ನಿಧಿಗಳ್ಳರನ್ನು ಹಿಡಿದ ಬೆನ್ನಿಗೇ ಆರಿಕ್ಕಾಡಿ ಕೋಟೆಯಲ್ಲಿ ಬೆಂಕಿ: ನಿಗೂಢ ಎಂದ ಸ್ಥಳೀಯರು

ಕುಂಬಳೆ: ನಿಧಿಗಳ್ಳರನ್ನು ಸೆರೆ ಹಿಡಿದ ಬೆನ್ನಿಗೇ ಆರಿಕ್ಕಾಡಿ ಕೋಟೆಗೆ ಬೆಂಕಿ ಹಚ್ಚಿದ ಘಟನೆ ನಿನ್ನೆ ನಡೆದಿದೆ. ಮಂಗಳವಾರ ಸಂಜೆ ಕೋಟೆಯಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ಮಾಹಿತಿ ಪಡೆದ ಕುಂಬಳೆ ಪೋಲೀಸರು ಸ್ಥಳಕ್ಕೆ ಧಾವಿಸಿದರು. ಕೋಟೆಯೊಳಗೆ ಹೊಗೆ ಬರುತ್ತಿರುವುದನ್ನು ಕಂಡ ಸ್ಥಳೀಯರು ಪೋಲೀಸರಿಗೆ ಮಾಹಿತಿ ನೀಡಿದ್ದರು ಎಂದು ವರದಿಯಾಗಿದೆ.

ಉಪ್ಪಳದಿಂದ ಅಗ್ನಿಶಾಮಕ ದಳದ ಸಿಬ್ಬಂದಿ ಸ್ಥಳಕ್ಕೆ ದೌಡಾಯಿಸಿ ಬೆಂಕಿ ನಂದಿಸಲು ಯತ್ನಿಸಿದ್ದಾರೆ.  ಸಂಜೆ 6 ಗಂಟೆ ಸುಮಾರಿಗೆ ಬೆಂಕಿ ಕಾಣಿಸಿಕೊಂಡಿದೆ. ಇದೇ ವೇಳೆ ಉದ್ದೇಶಪೂರ್ವಕವಾಗಿ ಸಾಕ್ಷಿ ನಾಶಪಡಿಸಲು ಬೆಂಕಿ ಹಚ್ಚಲಾಗಿದೆ ಎಂದು ಸ್ಥಳೀಯರು ಶಂಕೆ ವ್ಯಕ್ತಪಡಿಸಿದ್ದಾರೆ.

ಸೋಮವಾರ ಸಂಜೆ ಆರಿಕ್ಕಾಡಿ ಕೋಟೆಯಲ್ಲಿ ನಿಧಿ ಅಗೆದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೊಗ್ರಾಲ್ ಪುತ್ತೂರು ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷ ಸೇರಿದಂತೆ ಐವರನ್ನು ಸ್ಥಳೀಯರ ನೆರವಿನೊಂದಿಗೆ ಪೋಲೀಸರು ಬಂಧಿಸಿದ್ದರು. ಘಟನೆಯಲ್ಲಿ ಮೊಗ್ರಾಲ್ ಪುತ್ತೂರು ಗ್ರಾ.ಪಂ ಉಪಾಧ್ಯಕ್ಷ ಕೆ.ಎಂ.ಮುಜೀಬ್ ರಹಮಾನ್ (40), ಆದೂರು ಪೋಲೀಸ್ ಠಾಣಾ ವ್ಯಾಪ್ತಿಯ ಮುಹಮ್ಮದ್ ಫಿರೋಜ್ (27), ಕಾಸರಗೋಡು ಪೋಲೀಸ್ ಠಾಣೆ ವ್ಯಾಪ್ತಿಯ ಮುಹಮ್ಮದ್ ಫಿರೋಝ್ (27), ಮುಹಮ್ಮದ್ ಜಾಫರ್ (40), ಚಿತ್ತಾರಿಕಲ್ ಪೋಲೀಸ್ ಠಾಣೆ ವ್ಯಾಪ್ತಿಯ ಸಿಎ ಅಜಾಸ್ (26) ಮತ್ತು ನೀಲೇಶ್ವರ ಪೋಲೀಸ್ ಠಾಣೆಯ ಕೆ.ಸಹಾದುದ್ದೀನ್ (26) ಅವರನ್ನು ಕುಂಬಳೆ ಇನ್ಸ್‍ಪೆಕ್ಟರ್ ಕೆ.ಪಿ.ವಿನೋದ್ ಕುಮಾರ್ ಮತ್ತು ತಂಡ ಬಂಧಿಸಿದೆ.  ನಂತರ ಅವರನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಯಿತು.

ಎರಡು ಕಾರುಗಳಲ್ಲಿ ನಿಧಿ ಅಗೆಯಲು ಗುಂಪು ಬಂದಿತ್ತು.  ಪೋಲೀಸರ ಪ್ರಕಾರ, ಕೋಟೆಯೊಳಗಿನ ಬಾವಿಯಲ್ಲಿ ನಿಧಿ ಇದೆ ಎಂದು ತಿಳಿದ ಇಬ್ಬರು ಜನರು ಬಾವಿಗೆ ಇಳಿದಿದ್ದರು ಮತ್ತು ಇತರರು ಮೇಲ್ಗಡೆ ಇದ್ದರು ಎಂಬುದು ಪೋಲೀಸರಿಂದ ಲಭಿಸಿದ ಹೇಳಿಕೆ.  ಪುರಾತತ್ವ ಇಲಾಖೆಯ ಅಧಿಕಾರಿಗಳು ಪೋಲೀಸರಿಗೆ ಕರೆ ಮಾಡಿ ಮಂಗಳವಾರ ಬಂದು ಕೋಟೆ ಅತಿಕ್ರಮಣ ಹಾಗೂ

ಉತ್ಖನನದ ಬಗ್ಗೆ ಪರಿಶೀಲನೆ ನಡೆಸಿ ದೂರು ನೀಡುವುದಾಗಿ ತಿಳಿಸಿದ್ದರು.

ಪುರಾತತ್ವ ಇಲಾಖೆ ಅಧಿಕಾರಿಗಳು ಬರುವ ಮುನ್ನವೇ ಕೋಟೆಯಲ್ಲಿ ಬೆಂಕಿ ಕಾಣಿಸಿಕೊಂಡಿದೆ.  ಬೆಂಕಿ ಹೊತ್ತಿಕೊಂಡ ನಂತರ ಕೋಟೆಯ ಇತರ ಭಾಗಗಳಲ್ಲಿ ನಿಧಿಯನ್ನು ಅಗೆಯಲು ಗುಂಪು ಹುಡುಕುತ್ತಿರುವ ಬಗ್ಗೆ ಸ್ಥಳೀಯ ನಿವಾಸಿಗಳು ಅನುಮಾನ ವ್ಯಕ್ತಪಡಿಸಿದ್ದಾರೆ. ಆರೋಪಿಗಳಿಂದ  ಮಣ್ಣು ಅಗೆಯುವ ಪಿಕ್ಕಾಸು, ಗುದ್ದಲಿ, ಹಾರೆ ಮತ್ತಿತರ ವಸ್ತುಗಳನ್ನು ಪೋಲೀಸರು ವಶಪಡಿಸಿಕೊಂಡಿದ್ದಾರೆ.