ಆಳ ಸಮುದ್ರ ಸಂಶೋಧನೆಯಲ್ಲಿ ಭಾರತದ ಹೊಸ ಇತಿಹಾಸ: 2028ರ ವೇಳೆಗೆ 6,000 ಮೀಟರ್ ಆಳಕ್ಕೆ ಮೊದಲ ಮಾನವ ಸಹಿತ ನೌಕೆ ರವಾನೆ – ಕೇಂದ್ರ ಸಚಿವ ಡಾ. ಜಿತೇಂದ್ರ ಸಿಂಗ್

 ‘ಸಮುದ್ರಯಾನ’ ಯೋಜನೆಯಡಿ ‘ಮತ್ಸ್ಯ’ ಜಲಾಂತರ್ಗಾಮಿ ಸಿದ್ಧತೆ; ಮೂವರು ಸಂಶೋಧಕರ ಪಯಣ

ನವದೆಹಲಿ: ಭಾರತವು ೨೦೨೮ರ ವೇಳೆಗೆ ಸಾಗರದ ಮೇಲ್ಮೈಯಿಂದ ಬರೋಬ್ಬರಿ ೬,೦೦೦ ಮೀಟರ್ ಆಳಕ್ಕೆ ದೇಶದ ಮೊಟ್ಟಮೊದಲ ಮಾನವ ಸಹಿತ ಸಂಶೋಧನಾ ನೌಕೆಯನ್ನು ಕಳುಹಿಸಲು ಸಜ್ಜಾಗುತ್ತಿದೆ ಎಂದು ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಹಾಗೂ ಭೂವಿಜ್ಞಾನ ಸಚಿವ ಡಾ. ಜಿತೇಂದ್ರ ಸಿಂಗ್ ತಿಳಿಸಿದ್ದಾರೆ. 

ನವದೆಹಲಿಯಲ್ಲಿ ನಡೆದ ‘ಇಂಡೋ-ಪೆಸಿಫಿಕ್ ಪ್ರಾದೇಶಿಕ ಸಂವಾದ’ದಲ್ಲಿ ಮಾತನಾಡಿದ ಅವರು ಈ ಮಹತ್ವದ ವಿವರಗಳನ್ನು ಹಂಚಿಕೊಂಡರು. ಭಾರತದ ಮಹತ್ವಾಕಾಂಕ್ಷೆಯ ‘ಸಮುದ್ರಯಾನ’ (Samudrayaan) ಯೋಜನೆಯಡಿ ಅಭಿವೃದ್ಧಿಪಡಿಸಲಾಗುತ್ತಿರುವ ‘ಮತ್ಸ್ಯ’ (Matsya) ಹೆಸರಿನ ಸಬ್‌ಮರ್ಸಿಬಲ್ ನೌಕೆಯಲ್ಲಿ ಮೂವರು ಸಂಶೋಧಕರು ೫,೦೦೦ ದಿಂದ ೬,೦೦೦ ಮೀಟರ್ ಆಳದವರೆಗೆ ಪಯಣಿಸಲಿದ್ದಾರೆ.

ಚೆನ್ನೈ ಮೂಲದ ರಾಷ್ಟ್ರೀಯ ಸಾಗರ ತಂತ್ರಜ್ಞಾನ ಸಂಸ್ಥೆಯು (NIOT) ಮಧ್ಯ ಹಿಂದೂ ಮಹಾಸಾಗರ ವಲಯದಲ್ಲಿ ಈ ಯೋಜನೆಯ ವಿವಿಧ ಹಂತದ ಪ್ರಾಯೋಗಿಕ ಪರೀಕ್ಷೆಗಳ ನೇತೃತ್ವ ವಹಿಸಿದೆ.

ಒಂದೆಡೆ ‘ಗಗನ್‌ಯಾನ್’ ಯೋಜನೆಯ ಮೂಲಕ ಭಾರತೀಯ ಗಗನಯಾತ್ರಿ ಬಾಹ್ಯಾಕಾಶಕ್ಕೆ ಹಾರಲಿದ್ದರೆ, ಇನ್ನೊಂದೆಡೆ ‘ಸಮುದ್ರಯಾನ’ದ ಮೂಲಕ ಸಂಶೋಧಕರು ಆಳ ಸಮುದ್ರದ ತಳವನ್ನು ಪ್ರವೇಶಿಸುವ ಅಪರೂಪದ ಐತಿಹಾಸಿಕ ಕ್ಷಣಕ್ಕೆ ಭಾರತ ಸಾಕ್ಷಿಯಾಗಲಿದೆ ಎಂದು ಸಚಿವರು ವಿವರಿಸಿದರು.

‘ವಿಕಸಿತ ಭಾರತ ೨೦೪೭’ ಗುರಿಯನ್ನು ತಲುಪಲು ಈವರೆಗೆ ಬಳಸಿಕೊಳ್ಳದ ಸಾಗರ ಸಂಪನ್ಮೂಲಗಳ ಬಳಕೆ ಅತ್ಯಂತ ನಿರ್ಣಾಯಕ ಪಾತ್ರ ವಹಿಸಲಿದೆ. ಸಮುದ್ರ ಮಾಲಿನ್ಯ ನಿಯಂತ್ರಣ ಮತ್ತು ಸಾಗರ ಶಕ್ತಿಯ ಬಳಕೆಗೆ ಜಾಗತಿಕ ಮಟ್ಟದ ಸಹಕಾರ ಅಗತ್ಯ ಎಂದ ಅವರು, ಪರಮಾಣು ಶಕ್ತಿ, ಬಾಹ್ಯಾಕಾಶ ತಂತ್ರಜ್ಞಾನ, ರೋಬೋಟಿಕ್ಸ್ ಹಾಗೂ ಭೂವಿಜ್ಞಾನ ಕ್ಷೇತ್ರಗಳನ್ನು ಒಗ್ಗೂಡಿಸಿ ಸ್ವದೇಶಿ ತಂತ್ರಜ್ಞಾನವನ್ನು ಇನ್ನಷ್ಟು ಬಲಪಡಿಸುವುದೇ ಸರ್ಕಾರದ ಪ್ರಮುಖ ಆದ್ಯತೆ ಎಂದು ಸ್ಪಷ್ಟಪಡಿಸಿದರು.