ಅಫ್ಗಾನಿಸ್ತಾನ : ದಿಢೀರ್ ‍ಪ್ರವಾಹ: 50 ಜನರ ಸಾವು, ಕೊಚ್ಚಿಹೋದ ನೂರಾರು ಮನೆಗಳು

            ಕಾಬುಲ್: ಅಫ್ಗಾನಿಸ್ತಾನದ ಪಶ್ಚಿಮ ಭಾಗದಲ್ಲಿ ಉಂಟಾದ ದಿಢೀರ್ ಪ್ರವಾಹಕ್ಕೆ ಸಿಲುಕಿ 50 ಜನ ಮೃತಪಟ್ಟಿರುವುದಾಗಿ ಅಲ್ಲಿನ ಪೊಲೀಸರು ಶನಿವಾರ ತಿಳಿಸಿದ್ದಾರೆ.

         'ಮೃತರು ಘೋರ್‌ ಪ್ರಾಂತ್ಯಕ್ಕೆ ಸೇರಿದವರಾಗಿದ್ದಾರೆ. ಶುಕ್ರವಾರ ರಾತ್ರಿ ದಿಢೀರನೆ ಪ್ರವಾಹ ಉಂಟಾಗಿತ್ತು.

              ಹಲವರು ನಾಪತ್ತೆಯಾಗಿದ್ದಾರೆ' ಎಂದು ಪೊಲೀಸ್ ಅಧಿಕಾರಿ ಅಬ್ದುಲ್ ರೆಹಮಾನ್ ಬದ್ರಿ ತಿಳಿಸಿದ್ದಾರೆ.

                'ಸುಮಾರು 2 ಸಾವಿರ ಮನೆಗಳು ಸಂಪೂರ್ಣ ನಾಶವಾಗಿವೆ. ಸಾವಿರಕ್ಕೂ ಹೆಚ್ಚು ಮನೆಗಳಿಗೆ ಹಾನಿಯಾಗಿದೆ. ನೂರಾರು ಹಸುಗಳು ಮೃತಪಟ್ಟಿವೆ. ನೂರಾರು ಹೆಕ್ಟೇರ್‌ ಕೃಷಿ ಜಮೀನು, ಸೇತುವೆಗಳು ಹಾಗೂ ಕಲ್ವರ್ಟ್‌ಗಳು ನಾಶವಾಗಿವೆ. ನೂರಾರು ಮರಗಳು ಧರೆಗುರುಳಿವೆ. ರಸ್ತೆಗಳು ಸಂಪೂರ್ಣ ಕಿತ್ತುಹೋಗಿವೆ' ಎಂದು ಮಳೆಯಿಂದ ಉಂಟಾದ ಹಾನಿಯನ್ನು ವಿವರಿಸಿದರು.

                    ಕಳೆದ ಒಂದು ವಾರದಿಂದ ಮಳೆ ಸುರಿಯುತ್ತಿದ್ದು, ಉತ್ತರದ ಬಾಘ್ಲನ್‌ ಪ್ರಾಂತ್ಯದಲ್ಲಿ ನೂರಕ್ಕೂ ಹೆಚ್ಚು ಜನ ಮೃತಪಟ್ಟಿದ್ದಾರೆ ಎಂದು ತಾಲಿಬಾನ್ ಅಧಿಕಾರಿಗಳು ತಿಳಿಸಿದ್ದಾರೆ.