ಮಾಸ್ಕೊ: ರಷ್ಯಾದ ಅಧ್ಯಕ್ಷೀಯ ಚುನಾವಣೆಗೆ ಶುಕ್ರವಾರ ಮತದಾನ ಆರಂಭವಾಗಿದ್ದು, ಮತದಾನ ಪ್ರಕ್ರಿಯೆ ಮೂರು ದಿನ ನಡೆಯಲಿದೆ.
ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರು ಮತ್ತೊಂದು ಅವಧಿಗೆ ಪುನರಾಯ್ಕೆ ಬಯಸಿದ್ದಾರೆ.
ಮತದಾನ ಪ್ರಕ್ರಿಯೆಯಲ್ಲಿ 11.4 ಕೋಟಿಗೂ ಅಧಿಕ ಮತದಾರರು ತಮ್ಮ ಹಕ್ಕು ಚಲಾಯಿಸಲಿದ್ದಾರೆ.
'1999 ರಿಂದಲೂ ಅಧಿಕಾರದಲ್ಲಿರುವ ಪುಟಿನ್ ಅವರಿಗೆ ರಷ್ಯಾದಾದ್ಯಂತ ಜನ ಬೆಂಬಲವಿದ್ದು, ಪುನರಾಯ್ಕೆಯಾಗಲಿದ್ದಾರೆ' ಎಂದು ಸರ್ಕಾರದ ಮೂಲಗಳು ಹೇಳಿವೆ. ಒಂದು ವೇಳೆ ಪುಟಿನ್ ಮುಂದಿನ ಆರು ವರ್ಷಗಳ ಅವಧಿಗೆ ಪುನರಾಯ್ಕೆಯಾದರೆ, 2030ರವರೆಗೂ ಅಧಿಕಾರದಲ್ಲಿರಲಿದ್ದಾರೆ. ಸುದೀರ್ಘ 30 ವರ್ಷಗಳ ಕಾಲ ಪ್ರಧಾನಿ ಅಥವಾ ಅಧ್ಯಕ್ಷರಾಗಿ ಆಡಳಿತ ನಡೆಸಿದ ಹೆಗ್ಗಳಿಕೆಗೆ ಭಾಜನರಾಗಲಿದ್ದಾರೆ.
ಪುಟಿನ್ ಅಲ್ಲದೆ ಕಮ್ಯುನಿಸ್ಟ್ ಪಕ್ಷದ ನಿಕೊಲಾಯ್ ಖರಿತೊನೊವ್, ನ್ಯಾಷನಲಿಸ್ಟ್ ಲಿಬರಲ್ ಡೆಮಾಕ್ರಟಿಕ್ ಪಕ್ಷದ ಮುಖಂಡ ಲಿಯೊನಿಡ್ ಸ್ಲಟ್ಸ್ಕಿ ಮತ್ತು ನ್ಯೂ ಪೀಪಲ್ ಪಾರ್ಟಿಯ ವ್ಲಾದಿಸ್ಲಾವ್ ದವನ್ಕೊವ್ ಅವರು ಕಣದಲ್ಲಿದ್ದಾರೆ.
ರಷ್ಯಾ ಸೇನೆಯ ನಿಯಂತ್ರಣದಲ್ಲಿರುವ, ಉಕ್ರೇನ್ನ ನಾಲ್ಕು ಪ್ರಾಂತ್ಯಗಳಲ್ಲೂ ಮತದಾನ ನಡೆಯುತ್ತಿದೆ.