಟೆಂಬರ್‌ನಲ್ಲಿ ರೂ.15,000ಕ್ಕೆ ಹೆಚ್ಚಿಸಲಾಗಿತ್ತು. ಕಳೆದ 12 ವರ್ಷಗಳಲ್ಲಿ ವೇತನ ಮತ್ತು ಆದಾಯದಲ್ಲಾದ ಏರಿಕೆ ಹಾಗೂ ಔಪಚಾರಿಕ ಉದ್ಯೋಗಗಳ ವಿಸ್ತರಣೆಯನ್ನು ಪರಿಗಣಿಸಿ ಇದೀಗ ಮಿತಿ ಹೆಚ್ಚಿಸಲಾಗಿದೆ ಎಂದು ಸರ್ಕಾರ ತಿಳಿಸಿದೆ.

ವ್ಯಾಪ್ತಿಯನ್ನು ವಿಸ್ತರಿಸುವುದರಿಂದ ಸರ್ಕಾರಕ್ಕೆ ವಾರ್ಷಿಕ ಸುಮಾರು 11,339 ಕೋಟಿ ರೂ. ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿದೆ. ಪ್ರಸ್ತುತ ಸರ್ಕಾರದ ವಾರ್ಷಿಕ ಬಜೆಟ್‌ ನೆರವು ಸುಮಾರು ₹10,250 ಕೋಟಿಯಷ್ಟಿದೆ. ಐದು ವರ್ಷಗಳಲ್ಲಿ ಒಟ್ಟು ವೆಚ್ಚ ಸುಮಾರು ರೂ.56,696 ಕೋಟಿಯಾಗುವ ನಿರೀಕ್ಷೆಯಿದೆ.

ಇವೈ ಇಂಡಿಯಾದ ಪೀಪಲ್ ಅಡ್ವೈಸರಿ ಸರ್ವೀಸಸ್-ಟ್ಯಾಕ್ಸ್ ವಿಭಾಗದ ಪಾಲುದಾರ ಪುನೀತ್ ಗುಪ್ತಾ ಅವರು ಮಾತನಾಡಿ, ಇಪಿಎಫ್‌ಒ ವೇತನ ಮಿತಿ ಹೆಚ್ಚಳದಿಂದ ಉದ್ಯೋಗದಾತರು ಹೆಚ್ಚಿನ ಭವಿಷ್ಯ ನಿಧಿ ಮತ್ತು ಪಿಂಚಣಿ ಕೊಡುಗೆ ನೀಡಬೇಕಾಗಿರುವುದರಿಂದ ಅವರ ಮೇಲಿನ ನೇರ ವೆಚ್ಚದ ಪರಿಣಾಮ ಉಂಟಾಗಲಿದೆ ಎಂದು ಹೇಳಿದ್ದಾರೆ.

ಹೊಸ ನಿರ್ಧಾರದೊಂದಿಗೆ ಇಪಿಎಫ್‌ಒ ವೇತನ ಮಿತಿ ತಿಂಗಳಿಗೆ ರೂ.15,000ರಿಂದ ರೂ.25,000ಕ್ಕೆ ಏರಿಕೆಯಾಗಿದೆ. ಇದರಿಂದ ಉದ್ಯೋಗದಾತರ ಭವಿಷ್ಯ ನಿಧಿ ಮತ್ತು ಪಿಂಚಣಿ ಕೊಡುಗೆ ಹೆಚ್ಚಲಿದ್ದು, ಉದ್ಯೋಗಿಗಳ ಕೈಗೆ ಸಿಗುವ ವೇತನದಲ್ಲಿ ಇಳಿಕೆಯಾಗಲಿದೆ. ವೇತನದಲ್ಲಿನ ಏರಿಕೆ ಹಾಗೂ ಔಪಚಾರಿಕ ಉದ್ಯೋಗಗಳ ವಿಸ್ತರಣೆಯನ್ನು ಗಮನದಲ್ಲಿಟ್ಟುಕೊಂಡು ಈ ಮಿತಿ ಹೆಚ್ಚಿಸಲಾಗಿದೆ.