ಕೇರಳದಲ್ಲಿ ಸರ್ಕಾರಿ ಭೂಮಿ ಒತ್ತುವರಿ ತೆರವಿಗೆ ಕಂದಾಯ ಇಲಾಖೆ ಚುರುಕು: ವಿಲೇಜ್ ಕಚೇರಿಗಳಿಗೆ ಗುರಿ ನಿಗದಿ

ರಾಜ್ಯದಲ್ಲಿ ಬಾಕಿ ಉಳಿದಿದೆ 1,273 ಒತ್ತುವರಿಗಳ ತೆರವು; ಕಾಸರಗೋಡಿನಲ್ಲಿ ಒಂದೂ ತೆರವಾಗದ ಅತಿಕ್ರಮಣ

ಕೊಟ್ಟಾಯಂ: ರಾಜ್ಯಾದ್ಯಂತ ಅಕ್ರಮವಾಗಿ ಒತ್ತುವರಿಯಾಗಿರುವ ಸರ್ಕಾರಿ (ಪುರಂಬೋಕು) ಜಮೀನುಗಳನ್ನು ಮರುವಶಪಡಿಸಿಕೊಳ್ಳಲು ಕಂದಾಯ ಇಲಾಖೆಯು ಕಠಿಣ ಕ್ರಮಗಳನ್ನು ಕೈಗೊಳ್ಳಬೇಕೆಂಬ ಆಗ್ರಹ ತೀವ್ರಗೊಂಡಿದೆ. ಒತ್ತುವರಿ ಪತ್ತೆ ಹಚ್ಚಿ ತೆರವುಗೊಳಿಸಲು ವಿಲೇಜ್ ಕಚೇರಿಗಳಿಗೆ ನಿರ್ದಿಷ್ಟ ಗುರಿ (ಟಾರ್ಗೆಟ್) ನಿಗದಿಪಡಿಸುವ ಪ್ರಕ್ರಿಯೆಯು ಅತಿ ಹೆಚ್ಚು ಒತ್ತುವರಿ ದಾಖಲಾಗಿರುವ ತ್ರಿಶೂರ್ ಸೇರಿದಂತೆ ಕೆಲ ಜಿಲ್ಲೆಗಳಲ್ಲಿ ಆರಂಭವಾಗಿದ್ದು, ಉಳಿದೆಡೆಗಳಲ್ಲೂ ಇದನ್ನು ವಿಸ್ತರಿಸುವಂತೆ ಒತ್ತಾಯ ಕೇಳಿಬಂದಿದೆ.

ಕೇರಳದಲ್ಲಿ ಒಟ್ಟು 1,437 ಒತ್ತುವರಿ ಪ್ರಕರಣಗಳು ವರದಿಯಾಗಿದ್ದು, ಈ ಪೈಕಿ ಕೇವಲ 164 ಒತ್ತುವರಿಗಳನ್ನು ಮಾತ್ರ ತೆರವುಗೊಳಿಸಲಾಗಿದೆ. 918 ಪ್ರಕರಣಗಳಲ್ಲಿ ಪ್ರಕ್ರಿಯೆಗಳು ಆರಂಭಗೊಂಡಿದ್ದರೂ, ಇನ್ನುಳಿದ 1,273 ಅಕ್ರಮ ಒತ್ತುವರಿಗಳನ್ನು ತೆರವುಗೊಳಿಸುವ ಕಾರ್ಯಕ್ಕೆ ಇನ್ನಷ್ಟೇ ವೇಗ ಸಿಗಬೇಕಿದೆ.

ರಾಜ್ಯದಲ್ಲೇ ಅತ್ಯಧಿಕ ಅಂದರೆ 434 ಒತ್ತುವರಿಗಳು ತ್ರಿಶೂರ್ ಜಿಲ್ಲೆಯಲ್ಲಿ ವರದಿಯಾಗಿದ್ದು, 112 ಪ್ರಕರಣಗಳಲ್ಲಿ ಕ್ರಮ ಕೈಗೊಂಡು 16 ಜಾಗಗಳನ್ನು ತೆರವುಗೊಳಿಸಲಾಗಿದೆ.

ಜಿಲ್ಲಾವಾರು ತೆರವಾಗಬೇಕಿರುವ ಒತ್ತುವರಿಗಳ ವಿವರ:

ತ್ರಿಶೂರ್ 418, ಪತ್ತನಂತಿಟ್ಟ 260, ಎರ್ನಾಕುಲಂ 169, ಆಲಪ್ಪುಳ 152, ಕಣ್ಣೂರು 70, ತಿರುವನಂತಪುರಂ 47, ಕೋಝಿಕ್ಕೋಡ್ 42, ಕೊಟ್ಟಾಯಂ 31, ಕಾಸರಗೋಡು 25, ಕೊಲ್ಲಂ 21, ಪಾಲಕ್ಕಾಡ್ 16, ಮಲಪ್ಪುರಂ 13, ಇಡುಕ್ಕಿ 5 ಮತ್ತು ವಯನಾಡು 4.

ವಿಶೇಷವೆಂದರೆ ಕೊಲ್ಲಂ, ಎರ್ನಾಕುಲಂ, ವಯನಾಡು ಹಾಗೂ ಕಾಸರಗೋಡು ಜಿಲ್ಲೆಗಳಲ್ಲಿ ಕಂದಾಯ ಇಲಾಖೆಯು ಆರಂಭಿಕ ಕ್ರಮಗಳನ್ನು ಕೈಗೊಂಡಿದ್ದರೂ, ಇದುವರೆಗೆ ಒಂದೇ ಒಂದು ಒತ್ತುವರಿಯನ್ನೂ ಪೂರ್ಣವಾಗಿ ತೆರವುಗೊಳಿಸಲು ಸಾಧ್ಯವಾಗಿಲ್ಲ ಎಂಬುದು ಗಮನಾರ್ಹ.