'ಬಸ್ ಚಾಲಕರು ರಸ್ತೆಯ ಯಮಸ್ವರೂಪಿಗಳು': ಕೊಚ್ಚಿಯ ಖಾಸಗಿ ಬಸ್‌ಗಳ ಅತಿವೇಗದ ಸಂಚಾರಕ್ಕೆ ಹೈಕೋರ್ಟ್ ತೀವ್ರ ತರಾಟೆ

 ಕೊಚ್ಚಿ: ಕೊಚ್ಚಿ ನಗರದಲ್ಲಿ ಬಸ್‌ಗಳ ಮಿತಿಮೀರಿದ ವೇಗ ಹಾಗೂ ಅಜಾಗರೂಕ ಚಾಲನೆಯ ವಿರುದ್ಧ ಕೇರಳ ಹೈಕೋರ್ಟ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ. ಬಸ್ ಚಾಲಕರನ್ನು "ರಸ್ತೆಯ ಮೇಲಿನ ಯಮಸ್ವರೂಪಿಗಳು" ಎಂದು ಕಟುವಾಗಿ ಟೀಕಿಸಿರುವ ನ್ಯಾಯಾಲಯ, ಅಪಾಯಕಾರಿ ರೀತಿಯಲ್ಲಿ ಅತಿವೇಗದಿಂದ ಬಸ್ ಚಲಾಯಿಸುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಕೊಚ್ಚಿ ನಗರ ಪೊಲೀಸ್ ಕಮಿಷನರ್‌ಗೆ ಕಟ್ಟುನಿಟ್ಟಿನ ಆದೇಶ ನೀಡಿದೆ.

ಕಾಕನಾಡಿನಲ್ಲಿ ಯುವತಿಯೊಬ್ಬಳು ಬಸ್ ಅಪಘಾತಕ್ಕೆ ಬಲಿಯಾದ ಭೀಕರ ದೃಶ್ಯಾವಳಿಗಳನ್ನು ಪರಿಶೀಲಿಸಿದ ಬಳಿಕ ಹೈಕೋರ್ಟ್ ಈ ಮಹತ್ವದ ಅವಲೋಕನ ನಡೆಸಿದೆ. ಅಪಘಾತದ ತೀವ್ರತೆಯನ್ನು ಕಂಡು ಮರುಗಿದ ನ್ಯಾಯಪೀಠ, ಈ ಘಟನೆಯ ದೃಶ್ಯಗಳನ್ನು ಮರಳಿ ನೋಡಲು ಸಾಧ್ಯವಾಗದಷ್ಟು ಭೀಕರವಾಗಿದೆ ಎಂದು ಬೇಸರ ವ್ಯಕ್ತಪಡಿಸಿತು.

ಪಾದಚಾರಿ ಮಾರ್ಗಗಳಿಲ್ಲದಿರುವುದೇ ಅಪಘಾತಕ್ಕೆ ಮುಖ್ಯ ಕಾರಣ:

ನಗರದ ಬಹುತೇಕ ರಸ್ತೆಗಳಲ್ಲಿ ಪಾದಚಾರಿ ಮಾರ್ಗಗಳೇ (ಫುಟ್‌ಪಾತ್) ಇಲ್ಲದಿರುವುದನ್ನು ಬೆಟ್ಟುಮಾಡಿದ ನ್ಯಾಯಾಲಯ, ಇಂತಹ ಅಪಘಾತಗಳಿಗೆ ಮೂಲಸೌಕರ್ಯದ ಕೊರತೆಯೂ ಕಾರಣ ಎಂದಿದೆ. ರಸ್ತೆಗಳಲ್ಲಿ ಪಾದಚಾರಿ ಮಾರ್ಗಗಳನ್ನು ಸಮರ್ಪಕವಾಗಿ ನಿರ್ಮಿಸದಿದ್ದರೆ ನ್ಯಾಯಾಂಗ ನಿಂದನೆ ಕ್ರಮ ಜರುಗಿಸಲಾಗುವುದು ಎಂದು ಕೊಚ್ಚಿ ಮಹಾನಗರ ಪಾಲಿಕೆಗೆ ಅಂತಿಮ ಎಚ್ಚರಿಕೆ ನೀಡಿದೆ. ಅಗತ್ಯ ಕ್ರಮ ಕೈಗೊಳ್ಳದಿದ್ದಲ್ಲಿ ಪಾಲಿಕೆ ಕಾರ್ಯದರ್ಶಿಯನ್ನು ಖುದ್ದು ಹಾಜರಾಗುವಂತೆ ಸಮನ್ಸ್ ಜಾರಿ ಮಾಡಲಾಗುವುದು ಎಂದು ಎಚ್ಚರಿಸಿದೆ. "ರಸ್ತೆಗಳಲ್ಲಿ ಪಾದಚಾರಿ ಮಾರ್ಗಗಳಿಲ್ಲದಿದ್ದರೆ ಸಾರ್ವಜನಿಕರು ಎಲ್ಲಿ ನಡೆಯಬೇಕು?" ಎಂದು ನ್ಯಾಯಾಲಯ ಪ್ರಶ್ನಿಸಿದೆ.

ಚಾಲಕರ ನಿರ್ಲಕ್ಷ್ಯ, ಆಡಳಿತ ವ್ಯವಸ್ಥೆಯ ವೈಫಲ್ಯಕ್ಕೆ ಛೀಮಾರಿ:

ರಸ್ತೆ ಬದಿಯಲ್ಲಿ ಯಾರಿದ್ದಾರೆ ಎಂಬುದನ್ನೂ ಗಮನಿಸದೆ ಎಡಭಾಗದಿಂದ ಅತಿಯಾದ ವೇಗದಲ್ಲಿ ಓವರ್‌ಟೇಕ್ ಮಾಡುವ ಚಾಲಕರು ವಾಹನ ಚಲಾಯಿಸಲು ಕಿಂಚಿತ್ತೂ ಅರ್ಹರಲ್ಲ ಎಂದು ನ್ಯಾಯಾಲಯ ಹೇಳಿದೆ. ಇಂತಹ ಪುಂಡ ಚಾಲಕರ ಚಾಲನಾ ಪರವಾನಗಿಯನ್ನು (ಡ್ರೈವಿಂಗ್ ಲೈಸೆನ್ಸ್) ರದ್ದುಗೊಳಿಸಲು ನ್ಯಾಯಾಲಯ ಸೂಚಿಸಿದೆ.

"ಈ ಮಾರಣಾಂತಿಕ ಓಟವನ್ನು ನಿಯಂತ್ರಿಸಲು ಪೊಲೀಸರು ಏನು ಮಾಡುತ್ತಿದ್ದಾರೆ? ನಾಗರಿಕರಿಗೆ ರಕ್ಷಣೆ ನೀಡಲು ಸರ್ಕಾರಿ ವ್ಯವಸ್ಥೆ ಸಂಪೂರ್ಣ ವಿಫಲವಾಗಿದೆ. ಅಪಘಾತದಲ್ಲಿ ಮೃತಪಟ್ಟ ಯುವತಿಯ ಕುಟುಂಬಕ್ಕೆ ಆಡಳಿತ ವ್ಯವಸ್ಥೆ ಕ್ಷಮೆಯಾಚಿಸಬೇಕಿತ್ತು, ಆದರೆ ಅದನ್ನೂ ಮಾಡಿಲ್ಲ. ಬಸ್ ಚಾಲಕರಿಗೆ ಕಾನೂನು ಮತ್ತು ಪೊಲೀಸರ ಬಗ್ಗೆ ಕಿಂಚಿತ್ತೂ ಭಯವಿಲ್ಲ. ಪ್ರತಿದಿನ ರಸ್ತೆಗಳಲ್ಲಿ ಅಪಘಾತಗಳು ಸಂಭವಿಸುತ್ತಿದ್ದು, ಬಸ್‌ನ ಒಳಗಿರುವವರು ಮತ್ತು ಹೊರಗಿರುವ ಪಾದಚಾರಿಗಳು ಇವರ ದುರ್ವರ್ತನೆಗೆ ಬಲಿಯಾಗುತ್ತಿದ್ದಾರೆ" ಎಂದು ನ್ಯಾಯಪೀಠ ಆಕ್ರೋಶ ಹೊರಹಾಕಿದೆ.

ಸಮಯ ಪಾಲನೆಯ (ಟೈಮಿಂಗ್ಸ್) ನೆಪವೊಡ್ಡಿ ಇಂತಹ ಅಪಾಯಕಾರಿ ಚಾಲನೆ ಮಾಡುವುದನ್ನು ಯಾವುದೇ ಕಾರಣಕ್ಕೂ ಒಪ್ಪಲು ಸಾಧ್ಯವಿಲ್ಲ. ಬಸ್‌ಗಳ ಸಮಯ ಪಾಲನೆಯ ಬಗ್ಗೆ ಚಿಂತಿಸುವುದು ಪೊಲೀಸರ ಕೆಲಸವಲ್ಲ, ಸಾರ್ವಜನಿಕರ ಜೀವ ರಕ್ಷಣೆ ಮಾಡುವುದು ಅವರ ಕರ್ತವ್ಯ. "ಕೊಚ್ಚಿ ಈಗ ಮೊದಲಿನಂತಿಲ್ಲ, ರಸ್ತೆಗಳಲ್ಲಿ ವಾಹನಗಳು ಮತ್ತು ಜನರ ಸಂಚಾರ ಗಣನೀಯವಾಗಿ ಹೆಚ್ಚಾಗಿದೆ" ಎಂಬುದನ್ನು ಆಡಳಿತ ಮರೆಯಬಾರದು ಎಂದು ಹೈಕೋರ್ಟ್ ಎಚ್ಚರಿಸಿದೆ.