ಸ್ಮಾರ್ಟ್​ಫೋನ್ ಬಳಕೆದಾರರೇ ಎಚ್ಚರ! ಸೆಕೆಂಡ್​ಗಳಲ್ಲಿ ನಿಮ್ಮ ಖಾಸಗಿ ಡೇಟಾ ಕದಿಯುತ್ತೆ ಈ ವೈರಸ್​​, ಈಗಲೇ ಡಿಲೀಟ್​ ಮಾಡಿ

ನೀವು ಸ್ಮಾರ್ಟ್‌ಫೋನ್ ಬಳಸುತ್ತಿದ್ದೀರಾ? ಹೌದು, ಎಂದಾದರೆ ಖಂಡಿತ ಜಾಗರೂಕರಾಗಿರಿ. ಕಾರಣ, ನೀವು ಬಳಸುತ್ತಿರುವ ಫೋನ್ ಆಯಂಡ್ರಾಯ್ಡ್ ಆಗಿರಲಿ ಅಥವಾ ಐಫೋನ್ ಆಗಿರಲಿ, ತಕ್ಷಣವೇ ಈ ಹೊಸ ವೈರಸ್​ನಿಂದ ಎಚ್ಚೆತ್ತುಕೊಳ್ಳಿ. ಪ್ರಸ್ತುತ, ಸ್ಪಾರ್ಕ್‌ಕ್ಯಾಟ್ ಎಂಬ ಹೊಸ ಮಾಲ್‌ವೇರ್ ವೈರಸ್​, ಮೊಬೈಲ್​ನಲ್ಲಿರುವ ನಿಮ್ಮ ಬ್ಯಾಂಕ್​ ಖಾತೆಗೆ ಸಂಬಂಧಿಸಿದ ಮಾಹಿತಿ, ಖಾಸಗಿ ಡೇಟಾವನ್ನು ಕ್ಷಣಮಾತ್ರದಲ್ಲಿ ಕದ್ದು, ಸೋರಿಕೆ ಮಾಡುತ್ತದೆ.

ಈ ಅತ್ಯಂತ ಅಪಾಯಕಾರಿ ಮಾಲ್‌ವೇರ್ ಸ್ಮಾರ್ಟ್​ಫೋನ್​ಗಳಲ್ಲಿ ವೇಗ ಅಲ್ಲ ಶರವೇಗದಲ್ಲಿ ಹಬ್ಬುತ್ತಿದೆ. ಈಗಾಗಲೇ ಈ ಮಾಲ್‌ವೇರ್ ಜಾಗತಿಕವಾಗಿ ಸಾವಿರಕ್ಕೂ ಅಧಿಕ ಸಂಖ್ಯೆಯ ಸ್ಮಾರ್ಟ್​ಫೋನ್​ ಬಳಕೆದಾರರಿಗೆ ತೊಂದರೆ ಕೊಟ್ಟಿದೆ. ಸಾಮಾನ್ಯ ಮೊಬೈಲ್​ ವೈರಸ್‌ಗಳಿಗಿಂತ ಭಿನ್ನವಾಗಿರುವ ಸ್ಪಾರ್ಕ್‌ಕ್ಯಾಟ್ ವೈರಸ್​, ಕ್ರಿಪ್ಟೋಕರೆನ್ಸಿ ವ್ಯಾಲೆಟ್ ಸೇರಿದಂತೆ ಸೂಕ್ಷ್ಮ ಹಾಗೂ ಖಾಸಗಿ ಡೇಟಾವನ್ನು ಬಹಳ ಸುಲಭವಾಗಿ ಲೀಕ್​ ಮಾಡುವ ಸಾಮರ್ಥ್ಯವನ್ನು ಹೊಂದಿದೆ.

ಏನಿದು ಸ್ಪಾರ್ಕ್‌ಕ್ಯಾಟ್ ಮಾಲ್‌ವೇರ್?

ಇತ್ತೀಚಿನ ವರದಿಯ ಪ್ರಕಾರ, ಸ್ಪಾರ್ಕ್‌ಕ್ಯಾಟ್ ಅಪಾಯಕಾರಿ ಸಾಫ್ಟ್‌ವೇರ್ ಅಭಿವೃದ್ಧಿ ಕಿಟ್ (SDK) ಆಗಿದ್ದು, ಇದು ಗೂಗಲ್ ಪ್ಲೇ ಸ್ಟೋರ್ ಮತ್ತು ಆಯಪಲ್ ಸ್ಟೋರ್‌ನಲ್ಲಿ ಬಹು ಅಪ್ಲಿಕೇಶನ್‌ಗಳಲ್ಲಿ ಕಂಡುಬರುತ್ತದೆ. ಈ ಮಾಲ್‌ವೇರ್ ಬಳಕೆದಾರರ ಸಾಧನಗಳಲ್ಲಿ ಸಂಗ್ರಹವಾಗಿರುವ ಫೋಟೋಸ್​ಗಳನ್ನು ಸ್ಕ್ಯಾನ್ ಮಾಡುವ ಮೂಲಕ ವೈಯಕ್ತಿಕ ಡೇಟಾವನ್ನು ಕಸಿಯುತ್ತದೆ. ಅರಿವಿಲ್ಲದೆ ಈ ವೈರಸ್​ಗೆ ಸಂಬಂಧಿಸಿದ ಅಪ್ಲಿಕೇಶನ್ ಅನ್ನು ಡೌನ್‌ಲೋಡ್ ಮಾಡಿಕೊಂಡಿದ್ದೇ ಆದರೆ ನಿಮ್ಮ ಹಣಕಾಸು ಮತ್ತು ವೈಯಕ್ತಿಕ ಮಾಹಿತಿ ಸೋರಿಕೆ ಆಗುವ ಎಲ್ಲಾ ಸಾಧ್ಯತೆಗಳಿವೆ.

ಸ್ಪಾರ್ಕ್‌ಕ್ಯಾಟ್ ವೈರಸ್ ಪೀಡಿತ ಅಪ್ಲಿಕೇಶನ್‌ಗಳು

ಇಲ್ಲಿಯವರೆಗೆ, 18 ಆಂಡ್ರಾಯ್ಡ್ ಅಪ್ಲಿಕೇಶನ್‌ಗಳು ಮತ್ತು 10 ಐಒಎಸ್​ (iOS) ಅಪ್ಲಿಕೇಶನ್‌ಗಳು ಈ ಮಾಲ್‌ವೇರ್ ಅನ್ನು ಹೊಂದಿರುವುದು ದೃಢಪಟ್ಟಿದೆ. ಬಾಧಿತ ಅಪ್ಲಿಕೇಶನ್‌ಗಳಲ್ಲಿ ಒಂದು (ChatAi). ನೀವು ಈ ಅಪ್ಲಿಕೇಶನ್ ಅಥವಾ ಯಾವುದೇ ಇತರ ಅನುಮಾನಾಸ್ಪದ ಅಪ್ಲಿಕೇಶನ್​ನ ಡೌನ್‌ಲೋಡ್ ಮಾಡಿಕೊಂಡಿದ್ದರೆ, ಈ ಕೂಡಲೇ ಅದನ್ನು ನಿಮ್ಮ ಫೋನ್‌ನಿಂದ ಡಿಲೀಟ್​ ಮಾಡಿಬಿಡಿ.

ನಿಮ್ಮ ಡೇಟಾ ಸೋರಿಕೆ ಹೇಗೆ?

ಆಪ್ಟಿಕಲ್ ಕ್ಯಾರೆಕ್ಟರ್ ರೆಕಗ್ನಿಷನ್ (OCR) ಬಳಕೆ: ಇದು Google ML ಕಿಟ್ (OCR) ಬಳಸಿ ಫೋಟೋಗಳಿಂದ ಹಲವು ವಿಷಯಗಳನ್ನು ರೀಡ್​ ಮಾಡಲಿದೆ. ಇದು ಸೂಕ್ಷ್ಮ ಮಾಹಿತಿಯನ್ನು ಕಸಿಯುತ್ತದೆ.

ಬಹು ಭಾಷೆಗಳನ್ನು ಗುರುತಿಸುತ್ತದೆ: ಈ ಮಾಲ್‌ವೇರ್ ಇಂಗ್ಲಿಷ್, ಹಿಂದಿ, ಚೈನೀಸ್, ಜಪಾನೀಸ್, ಫ್ರೆಂಚ್, ಇಟಾಲಿಯನ್, ಇತ್ಯಾದಿ ಕೀವರ್ಡ್‌ಗಳನ್ನು ಸುಲಭವಾಗಿ ಗುರುತಿಸುವ ಸಾಮರ್ಥ್ಯ ಹೊಂದಿದೆ. ಇದು ತುಂಬಾ ಅಪಾಯಕಾರಿ ಎಂಬುದು ಇಲ್ಲಿ ಗಮನಾರ್ಹ.

ವೈರಸ್​ನಿಂದ ಫೋನ್​ ಸುರಕ್ಷಿತ ಹೇಗೆ?

ಅಪರಿಚಿತ ಅಪ್ಲಿಕೇಶನ್‌ಗಳನ್ನು ಯಾವುದೇ ಕಾರಣಕ್ಕೂ ಡೌನ್‌ಲೋಡ್ ಮಾಡಬೇಡಿ. ಉತ್ತಮ ವಿಮರ್ಶೆ ಹಾಗೂ ವಿಶ್ವಾಸಾರ್ಹ ಮೂಲಗಳಿಂದ ಬಂದಿರುವ ಅಪ್ಲಿಕೇಶನ್‌ಗಳನ್ನು ಮಾತ್ರ ಇಳಿಸಿಕೊಳ್ಳಿ.

ಅಪ್ಲಿಕೇಶನ್ ಅನುಮತಿಗಳನ್ನು ಪರಿಶೀಲಿಸಿ: ಯಾವುದೇ ಅಪ್ಲಿಕೇಶನ್ ನಿಮ್ಮ ಖಾಸಗಿ ಮಾಹಿತಿ ಅಥವಾ ಕ್ಯಾಮೆರಾಗೆ ಅನಗತ್ಯ ಪ್ರವೇಶ ಅನುಮತಿ ಕೋರಿದರೆ, ಅದನ್ನು ತಕ್ಷಣವೇ ನಿರ್ಬಂಧಿಸಿ.

ಸಾಫ್ಟ್‌ವೇರ್ ನವೀಕರಿಸಿ: ನಿಯಮಿತ ನವೀಕರಣಗಳೊಂದಿಗೆ ಭದ್ರತಾ ದೋಷಗಳನ್ನು ಸರಿಪಡಿಸಿಕೊಳ್ಳುವ ಸಾಧ್ಯತೆಗಳು ಹೆಚ್ಚಿವೆ.

ಆಯಂಟಿ ವೈರಸ್ ಬಳಸಿ: ಭದ್ರತಾ ಅಪ್ಲಿಕೇಶನ್‌ಗಳು ಮಾಲ್‌ವೇರ್ ಬೆದರಿಕೆಗಳನ್ನು ಪತ್ತೆಹಚ್ಚಬಹುದು ಮತ್ತು ಅವುಗಳನ್ನು ತಕ್ಷಣವೇ ನಿರ್ಬಂಧಿಸಬಹುದು. ಹೀಗಾಗಿ ಆಯಂಟಿ ವೈರಸ್​ ಬಳಕೆ ಒಳ್ಳೆಯದು.