ಭಾರತೀಯ ಸೇನೆ ಭವಿಷ್ಯದಲ್ಲಿನ್ನು 'ಪ್ರಳಯಾಂತಕ'; ಮಹತ್ವದ ಪ್ರಸ್ತಾವನೆಗೆ ಅನುಮೋದನೆ

           ನವದೆಹಲಿ: ಭಾರತೀಯ ಸೇನೆ ಭವಿಷ್ಯದಲ್ಲಿ ಇನ್ನೂ ಪ್ರಳಯಾಂತಕ ಎನಿಸಿಕೊಳ್ಳಲಿದೆ. ಅರ್ಥಾತ್, 'ಪ್ರಳಯ್' ಯುದ್ಧ ಕ್ಷಿಪಣಿಗಳ ಖರೀದಿ ಕುರಿತ ಪ್ರಸ್ತಾವನೆಯನ್ನು ರಕ್ಷಣಾ ಸಚಿವಾಲಯ ಅನುಮೋದಿಸಿದೆ.

            150ರಿಂದ 500 ಕಿ.ಮೀ. ನಡುವಿನ ಗುರಿಗಳನ್ನು ಹೊಡೆಯಬಲ್ಲ ಪ್ರಳಯ್​ ಬ್ಯಾಲಿಸ್ಟಿಕ್ ಕ್ಷಿಪಣಿಗಳ ರೆಜಿಮೆಂಟ್ ತನ್ನದಾಗಿಸಿಕೊಳ್ಳುವ ಪ್ರಸ್ತಾವನೆಯನ್ನು ಇತ್ತೀಚೆಗೆ ನಡೆದ ರಕ್ಷಣಾ ಸ್ವಾಧೀನ ಮಂಡಳಿ ಸಭೆಯಲ್ಲಿ ಅನುಮೋದಿಸಲಾಗಿದೆ.

               ಇದು ಭಾರತೀಯ ಸೇನೆಗೆ ಸಂಬಂಧಿಸಿದಂತೆ ಪ್ರಮುಖ ನಿರ್ಧಾರವಾಗಿದೆ ಎಂದು ರಕ್ಷಣಾ ಅಧಿಕಾರಿಗಳು ತಿಳಿಸಿದ್ದಾರೆ.

               ಸೇನೆಯು ಈ ಕ್ಷಿಪಣಿಗಳನ್ನು ಸಾಂಪ್ರದಾಯಿಕ ಯುದ್ಧತಂತ್ರಗಳ ಜೊತೆಗೇ ಬಳಸಿಕೊಳ್ಳಲಿದೆ. ಭಾರತೀಯ ವಾಯುಪಡೆಗೆ ಇದೇ ರೀತಿಯ ಪ್ರಸ್ತಾಪವನ್ನು ಸರ್ಕಾರ ಒಪ್ಪಿದ್ದ ಬೆನ್ನಲ್ಲೇ ಈ ಕ್ಷಿಪಣಿಗಳನ್ನು ಖರೀದಿಸುವ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ. 

           ಪ್ರಳಯ್ ಬ್ಯಾಲಿಸ್ಟಿಕ್ ಕ್ಷಿಪಣಿಗಳ ರೆಜಿಮೆಂಟ್​ಅನ್ನು ಚೀನಾ ಮತ್ತು ಪಾಕಿಸ್ತಾನದ ಗಡಿಗಳ ಎಲ್​ಒಸಿಗಳಲ್ಲಿ ನಿಯೋಜಿಸಲಾಗುವುದು ಎಂದೂ ಸೇನಾ ಮೂಲಗಳು ತಿಳಿಸಿವೆ. ಈ ಕ್ಷಿಪಣಿಗಳನ್ನು ಕಳೆದ ವರ್ಷದ ಡಿ. 21 ಮತ್ತು 22ರಂದು ಪರೀಕ್ಷಿಸಿದ್ದು, ಯಶಸ್ವಿ ಫಲಿತಾಂಶ ಲಭಿಸಿತ್ತು.