'ಹಿಂದೂಗಳ ಹಣ' ನಿರ್ವಹಿಸಲು ಹಿಂದೂ ಬ್ಯಾಂಕುಗಳು; ಕೇರಳದಲ್ಲಿ ಸಂಘ ಪರಿವಾರದಿಂದ ಹೊಸ ಯೋಜನೆ: ವರದಿ

               ತಿರುವನಂತಪುರ: ರಾಜ್ಯದ ಎಲ್ಲಾ ಸ್ಥಳೀಯ ಸಂಸ್ಥೆಗಳಲ್ಲಿ ಸಂಘ ಪರಿವಾರ್ 'ಹಿಂದೂ ಬ್ಯಾಂಕುಗಳು' ಪ್ರಾರಂಭಿಸಲು ಯೋಜಿಸುತ್ತಿದೆ ಎಂದು ವರದಿಯಾಗಿದೆ. ಮಾಧ್ಯಮ ವರದಿಗಳ ಪ್ರಕಾರ, ಸಹಕಾರ ಸಚಿವಾಲಯದ ಅಡಿಯಲ್ಲಿ ಕಂಪನಿಗಳ ಕಾಯ್ದೆಯಡಿ ಬ್ಯಾಂಕುಗಳನ್ನು ನಿಧಿ ಲಿಮಿಟೆಡ್ ಕಂಪನಿಗಳಾಗಿ ಸ್ಥಾಪಿಸಲಾಗುತ್ತಿದೆ ಮತ್ತು ಈವರೆಗೆ ಸುಮಾರು 100 ಕಂಪನಿಗಳನ್ನು ನೋಂದಾಯಿಸಲಾಗಿದೆ. ಹೊಸ ಬ್ಯಾಂಕುಗಳನ್ನು 'ಹಿಂದೂ ಬ್ಯಾಂಕ್ ನಿಧಿ ಲಿಮಿಟೆಡ್ ಕಂಪನಿಗಳು' ಎಂದು ಕರೆಯಲಾಗುತ್ತದೆ ಎಂದು ವರದಿ ತಿಳಿಸಿದೆ.

              ವರದಿಯ ಪ್ರಕಾರ, ಹೊಸ ಯೋಜನೆ 'ಹಿಂದೂಗಳಿಗೆ ಹಿಂದೂ ಹಣ' ಎಂಬ ಘೋಷಣೆಯೊಂದಿಗೆ ಪ್ರಾರಂಭವಾಗಲಿದ್ದು, ಅಂತಹ ಬ್ಯಾಂಕುಗಳನ್ನು ರಾಜ್ಯದ ಎಲ್ಲಾ ಸ್ಥಳೀಯ ಸಂಸ್ಥೆಗಳಲ್ಲಿ ಸ್ಥಾಪಿಸಲಾಗುವುದು. ಒಂದು ಪ್ರದೇಶದಲ್ಲಿ ಹಿಂದೂ ವ್ಯಾಪಾರಿಗಳನ್ನು ಒಳಗೊಂಡ ಸಂಸ್ಥೆಗಳನ್ನು ಪ್ರಾರಂಭಿಸುವುದು ಯೋಜನೆಯಾಗಿದೆ. ಮೊದಲ ಹಂತದಲ್ಲಿ ಮಠಗಳು ಮತ್ತು ದೇವಾಲಯಗಳು ಸೇರಿದಂತೆ 100 ಸಂಸ್ಥೆಗಳನ್ನು ಪ್ರಾರಂಭಿಸಲಾಗುವುದು. ಒಂದು ವರ್ಷದೊಳಗೆ 200 ಸದಸ್ಯರಿಗೆ ಖಾತೆ ನೀಡುವ ಲಕ್ಷ್ಯವಿರಿಸಲಾಗಿದೆ. 

               ರಾಜ್ಯದ ಸಹಕಾರ ಕ್ಷೇತ್ರದ ಸಿಂಹ ಪಾಲನ್ನು ಪ್ರಸ್ತುತ ಎಲ್.ಡಿ.ಎಫ್. ಮತ್ತು ಯುಡಿಎಫ್ ಬೆಂಬಲಿಗರು ನಿರ್ವಹಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಸಂಘ ಪರಿವಾರದ ನಿಧಿ ಲಿಮಿಟೆಡ್ ವಿಸ್ತರಿಸಲು ಯೋಜಿಸಿದೆ. ವರದಿಯ ಪ್ರಕಾರ, ಭಾರತೀಯ ಹಿಂದೂ ಪ್ರಜಾಸಂಘಮ್ ಮತ್ತು ಹಿಂದೂ ಸಂರಕ್ಷಣ್ ಪರಿವಾರ್ ಮುಂತಾದ ಸಂಸ್ಥೆಗಳಿಂದ ಜನರನ್ನು ನೇಮಕ ಮಾಡಿಕೊಳ್ಳಲಾಗುತ್ತಿದೆ. ಇದಕ್ಕಾಗಿ ಸೋಷಿಯಲ್ ಮೀಡಿಯಾ ಮೂಲಕ ಅಭಿಯಾನ ಆರಂಭಿಸಲಾಗುತ್ತಿದೆ.  ಮಹಿಳಾ ಘಟಕವನ್ನು ಪ್ರಾರಂಭಿಸುವ ಯೋಜನೆಯೂ ಇದೆ.

                ವರದಿಯ ಪ್ರಕಾರ, ಹೊಸ ಸಂಸ್ಥೆಗಳು ಸಹಕಾರಿಗಳಿಗಿಂತ ಹೆಚ್ಚಿನ ಪಾರದರ್ಶಕತೆಯ ಭರವಸೆ ನೀಡುತ್ತವೆ. ಹೆಚ್ಚುವರಿಯಾಗಿ, ಠೇವಣಿಗಳ ಮೇಲೆ ಹೆಚ್ಚಿನ ಬಡ್ಡಿದರಗಳನ್ನು ಪಾವತಿಸಲಾಗುತ್ತದೆ. ಸ್ಥಿರ ಠೇವಣಿಗಳ ಮೇಲೆ ಶೇ 12.5 ರಷ್ಟು ಬಡ್ಡಿ ನೀಡಲಾಗುವುದು. ಚಿನ್ನದ ಸಾಲಗಳು, ಕೈಗಾರಿಕಾ ಸಾಲಗಳು ಮತ್ತು ದೈನಂದಿನ ಸಂಗ್ರಹ ಸಾಲಗಳಂತಹ ಸೇವೆಗಳು ಲಭ್ಯವಿರಲಿದೆ.

                             ನಿಧಿ ಲಿಮಿಟೆಡ್ ಕಂಪನಿಗಳು ಯಾವುವು?:

          ನಿಧಿ ಲಿಮಿಟೆಡ್ ಕಂಪನಿಗಳು ಕೇಂದ್ರ ಸರ್ಕಾರದ ನಿಧಿ ನಿಯಮಗಳು 2014 ರ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸಹಕಾರಿ ಸಂಘಗಳಾಗಿವೆ. ಸಾರ್ವಜನಿಕ ಸೀಮಿತ ಹಣಕಾಸು ಕಂಪನಿಗಳಾಗಿರುವ ಈ ಸಂಸ್ಥೆಗಳ ಮೂಲಕ, ನೀವು ಉಳಿತಾಯ, ಸ್ಥಿರ ಮತ್ತು ಮರುಕಳಿಸುವ ಠೇವಣಿಗಳನ್ನು ಮಾಡಬಹುದು ಮತ್ತು ಸಾಮಾನ್ಯ ಬ್ಯಾಂಕುಗಳಂತೆ ಸಾಲ ತೆಗೆದುಕೊಳ್ಳಬಹುದು. ಅರೆ-ಬ್ಯಾಂಕಿಂಗ್ ಸಂಸ್ಥೆಯಾಗಿ ರಿಸರ್ವ್ ಬ್ಯಾಂಕಿನ ನಿಯಮಗಳಿಗೆ ಇವು ಒಳಪಟ್ಟಿರುತ್ತವೆ. ಈ ಸಂಸ್ಥೆಗಳು ಸದಸ್ಯರ ಠೇವಣಿ ಸ್ವೀಕರಿಸಲು ಮತ್ತು ಅವರಿಗೆ ಸಾಲ ನೀಡಲು ಪರವಾನಿಗೆ ಹೊಂದಿವೆ.

                   ಕಂಪನಿಯು ಪ್ರಾರಂಭವಾದ ಒಂದು ವರ್ಷದೊಳಗೆ ಕನಿಷ್ಠ 200 ಸದಸ್ಯರನ್ನು ಹೊಂದಿರಬೇಕು ಮತ್ತು ಕಂಪನಿಯ ಹೆಸರಿನೊಂದಿಗೆ ನಿಧಿ ಲಿಮಿಟೆಡ್ ಎಂದು ಸೇರಿಸಿರಬೇಕು. ಚಿಟ್‍ಗಳು, ವಿಮಾ ವಹಿವಾಟುಗಳು, ಭದ್ರತಾ ಖರೀದಿಗಳು ಅಥವಾ ಗುತ್ತಿಗೆ ಮುಂತಾದ ಯಾವುದೇ ವಹಿವಾಟುಗಳನ್ನು ಅನುಮತಿಸಲಾಗುವುದಿಲ್ಲ. ಹೂಡಿಕೆಗಳನ್ನು ಸ್ವೀಕರಿಸಲು ಜಾಹೀರಾತು ನೀಡುವಂತಿಲ್ಲ. ಮತ್ತು ಷೇರುಗಳನ್ನು ಮಾರಾಟ ಮಾಡುವಾಗ ಸೇವಾ ಶುಲ್ಕ ವಿಧಿಸಬಾರದು ಎಂಬ ಷರತ್ತು ಇದೆ.

               ಕನಿಷ್ಠ ಷೇರು ಬಂಡವಾಳ 5 ಲಕ್ಷ ರೂ. ನಿವ್ವಳ ಆಸ್ತಿ ಕನಿಷ್ಠ 10 ಲಕ್ಷ ರೂ. ನಿವ್ವಳ ಆಸ್ತಿಗಿಂತ 20 ಪಟ್ಟು ಹೆಚ್ಚು ಹೂಡಿಕೆ ಮಾಡಲು ಅನುಮತಿಸುವುದಿಲ್ಲ.